ဒုတိယအကြိမ် အာဆီယံ-GCC ထိပ်သီးအစည်းအဝေးက ဒေသအချင်းချင်း ပူးပေါင်းဆောင်ရွက်မှု တိုးမြှင့်ရေး၊ ကြံ့ကြံ့ခံနိုင်စွမ်း တည်ဆောက်ရေးအတွက် လမ်းဖွင့်ပေး
News Image
စီးပွားရေးဆိုင်ရာ မရေရာမှုများ၊ ပထဝီဝင်နိုင်ငံရေး စိန်ခေါ်မှုများကြောင့် ပိုမိုရှုပ်ထွေးလာသော နိုင်ငံတကာအခင်းအကျင်းအား လမ်းညွှန်တည့်မတ်ရန်အတွက် ဒေသအချင်းချင်း ပူးပေါင်းဆောင်ရွက်မှု တိုးမြှင့်ရေးနှင့် ကြံ့ကြံ့ခံနိုင်စွမ်း တည်ဆောက်ရေးတို့မှာ ဒုတိယအကြိမ် အာဆီယံ-GCC ထိပ်သီး အစည်းအဝေး၌ အဓိကဆွေးနွေးမည့် အကြောင်းအရာများထဲတွင်ပါဝင်ကြောင်း မလေးရှားနိုင်ငံ ဝန်ကြီးချုပ် အန်ဝါ အီဘရာဟင်က ကွာလာလမ်ပူမြို့တွင် မေ ၂၇ ရက်၌ ပြောကြားခဲ့သည်။
လွန်ခဲ့သော နှစ်နှစ်က ယခုထိပ်သီးအစည်းအဝေးကို ပထမဆုံးအကြိမ် ကျင်းပခဲ့ပြီးနောက် နှစ်ဖက်အနေဖြင့် နိုင်ငံရေးအရ လုံခြုံမှုရှိရေး၊ စီးပွားရေးနှင့် လူမှုယဉ်ကျေးမှုစသော ပူးပေါင်းဆောင်ရွက်ရေး ကဏ္ဍကြီး သုံးရပ်၌ တိုးတက်မှုများ လျင်မြန်စွာ ရရှိခဲ့သော်လည်း ကမ္ဘာ့ရေးရာ များတွင် ဖြစ်ပေါ်တိုးတက်နေသော အခြေအနေသစ်များကို ရင်ဆိုင်ရာ၌ အဆိုပါ တိုးတက်မှုများကို ပိုမိုခိုင်မာအောင် လုပ်ဆောင်ရမည် ဖြစ်ကြောင်း ထိပ်သီးအစည်းအဝေး ဖွင့်ပွဲတွင် အန်ဝါက ပြောကြားခဲ့သည်။
“မိမိတို့အနေဖြင့် စီးပွားရေးဆိုင်ရာ မရေရာမှု၊ ပထဝီဝင်နိုင်ငံရေး စိန်ခေါ်မှုတွေကြောင့် ပိုမိုရှုပ်ထွေးလာသည့် နိုင်ငံတကာ အခင်းအကျင်းကို လမ်းညွှန်တည့်မတ်ပေးရာမှာ အာဆီယံ-GCC မိတ်ဖက် ပူးပေါင်းဆောင်ရွက်မှုက မျက်မှောက်ခေတ်မှာ အရင်ကထက်ပိုပြီး အရေးပါ လာပြီဟု ယုံကြည်ပါသည်။ အာဆီယံနှင့် GCC တို့သည် အနာဂတ် ဖွံ့ဖြိုးတိုးတက်မှု၏ မောင်းနှင်အားအဖြစ်ရော တည်ငြိမ်မှုကို ထိန်းသိမ်း ပေးသူ အဖြစ်ပါ ဖြစ်လာရန် နည်းလမ်းတွေ၊ တာဝန်ဝတ္တရားတွေ ရှိနေ ပါသည်” ဟု ၎င်းက ပြောကြားခဲ့သည်။
“အာဆီယံ-GCC ဆက်ဆံရေး ပိုမိုခိုင်မာလာခြင်းသည် ဒေသအချင်းချင်း ပူးပေါင်းဆောင်ရွက်မှု မြှင့်တင်ရန်၊ ကြံ့ကြံ့ခံနိုင်စွမ်း တည်ဆောက်ရန်၊ ပြည်သူတွေအတွက် ရေရှည်တည်တံ့သည့် သာယာဝပြောမှု ရရှိအောင် လုပ်ဆောင်ရန်အတွက် အဓိကကျလာမည်ဖြစ်ပါသည်” ဟု ၎င်းက ပြောကြားခဲ့ပြီး အာဆီယံနှင့် GCC အဖွဲ့ဝင်နိုင်ငံများအနေဖြင့် မိမိတို့၏ ဘုံမျှော်မှန်းချက်အား ခိုင်မာ၍ ထိရောက်အကျိုးရှိသော ပူးပေါင်း ဆောင်ရွက်မှု အဖြစ် အကောင်အထည်ဖော်ရမည်ဖြစ်ကြောင်း ဖြည့်စွက်ပြောကြား ခဲ့သည်။
ယခုထိပ်သီးအစည်းအဝေး၌ အရှေ့တောင်အာရှ နိုင်ငံများအသင်း (အာဆီယံ) နှင့် ပင်လယ်ကွေ့ ပူးပေါင်းဆောင်ရွက်ရေးကောင်စီ (GCC) အဖွဲ့ဝင်နိုင်ငံများ တက်ရောက်ခဲ့ကာ အဆိုပါ ထိပ်သီးအစည်းအဝေးအား ဆော်ဒီအာရေဗျနိုင်ငံ မြို့တော် ရီယတ်၌ ၂၀၂၃ ခုနှစ်က ပထမဆုံးအကြိမ် ကျင်းပခဲ့ခြင်းဖြစ်ကြောင်း သိရသည်။
ကိုးကား - Xinhua
