ဝန်ကြီးချုပ်ဟောင်း ယင်လပ်ရှင်နာဝတ်ထရာနှင့် သွားတွေ့ခဲ့ခြင်းမဟုတ်ဟု ထိုင်းဝန်ကြီးချုပ် ပေထုန်တန် ရှင်နာဝတ်ထရာ ငြင်းဆို

ထိုင်းဝန်ကြီးချုပ် ပေထုန်တန် ရှင်နာဝတ်ထရာက ၎င်း၏ ဗြိတိန်နှင့် မိုနာကိုသို့ မကြာသေးမီက သွားရောက်ခဲ့သည့် ခရီးစဉ်များနှင့် ပတ်သက်ပြီးဝေဖန်မှုများရှိနေခဲ့ခြင်းကို တနင်္ဂနွေနေ့ (မေလ ၂၅ ရက်) က ရှင်းလင်းချက် ထုတ်ပြန်သွားပါသည်။ အဆိုပါ လည်ပတ်မှုသည် ပြည်သူ့ငွေကြေးဖြင့် သီးသန့်အားလပ်ရက်များတွင် သွားရောက်ခဲ့ခြင်း ဖြစ်ကြောင်း စွပ်စွဲချက်များကို ငြင်းဆိုခဲ့ပါသည်။

ဘန်ကောက်မြို့၊ ဒွန်မောင်းမြို့နယ်ရှိ ထိုင်းတော်ဝင်လေတပ် အခြေစိုက်စခန်း၏ Wing 6 တွင် ပြောကြားရာတွင် ၎င်းနှင့် ဝန်ကြီးချုပ်ဟောင်း ယင်လပ်ရှင်နာဝတ်ထရာတို့နှင့်အတူ တွဲရိုက်ထားသည့် အွန်လိုင်းပေါ်တွင် တင်ထားသော ဓာတ်ပုံတစ်ပုံမှာ ယခုခရီးစဉ်အတွင်း ရိုက်ကူးထားခြင်းမဟုတ်ဘဲ ဓာတ်ပုံအဟောင်းသာဖြစ်ကြောင်း ပြောကြားခဲ့ပါသည်။ 

ဓာတ်ပုံထဲမှ သူမ၏ဆံပင်ပုံစံကို ဆန်းစစ်ပြီး လက်ရှိပုံစံနှင့် နှိုင်းယှဉ်မေးမြန်းသည့်အကြောင်းကို လူမှုမီဒီယာ အသုံးပြုသူများက မေးမြန်းသည့်အခါ ပေထုန်တန်က ထင်ကြေးပေးမှုများကို ဟာသဖြင့် ပယ်ချခဲ့ပါသည်။ “ကျွန်မရဲ့ဆံပင်ကို အကြိမ်တိုင်း ဒီလိုပဲခွဲလိုက်တာက ဘာကိုမှ သက်သေမပြနိုင်ဘူးလား။ တကယ်ပဲ ကျွန်မသွားခဲ့သည့် ခရီးစဉ်အတွင်းမှာ ယင်လပ်နှင့် မတွေ့ခဲ့ပါဘူး” ဟု ပြတ်ပြတ်သားသား ငြင်းဆိုခဲ့ပါသည်။

ဝန်ကြီးချုပ်ဟောင်း ယင်လပ်ကို အစိုးရဌာနအချင်းချင်း ဆန်ဈေးတင် ရောင်းချမှုဖြင့် ဗဟိုတရားရုံးက ဘတ်ငွေ သန်း ၁၀၀၀ လျော်ကြေးပေးရန် လွန်ခဲ့သည့် သီတင်းပတ်က အမိန့်ချခဲ့ပါသည်။ ပေထုန်တန်က ယင်လပ်နှင့် အဆက်အသွယ်ရှိခြင်းကိုမူ မငြင်းဆိုခဲ့ပေ။ 

“ကျွန်မ ယင်လပ်နှင့် ဖုန်းအဆက်အသွယ်ရှိသလို သက်ဆင်နှင့်လည်း အဆက်အသွယ်ရှိပါတယ်။ သက်ဆင်က ထိုင်းနိုင်ငံမှာပဲ ရှိပါတယ်။ ရဲ အထွေထွေ ဆေးရုံမှာ ဆေးကုသခံနေပါတယ်။ ဝန်ကြီးချုပ် အိမ်ရာမှာ နေထိုင်ပါတယ်။ သူဘယ်မှ မသွားပါဘူး။ ကျွန်မ ယူကေကိုသွားတာက အဲဒီမှာ ကျောင်းတက်နေသည့် ကျွန်မရဲ့ ကလေးတွေကို သွားကြည့်တာပါ။ လိုင်းပေါ်မှာ ကျွန်မနှင့် ပတ်သက်ပြီးတင်သည့် သတင်းအများစုက အမှားတွေ များပါတယ်။ ကျွန်မ အလုပ်ကို ကြိုးကြိုးစားစား လုပ်နေပါတယ်။ ကျွန်မနှင့်ပတ်သက်ပြီး ပြည်သူတွေ စိတ်မသက်မသာဖြစ်တယ်ဆိုရင် တိုက်ရိုက်မေးနိုင်ပါတယ်။ လမ်းဖွင့်ထားပါတယ်။ အခုလို ဖြေရှင်းခွင့်ရတာ ဝမ်းသာပါတယ်” ဟု ပြောသွားပါသည်။

ကိုးကား- MNP