မတ်လ ၄ ရက်တွင် ဘယ်လာရုစ်သမ္မတ အလက်ဆန်ဒါ လူကာရှန်ကို သည် ရုရှားနှင့် ဘယ်လာရုစ်တို့ကြားရှိ ပြည်ထောင်စုနိုင်ငံ (Union State) အတွင်း လုံခြုံရေးအာမခံချက်များနှင့်စပ်လျဉ်းသည့် စာချုပ်ကို ဥပဒေ အဖြစ် အသက်သွင်းရန် လက်မှတ်ရေးထိုးလိုက်ကြောင်း ဘယ်လာရုစ် သမ္မတရုံးကို ကိုးကား၍ ဘယ်လာရုစ်၏ နာမည်ကြီး BelTA သတင်းဌာန က ဖော်ပြထားပါသည်။

ထိုအပြည်ပြည်ဆိုင်ရာ သဘောတူညီချက်သည် ဘယ်လာရုစ်နှင့် ရုရှား တို့၏ လုံခြုံရေးကို ထိခိုက်စွက်ဖက်မှုများ ဖြစ်ပေါ်လာပါက လိုအပ်သော စီမံချက်များ ဆောင်ရွက်ရန် အပြန်အလှန် အာမခံမှုများကို ထားရှိ၍ ပြည်ထောင်စုနိုင်ငံတစ်ခုလုံးအတွက် လုံခြုံရေးကိုပါ အာမခံထားရပါမည်။

စာချုပ်၏ ရည်ရွယ်ချက်မှာ ပြည်ထောင်စုနိုင်ငံ၏ ပူးတွဲ ကာကွယ်ရေး နယ်မြေအတွင်းတွင် လုံခြုံရေးတိုးမြှင့် ဆောင်ရွက်ရန်ဖြစ်ပြီး ထိုစာချုပ်အရ ဘယ်လာရုစ်နှင့် ရုရှားတို့သည် နှစ်နိုင်ငံ သို့မဟုတ် ပြည်ထောင်စု နိုင်ငံတစ်ခုလုံး၏ လုံခြုံရေးကို ထိခိုက်လာပါက လိုအပ်သည့် အရေးယူမှုများ ပြုလုပ်ကြရမည်ဖြစ်ပါသည်။

ကိုးကား- BelTA (ဘယ်လာရုစ်)

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ပြည်ထောင်စုသမ္မတမြန်မာနိုင်ငံတော် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်၏ ရုရှားနိုင်ငံသို့ သွားရောက်သည့် တရားဝင် ခရီးစဉ်တွင် နှစ်နိုင်ငံအကြား သဘောတူညီချက် ၁၀ ခု လက်မှတ်ရေးထိုးခဲ့ကြပါသည်။

အဆိုပါသဘောတူညီချက်များတွင် ဘွဲ့ဒီပလိုမာများ၊ ပညာရပ်ပိုင်းဆိုင်ရာ ဘွဲ့များအား နှစ်နိုင်ငံ အသိအမှတ်ပြုရေး သဘောတူညီချက်၊ အသေးစား နျူကလီးယားဓာတ်အားပေး စက်ရုံတည်ဆောက်ရေး အခြေခံ မူများဆိုင်ရာ စာချွန်လွှာတို့ ပါဝင်ပါသည်။ ထို့ပြင် နျူကလီးယားနှင့် ဓာတ်ရောင်ခြည် ဘေးကင်းရေးအတွက် ပူးပေါင်းဆောင်ရွက်ရန် စာချွန်လွှာကိုလည်း လက်မှတ်ရေးထိုးခဲ့ကြောင်း သိရှိရပါသည်။ 

ထပ်မံ၍ မြန်မာနိုင်ငံ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် ရုရှားနိုင်ငံ ရန်ပုံငွေအဖွဲ့ RK-Investments တို့အကြား မြန်မာနိုင်ငံရှိ သယံဇာတထုတ်ယူရေးဆိုင်ရာ စာချွန်လွှာတစ်ခုကို လက်မှတ်ရေးထိုးခဲ့ကြပါသည်။ 

နှစ်နိုင်ငံအကြား အကောက်ခွန်ကိစ္စရပ်များ ပူးပေါင်းဆောင်ရွက်ရေး၊ ကျန်းမာရေးဝန်ကြီးဌာနများ၊ အားကစားနှင့် အာကာသဆိုင်ရာ အေဂျင်စီများအကြား စာချွန်လွှာများ လက်မှတ်ရေးထိုးခဲ့ကြပါသည်။ ထို့ပြင် ရင်းနှီးမြှုပ်နှံမှုများကို ကာကွယ်ရန်နှင့် အားပေးမြှင့်တင်ရန် သဘောတူညီချက်နှင့်ပတ်သက်သည့် ကြေညာချက်တစ်ခုကိုလည်း ချမှတ်ခဲ့ကြပါသည်။

ကိုးကား- TASS

Photo: Nation Thailand

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တရားမဝင် ပိတ်ဆို့အရေးယူမှုများ ချမှတ်ထားသော်လည်း မြန်မာနိုင်ငံနှင့် ရုရှားနိုင်ငံအကြား ကုန်သွယ်ရေးနှင့်စီးပွားရေး ပူးပေါင်းဆောင်ရွက်မှုမှာ အောင်မြင်စွာ ဖွံ့ဖြိုးတိုးတက်လာကြောင်း ရုရှားဝန်ကြီးချုပ် Mikhail Mishustin က မြန်မာနိုင်ငံ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံစဉ် ပြောကြားလိုက်ပါသည်။ 

ထို့ပြင် စွမ်းအင်၊ ငြိမ်းချမ်းသည့် နျူကလီးယားစွမ်းအင်၊ သယ်ယူပို့ဆောင်ရေး အခြေခံအဆောက်အအုံနှင့် စိုက်ပျိုးရေးကဏ္ဍများမှာ ပူးပေါင်းဆောင်ရွက်မှုတိုးမြှင့်ရန် အခွင့်အလမ်းကောင်းများရှိကြောင်း၊  မိမိတို့နှစ်နိုင်ငံ ပူးပေါင်း၍ ဆက်သွယ်ရေးနှင့် သတင်းအချက်အလက် နည်းပညာ၊ စားသောက်ကုန်လုပ်ငန်း၊ ဓာတ်သတ္တုထုတ်ယူခြင်း အစရှိသည့် ပူးတွဲစီမံကိန်းသစ်များကို လုပ်ဆောင်နေကြပါကြောင်း  ၎င်းက  ထပ်လောင်းပြောကြားခဲ့ပါသည်။ 

ထို့ပြင် ဗိုလ်ချုပ်မှူးကြီး မင်းအောင်လှိုင်နှင့်အဖွဲ့ကို မော်စကိုမြို့ရှိ အစိုးရအိမ်တော်၌ ကြိုဆိုနှုတ်ဆက်ရာတွင် မြန်မာနိုင်ငံသည် အာရှ-ပစိဖိတ် ဒေသတွင် ရုရှားနိုင်ငံ၏ အရေးပါသော မိတ်ဖက်နိုင်ငံဖြစ်ကြောင်း ရုရှား ဝန်ကြီးချုပ်က အလေးအနက် ပြောကြားထားပါသည်။

ယခုနှစ်မှာ မြန်မာ-ရုရှား နှစ်နိုင်ငံ ချစ်ကြည်စွာ ဆက်ဆံရေး တည်ထောင်မှု ပူးတွဲကြေညာစာတမ်း လက်မှတ်ရေးထိုးခြင်း ၂၅ နှစ်မြောက်နှစ် ဖြစ်ပါ ကြောင်း၊ ယခု မြန်မာနိုင်ငံတော် ဝန်ကြီးချုပ်၏  ခရီးစဉ်မှာ နှစ်နိုင်ငံအကြား နယ်ပယ်အားလုံးတွင် ပူးပေါင်းဆောင်ရွက်မှု ဖွံ့ဖြိုးတိုးတက်လာစေရေးအတွက် တွန်းအားသစ်များ ပေးဆောင်နိုင်မည်ဟု  မိမိယုံကြည်ပါကြောင်း၊ ရုရှားသမ္မတဗလာဒီမာပူတင်နှင့် တွေ့ဆုံဆွေးနွေးမှုကတစ်ဆင့် ရရှိလာမည့် သဘောတူညီချက်များကို  မိမိတို့အစိုးရအဖွဲ့က အတိအကျ အကောင်အထည်ဖော် ဆောင်ရွက်သွားမည်ဖြစ်ပါကြောင်း ရုရှား ဝန်ကြီးချုပ်က ပြောကြားခဲ့ပါသည်။ 

ကိုးကား-TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ပြည်ထောင်စုသမ္မတမြန်မာနိုင်ငံတော် နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် တနင်္လာနေ့ ၊ မော်စကို စံတော်ချိန် ၁၃၀၀ အချိန်တွင် ရုရှားနိုင်ငံသို့ တရားဝင်ခရီးစဉ်အဖြစ် ရောက်ရှိခဲ့ကြောင်း TASS သတင်းဌာနက ဖော်ပြထားပါသည်။

နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်အား ရုရှားနိုင်ငံ၏ စီးပွားရေးဖွံ့ဖြိုးတိုးတက်မှုဝန်ကြီး Maxim Reshetnikov ဦးဆောင်သော ကိုယ်စားလှယ်အဖွဲ့များက ကြိုဆိုခဲ့ကြသည်။

ထို့အပြင် မော်စကိုရှိ မြန်မာသံရုံးမှ သံတမန်များနှင့်အတူ ရုရှားနိုင်ငံ၏ နိုင်ငံခြားရေး ဒုဝန်ကြီးနှင့် အရှေ့အလယ်ပိုင်းဒေသဆိုင်ရာ သမ္မတအထူး ကိုယ်စားလှယ် Mikhail Bogdanov တို့လည်း ကြိုဆိုပွဲအခမ်းအနားသို့ တက်ရောက်ခဲ့ကြပါသည်။

မတ်လ ၄ ရက်တွင် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် သည် ရုရှားသမ္မတ ဗလာဒီမာပူတင်နှင့် တွေ့ဆုံရန် စီစဉ်ထားပါသည်။

မြန်မာ- ရုရှား နှစ်နိုင်ငံအကြား ပူးပေါင်းဆောင်ရွက်ရေး အပြန်အလှန် အကျိုးရှိမှု ပိုမိုတိုးတက်လာစေရေးအပြင် ရေပန်းစားနေသော အပြည်ပြည်ဆိုင်ရာကိစ္စရပ်များကို ဆွေးနွေးမည်ဖြစ်ကြောင်း ကရင်မလင် က ကြေညာထားပါသည်။ တွေ့ဆုံဆွေးနွေးမှုများအပြီး အစိုးရအဆင့်နှင့် ဌာနဆိုင်ရာအဆင့် သဘောတူညီမှုများစွာကို လက်မှတ်ရေးထိုးပြီး နှစ်နိုင်ငံ ပူးတွဲထုတ်ပြန်ချက်တစ်ရပ် ထုတ်ပြန်မည့် အစီအစဉ်ရှိကြောင်း သိရပါသည်။

မြန်မာနိုင်ငံနှင့် ရုရှားခေါင်းဆောင်တို့သည် ၂၀၂၂ ခုနှစ်တွင် ရုရှားနိုင်ငံ၏ အရှေ့ဖျားမြို့ Vladivostok ၌ ကျင်းပသည့် အရှေ့ဖျား စီးပွားရေးဖိုရမ် (Eastern Economic Forum) တွင် နောက်ဆုံးအကြိမ် တွေ့ဆုံခဲ့ကြပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဓားစာခံများ ထပ်မံလွတ်မြောက်လာစေရေး အပစ်အခတ်ရပ်စဲရေး သက်တမ်းတိုးရန် အမေရိကန်ပြည်ထောင်စု၏ အဆိုပြုချက်အသစ်ကို ဟားမက်က လက်မခံမချင်း ဂါဇာကမ်းမြောင်အတွက် ထောက်ပံ့ရေး ပစ္စည်းများကို ပိတ်ဆို့ထားမည်ဟု အစ္စရေးက ဆိုသည်။ ဂါဇာကမ်းမြောင် သို့ ကုန်ပစ္စည်းနှင့် ထောက်ပံ့ရေးပစ္စည်းအားလုံး ဝင်ရောက်မှု ရပ်ဆိုင်း ထားမည်ဟု အစ္စရေးဝန်ကြီးချုပ်ရုံးက မတ်လ ၂ ရက်(တနင်္ဂနွေနေ့)တွင် ထုတ်ပြန်ခဲ့ပါသည်။

ကနဦး သီတင်း ၆ ပတ်ကြာ အပစ်အခတ်ရပ်စဲရေး ပထမအဆင့်သည် မတ်လ ၁ ရက် (စနေနေ့)၌ ပြီးဆုံးခဲ့သည်။အမေရိကန်၏ အဆိုပြုချက် အသစ်တွင် ဟားမက်တို့က ထိန်းသိမ်းထားသော ဓားစာခံများထဲမှ တစ်ဝက်ကို ချက်ချင်းပြန်လွှတ်ပေးရန်နှင့် အပစ်အခတ်ရပ်စဲရေးကို ဧပြီ  လလယ်အထိ သက်တမ်းတိုးရန် တောင်းဆိုထားပါသည်။ အမြဲတမ်း အပစ်အခတ်ရပ်စဲရေးသဘောတူချိန်၌ ကျန်ဓားစာခံများကို လွှတ်ပေးရမည်ဟုလည်း ဆိုထားပြီး ၎င်းအဆိုပြုချက်ကို ဟားမက်က ပြင်းပြင်း ထန်ထန် ဝေဖန်ခဲ့ပါသည်။ ဒုတိယအဆင့်အတွက် စေ့စပ်ညှိနှိုင်းရေး ကိစ္စများတွင် တောင်းဆိုထားသည့် မူလသဘောတူညီချက်ကို အကောင် အထည်ဖော်ရမည်ဟု ၎င်းတို့ကဆိုသည်။ ဒုတိယအဆင့်တွင် ယင်း ကမ်းမြောင်မှ အစ္စရေးတပ်များ အပြီးတိုင်ဆုတ်ခွာခြင်း၏ အပြန်အလှန်အနေဖြင့် ဟားမက်က လက်ကျန်ဓားစာခံအားလုံးကို လွှတ်ပေးမည် ဖြစ်ပါသည်။ အကူအညီများ၏ အမှန်တကယ်စီးဆင်းမှု အသေးစိတ်ကို မသိရသေးသော်လည်း မတ်လ ၂ ရက်(တနင်္ဂနွေနေ့)တွင် ဂါဇာ ကမ်းမြောင်သို့ ဝင်ရောက်ရန် နယ်စပ်ဖြတ်ကျော်ဂိတ်တစ်ခု၌ အကူအညီပေးရေး ထရပ်ကားယာဉ်တန်းရှည်ကို တွေ့နေရသည်။ ကုလသမဂ္ဂ လူသားချင်း စာနာထောက်ထားမှုဆိုင်ရာ အကြီးအကဲ Tom Fletcher က “ဂါဇာ ကမ်းမြောင်ဒေသအတွက် အကူအညီများကို ရပ်ဆိုင်းရန် အစ္စရေး၏ ဆုံးဖြတ်ချက်သည် စိုးရိမ်စရာကောင်းသည်” ဟုပြောခဲ့ကြောင်း သိရှိရပါသည်။ ဂါဇာကမ်းမြောင် မြောက်ပိုင်း၌ ဖောက်ခွဲရေးလုပ်ဆောင်ရန် ကြိုးစားနေသူအများအပြားကို တိုက်ခိုက်ခဲ့သည်ဟုလည်း အစ္စရေး တပ်ဖွဲ့များက ပြောကြားခဲ့ပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

အမေရိကန်သမ္မတ Donald Trump နှင့် ယူကရိန်းခေါင်းဆောင် Vladimir Zelensky တို့အကြား လွန်ခဲ့သောသီတင်းပတ်က White House တွင် ဖြစ်ပွားခဲ့သော အများသိ ပဋိပက္ခသည် ယူကရိန်းသည် ရုရှားနှင့် ပဋိပက္ခကို ငြိမ်းချမ်းစွာဖြေရှင်းရန် အမှန်တကယ် စိတ်မဝင်စားကြောင်း ပြသနေသည်ဟု Kremlin ပြောရေးဆိုခွင့်ရှိသူ Dmitry Peskov က ထုတ်ဖော်ပြောဆိုလိုက်သည်။

ဖေဖော်ဝါရီ ၂၈ ရက်(သောကြာ)နေ့က Zelensky ၏ White House ခရီးစဉ်တွင် ပဋိပက္ခများ အဆုံးသတ်နိုင်ရေးဆွေးနွေးစဉ် မီဒီယာများရှေ့၌ အမေရိကန်သမ္မတ၊ ဒုတိယသမ္မတတို့နှင့် အပြင်းအထန် ငြင်းခုံပြီးနောက် ဆွေးနွေးမှုပျက်ပြယ်သွားခဲ့ရသည်။ တင်းမာမှုများဖြင့် ပြည့်နေသော အစည်းအဝေးအတွင်း Donald Trump နှင့် J.D. Vance တို့က ယူကရိန်းခေါင်းဆောင်အား ရုရှားနှင့် ငြိမ်းချမ်းရေးညှိနှိုင်းဆွေးနွေးရန် ငြင်းဆန်ခြင်းဖြင့် “တတိယကမ္ဘာစစ်ကို ဦးတည်နေသည်” ဟု စွပ်စွဲခဲ့ ကြသည်။ ထို့အပြင် Washington က Kiev အား ကြီးမားသော စစ်ရေးအကူအညီများ ပေးခဲ့သော်လည်း ကျေးဇူးမသိတတ်ဘဲ မလေးမခန့် ပြုမူသည်ဟု ၎င်းတို့က ဝေဖန်ခဲ့ကြသည်။

ပြင်းထန်သော အငြင်းပွားမှုအတွင်း Zelensky က မော်စကိုနှင့် ဆွေးနွေးညှိနှိုင်းမှုများပြုလုပ်ရန် ထပ်မံငြင်းဆန်ခဲ့ပြီး အမေရိကန်ထံမှ လုံခြုံရေး အာမခံချက်များ တောင်းဆိုခဲ့ကာ ယူကရိန်းတပ်ဖွဲ့များသည် အင်အား လျော့နည်းလာနေသည်ဟူသောအချက်ကို ငြင်းဆိုခဲ့သည်။

“Washington ၏ ကြိုးပမ်းမှုများနှင့် Moscow ၏ အသင့်ရှိမှု တစ်ခုတည်းသည် စစ်ပွဲကို ရပ်တန့်ရန် လုံလောက်မည်မဟုတ်ဘဲ ကိယက်ဗ်၏ စိတ်ပါဝင်စားမှုမရှိခြင်းက ငြိမ်းချမ်းရေးလုပ်ငန်းစဉ်ကို အနှောင့်အယှက် ဖြစ်နေစေသည်။

ဘဲဥပုံခန်းမတွင် ယူကရိန်းခေါင်းဆောင်၏ ပြုမူပုံသည် ယူကရိန်းနှင့် ပတ်သက်သည့် အရေးကိစ္စကို ဖြေရှင်းရန် လမ်းကြောင်းပေါ်သို့ ရောက်ရှိရန် မည်မျှခက်ခဲမည်ကို ပြသနေသည်” ဟု Peskov က ပြောကြားခဲ့သည်။

White House တွင် ဖြစ်ပွားခဲ့သော အငြင်းပွားမှုသည် “အလွန်ထူးခြားသော ဖြစ်ရပ်တစ်ခု” ဖြစ်ပြီး ယူကရိန်းခေါင်းဆောင်သည် “သံတမန်ရေးဆိုင်ရာ ကျွမ်းကျင်မှု လုံးဝမရှိကြောင်း ပြသနေသည်” ဟု Peskov က မှတ်ချက်ပြုခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

ရုရှားသမ္မတ ဗလာဒီမာပူတင်သည် “လွတ်လပ်သော အနာဂတ်ကမ္ဘာကို ဦးဆောင်သူ” ဖြစ်သင့်သည်ဟု ရုရှားသမ္မတဟောင်း ဒီမီထရီမက်ဗ်ဒက် က ပြောကြားခဲ့သည်။ ယူကရိန်းနိုင်ငံဆိုင်ရာ ဝါရှင်တန်၏ မူဝါဒပြောင်းလဲမှုအပေါ် တုံ့ပြန်သည့်အနေဖြင့် EU သည် အမေရိကန်ထံမှ တာဝန်ကိုလွှဲယူရမည်ဟု အဆိုပြုခဲ့သော EU ၏ အဆင့်မြင့် သံတမန် Kaja Kallas ၏ ပြောကြားချက်ကို တုံ့ပြန်သည့်အနေဖြင့် မက်ဗ်ဒက်က ပြောကြားခဲ့ခြင်းဖြစ်သည်။

ဖေဖော်ဝါရီ ၂၈ ရက်(သောကြာနေ့)တွင် Kallas သည် အခြား EU ခေါင်းဆောင်များနှင့်အတူ ယူကရိန်းခေါင်းဆောင် ဗလာဒီမာဇီလန်စကီး အား ၎င်းတို့က အခိုင်အမာထောက်ခံကြောင်း ထပ်လောင်း ပြောကြားခဲ့သည်။ ဇီလန်းစကီးသည် သောကြာနေ့တွင် အိမ်ဖြူတော်၌ အမေရိကန် သမ္မတ ဒေါ်နယ်ထရမ့်နှင့် အပြင်းအထန် ငြင်းခုံပြောဆိုခဲ့ကာ ထရမ့်က ဇီလန်စကီးအား အမေရိကန်အကူအညီအတွက် ကျေးဇူးမသိတတ်ဘဲ ယူကရိန်းပဋိပက္ခကို အဆုံးသတ်ရန် ညှိနှိုင်းရန်မလိုလားကြောင်း စွပ်စွဲခဲ့သည်။ ထိုအချိန်တွင် ယူကရိန်းခေါင်းဆောင်က ဝါရှင်တန်အား ကိယက်ဗ် အတွက် စစ်ရေးထောက်ပံ့မှုကို ဆက်လက်ပေးအပ်ရန် တိုက်တွန်းခဲ့ပြီး ထိုသို့မပြုလုပ်ပါက အမေရိကန်အတွက် အနှုတ်သဘော သက်ရောက်မှုသာ ရှိလာနိုင်ကြောင်း သတိပေးခဲ့သည်။

Kallas က ထရမ့်အား ဝေဖန်ပြောဆိုခဲ့ကာ “ယူကရိန်းသည် ဥရောပ ဖြစ်ပြီး မိမိတို့သည် ယူကရိန်းဘက်မှ ရပ်တည်လျက်ရှိကြောင်း၊ ယူကရိန်း အား စစ်ရေးထောက်ပံ့မှုကို တိုးမြှင့်ပေးမည်ဖြစ်ပြီး ကျူးကျော်သူကို ဆက်လက်တိုက်ထုတ်နိုင်ရန် လုပ်ဆောင်သွားမည်ဖြစ်ကာ ယနေ့တွင် လွတ်လပ်သောကမ္ဘာသည် ခေါင်းဆောင်အသစ် လိုအပ်နေပြီ ဖြစ်ကြောင်း ရှင်းရှင်းလင်းလင်း သိမြင်လာရကြောင်း၊ အဆိုပါစိန်ခေါ်မှုကို ဥရောပသား များက လက်ခံရန်တာဝန်ရှိကြောင်း” ပြောဆိုခဲ့သည်။

မတ်လ ၁ ရက် (စနေနေ့)တွင် RIA Novosti သတင်းဌာနနှင့် ပြုလုပ်သော တွေ့ဆုံမေးမြန်းခန်းတစ်ခုတွင် ရုရှားလုံခြုံရေးကောင်စီ၏ ဒုတိယ ဥက္ကဋ္ဌ အဖြစ် တာဝန်ထမ်းဆောင်နေသော မက်ဗ်ဒက်က “လွတ်လပ်သော အနာဂတ်ကမ္ဘာကို ဦးဆောင်သူ” သည် အမေရိကန်မှ အခြားတစ်ဦးထံသို့ လွှဲပြောင်းပေးသင့်သော်လည်း ၎င်းသည် EU မှ မထိုက်တန်ကြောင်းနှင့် ဗလာဒီမာပူတင်သာ အထိုက်တန်ဆုံးဖြစ်သည် ဟု ၎င်းက ပြောကြားခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဥရောပသမဂ္ဂသည် ရုရှားကိုဆက်လက်တိုက်ခိုက်ရန် ယူကရိန်းကို တွန်းအားပေးခြင်းဖြင့် ယူကရိန်းငြိမ်းချမ်းရေး လုပ်ငန်းစဉ်ကို နှောင့်ယှက်ရန် ကြိုးပမ်းနေကြောင်း ရုရှားနိုင်ငံခြားရေးဝန်ကြီး ဆာဂေးလာရော့ဗ်က ပြောကြားခဲ့သည်။ထို့အပြင် လွန်ခဲ့သော သီတင်းပတ် ဖေဖော်ဝါရီလ ၂၄ ရက်တွင် ကုလသမဂ္ဂလုံခြုံရေးကောင်စီက အတည်ပြုခဲ့သော ယူကရိန်း ပဋိပက္ခ အမြန်ဆုံးအဆုံးသတ်ရန် တောင်းဆိုထားသည့် အမေရိကန်က ရေးဆွဲထားသော ဆုံးဖြတ်ချက်တစ်ခုကို ဆာဂေးလာရော့ဗ်က အလေးအနက်ထားစဉ်းစားမှုများ လုပ်ဆောင်ခဲ့ကြောင်းလည်း ဆိုပါသည်။

ယူကရိန်းအပေါ် ကျူးကျော်တိုက်ခိုက်မှုများနှင့် ပတ်သက်ပြီး ရုရှားကို ပြစ်တင်ရှုတ်ချရန် ငြင်းဆိုခဲ့သော အမေရိကန်သမ္မတဒေါ်နယ်ထရမ့်က ယူကရိန်းကို ပြစ်တင်ဝေဖန်မှုများ လုပ်ဆောင်ခဲ့ပြီးနောက် အဆိုပါဆုံး ဖြတ်ချက်ထွက်ပေါ်လာခြင်းဖြစ်သည်။

ဆာဂေးလာရော့ဗ်က ‘‘ယူကရိန်းပဋိပက္ခနှင့်ပတ်သက်သော နိုင်ငံရေးအခင်းအကျင်းများ စတင်ပြောင်းလဲလာသည်နှင့် တစ်ပြိုင်နက် ဥရောပ သမဂ္ဂသည် အဆိုပါလမ်းကြောင်းကို ပျက်ပြားစေရန် ကြိုးပမ်းမှုများကို ချက်ချင်းလုပ်ဆောင်ခဲ့ပြီး ဥရောပသမဂ္ဂသည် ယူကရိန်းအတွက် ကြီးမားသောစစ်ရေးအကူအညီပံ့ပိုးမှုအသစ်များကို ထုတ်ပြန်ကြေညာကာ စစ်ရေးလှုပ်ရှားမှုများ ဆက်လက်လုပ်ဆောင်ရန် တိုက်တွန်း ခဲ့သည်” ဟု ပြောဆိုခဲ့သည်။

ထို့အပြင် အကျပ်အတည်းများကို ဖော်ဆောင်ရာတွင် ၎င်း၏အခန်းကဏ္ဍ နှင့်ပတ်သက်ပြီး ရာစုနှစ်များအတွင်းရရှိခဲ့သော ဥရောပသမဂ္ဂ၏ ဂုဏ်သတင်းမှာ မပြောင်းလဲဘဲရှိကြောင်း ဆာဂေးလာရော့ဗ်က ဝေဖန် ပြောဆိုခဲ့သည်။

ကိုးကား-NP News

ရုရှားနှင့်အမေရိကန်တို့သည် ၎င်းတို့၏ သံတမန်ရေးရာကိစ္စရပ်များ ပုံမှန်ပြန်လည် လည်ပတ်ရန် ၎င်းတို့ လုပ်ဆောင်ရမည့်ခြေလှမ်းများကို ဖော်ထုတ်နိုင်ခဲ့ကြောင်း တူရကီနိုင်ငံတွင်ကျင်းပခဲ့သည့် ဆွေးနွေးပွဲအပြီး တွင် ရုရှားနိုင်ငံခြားရေးဝန်ကြီးဌာနက ထုတ်ပြန်ခဲ့သည်။ 

ယခင်သမ္မတ ဂျိုးဘိုင်ဒင် လက်ထက်တွင် ပိုမိုနက်ရှိင်းလာခဲ့သော သံတမန်ရေးရာအကွဲအပြဲကို ကုစားရန်ကြိုးပမ်းနေစဉ် ရုရှားနှင့် အမေရိကန် ကိုယ်စားလှယ်အဖွဲ့များသည် ဖေဖော်ဝါရီ ၂၇ ရက်နေ့က အစ္စတန်ဘူလ် ၌ တွေ့ဆုံခဲ့ကြပါသည်။

ဆွေးနွေးပွဲများသည် မော်စကိုရှိ အမေရိကန်သံရုံးနှင့် ဝါရှင်တန်ရှိ ရုရှား သံရုံးတို့တွင် ပုံမှန် လုပ်ငန်းဆောင်ရွက်မှုများ ပြန်လည်ရရှိရေးအပေါ် အဓိကဗဟိုပြုပြီး နှစ်ဘက်စလုံးက ဆွေးနွေးခဲ့ကြကြောင်း အမေရိကန် နိုင်ငံခြားရေးဝန်ကြီးဌာနမှ ထုတ်ပြန်ခဲ့ပါသည်။ နှစ်နိုင်ငံစလုံးသည် လွန်ခဲ့သောနှစ်များက သံတမန်ရေးရာဝန်ထမ်းများကို ကန့်သတ်ခြင်း၊ ဘဏ်လုပ်ငန်းဝင်ရောက်ခွင့်အား ကန့်သတ်ခြင်းနှင့် သံတမန်ဆိုင်ရာ ပိုင်ဆိုင်မှုများကို သိမ်းယူခြင်းအပါအဝင် တစ်ဖက်နှင့်တစ်ဖက် ကန့်သတ် ချက်များအပေါ် အချေတင်ဆွေးနွေးခဲ့ကြပြီး မော်စကိုက ၎င်း၏ ပိတ်ဆို့ အရေးယူမှုသည် ဝါရှင်တန်၏ လုပ်ဆောင်ချက်များအပေါ် တိုက်ရိုက် တုံ့ပြန်ခြင်းသာဖြစ်သည်ဟု ဆိုထားပါသည်။ 

ရုရှားကိုယ်စားလှယ်အဖွဲ့အား ရုရှားနိုင်ငံခြားရေးဝန်ကြီးဌာန၊ မြောက်အတ္တလန္တိတ်ဌာန အကြီးအကဲ အလက်ဆန်ဒရာဒါချိဗ်က ဦးဆောင် ခဲ့ပြီး အမေရိကန်အဖွဲ့အား ရုရှားနှင့် ဗဟိုဥရောပဆိုင်ရာ အမေရိကန် လက်ထောက်နိုင်ငံခြားရေးဝန်ကြီး ဆိုနာတာကုတလာက ဦးဆောင်ခဲ့ ပါသည်။

ဒါချိဗ်ကို မော်စကို၏ အမေရိကန်ဆိုင်ရာသံတမန်ဖြစ်လာရန် ရည်မှန်း ထားကြောင်း သိရှိရပြီး ဆွေးနွေးပွဲများအတွင်း ရာထူးခန့်အပ်ခြင်းအတွက် အမေရိကန်နှင့် သဘောတူညီချက်ရရှိထားကာ မကြာမီ ဝါရှင်တန်သို့ သွားရောက်ရန် စီစဉ်ထားကြောင်း ရုရှားနိုင်ငံခြားရေးဝန်ကြီးဌာနက သီးခြားထုတ်ပြန်ချက်တစ်ခုတွင် ဖော်ပြထားသည်။ 

ဆွေးနွေးပွဲ၏ တစ်စိတ်တစ်ပိုင်းအနေဖြင့် ရုရှားသည် နှစ်နိုင်ငံကြား တိုက်ရိုက်လေကြောင်းပျံသန်းမှုကို ပြန်လည်ထူထောင်ရန် အဆိုပြုခဲ့ကြောင်း သိရှိရပါသည်။

၂၀၂၂ ခုနှစ်တွင် အမေရိကန်သည် ယူကရိန်းပဋိပက္ခ တင်းမာလာမှု အပေါ် တုံ့ပြန်သည့်အနေဖြင့် အခြားအနောက်နိုင်ငံများနှင့်အတူ ရုရှား လေကြောင်းလိုင်းများအား တိုက်ရိုက်ပျံသန်းခွင့်ကို ရပ်ဆိုင်းကာ လေကြောင်းနယ်နိမိတ်ကို ပိတ်ပင်ခဲ့သည်။ ထိုအချိန်မှစ၍ ခရီးသွား များသည် တူရကီနှင့် အာရပ်စော်ဘွားများ ပြည်ထောင်စုကဲ့သို့သော ကြားနေနိုင်ငံများမှ လေကြောင်းလိုင်းများကို အသုံးပြုလာကြသည်။

အမေရိကန်သမ္မတ ဒေါ်နယ်ထရမ့်သည် ရုရှားကို “သီးခြားခွဲထုတ်ရန်” ကြိုးပမ်းမှုများအပါအဝင် ဘိုင်ဒင်၏ မူဝါဒများစွာမှ ရုန်းထွက်ရန် လုပ်ဆောင် လျက်ရှိပြီး ယူကရိန်းပဋိပက္ခကို လျင်မြန်စွာ အဆုံးသတ်နိုင်ရေး ကြိုးပမ်းနေသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယူကရိန်းသမ္မတ ဗလာဒီမာ ဇီလန်စကီး က အမေရိကန် သမ္မတ ဒေါ်နယ်ထရမ့်နှင့် ပြင်းထန်သည့် ဆွေးနွေးပွဲ ဖြစ်ခဲ့သော်လည်း ၎င်းတို့နှစ်ဦးအကြား ဆက်ဆံရေး ပြန်လည်ပြေလည်နိုင်ကြောင်း ပြောကြားခဲ့ပါသည်။

ယူကရိန်းသမ္မတ ဗလာဒီမာ ဇီလန်စကီးက မတ်လ ၁ ရက်(စနေနေ့)က အိမ်ဖြူတော်တွင် ခေါင်းဆောင်နှစ်ဦးကြား ထိပ်တိုက်တွေ့ဆုံမှုအပြီးတွင် အမေရိကန်သမ္မတ ဒေါ်နယ်ထရမ့်ကို ယူကရိန်းအား ပိုမိုထောက်ခံစေလိုကြောင်း ထပ်လောင်း ပြောကြားခဲ့သည်။

ဗလာဒီမာ ဇီလန်စကီးသည် ထရမ့်နှင့် "ပြင်းထန်သောဆွေးနွေးမှု" ပြီးနောက် “အမေရိကန်သည် ယူကရိန်းတို့ဘက်တွင် ပိုမိုခိုင်မာစွာရပ်တည်စေလိုသည်" ဟု ပြောကြားခဲ့သည်။

ယူကရိန်းသည် အမေရိကန်က အဆိုပြုထားသည့် မြေရှားသတ္တုဆိုင်ရာ သဘောတူညီချက်ကို လက်မှတ် ရေးထိုးရန် အဆင်သင့်ဖြစ်နေသော်လည်း ဝါရှင်တန်ထံမှ လုံခြုံရေးအာမခံချက် လိုအပ်ကြောင်း ၎င်းက ထပ်လောင်း ပြောကြားခဲ့သည်။

ကိုးကား- BBC News

သတင်းအပြည့်အစုံကို ဆက်လက်ဖတ်ရှုရန်- https://www.bbc.com/news/live/cn5220x56pqt