သတ္ထုရင်းမြစ်များ အသုံးပြုခွင့်မပေးပါက Starlink ဝန်ဆောင်မှု ရပ်ဆိုင်းမည်ဟု အမေရိကန်ပြော

အမေရိကန်တာဝန်ရှိသူများက ယူကရိန်းသည် ၎င်း၏ သတ္တုရင်းမြစ်များကို အသုံးပြုခွင့်မပေးပါက Elon Musk ၏ Starlink အင်တာနက် စနစ်အသုံးပြုခွင့်ကို တားဆီးနိုင်ကြောင်း သတိပေးခဲ့သည်ဟု အမေရိကန် တာဝန်ရှိသူ ၃ ဦး၏ပြောကြားချက်ကို ကိုးကား၍ ရိုက်တာသတင်းဌာနက ဖေဖော်ဝါရီ ၂၂ ရက်တွင် ဖော်ပြခဲ့သည်။

အမေရိကန်သမ္မတ Donald Trump ၏ အဓိကမဟာမိတ်ဖြစ်သူ Musk သည် ၂၀၂၂ ခုနှစ်ကတည်းက အင်တာနက်စနစ် ၄၀,၀၀၀ ကျော် လှူဒါန်းခဲ့ပြီး ယင်းတို့ကို ယူကရိန်းတပ်များက စစ်မြေပြင်တွင် ကျယ်ကျယ် ပြန့်ပြန့် အသုံးပြုခဲ့သည်။

ရိုက်တာ၏ဖော်ပြချက်အရ သတ္တုရင်းမြစ်များနှင့် ပတ်သက်သည့် သဘောတူညီချက်ကို အမေရိကန်နှင့် လက်မှတ်မထိုးပါက Starlink ၏ ဂြိုလ်တုဝန်ဆောင်မှုကို “ချက်ချင်းပိတ်သိမ်းခြင်း” နှင့် ရင်ဆိုင်ရမည်ဟု ယူကရိန်းခေါင်းဆောင် Vladimir Zelensky နှင့် Trump ၏ ကိုယ်စားလှယ် Keith Kellogg တို့အကြား ဖေဖော်ဝါရီ ၂၀ ရက်နေ့က ယူကရိန်းမြို့တော် Kiev တွင် ကျင်းပသော အစည်းအဝေးတစ်ခု၌ Kellogg က ယူကရိန်းတို့အား ပြောကြားခဲ့သည်။

ယူကရိန်းသည် Starlink အပေါ်တွင် များစွာမှီခိုနေရပြီး ထိုဝန်ဆောင်မှုကို ဆုံးရှုံးခြင်းသည် “ကြီးမားသောထိခိုက်မှုတစ်ခု ဖြစ်လိမ့်မည်” ဟု ဖြည့်စွက်ပြောကြားခဲ့သည်။ အမေရိကန်ထံမှ နောက်ထပ်စစ်ရေး အကူအညီများရရှိရန် ကြိုးပမ်းမှုတစ်ခုအနေဖြင့် Zelensky သည် ရှားပါးသတ္တုများအပါအဝင် ယူကရိန်း၏ သယံဇာတများကို Trump ထံ ပဏာမ ချပြခဲ့သော်လည်း အမေရိကန်ကို နိုင်ငံ၏သတ္တုသယံဇာတကြွယ်ဝမှု၏ ၅၀% ပိုင်ဆိုင်ခွင့်ပေးမည့် သဘောတူညီချက်ကို လက်မှတ်ထိုးရန် ၎င်းက ငြင်းဆန်ခဲ့သည်။ 

Zelensky က ၎င်း၏ ရှားပါးသတ္တုသိုက်များ၏ တစ်ဝက်ခန့်သည် ရုရှားတို့၏ သိမ်းပိုက်ခြင်းခံရသည် ဟု ယခုလအစောပိုင်းတွင် ဝန်ခံ ပြောကြားခဲ့ပြီး ယူကရိန်းတွင် “သေးငယ်သော scandium သတ္တုတွင်းများမှလွဲ၍ အရေးပါသော ရှားပါးသတ္တုသိုက်များ မရှိကြောင်း” Javier Blas က Bloomberg တွင်ရေးသားဖော်ပြခဲ့သည်။ 

ကိုးကား-RT