နှစ်ပတ်အတွင်း အစ္စရေးစစ်သား ငါးဦး ကိုယ့်ကိုယ်ကိုယ် အဆုံးစီရင်

အစ္စရေးစစ်သား အနည်းဆုံး ငါးဦးသည် လွန်ခဲ့သည့် နှစ်ပတ်အတွင်း ကိုယ့်ကိုယ်ကိုယ် အဆုံးစီရင်ခဲ့ကြပြီး ၎င်းတို့တွင် ဂါဇာနှင့် အခြား ပဋိပက္ခ ဇုန်များတွင် ရှည်လျားစွာ တာဝန်ထမ်းဆောင်ပြီးနောက် ပြန်လည် ရောက်ရှိလာသည့် စစ်မှုထမ်းဟောင်းများနှင့် သာမန်စစ်မှုထမ်းများ ပါဝင်သည်။

၂၀၂၃ ခုနှစ်၊ အောက်တိုဘာ ၇ ရက်နေ့တွင် ဟားမက်အဖွဲ့၏ အကြမ်းဖက် တိုက်ခိုက်မှုအပြီး အစ္စရေးက ဂါဇာသို့ စစ်တပ်စေလွှတ်ခဲ့သည့် အချိန် မှစ၍ အစ္စရေးကာကွယ်ရေးတပ် (IDF) အတွင်း ကိုယ့်ကိုယ်ကိုယ်အဆုံးစီရင်မှုများ သိသိသာသာ မြင့်တက်လာခဲ့သည်။ ၂၀၂၃ ခုနှစ် နှစ်ကုန် အထိ စစ်သား ၇ ဦး၊ ၂၀၂၄ ခုနှစ်တွင် ၂၁ ဦး၊ ယခု ၂၀၂၅ ခုနှစ် အစမှ ယနေ့အထိ အနည်းဆုံး ၂၀ ဦး အဆုံးစီရင်ခဲ့ကြသည်။

လတ်တလော ဖြစ်စဉ်မှာ တနင်္ဂနွေနေ့ (ဇူလိုင် ၂၀) က အတည်ပြုခဲ့သည့် အသက် ၁၉ နှစ်အရွယ် နော်ဝေနိုင်ငံသား ရွှေ့ပြောင်းနေထိုင်သူတစ်ဦး ဖြစ်သည်။ ၎င်းသည် လွန်ခဲ့သည့် တစ်နှစ်က IDF တွင် တာဝန်ထမ်းဆောင် ရန် အစ္စရေးသို့ ပြောင်းရွှေ့လာပြီး လေ့ကျင့်ရေးကာလကို ဖြတ်သန်းနေဆဲ ဖြစ်သည်။ အခြားလေးဦးမှာ လွန်ခဲ့သည့် နှစ်ပတ်အတွင်း အဆုံးစီရင်ခဲ့ ကြသူများဖြစ်ပြီး ၎င်းတို့တွင် Sde Teiman စခန်းတွင် သေနတ်ဖြင့် ကိုယ့်ကိုယ်ကိုယ် အဆုံးစီရင်ခဲ့သည့် Golani တပ်ဖွဲ့ဝင်တစ်ဦးနှင့် စိတ်ဒဏ်ရာ လက္ခဏာ (PTSD) ရောဂါရှိကြောင်း စစ်ဆေးတွေ့ရှိပြီးနောက် ကိုယ့်ကိုယ်ကိုယ် မီးရှို့သတ်သွားသည့် အရန်စစ်သား Daniel Edri တို့ ပါဝင်သည်။

အများစုမှာ တာဝန်ထမ်းဆောင်နေဆဲ အရန်စစ်သားများဖြစ်ပြီး စစ်တပ် အရာရှိများက အဆိုပါမြင့်တက်မှုကို စစ်ဆင်ရေးဆိုင်ရာ စိတ်ဒဏ်ရာကြောင့် ဟု သတ်မှတ်ကြသည်။ IDF မှ စိတ်ဖိစီးမှုကြောင့် ထောင်နှင့်ချီသော အရန်စစ်သားများ စစ်ဆင်ရေးတာဝန်မှ နုတ်ထွက်ခဲ့ကြောင်း အတည်ပြု ထားသည်။ စစ်မှုထမ်းခြင်းနှင့်ဆက်စပ်သော စိတ်ကျန်းမာရေးပြဿနာများကြောင့် အဆုံးစီရင်မှုအရေအတွက်မှာ ပိုများနိုင်ပြီး၊ Haaretz ၏ သတင်းတွင် လွန်ခဲ့သည့်နှစ်များအတွင်း တပ်မတော်၏ တရားဝင် စာရင်းတွင် မပါဝင်ခဲ့သော စစ်ဆင်ရေးကြောင့်မဟုတ်ဘဲ သေဆုံးခဲ့သည့် စစ်မှုထမ်း ဟောင်း အနည်းဆုံး ၁၂ ဦးရှိကြောင်း ဖော်ပြထားသည်။ 

အစ္စရေးတပ်ဖွဲ့များသည် ကာလရှည်ကြာ တာဝန်ထမ်းဆောင်မှုများနှင့် ဆုံးရှုံးမှုများ တိုးပွားလာမှုတို့ကြောင့် ပြင်းထန်သော ဖိစီးမှုများ ရင်ဆိုင် နေရသည်။ တရားဝင်အချက်အလက်များအရ အဆိုပါ စစ်ဆင်ရေးစတင်သည့်အချိန်မှစ၍ အစ္စရေးစစ်သား ၈၉၃ ဦး ကျဆုံးခဲ့ပြီး အောက်တိုဘာ ၇ ရက်က ဟားမက်၏ တိုက်ခိုက်မှုတွင် အစ္စရေးနိုင်ငံသား အရပ်သား ၁,၂၀၀ နီးပါး သေဆုံးခဲ့သည်။ အစ္စရေး၏ လက်စားချေ တိုက်ခိုက်မှုများ ကြောင့် ဂါဇာကျန်းမာရေးဝန်ကြီးဌာန၏ ထုတ်ပြန်ချက်အရ ပါလက်စတိုင်း သား ၅၉,၀၀၀ နီးပါး သေဆုံးခဲ့သည်။

 IDF သည် ဂါဇာအပြင် အခြားစစ်မျက်နှာစာများအနေဖြင့် လက်ဘနွန်တွင် လေကြောင်းတိုက်ခိုက်မှုများနှင့် ကန့်သတ်ထားသော ကြည်းတပ် လှုပ်ရှားမှုများ၊ ဆီးရီးယားတွင် စစ်ရေးအခြေစိုက်စခန်းများ ချဲ့ထွင်ခြင်း၊ အီရန်အား ဗုံးကြဲတိုက်ခိုက်ခြင်းနှင့် အီရတ်၊ ယီမင်နှင့် အနောက်ဘက်ကမ်း (West Bank) တို့တွင် စစ်ရေးလှုပ်ရှားမှုများ တိုးမြှင့်ခြင်း စသည့် စစ်ဆင်ရေး တာဝန်များ ထမ်းဆောင်ရလျက်ရှိသည်။ 

ဝန်ကြီးချုပ် နေတန်ယာဟုက "မိမိတို့သည် စစ်မျက်နှာစာ ရှစ်ခုတွင် ရင်ဆိုင်တိုက်ခိုက်နေရပြီး နိုင်ငံအပေါ် ထိခိုက်ခြင်းမှ ကာကွယ်ရန် ဖြစ်သည်" ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂