မြောက်ကိုရီးယားတွင် ကမ်းခြေအပန်းဖြေဇုန် ဖွင့်လှစ်

မြောက်ကိုရီးယား၏ Wonsan Kalma resort သည် ပြည်တွင်း ခရီးသွားဧည့်သည်များအား စတင်လက်ခံလျက်ရှိပြီး ရုရှားဧည့်သည်များကိုလည်း လက်ခံရန် ပြင်ဆင်နေဟု သိရသည်။ မြောက်ကိုရီးယား၏ နိုင်ငံပိုင်သတင်းဌာန KCNA မှ ယမန်နေ့ (ဇူလိုင်၁) က ထုတ်ပြန်သည့် ဓာတ်ပုံများတွင် Luxury Resort ရှိ ကမ်းခြေတွင် ဧည့်သည်များ အပန်းဖြေနေပုံကို ပြသထားသည်။

KCNA က “နိုင်ငံအနှံ့မှ ပြည်သူများသည် အဆိုပါ Luxury Resort သို့ လာရောက်လည်ပတ်ခဲ့ကြပြီး အဆင့်မြင့် အဆောက်အအုံများနှင့် ဝန်ဆောင်မှုများကို တွေ့ကြုံခံစားရသည့်အတွက် ဝမ်းမြောက်ဝမ်းသာ ဖြစ်ခဲ့ကြပြီး အနုပညာဆန်ဆန် ဒီဇိုင်းထုတ်ထားသော အဆောက်အအုံ ၄၀၀ ကျော်နှင့် သဘာဝသဲဖြူကမ်းခြေတို့၏ သာယာလှပမှုအစုံလင်ကို မြင်တွေ့ရသည့် ခရီးသွားမြို့တော်၏ အလှတရားက ၎င်းတို့အား အံ့အား သင့်စေခဲ့သည်” ဟု ဖော်ပြထားသည်။

ရုရှားခရီးသွားအုပ်စုတစ်စုသည် ဇူလိုင် ၇ ရက်နေ့တွင် ထို Luxury Resort သို့ ရောက်ရှိလာမည်ဟု မျှော်လင့်ရကြောင်း တောင်ကိုရီးယား၏ ပြန်လည် သွေးစည်းရေးဝန်ကြီးဌာန (Unification Ministry) မှ ထုတ်ပြန်ခဲ့သည်။ ထိုဌာနသည် မြောက်ကိုရီးယားနှင့် ဆက်ဆံရေးကို တာဝန်ယူ ဆောင်ရွက် လျက်ရှိပြီး Wonsan Kalma resort သည် ရုရှားအပါအဝင် နိုင်ငံခြား ခရီးသွားများအား တဖြည်းဖြည်း လက်ခံလိမ့်မည်ဟု ဖော်ပြခဲ့သည်။ 

Luxury Resort ၏ ခမ်းနားသောဖွင့်ပွဲအခမ်းအနားကို ဇွန် ၂၄ ရက်နေ့ တွင် ခေါင်းဆောင် ကင်ဂျုံအွန်၊ ဇနီး ရီဆိုးလ်ဂျူ နှင့် သမီး ကင်ဂျူအေးတို့ တက်ရောက်ချီးမြှင့်ခဲ့သည်။ ထို Resort တွင် ရေကူးခြင်း၊ အားကစားနှင့် ဖျော်ဖြေရေး အစီအစဉ်များ၊ စားသောက်ဆိုင်ဝန်ဆောင်မှုများ စီစဉ်ထား ရှိသည်။ 

ခေါင်းဆောင် ကင်ဂျုံအွန် က ခရီးသွား ၂၀,၀၀၀ ကျော် လက်ခံနိုင်သည့် အဆိုပါ Luxury Resort ကို မြောက်ကိုရီးယား၏ ယခုနှစ်အတွက် အကြီးမားဆုံးသော အောင်မြင်မှုတစ်ခု အဖြစ် သတ်မှတ်ခဲ့ပြီး အမြန်ဆုံး အချိန်အတွင်း နိုင်ငံတွင် အလားတူ ကြီးမားသော ခရီးသွားဧည့်သည် လက်ခံရေးနယ်မြေများ ထပ်မံတည်ဆောက်သွားမည်ဟု ပြောကြားခဲ့သည်။

“Wonsan Kalma ကမ်းခြေခရီးသွားဇုန်သည် မြောက်ကိုရီးယား၏ ခရီးသွားယဉ်ကျေးမှုအတွက် အခြေခံအုတ်မြစ်ချရာတွင် ဦးဆောင်နေရာမှ ပါဝင်သင့်သည်” ဟု ၎င်းက မှာကြားခဲ့ပြီး တာဝန်ရှိသူများအား ဧည့်သည်များအတွက် အကောင်းဆုံးဝန်ဆောင်မှုများနှင့် ဖျော်ဖြေရေး အစီအစဉ်များ ပေးစွမ်းရန် တိုက်တွန်းခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂