တောင်ကိုရီးယား၊ ဂျပန်နှင့်အမေရိကန်တို့၏ သုံးနိုင်ငံပူးတွဲစစ်ရေးလေ့ကျင့်မှုကို မြောက်ကိုရီးယားပြစ်တင်ရှုတ်ချ

တောင်ကိုရီးယား၊ ဂျပန်နှင့်အမေရိကန်ပြည်ထောင်စုတို့ကြား ယခုရက်သတ္တပတ်အတွင်းက လုပ်ဆောင်ခဲ့သည့် ပူးတွဲစစ်ရေး လေ့ကျင့်မှုအား မြောက်ကိုရီးယားနိုင်ငံက ဇန်နဝါရီလ  ၁၇  ရက်တွင် ပြစ်တင် ရှုတ်ချခဲ့ကြောင်းသိရသည်။

အဆိုပါ ပူးတွဲစစ်ရေး လေ့ကျင့်မှုသည် နိုင်ငံအပေါ်ခြိမ်းခြောက်မှု ဖြစ်သည့်အတွက် မြောက်ကိုရီးယားအနေဖြင့်  မိမိကိုယ်ကို ကာကွယ်ရေးအတွက် စစ်ရေးလေ့ကျင့်မှုကို လုပ်ဆောင်နိုင်သည့်အခွင့်အရေးရှိကြောင်း  မြောက်ကိုရီးယားနိုင်ငံက ပြောသည်။

တောင်ကိုရီးယား၊ ဂျပန်နှင့်အမေရိကန်ပြည်ထောင်စုသုံးနိုင်ငံကြား လုပ်ဆောင်သည့် ပူးတွဲစစ်ရေးလေ့ကျင့်မှုသည် အသံထက်မြန်သည့် ဒုံးကျည်စနစ်သစ်တစ်ခုနှင့် တာတိုပစ်ဒုံးကျည်များကို  မြောက်ကိုရီးယားက စမ်းသပ်ပစ်ခတ်ခဲ့သည်ဟု အဆိုပါသုံးနိုင်ငံက ပြောကြားပြီးနောက် လုပ်ဆောင်ခဲ့ခြင်းဖြစ်သည်။ သုံးနိုင်ငံကြား လုပ်ဆောင်ခဲ့သည့်   ပူးတွဲစစ်ရေး လေ့ကျင့်မှုတွင် အမေရိကန် B-1B အမျိုးအစားအကြီးစား ဗုံးကြဲလေယာဉ်နှစ်စင်းက  ဇန်နဝါရီလ ၁၆ ရက်တွင် ကိုရီးယားကျွန်းဆွယ်ပေါ်၌ ပျံသန်းလေ့ကျင့်ခဲ့ကြောင်း သိရသည်။

သုံးနိုင်ငံ ပူးတွဲစစ်ရေးလေ့ကျင့်မှုနှင့် စပ်လျဉ်း၍  မြောက်ကိုရီးယားနိုင်ငံက အလွန်အမင်းစိုးရိမ်လျက်ရှိကြောင်း၊ ထို့ကြောင့် နိုင်ငံ၏လုံခြုံရေး အကျိုးစီးပွားကို  ကာကွယ်နိုင်ရန်အတွက် စစ်ရေးလေ့ကျင့်မှုလုပ်ဆောင်ရန် အခွင့်အရေးရှိကြောင်း  မြောက်ကိုရီးယားနိုင်ငံခြားရေးဝန်ကြီးဌာန၏ ပြောကြားချက်ကို ကိုးကား၍ KCNA သတင်းအေဂျင်စီက ဇန်နဝါရီလ ၁၇   ရက်တွင်  ဖော်ပြထားကြောင်း သိရသည်။                                   

 Ref: ST

Source: Myawady Web Portal