ဘန်ကောက်တွင် သေနတ်ဖြင့်ပစ်ခတ်မှုဖြစ်ပွားခဲ့ပြီး လူ ၆ ဦး သေဆုံး

ထိုင်းနိုင်ငံ၏မြို့တော် ဘန်ကောက်ရှိ လူစည်ကားသော ဈေးတစ်ခုတွင် ပစ်ခတ်မှုဖြစ်ပွားခဲ့ပြီး ပစ်ခတ်သူအပါအဝင် လူ ၆ ဦး သေဆုံးကာ ပစ်ခတ်သူကိုယ်တိုင်လည်း ကိုယ့်ကိုယ်ကို အဆုံးစီရင်ခဲ့သည်။

ယနေ့ (ဇူလိုင် ၂၈) တွင် ဘန်ကောက်မြို့ ချာတုချက် (Chatuchak) ခရိုင် ရှိ အော်တော်ကော်ဈေး (Or Tor Kor Market) အတွင်း အဆိုပါပစ်ခတ်မှု ဖြစ်ပွားခဲ့ခြင်းဖြစ်ပြီး အဆိုပါဈေးသည် အဓိကအားဖြင့် စိုက်ပျိုးရေး ထွက်ကုန်များ ရောင်းချသောနေရာဖြစ်ကာ ခရီးသွားဧည့်သည်များ လာရောက်လည်ပတ်လေ့ရှိသော နေရာလည်းဖြစ်သည်။ ယင်းဖြစ်စဉ်တွင် ခရီးသွားဧည့်သည်များ ထိခိုက်ဒဏ်ရာရခြင်း မရှိခဲ့ပေ။

လူမှုကွန်ရက်ပေါ်တွင် မျှဝေထားသော ဗီဒီယိုတွင် လက်နက်ကိုင် အမျိုးသားတစ်ဦးသည် ဖြစ်စဉ်ဖြစ်ရာနေရာတွင် လှည့်ပတ်သွားလာနေ ခဲ့ပြီး လူများစွာ အထိတ်တလန့်ဖြစ်ကာ ပုန်းရှောင်ရန် ပြေးလွှားနေကြ သည်ကို တွေ့ရသည်။ ဘန်ကောက်ရဲတပ်ဖွဲ့မှ အရာရှိ Worapat Sukthai က အဆိုပါဖြစ်စဉ်တွင် သံသယရှိသူသည် ဈေးအတွင်းရှိနေသော လူအချို့အား သေနတ်ဖြင့် ပစ်ခတ်ခဲ့ပြီး ၎င်းသည်လည်း ကိုယ့်ကိုယ်ကို အဆုံးစီရင်ခဲ့ကြောင်း ပြောကြားခဲ့သည်။ ယင်းဖြစ်စဉ်တွင် လုံခြုံရေး ဝန်ထမ်း ၄ ဦး၊ ဈေးရောင်းသူ ၁ ဦးနှင့် ပစ်ခတ်သူအပါအဝင် လူ ၆ ဦး သေဆုံးခဲ့ပြီး ၃ ဦး ဒဏ်ရာရရှိခဲ့သည်။

Worapat Sukthai က ပစ်ခတ်သူ၏ ကိုယ်ရေးရာဇဝင်နှင့် ရည်ရွယ်ချက် ကို စုံစမ်းစစ်ဆေးနေပြီး ထိုင်း-ကမ္ဘောဒီးယား နယ်စပ်တိုက်ပွဲနှင့် ဆက်စပ်မှု ရှိ/ မရှိကိုလည်း စစ်ဆေးသုံးသပ်လျက်ရှိကြောင်း ဖြည့်စွက်ပြောကြား ခဲ့သည်။

ထိုင်းနိုင်ငံတွင် သေနတ်ပစ်ခတ်မှုများသည် ရှားပါးသည့် အဖြစ်အပျက်မျိုး မဟုတ်ဘဲ ဥပဒေစည်းမျဉ်းများ လျော့ရဲသောကြောင့် သေနတ် ပိုင်ဆိုင်ခွင့် ကို လွယ်ကူစွာ ရရှိနိုင်သည်။ ၂၀၂၃ ခုနှစ် အောက်တိုဘာလက ဘန်ကောက် မြို့လယ်ရှိ ဈေးတစ်ခုတွင် အသက် ၁၄ နှစ်အရွယ် လူငယ်တစ်ဦးက သေနတ်ဖြင့် လူ ၂ ဦးကို ပစ်ခတ်သတ်ဖြတ်ကာ ၅ ဦး ဒဏ်ရာ ရစေ ခဲ့သည်။

၂၀၂၂ ခုနှစ် အတွင်းတွင်လည်း ထိုင်းအရှေ့ပိုင်းရှိ မူကြိုကျောင်း တစ်ခု တွင် ရဲတပ်ဖွဲ့ဝင်ဟောင်း တစ်ဦးက သေနတ်နှင့်ဓားတို့ဖြင့် ပစ်ခတ် တိုက်ခိုက်မှုပြုလုပ်ခဲ့ခြင်းကြောင့် ကလေး ၂၂ ဦးအပါအဝင် လူ ၃၆ ဦး သေဆုံးခဲ့ရသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂