ဗိဿနိုး ရှေးဟောင်းသုတေသနပြတိုက် ပုံမှန်ဖွင့်လှစ်လျက်ရှိ
တောင်တွင်းကြီး ဖေဖော်ဝါရီ ၂၅
မကွေးတိုင်းဒေသကြီး၊ တောင်တွင်းကြီးမြို့နယ်၏ အနောက်ဘက် ၁၂ မိုင်ခန့် အကွာ ကမ္ဘာ့အမွေအနှစ်စာရင်းဝင် ဗိဿနိုး ရှေးဟောင်းယဉ်ကျေးမှုနယ်မြေရှိ ဗိဿနိုး ရှေးဟောင်းသုတေသနပြတိုက်ကို ပုံမှန် ဖွင့်လှစ်လျက် ရှိကြောင်း သိရသည်။ ထိုပြတိုက်ကို၂၀၀၄ ခုနှစ်၊ ဇူလိုင်လ ၁၂ ရက်တွင် ပန္နက်တင်ဆောက်လုပ်ပြီး ၂၀၀၇ ခုနှစ်၊ နိုဝင်ဘာလ ၃၀ ရက်တွင် ဆောက်လုပ်ပြီးစီး ခဲ့ပြီး ၂၀၀၈ ခုနှစ် စက်တင်ဘာလ ၁ ရက် တွင် အများပြည်သူ ဝင်ရောက်လေ့လာ နိုင်ရန် စတင်ဖွင့်လှစ်ပြသခဲ့ခြင်းဖြစ်သည်။
အဆိုပါဗိဿနိုးရှေးဟောင်းသုတေသန ပြတိုက်အတွင်း၌ ကျောက်ခေတ်၊ သံခေတ်၊ ကြေးခေတ်ပြကွက်များ၊ ကျောက်ဖြစ် ရုပ်ကြွင်းပြကွက်များ၊ ဓလေ့ရိုးရာနေအိမ် ပုံစံငယ်၊ ဗိဿနိုးမြို့ဟောင်းမြေပုံ၊ ဗိဿနိုး မြို့ဟောင်းသမိုင်းအကျဉ်း၊ ပျူတို့၏ ထင်ရှားသောအမှတ်လက္ခဏာများ၊ ဗိဿနိုး မြို့ဟောင်းဝန်းကျင်ဒေသရှိ သမိုင်းမတင်မီ ခေတ်အထောက်အထားများ၊ ဗိဿနိုးမြို့ဟောင်းမှ တူးဖော်တွေ့ရှိရသော စာပေဆိုင်ရာ အထောက်အထားများ၊ ပျူစာပေ အရေးအသား၊ ပျူခေတ်အုတ်များ၊ ရေစင် တော်သွန်းအိုး၊ ကြေးဗုဒ္ဓဆင်းတု၊ ငှက် ရုပ်ပုံအရိုးအိုး၊ အရိုးအိုးမြှုပ်နှံမှုဆိုင်ရာ အဆောက်အအုံပုံစံငယ်၊ တော်ဝင်ဗိသုကာ အထောက်အထားများ၊ မြို့ရိုးနှင့် အရန် အတား(ပုံစံငယ်)၊ သပိတ်ပုံအရိုးအိုး၊ ပျူဒင်္ဂါးများ၊ ပျူပုတီးစေ့များ စသည့်တူးဖော်တွေ့ရှိမှု သမိုင်းဆိုင်ရာ အထောက်အထား များကို စိတ်ဝင်စားဖွယ်ရာ ခင်းကျင်းပြသထားသည်။
နောင်နောင်(ဗိဿနိုးမြေ)
Source: Myawady Daily Newspaper
