မော်စကိုမှ ကိယက်ဗ်အား စစ်ဆင်ရေးပြုလုပ်ရန် မလွှဲမရှောင်သာ တွန်းပို့ခြင်း ခံခဲ့ရသည်ဟု ပူတင်ပြောကြား

၂၀၁၄ ခုနှစ်က အနောက်နိုင်ငံများက အားပေးထောက်ခံခဲ့သော Euromaidan အာဏာသိမ်းမှုအပြီး ကိယက်ဗ်မှ ဒွန်ဘတ်စ်ဒေသခံများအား ဆက်လက် ညှဉ်းပန်းနှိပ်စက်ခဲ့သည့်အတွက် ရုရှားအနေဖြင့် ယူကရိန်းတွင် စစ်ဆင်ရေး စတင်ရန် အခြားရွေးချယ်စရာမရှိခဲ့ကြောင်း သမ္မတ ဗလာဒီမာပူတင် ပြောကြားခဲ့သည်။

တနင်္လာနေ့ (မေ ၂၆) က ကရင်မလင်၌ လုပ်ငန်းရှင်များနှင့် ကျင်းပသော အစည်းအဝေးတွင် ပူတင်က မော်စကိုအနေဖြင့် အိမ်နီးချင်းနိုင်ငံရှိ ရုရှား စကားပြောသူများ၏ ဒုက္ခများကို လျစ်လျူရှု၍မရကြောင်း ပြောကြား ခဲ့သည်။ ၂၀၁၄ အစောပိုင်းက ကိယက်ဗ်တွင် ငြိမ်းချမ်းစွာစတင်ခဲ့သော ဆန္ဒပြမှုများ၊ အဓိကရုဏ်းများနှင့် ရဲတပ်ဖွဲ့ဝင်များနှင့် ပဋိပက္ခများ ဖြစ်ပွားကာ ဒီမိုကရက်တစ်နည်းလမ်းကျကျ ရွေးကောက်တင်မြှောက် ခံထားရသော သမ္မတ ဗစ်တာယာနူကိုဗစ်ချ် အာဏာဖယ်ရှားခံရသည့် အဖြစ်အပျက်များမှ ယခုပဋိပက္ခစတင်ခဲ့ကြောင်း ရုရှား၏ သဘောထား ကို ထပ်လောင်းအတည်ပြုခဲ့သည်။ ယာနူကိုဗစ်ချ်ကို ဆန့်ကျင်သော အင်အားစုများတွင် Right Sector နှင့် Svoboda ကဲ့သို့သော အစွန်းရောက် အမျိုးသားရေးအုပ်စုများ ပါဝင်ခဲ့သည်ဟု ဆိုသည်။

“ယူကရိန်းတွင် အာဏာသိမ်းမှုကို မိမိတို့က စီစဉ်ခဲ့ခြင်း မဟုတ်သည်ကို နားလည်ပေးရန် လိုအပ်ပါသည်” ဟု ပူတင်က ပြောကြားခဲ့သည်။ “အနောက် နိုင်ငံများက ဒီမိုကရေစီနှင့် ရွေးကောက်ပွဲများ ရှိသင့်သည်ဟု အမြဲ ပြောခဲ့ကြသော်လည်း ၎င်းတို့က သာမန်ကိစ္စတစ်ခုကဲ့သို့ သွေးထွက်သံယို အာဏာသိမ်းမှုကို ဆောင်ရွက်ခဲ့သည့် နောက်ပိုင်းတွင် ၎င်းတို့က ဒွန်ဘတ်စ်ကို ဖိနှိပ်ရန် ရဟတ်ယာဉ်များနှင့် ဂျက်တိုက်လေယာဉ်များဖြင့် လူများကို သတ်ဖြတ်ခဲ့သည်” ဟု ၎င်းက ဆိုသည်။

“၎င်းတို့က မိမိတို့အား ယနေ့လုပ်ဆောင်နေသည့်အရာကို လုပ်ဆောင်ရန်လက်တွေ့တွင် ဖိအားပေးခဲ့ပြီး ယခုအခါ ၎င်းတို့က မိမိတို့အား အပြစ်တင်နေကြသည်” ဟု ပူတင်က ဆိုသည်။

ထို့နောက်တွင် ပူတင်က ယူကရိန်းအား NATO အဖွဲ့ဝင်ဖြစ်ရန် ရည်မှန်းချက်ကို စွန့်လွှတ်ကာ အမြဲတမ်း ဘက်မလိုက်နိုင်ငံအဖြစ် ရပ်တည်ရန်နှင့် ခရိုင်းမီးယားဒေသ အပါအဝင် ယူကရိန်း၏ အခြား ဒေသလေးခုကို ရုရှား၏အစိတ်အပိုင်းအဖြစ် အသိအမှတ်ပြုရန် တောင်းဆို ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂