ယူကရိန်းအပေါ် အကြီးအကျယ် တိုက်ခိုက်မှုများ ပြုလုပ်နေခြင်းက ရုရှား၏ “နိုင်ငံရေး ရွေးချယ်မှု” ဖြစ်ကြောင်း ဇီလန်းစကီး ပြောကြား

ယူကရိန်းအပေါ် ရုရှား၏ ၃ ရက်ဆက်တိုက် အကြီးအကျယ် တိုက်ခိုက်မှုများနှင့်ပတ်သက်၍ ယင်းမှာ ရုရှား၏ “နိုင်ငံရေး ရွေးချယ်မှု” ဖြစ်ကြောင်း နှင့် အနောက်နိုင်ငံများအနေဖြင့် ရုရှားအပေါ် ပိတ်ဆို့အရေးယူမှုများ ဆက်လက်တိုးမြှင့်လုပ်ဆောင်ရန် တိုက်တွန်းကြောင်း ယူကရိန်းသမ္မတ ဇီလန်းစကီးက မေ ၂၆ ရက်တွင် လူမှုမီဒီယာတွင် ၎င်း၏ သဘောထား ဖော်ပြခဲ့သည်။

ရုရှားစစ်တပ်က ယူကရိန်းစစ်ဘက်ဆိုင်ရာ အဆောက်အအုံများကို တိုက်ခိုက်ခြင်းသည် ယူကရိန်းက ရုရှားအရပ်သုံး အဆောက်အအုံများကို တိုက်ခိုက်သည့်အပေါ် တုံ့ပြန်ခြင်းဖြစ်ကြောင်း အဆိုပါနေ့ အစောပိုင်းတွင် ရုရှားသမ္မတ ကရင်မလင်ပြောရေးဆိုခွင့်ရှိသူ ဒီမီထရီ ပက်စ်ကော့ဗ်က မီဒီယာများထံ ပြောကြားခဲ့သည်။

၃ ရက်တာ အချိန်တိုလေးအတွင်း ရုရှားက ယူကရိန်းထံ တိုက်ခိုက်သည့် ဒရုန်း ၉၀၀ ကျော်ကို ပစ်လွှတ်ခဲ့ပြီး တစ်ချိန်တည်းမှာပင် ပဲ့ထိန်းဒုံးကျည် နှင့် ခရုဇ်ဒုံးကျည်များကိုလည်း ပစ်လွှတ်ခဲ့ကြောင်း၊ “ဒါက စစ်ရေးအရ ဘယ်လိုမှ အဓိပ္ပာယ်မရှိသော်လည်း ရုရှား၏ နိုင်ငံရေး ရွေးချယ်မှု ဖြစ်သည်မှာ သိသာပါသည်” ဟု ဇီလန်းစကီးက ဆိုရှယ်မီဒီယာတွင် ဗီဒီယိုဖြင့် မိန့်ခွန်းပြောကြားခဲ့သည်။

အမေရိကန်နှင့် ဥရောပနိုင်ငံများအနေဖြင့် ရုရှားအပေါ် ပြင်းထန်သော အရေးယူပိတ်ဆို့မှုအသစ်များ ဖော်ဆောင်ရန် ဇီလန်းစကီးက တိုက်တွန်းခဲ့သလို ရုရှားဘက်က ရုရှား-ယူကရိန်း သဘောတူညီမှုစာချွန်လွှာ မူကြမ်းရေးသားရန် အချိန်ဆွဲနေကြောင်းလည်း အရိပ်အမြွက်ပြောကြားခဲ့သည်။

ထိုနေ့တွင်ပင် ရုရှားနှင့် ထိစပ်နေသော ယူကရိန်း Sumy ပြည်နယ်အုပ်ချုပ်ရေးမှူး Oleh Hryhorov က ရုရှားစစ်တပ်သည် အဆိုပါဒေသရှိ ကျေးရွာ ၄ ခုကို ထိန်းချုပ်ထားရာ ယင်းမှာ ရုရှားဘက်က ယူကရိန်း နယ်နိမိတ်အပေါ်တွင် “ကြားခံဇုန်” တည်ဆောက်ရန် ကြိုးပမ်းနေမှု၏ တစ်စိတ်တစ်ပိုင်းဖြစ်ကြောင်း ဆိုရှယ်မီဒီယာတွင် ပြောကြားခဲ့သည်။

ထရမ့်က မေ ၂၅ ရက်တွင် ဆိုရှယ်မီဒီယာပေါ်၌ ရုရှားသမ္မတ ပူတင် “ရူးသွပ်သွားပြီ” ဟု ဝေဖန်ခဲ့ပြီး တစ်ချိန်တည်းမှာပင် “ဇီလန်းစကီး ပြောသည့် စကားတိုင်းက ပြဿနာဖြစ်အောင် လုပ်နေသည်” ဟု ပြစ်တင် ပြောဆိုသည့် ပို့စ်ကို ရေးသားဖော်ပြခဲ့သည်။ ဇီလန်းစကီးက ဗီဒီယို မိန့်ခွန်းတွင် ထရမ့်၏ ပြစ်တင်ပြောဆိုမှုအပေါ် တုံ့ပြန်မှုမပြုခဲ့ပေ။ ပက်စ် ကော့ဗ်က ထရမ့်၏ ပူတင်အပေါ် ဝေဖန်မှုမှာ “စိတ်ခံစားမှုအပေါ် အခြေခံသော တုံ့ပြန်မှု” ဟု ပြောကြားခဲ့သည်။

ရုရှား-ယူကရိန်းနိုင်ငံသည် ယခုလ ၁၆ ရက်တွင် တူကီယဲနိုင်ငံ အစ္စတန် ဘူလ်တွင် တိုက်ရိုက်စေ့စပ်ညှိနှိုင်းမှု ပြန်လည်စတင်ခဲ့ပြီး “မူအရ” ဆက်လက်၍ ထိတွေ့ဆက်ဆံမှု၊ စေ့စပ်ညှိနှိုင်းမှုပြုလုပ်ရန် ဆန္ဒရှိသည်။

နှစ်နိုင်ငံအနေဖြင့် အနာဂတ်တွင် ဖြစ်နိုင်ခြေရှိသော ငြိမ်းချမ်းရေး သဘောတူညီချက်နှင့်စပ်လျဉ်း၍ ယူကရိန်းနှင့်အတူ သုတေသနပြုကာ စာချွန်လွှာမူကြမ်းတစ်ခု ရေးဆွဲရန် အဆိုပြု၍ ပြင်ဆင်သွားမည်ဖြစ်ကြောင်း မေ ၁၉ ရက်တွင် ထရမ့်နှင့် ဖုန်းဖြင့်ဆက်သွယ်ဆွေးနွေးပြီးနောက် ပူတင် က ပြောကြားခဲ့သည်။

ကိုးကား- Xinhua