ဂျပန်၀န်ကြီးချုပ်ဟောင်း Kishida Fumio ရှိသည့် နေရာအနီးသို့ ဖောက်ခွဲရေးပစ္စည်းနှင့် ပစ်ပေါက်ခဲ့သော အမျိုးသားကို ဂျပန်အနောက်ပိုင်း Wakayama ခရိုင်ရှိ တရားရုံးတစ်ရုံးက ထောင်ဒဏ် ၁၀ နှစ် ချမှတ်လိုက်ပါသည်။ တရားခံသည် ထိုစဉ်က တာဝန်ထမ်းဆောင်ဆဲ ဝန်ကြီးချုပ်ကို ပစ်မှတ်ထား တိုက်ခိုက်ခဲ့ခြင်းကြောင့် အများပြည်သူအကြား စိုးရိမ် ထိတ်လန့်မှုများ ဖြစ်ပေါ်စေခဲ့သည်ဟု တရားရုံးက ပြောပါသည်။

တရားခံဖြစ်သူ Kimura Ryuji က ဖောက်ခွဲရေးပစ္စည်းများနှင့် ပစ်ပေါက် ခဲ့ရာ လူ ၂ ဦး ဒဏ်ရာရခဲ့ကြောင်း စွပ်စွဲခံခဲ့ရသည်။ အောက်လွှတ်တော် ကြားဖြတ်ရွေးကောက်ပွဲအတွက် ကိုယ်စားလှယ်လောင်းတစ်ဦး မဲဆွယ် စည်းရုံးခဲ့ချိန် ၂၀၂၃ ခုနှစ်၊ ဧပြီလတွင် ဝန်ကြီးချုပ် Kishida သည် Wakayama မြို့ရှိ ဆိပ်ကမ်းတစ်ခု၌ ရောက်ရှိနေခဲ့ပြီး ထိုနေရာတွင် လုပ်ကြံခံခဲ့ရသော်လည်း ဒဏ်ရာရရှိခြင်းမရှိဘဲ အခင်းဖြစ်ပွားရာနေရာမှ အလျင်အမြန် ရွှေ့ပြောင်းတိမ်းရှောင်နိုင်ခဲ့ပါသည်။

အသက် ၂၅ နှစ်အရွယ် Kimura သည် လူသတ်မှုကျူးလွန်ရန် ကြိုးပမ်းမှုနှင့် ဖောက်ခွဲရေးပစ္စည်းထိန်းချုပ်ရေးအက်ဥပဒေကို ချိုးဖောက်မှု အပါအဝင် စွဲချက် ၅ ခုဖြင့် Wakayama ခရိုင်တရားရုံး၌ ရုံးတင်စစ်ဆေးခံခဲ့ရခြင်း ဖြစ်သည်။

ကျွမ်းကျင်ပညာရှင်များ၏ စစ်ဆေးမှုအရ ဖောက်ခွဲရေးပစ္စည်းများသည် လူကို သေစေနိုင်သည်ဟု တရားသူကြီး Fukushima Keiko က ဖေဖော်ဝါရီ ၁၉ ရက်နေ့က တရားစီရင်မှုတွင် ပြောကြားခဲ့သည်။ Kimura သည် Kishida သေဆုံးသွားနိုင်ကြောင်းကို သိထားပြီး ၎င်းဖောက်ခွဲရေးပစ္စည်းနှင့် ပစ်ပေါက်ခဲ့ခြင်းကြောင့် လူသတ်မှုကျူးလွန်ရန်ကြိုးပမ်းမှုနှင့် အပြစ်ရှိကြောင်း ဆုံးဖြတ်ချက်ချခဲ့သည်ဟု တရားသူကြီးက ဆိုပါသည်။

ကိုးကား-NHK World

အမေရိကန်သမ္မတ ဒေါ်နယ်ထရမ့်က ယူကရိန်းခေါင်းဆောင် ဗလာ ဒီမာဇီလန်စကီးကို “ရွေးကောက်ပွဲမရှိသော အာဏာရှင်” ဟု ခိုင်းနှိုင်း ခေါ်ဆိုကာ ရုရှားနှင့်ဖြစ်ပွားနေသော ပဋိပက္ခကို စီမံခန့်ခွဲမှုညံ့ဖျင်းပြီး အမေရိကန်ငွေကြေးအကူအညီများကို အလွဲသုံးစားလုပ်သည်ဟု စွပ်စွဲခဲ့သည်။ ဖေဖော်ဝါရီ တတိယပတ်အတွင်း ဆော်ဒီအာရေးဗီးယားနိုင်ငံ တွင် အမေရိကန် - ရုရှားတွေ့ဆုံဆွေးနွေးပွဲပြီးနောက် ဝါရှင်တန်နှင့် ကိယက်ဗ်အကြား တင်းမာမှုများ ပိုမိုမြင့်တက်လာခဲ့သည်။

ဖေဖော်ဝါရီ ၁၉ ရက်နေ့တွင် ၎င်း၏ Truth Social ပလက်ဖောင်း၌ ထရမ့်က ဇီလန်စကီးကို ဝေဖန်ကာ “ယူကရိန်းခေါင်းဆောင်သည် အမေရိကန်ပြည်ထောင်စုအား မအောင်မြင်နိုင်သော စစ်ပွဲတစ်ခုထဲသို့ ဒေါ်လာ ၃၅၀ ဘီလီယံ သုံးစွဲရန် စည်းရုံးခဲ့သည်” ဟု ရေးသားခဲ့သည်။ ထို့အပြင် ၎င်းက ဇီလန်စကီးသည် “ရွေးကောက်ပွဲများ ကျင်းပရန် ငြင်းဆိုနေပြီး ယူကရိန်းရွေးကောက်ပွဲအပေါ် စိတ်ဝင်စားမှု အားနည်းသည်” ဟု ဆိုသည်။

“ရွေးကောက်ပွဲမရှိသော အာဏာရှင် ဇီလန်စကီးအနေဖြင့် ရွေးကောက်ပွဲ ကို အမြန်ဆုံးလုပ်ဆောင်ခြင်းက ၎င်းအတွက် ကောင်းမွန်သော အဖြေရရှိမည်ဖြစ်ပြီး ထိုသို့မဟုတ်ပါက နိုင်ငံမဲ့ဖြစ်သွားနိုင်သည်” ဟု ထရမ့်က သတိပေးခဲ့သည်။

ကိုးကား-RT

အသစ်ဖန်တီးလိုက်သည့် ခရစ်တိုငွေကြေးအသစ် $ Libra ကို ၎င်း၏ X လူမှုကွန်ယက်စာမျက်နှာတွင် ကြော်ငြာပေးခဲ့သည်ဟူသော စွပ်စွဲချက်ကို အာဂျင်တီးနားသမ္မတ Javier Milei က ငြင်းဆိုခဲ့သည်။

Milei က ဖေဖော်ဝါရီ ၁၄ ရက်တွင် $ Libra ခရစ်တိုငွေကြေးအကြောင်း ပို့စ်တင်ပြီး မကြာမီဈေးကွက်တန်ဖိုး သိသိသာသာတက်လာသော်လည်း နာရီပိုင်းအတွင်း ရုတ်တရက် ကျဆင်းသွားခဲ့ခြင်းကြောင့် ရင်းနှီးမြှုပ်နှံသူ အများစုအတွက် ကြီးမားသော ဆုံးရှုံးမှုများ ဖြစ်ပေါ်စေခဲ့သည်။

အဆိုပါအခြေအနေကို Rug Pull ($ Libra ငွေကြေးပရောဂျက် တည်ထောင်သူများသည် ရင်းနှီးမြှုပ်နှံသူများထံမှ ရန်ပုံငွေများရရှိပြီးနောက် ပရောဂျက်ကို ရုတ်တရက် ပိတ်လိုက်ခြင်း သို့မဟုတ် ရောင်းချလိုက်ခြင်း) ဖြစ်ကြောင်း အာဂျင်တီးနား Fintech အဖွဲ့ချုပ်က ကောက်ချက်ချခဲ့ပြီး Milei အနေဖြင့် အဆိုပါပရောဂျက်ကြောင့် သမ္မတရာထူးမှ ထုတ်ပယ်ခံရမည့် အခြေအနေနှင့် ရင်ဆိုင်နေရသည်။

Milei က ၎င်းအနေဖြင့် အဆိုပါကိစ္စကို “သဘောရိုးဖြင့် ဆောင်ရွက်ခြင်းဖြစ်‌ကြောင်း” ဖေဖော်ဝါရီ ၁၇ ရက်(တနင်္လာနေ့)တွင် ပြောကြားကာ ရင်းနှီးမြှုပ်နှံသူများ၏ စွပ်စွဲချက်များကို ပယ်ချခဲ့ပြီး ခရစ်တို ငွေကြေးအသစ် $Libra ရောင်းချသည့် ဝက်ဘ်ဆိုက်လင့်ခ်ပါသော ပို့စ်တင်ခဲ့သည်မှာ အဆိုပါငွေကြေးကို ကြော်ငြာပေးခြင်းမဟုတ်ဘဲ မျှဝေခြင်းသာ ဖြစ်ကြောင်း ပြောကြားခဲ့သည်။

Milei သည် ၎င်း၏ X လူမှုကွန်ယက်စာမျက်နှာရှိ ပို့စ်ကို နာရီပိုင်းအတွင်း ဖျက်လိုက်ပြီးနောက် အာဂျင်တီးနားရှိ ၎င်း၏ နိုင်ငံရေးပြိုင်ဘက်များ သာမက ခရစ်တိုငွေကြေးတွင် ရင်းနှီးမြှုပ်နှံထားသူများထံမှလည်း ပြင်းထန်သော ဝေဖန်မှုများ ရရှိခဲ့သည်။

ခရစ်တိုငွေကြေး လိမ်လည်မှုဖြင့် သမ္မတအပေါ် စွဲဆိုထားသည့်စွဲချက်ကို ဆက်လက် လုပ်ဆောင်သင့်၊ မသင့် ဆုံးဖြတ်ရန် တရားသူကြီးတစ်ဦးကို တာဝန်ပေးထားသည်။

ကိုးကား-BBC

ရိုမေးနီးယားအပါအဝင် ဥရောပနိုင်ငံအချို့က ယူကရိန်းဒေသအချို့ကို ပိုင်ဆိုင်ခွင့်ရှိကြောင်း စတင်ပြောဆိုလာမှုများရှိကြောင်း ဖေဖော်ဝါရီ ၁၈ ရက်တွင် ဆော်ဒီအာရေးဗီးယားနိုင်ငံ၊ ရီယာ့ဒ်မြို့၌ အမေရိကန် ကိုယ်စားလှယ်အဖွဲ့နှင့် တွေ့ဆုံမှုအပြီး ရုရှားနိုင်ငံခြားရေးဝန်ကြီး ဆာဂေးလာဗ်ရော့ဖ် က ပြောကြားလိုက်ပါသည်။

ရိုမေးနီးယားနိုင်ငံရေးသမားများက မကြာသေးခင်ကလည်း အဆိုပါအကြောင်းကို ပြောဆိုထားကြကြောင်း ၎င်းက ဆက်လက်ပြောကြားထားပါသည်။

ဥရောပအနေဖြင့် ယူကရိန်းပဋိပက္ခဖြေရှင်းရန် ဆွေးနွေးပွဲတွင် ပါဝင်လိုမှုနှင့် အတိတ်အချိန်က ယူကရိန်းဒေသအချို့ကို ထိန်းချုပ်လေ့ရှိသည့် ဥရောပနိုင်ငံများသည် နယ်နိမိတ်ဆိုင်ရာ တောင်းဆိုမှုနှင့် ဆက်နွှယ်နေသည့် အကြောင်းအရာကိုမူ ဖြေကြားသွားခြင်းမရှိဘဲ “မိမိအနေဖြင့် ထင်ကြေးမပေးချင်ကြောင်း” ၎င်းက ပြောကြားသွားပါသည်။

ကိုးကား-TASS

Photo: Romania Insider

ပြင်သစ်တပ်များကို ယူကရိန်းသို့ ပို့ရန် အစီအစဉ်မရှိကြောင်း La Depeche သတင်းစာနှင့် အင်တာဗျူးတွင် ပြင်သစ်သမ္မတ အီမန်နျူရယ်မက်ခရွန် က ပြောကြားခဲ့သည်။

မက်ခရွန်သည် ဂျာမနီ၊ အီတလီ၊ ပိုလန်၊ စပိန်၊ နယ်သာလန်၊ UK နှင့် ဒိန်းမတ်နိုင်ငံတို့၏ နိုင်ငံ့ခေါင်းဆောင်အကြီးအကဲများနှင့် အလွတ်သဘော ဆွေးနွေးပွဲတစ်ခုကို ဖေဖော်ဝါရီ ၁၇ ရက်တွင် ပဲရစ်မြို့၌ ကျင်းပခဲ့သည်။ ဆွေးနွေးပွဲသို့ ဥရောပကော်မရှင် (European Commission) နှင့် ဥရောပ ကောင်စီ (European Council) ဥက္ကဋ္ဌများနှင့် NATO တပ်ဖွဲ့၏ အထွေထွေ အတွင်းရေးမှူးချုပ်တို့လည်း တက်ရောက်ခဲ့ကြသည်။ 

အဆိုပါဆွေးနွေးပွဲတွင် ယူကရိန်းနိုင်ငံအတွက် လုံခြုံရေးအာမခံချက် ပေးမည့်ကိစ္စရပ်များလည်း ထည့်သွင်းဆွေးနွေးမည်ဖြစ်ကြောင်း Elysee နန်းတော်က ဆွေးနွေးပွဲမတိုင်မီ ထုတ်ပြန်ခဲ့သည်။

ဥရောပနိုင်ငံများသည် ဘဏ္ဍာရေးအကျပ်အတည်းများ ရှိနေခြင်းကြောင့် ယူကရိန်းအတွက် ငွေကြေးအကူအညီများ ထပ်မံပေးအပ်ရန် ခက်ခဲနေကြောင်း ဂျာမနီဝန်ကြီးချုပ် Olaf Scholz က ဆွေးနွေးပွဲအပြီးတွင် သတင်းထောက်များကို ပြောကြားခဲ့သည်။ ကိယက်ဗ်အပေါ် ဆက်လက်ထောက်ပံ့မှုများသည် ဥရောပနိုင်ငံများရှိ စက်မှုလုပ်ငန်းနှင့် လူမှုဘေးအန္တရာယ်ကင်းရှင်းရေးလုပ်ငန်းများအပေါ် ထိခိုက်မှုမရှိစေရန် သီးခြားငွေကြေး အစီအစဉ် တစ်ရပ်ကို ဖော်ဆောင်သင့်ကြောင်း Scholz က ပြောကြားခဲ့သည်။

ကိုးကား-TASS

Photo: en.iz.ru

အိန္ဒိယနှင့်ကာတာနိုင်ငံတို့သည် နှစ်နိုင်ငံကြားဆက်ဆံရေးကို ကုန်သွယ်ရေး၊ ရင်းနှီးမြှုပ်နှံမှု၊နည်းပညာ၊စွမ်းအင်နှင့် ပြည်သူအချင်းချင်းဆက်ဆံရေးကို အဓိကအာရုံစိုက်သည့် မဟာဗျူဟာမြောက်မိတ်ဖက်ဆက်ဆံရေးအဖြစ် မြှင့်တင်ခဲ့သည်ဟု သိရှိရပါသည်။

ထို့အပြင် နှစ်နိုင်ငံစလုံးသည် ၂၀၃၀ ပြည့်နှစ်တွင် ကုန်သွယ်မှု နှစ်ဆတိုးမြှင့်ရန် ရည်မှန်းထားကြောင်းလည်း သိရပါသည်။ ကာတာနိုင်ငံ မင်းသား Sheikh Tamim bin Hamad Al Thani သည် အိန္ဒိယနိုင်ငံ၊ နယူးဒေလီမြို့သို့ သွားရောက်လည်ပတ်စဉ်အချိန်အတွင်း အဆိုပါ သဘောတူညီချက်များကို လက်မှတ်ရေးထိုးခဲ့ခြင်း ဖြစ်သည်ဟုလည်း သိရပါသည်။

ဖေဖော်ဝါရီ ၁၇ ရက် ညပိုင်း၌ နယူးဒေလီမြို့သို့ Sheikh Tamim bin Hamad Al Thani ရောက်ရှိလာသည့် အချိန်တွင် အိန္ဒိယဝန်ကြီးချုပ်မိုဒီ ကိုယ်တိုင် ကြိုဆိုခဲ့သည်ဟုလည်း သိရပါသည်။ မိုဒီနှင့် Sheikh Tamim bin Hamad Al Thani တို့သည် စီးပွားရေးပူးပေါင်းဆောင်ရွက်မှု၊ စွမ်းအင် ပူးပေါင်းဆောင်ရွက်မှုနှင့် အာကာသနည်းပညာများ အပါအဝင် အဓိက ပူးပေါင်းဆောင်ရွက်မှုကဏ္ဍများကို ဖေဖော်ဝါရီ ၁၈ ရက်တွင် ဆွေးနွေးခဲ့ ကြကြောင်းလည်း သိရပါသည်။ လက်ရှိအချိန်၌ ကာတာနှင့် အိန္ဒိယ နိုင်ငံကြားကုန်သွယ်မှုသည် အမေရိကန်ဒေါ်လာ ၂၀ ဘီလီယံ ဝန်းကျင်ရှိပြီး လာမည့် ၅ နှစ်အတွင်း နှစ်နိုင်ငံကြားကုန်သွယ်မှုသည် အမေရိကန် ဒေါ်လာ ၂၈ ဘီလီယံ ဝန်းကျင်ထိ ရှိလာနိုင်သည်ဟု အိန္ဒိယနိုင်ငံခြားရေး ဝန်ကြီးဌာနက ထုတ်ပြန်ပြောကြားခဲ့ပါသည်။ အိန္ဒိယနှင့် ကာတာနိုင်ငံ တို့သည် အခွန်နှစ်ဆကောက်ခံခြင်းကို ရှောင်ရှားရန်နှင့် အခွန်နှင့် ပတ်သက်သော ဘဏ္ဍာရေးဆိုင်ရာရှောင်လွှဲမှုများကို တားဆီးရန်အတွက် ပြန်လည်ပြင်ဆင်သည့် သဘောတူညီချက်တစ်ရပ်ကိုလည်း လက်မှတ်ရေးထိုးခဲ့ကြသည်ဟုလည်း သိရှိရပါသည်။

ကိုးကား-NP News

စင်္ကာပူရှိအိမ်ထောင်စုများသည် အလုပ်မှပျမ်းမျှဝင်ငွေပိုမိုမြင့်မားလာပြီး တစ်လလျှင် စင်္ကာပူဒေါ်လာ ၁၁,၂၉၇ (အမေရိကန်ဒေါ်လာ ၈,၄၁၃) အထိရောက်ရှိခဲ့ပြီး ယမန်နှစ်ကထက် အစိုးရအစီအစဉ်များမှ ပံ့ပိုးမှု ပိုမို ရရှိခဲ့သည်။

၎င်းသည် ငွေကြေးဖောင်းပွမှုကို ထိန်းညှိပြီးနောက် ဝင်ငွေ ၁.၄% တိုးလာခြင်း ဖြစ်ပြီး ၂၀၂၃ ခုနှစ်တွင် ပျမ်းမျှဝင် ၂.၈% တိုးတက်မှုထက်နည်းခဲ့ကြောင်း မကြာသေးမီက ထုတ်ပြန်ခဲ့သော မြို့တော်-ပြည်နယ်စာရင်းအင်းဌာနမှ အချက်အလက်များကို ကိုးကား၍ CNA က ဖော်ပြခဲ့သည်။

 ၂၀၂၄ ခုနှစ်တွင် စင်္ကာပူရှိအိမ်ထောင်စုများအတွက် ပျမ်းမျှလစဉ် အလုပ်အကိုင် ဝင်ငွေ စင်ကာပူဒေါ်လာ ၁၀,၀၀၀ သတ်မှတ်ချက်ထက် သုံးနှစ်ဆက်တိုက် ကျော်လွန်ခဲ့ခြင်းဖြစ်သည်။ ၂၀၂၂ ခုနှစ်တွင် စင်ကာပူ ဒေါ်လာ ၁၀,၀၉၉ နှင့် ၂၀၂၃ ခုနှစ်တွင် စင်ကာပူဒေါ်လာ ၁၀,၈၆၉ ဖြစ်ခဲ့၍ ပျမ်းမျှလစဉ် အလုပ်အကိုင်ဝင်ငွေ သတ်မှတ်ချက်ထက် ကျော်လွန်ခဲ့ခြင်း ဖြစ်သည်။

အိမ်ထောင်စုဝင်တစ်ဦးလျှင် ၀င်ငွေသည် တစ်လလျှင် စင်္ကာပူဒေါ်လာ ၃,၆၁၅ ဖြစ်၍ ၀.၈% တိုးလာပြီး ဝင်ငွေအုပ်စုအားလုံးတွင် တိုးလာပါသည်။

ဝင်ငွေအနည်းဆုံး ၁၀% အုပ်စုရှိ အိမ်ထောင်စုများ၏ ၁၄.၁% သည် ကားတစ်စီးပိုင်ဆိုင်ပြီး ၈.၅% သည် ကိုယ်ပိုင်အိမ်များတွင် နေထိုင်ကြသည်။

စာရင်းအင်းဌာန၏ ပြောကြားချက်များအရ အလုပ်လုပ်ကိုင်ခြင်းမရှိသူများ ပါဝင်သည့် အိမ်ထောင်စုများအပါအဝင် နေထိုင်သူအိမ်ထောင်စုများသည် အစိုးရ၏ အစီအစဉ်များမှ တစ်ဦးချင်းစီအတွက် ပျမ်းမျှ စင်္ကာပူ ဒေါ်လာ ၇,၈၂၅ ရရှိခဲ့ပြီး ယခင်နှစ် ၂၀၂၃ ထက် ၂၂% တိုးလာခဲ့ကြောင်းThe Business Times က ဖော်ပြထားသည်။

ဤအချက်အလက်များသည် အစိုးရ၏ လူမှုဖူလုံရေးနှင့် ငွေကြေးထောက်ပံ့မှုများ ပိုမိုမြှင့်တင်လာခြင်းကိုဖော်ပြနေပြီး စီးပွားရေး စိန်ခေါ်မှုများနှင့် အိမ်ထောင်စုများ၏ ဝင်ငွေတိုးတက်ရေးအတွက် ကြိုးပမ်းမှုများကို ထင်ဟပ်စေပါသည်။

ကိုးကား-VN Express

ဗီယက်နမ်နိုင်ငံသည် ဘဏ္ဍာရေးအသုံးစရိတ်များကို လျှော့ချရန်နှင့် စီမံခန့်ခွဲရေးဆိုင်ရာ စွမ်းဆောင်ရည်မြှင့်တင်ရန် ကြိုးစားနေချိန်တွင် အစိုးရယန္တရားကို ငါးပုံတစ်ပုံအထိ လျှော့ချမည့် ဗျူရိုကရေစီ ပြုပြင် ပြောင်းလဲရေးအစီအစဉ်ကို ဖေဖော်ဝါရီ ၁၈ ရက်(အင်္ဂါနေ့)တွင် ဗီယက်နမ် လွှတ်တော်မှ အတည်ပြုခဲ့သည်။

မတ်လ ၁ ရက်နေ့မှစတင်၍ အစိုးရဝန်ကြီးဌာန အရေအတွက်ကို လက်ရှိ ၁၈ ခုမှ ၁၄ ခုသို့ လျှော့ချသွားမည်ဖြစ်ကြောင်း အဆိုပါအစည်းအဝေး ထုတ်ပြန်ချက်တွင် ဖော်ပြထားသည်။

လွှတ်တော်ကိုယ်စားလှယ်များ၏ ၉၇ ရာခိုင်နှုန်းကျော်က ထိုအစီအစဉ် ကို အတည်ပြုခဲ့ခြင်းဖြစ်သည်။

အင်္ဂါနေ့အစောပိုင်းက အစည်းအဝေးတွင် ပြင်ဆင်ချက်ဥပဒေတစ်ရပ်ကို အတည်ပြုခဲ့ပြီးနောက် အေဂျင်စီလေးခုနှင့် နိုင်ငံပိုင်ရုပ်သံချန်နယ် ငါးခု တို့ အပါအဝင် အခြားလျှော့ချမှုများ ပါဝင်သည့် အစိုးရယန္တရား၏ ၁၅ ရာခိုင်နှုန်းမှ ၂၀ ရာခိုင်နှုန်းအထိ လျှော့ချမည့်အစီအစဉ်ကို အတည်ပြုရန် ဆွေးနွေးခဲ့ကြသည်။

ထိုသို့ဆောင်ရွက်မှုသည် “နိုင်ငံတော်ဘဏ္ဍာငွေ သက်သာစေရုံသာမက ပိုအရေးကြီးသည်မှာ စနစ်၏ စွမ်းဆောင်ရည်ကိုပါ မြှင့်တင်ပေးနိုင်လိမ့်မည်” ဟု ဗီယက်နမ်အာဏာရ ကွန်မြူနစ်ပါတီ အထွေထွေအတွင်းရေးမှူး To Lam က ပြီးခဲ့သည့်အပတ်က လွှတ်တော်သို့ ပြောကြားခဲ့သည်။

ရင်းနှီးမြုပ်နှံသူများ၊ သံတမန်များနှင့် တာဝန်ရှိသူများက အဆိုပါ အစီအစဉ်ကို ကျယ်ကျယ်ပြန့်ပြန့် ကြိုဆိုခဲ့ကြသော်လည်း နိုင်ငံခြားရင်းနှီးမြုပ်နှံမှု များကို ကြီးကြီးမားမားမှီခို နေရသည့် ဒေသတွင်းစက်မှုဗဟိုဖြစ်သည့် ဗီယက်နမ်နိုင်ငံတွင် ရေတိုကာလအတွင်း စီမံခန့်ခွဲရေးဆိုင်ရာ ကြန့်ကြာမှု အချို့ကို ကြုံတွေ့လာရဖွယ်ရှိသည်။

ပြုပြင်ပြောင်းလဲမှုသည် စီမံကိန်းအတည်ပြုချက်အပေါ် သက်ရောက်မှု ရှိမည်မဟုတ်ကြောင်း အစိုးရက ပြောကြားခဲ့သည်။

စီမံကိန်းနှင့် ရင်းနှီးမြှုပ်နှံမှုဝန်ကြီးဌာနသည် နိုင်ငံခြားရင်းနှီးမြှုပ်နှံမှု စီမံကိန်းများကို အတည်ပြုပေးမည့် ဘဏ္ဍာရေးဝန်ကြီးဌာနနှင့် ပူးပေါင်းမည်ဖြစ်ပြီး ပို့ဆောင်ရေးဝန်ကြီးဌာနနှင့် ဆောက်လုပ်ရေးဝန်ကြီးဌာနတို့ ပေါင်းစည်းမည်ဖြစ်သည်။

ထို့အပြင် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် စိုက်ပျိုးရေးဝန်ကြီးဌာနတို့လည်း ပေါင်းစည်းမည်ဖြစ်သည်။ လက်ရှိ ရင်းနှီးမြှုပ်နှံမှုဝန်ကြီး အပါအဝင် ဒုတိယ၀န်ကြီးချုပ် အသစ်နှစ်ဦးကို ခန့်အပ်ရန် လွှတ်တော်ကိုယ်စားလှယ်များက ယင်းနေ့တွင် အတည်ပြုခဲ့သည်။ ထို့ကြောင့် ဒုတိယဝန်ကြီးချုပ် အရေအတွက်သည် ငါးဦးမှ ခုနစ်ဦး အထိ တိုးလာမည်ဖြစ်သည်။

ဝန်ကြီးဌာနများ ပြင်ဆင်ဖွဲ့စည်းမှုသည် နိုင်ငံ့ဝန်ထမ်းပေါင်း ၁၀၀,၀၀၀ ကို ထိခိုက်စေနိုင်သည်ဟု ပြီးခဲ့သည့်လတွင် ဗီယက်နမ်နိုင်ငံပိုင် မီဒီယာက ဖော်ပြခဲ့သည်။

“စွမ်းဆောင်ရည်ညံ့ဖျင်းသည့် ဝန်ထမ်းများကို စနစ်ကနေ ဖယ်ရှားရမည် ဖြစ်ကြောင်း” ဒုတိယဝန်ကြီးချုပ် ငုယင်ဟွာဘင်း၏ ပြောကြားချက်ကို ကိုးကား၍ ဖော်ပြခဲ့ခြင်းဖြစ်သည်။

ကိုးကား-Reuters

ငြိမ်းချမ်းရေးအကြောင်းပြကာ ယူကရိန်း ပိုင်နက်အတွင်း NATO အဖွဲ့ဝင်နိုင်ငံများမှ တပ်ဖြန့်ထားရေးသဘောတူညီမှုအား လက်မခံကြောင်း ရုရှားနိုင်ငံခြားရေးဝန်ကြီးက သတိပေးလိုက်သည်။

ဆော်ဒီအာရေးဗီးယားတွင် ပြုလုပ်ခဲ့သည့် အမေရိကန်နှင့် ယူကရိန်း ရုရှားစစ်ပွဲ အဆုံးသတ်ရေးဆွေးနွေးပွဲအပြီးတွင် ရုရှားနိုင်ငံခြားရေး ဝန်ကြီး ဆာဂေးလက်ဗ်ရော့ဗ်က ယခုလိုပြောဆိုခဲ့ခြင်းဖြစ်သည်။ 

ယူကရိန်းတွင် အခြားနိုင်ငံများ၏ အလံအောက်မှ စစ်တပ်တချို့ ရောက်ရှိ နေရုံဖြင့် အခြေအနေ ကွာခြားသွားမည်မဟုတ်ဘဲ လုံးဝ လက်ခံမည်မဟုတ်ကြောင်း ၄င်းကဆိုသည်။

ပြီးခဲ့သည့်ရက်ပိုင်းက ဗြိတိန်ဝန်ကြီးချုပ် ကီယာစတာမာက ယူကရိန်းမြေပေါ်တွင် ဗြိတိန်အပါအဝင် နေတိုးအဖွဲ့ဝင်နိုင်ငံများမှ စစ်တပ်များ တပ်ဖြန့်ချထားရန် အဆင်သင့်ရှိကြောင်း ပြောဆိုခဲ့ပြီးနောက် ရုရှား နိုင်ငံခြား ရေးဝန်ကြီးက တုန့်ပြန်ခဲ့ခြင်းဖြစ်သည်။

ရုရှားနိုင်ငံက ယူကရိန်းနိုင်ငံသို့ အထူးစစ်ဆင်ရေးမဖော်ဆောင်မီ ယူကရိန်း သမ္မတ ဇီလန်စကီး၏ နေတိုးအဖွဲ့ဝင်ဖြစ်ရေး ကြိုးပမ်းမှုအား အကြိမ်ကြိမ် သတိပေးခဲ့ကြောင်း သတင်းများအရ သိရှိရပါသည်။

ကိုးကား- ဒေသတွင်းမီဒီယာ

Photo: Euractiv

ပြင်သစ်နိုင်ငံ ပါရီမြို့တွင် အရေးပေါ် ပြုလုပ်နေသော ပဲရစ် လုံခြုံရေးညီလာခံတွင် ဥရောပခေါင်းဆောင်များက ယူကရိန်းအတွက် လုံခြုံရေးအာမခံချက်ပေးရန် ဦးဆောင် လုပ်ဆောင်သွားရန် ဆန္ဒရှိကြောင်း ဆုံးဖြတ်ခဲ့ကြသည်။

အမေရိကန်သမ္မတနှင့် ရုရှားသမ္မတတို့၏ ယူကရိန်းအရေး စေ့စပ်ညှိနှိုင်းရန် ဥရောပကို ဖယ်ရှားထားမှုအပေါ် အမေရိကန်နှင့် ရုရှား ထိပ်တန်း ကိုယ်စားလှယ်များ ဆော်ဒီ၌ ရှေ့ပြေးတွေ့ဆုံဆွေးနွေးချိန်နှင့် ကိုက်ညီ၍ ပြုလုပ်သည့် ပဲရစ်အစည်းအဝေးတွင် ယူကရိန်းအတွက် စစ်ရေးအကူအညီများ ပိုမိုထောက်ပံ့နိုင်ရန်နှင့် လုံခြုံရေးအတွက် လိုအပ်သည့် ရင်းနှီးမြှုပ်နှံမှုများ ဆောင်ရွက်ပေးသွားရန် သဘောတူညီခဲ့ကြကြောင်း နေတိုးအကြီးအကဲ Mark Rutte က ပြောကြားထားပါသည်။

ကိုးကား-TASS

Photo: UNITED24 Media