ထိုင်းနိုင်ငံက ခရီးသွားလုပ်ငန်းကို မြှင့်တင်ရန် 'နွေရာသီပွဲတော်များ' ကို စတင်

ထိုင်းအစိုးရသည် မတ်လမှ စက်တင်ဘာလအထိ စီစဉ်ထားသော ပွဲတော်များစွာမှတစ်ဆင့် ခရီးသွားလုပ်ငန်းနှင့် ဆက်စပ်စီးပွားရေး အခွင့်အလမ်းများ မြှင့်တင်ရန် ရည်ရွယ်သည့် "Thailand Summer Festivals" ကမ်ပိန်းကို ကြေညာခဲ့သည်။

ထိုင်းဝန်ကြီးချုပ် Paetongtarn Shinawatra သည် ဖေဖော်ဝါရီ ၂၆ ရက်နေ့တွင် Government House ၌ကျင်းပသည့် အခမ်းအနားကို ဦးဆောင်တက်ရောက်ခဲ့သည်။ "7 Months 7 Wonders Summer Festivals" ဆောင်ပုဒ်ဖြင့် ကမ်ပိန်းသည် Songkran၊ ယဉ်ကျေးမှု၊ ဂီတ၊ အားကစား၊ အစားအသောက်နှင့် အနုပညာနှင့်ဖန်တီးမှု ပွဲတော်များ ဟူသော အစီအစဉ် ၇ ခုကို အလေးပေးဖော်ပြ ဆွဲဆောင်ထားသည်။

ပေထုံတန်က သူမ၏မိန့်ခွန်းတွင် ထိုင်းအစိုးရသည် ခရီးသွားလုပ်ငန်းကို ထိုင်းစီးပွားရေး၏ အခြေခံအုတ်မြစ်အဖြစ်ပြုလုပ်ရန် ကတိပြုထားကြောင်း နှင့် ၎င်းသည် ဂျီဒီပီ၏ ၁၄% ကျော်ကို ပံ့ပိုးပေးလျက်ရှိကြောင်း ပြောကြား ခဲ့သည်။

ထို့အပြင် ကမ်ပိန်း၌ မတူညီသောလူနေမှုပုံစံများကို ဖြည့်ဆည်းပေးသည့် ပွဲတော်များနှင့် လှုပ်ရှားမှုများပါဝင်မည်ဖြစ်ပြီး ခရီးသွား ဧည့်သည်များကို မြို့ကြီးများနှင့် လူသိများသော ဆွဲဆောင်မှုများအပါအဝင် ဒေသအားလုံးသို့ ဆွဲဆောင်ရန် ရည်ရွယ်ထားကြောင်း၊ ထို့ကြောင့် တစ်နိုင်ငံလုံး အတိုင်းအတာဖြင့် မျှတသောဝင်ငွေခွဲဝေမှုကို သေချာစေမည် ဖြစ်ကြောင်း သူမက ဖြည့်စွက်ပြောကြားခဲ့သည်။

ထိုင်းနိုင်ငံ၏ အထင်ကရပွဲတော်များအနက်မှ တစ်ခုမှာ ဘန်ကောက်မြို့ Sanam Luang တွင် ဧပြီလ ၁၁ ရက်မှ ၁၅ ရက်အထိ ကျင်းပမည့် Maha Songkran World Water Festival 2025 ဖြစ်သည်။ အဆိုပါပွဲတော် Songkran ကို UNESCO ၏ ဒြပ်မဲ့ယဉ်ကျေးမှုအမွေအနှစ်အဖြစ် အသိအမှတ် ပြုခံရခြင်းအား ဂုဏ်ပြုကာ ဆက်လက်ကျင်းပနေဆဲဖြစ်ပြီး ကမ္ဘာလုံး ဆိုင်ရာပွဲတော်တစ်ခုဖြစ်လာစေရန် ရည်မှန်းထားသည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂