ဂျပန်နိုင်ငံရှိ တက္ကသိုလ်တစ်ခုတွင် အိမ်ထောင်သည်စုံတွဲတစ်တွဲက တက္ကသိုလ်နှင့်ဌာနမှူးကို တရားစွဲဆို

ဂျပန်နိုင်ငံရှိ တက္ကသိုလ်တစ်ခုတွင် အိမ်ထောင်သည်စုံတွဲတစ်တွဲက အိမ်ထောင်သည်များကို ခန့်ထားခြင်းမရှိဟူသော စည်းမျဉ်းကိုကန့်ကွက်ပြီး တက္ကသိုလ်နှင့်ဌာနမှူးကို တရားစွဲဆိုခဲ့ကြောင်း တရားရုံးက မတ်လ ၁၃ ရက်နေ့တွင် ပြောကြားခဲ့သည်။ ၎င်းစုံတွဲသည် အိမ်ထောင်ပြုပြီးနောက် ခင်ပွန်းသည်ကိုသာ တက္ကသိုလ်၌ ဆက်လက် ထမ်းဆောင် ခွင့်ပြုခဲ့သည်ဟု သတင်းများအရသိရသည်။

ခင်ပွန်းသည် သည် ဥပဒေပါမောက္ခဖြစ်ပြီး ဇူလိုင်လတွင် ၎င်းတို့ အိမ်ထောင် ပြုချိန်၌ တောင်ပိုင်းဂျပန်ရှိ Miyazaki Sangyo-keiei တက္ကသိုလ်မှ ဌာနမှူးအား အသိပေးခဲ့ကြောင်း ဒေသတွင်းသတင်းမီဒီယာများက ဖော်ပြ ခဲ့သည်။

သို့သော် ဌာနမှူးက အမျိုးသမီး၏အလုပ်စာချုပ်ကို မတ်လကုန်တွင် ရပ်ဆိုင်းမည်ဟု ပြောကြားခဲ့သည်ဟု စုံတွဲ၏ ရှေ့နေ၏ပြောဆိုမှုကို ကိုးကားပြီး Asahi media က ဖော်ပြခဲ့သည်။

အဆိုပါတက္ကသိုလ်သည် သေးငယ်သောအဖွဲ့အစည်းဖြစ်သည့်အတွက် အိမ်ထောင်စုံတွဲနှစ်ဦးကို အလုပ်မခန့်ထားရန် တရားဝင်ထုတ်ပြန် မထားသော စည်းမျဉ်းရှိကြောင်း NHK ရုပ်သံကပြောကြားခဲ့သည်။

Miyazaki ခရိုင်တရားရုံးက လွန်ခဲ့သောလတွင် တက္ကသိုလ်နှင့်ဌာနမှူးကို တရားစွဲဆိုမှုတင်သွင်းခဲ့ကြောင်း အတည်ပြုခဲ့သည်။

ဒေသတွင်း သတင်းဌာနများ၏အဆိုအရ စုံတွဲသည် တက္ကသိုလ်၏ ဥပဒေ ဌာနတွင်အလုပ်ဆက်လက်လုပ်ကိုင်နိုင်ရန် အိမ်ထောင်ကွာရှင်းရန်ပင် ရွေးချယ်ခဲ့ကြသည်။

ထိုအချိန်တွင်ပင် အမျိုးသားကို တွဲဘက်ပါမောက္ခအဖြစ် ရာထူးလျှော့ချခံခဲ့ရပြီး အမျိုးသမီးမှာ လက်ထောက်ပါမောက္ခအဖြစ်မှ စာရင်းကိုင်အဖြစ်သို့ ပြောင်းလဲခံခဲ့ရကာစုံတွဲသည် ၎င်းတို့၏ယခင်ရာထူးများကို ပြန်လည် ရရှိရန်တောင်းဆိုနေသည်။

“အမျိုးသမီးများ ပညာတတ်များပြားသော်လည်း ဂျပန်နိုင်ငံသည် ၂၀၂၄ ကမ္ဘာ့စီးပွားရေးဖိုရမ်၏ ကမ္ဘာလုံးဆိုင်ရာ ကျားမ ကွာဟမှု အစီရင်ခံစာတွင် ၁၄၆ နိုင်ငံအနက် ၁၁၈ နေရာတွင်သာရှိပြီး ဂျပန်စီးပွားရေးနှင့် နိုင်ငံရေးတွင် အမျိုးသမီးခေါင်းဆောင်များမှာ ရှားပါးနေဆဲဖြစ်သည်။”

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂