EU က ယူကရိန်းဒုက္ခသည်များ၏ လူဝင်မှုကြီးကြပ်ရေး အကာအကွယ်များ ရပ်ဆိုင်းနိုင်ဟုဆို

EU နိုင်ငံများသည် ၎င်းတို့၏နယ်မြေအတွင်း နေထိုင်နေသည့် ယူကရိန်း ဒုက္ခသည်များ၏ တရားဝင်အခြေအနေကို ပြန်လည်သုံးသပ်ရန် ပြင်ဆင် နေကြောင်း Euractiv သတင်းဌာနက တနင်္လာနေ့ (မေ ၂၆) တွင် EU သံတမန်တစ်ဦး၏ ထုတ်ဖော်ပြောဆိုချက်ကို ကိုးကား၍ ဖော်ပြခဲ့သည်။ Temporary Protection Directive (TPD) မှ ထွက်ခွာမည့် အလားအလာ နှင့်စပ်လျဉ်း၍ ဆွေးနွေးမှုများကို ဇွန်လအတွင်း စတင်နိုင်သည်ဟု ဆိုသည်။

၂၀၂၂ ခုနှစ်အစောပိုင်း ယူကရန်းပဋိပက္ခ စတင်ချိန်မှစ၍ Brussels မှ TPD ကို အသုံးပြုခဲ့သည်။ ၂၀၀၁ ခုနှစ်တွင် စတင်ခဲ့သော အဆိုပါ ညွှန်ကြားချက်သည် နေထိုင်ခွင့်လက်မှတ်၊ နေအိမ်၊ အလုပ်အကိုင် အခွင့်အလမ်း၊ ပညာရေး၊ ကျန်းမာရေးစောင့်ရှောက်မှု၊ ငွေကြေး အထောက်အပံ့နှင့် လူမှုဝန်ဆောင်မှုများအပါအဝင် အကျိုးခံစားခွင့်များစွာကို ပေးထားသည်။ မူလက ၂၀၂၅ ခုနှစ် မတ်လတွင် သက်တမ်းကုန်ဆုံးမည်ဖြစ်သော်လည်း ယခုအခါ ၂၀၂၆ ခုနှစ်၊ မတ်လအထိ တိုးမြှင့်ပေးထားသည်။

အမည်မဖော်လိုသော ထိုသံတမန်က Euractiv သို့ ပြောကြားရာတွင် “ပြောင်းလဲနေသော ပထဝီနိုင်ငံရေးအနေအထား” ကြောင့် နောက်ကွယ်တွင် အဖြေရှာနိုင်ရေး နည်းလမ်းများ နှင့်ပတ်သက်သည့် ဆွေးနွေးမှုများ ပြင်းထန်လာနေကြောင်း ဖော်ပြခဲ့သည်။ အဆိုပါ ကိစ္စသည် ဇွန်လ ၁၂-၁၃ ရက်နေ့များတွင် ကျင်းပမည့် EU ၏ Justice and Home Affairs Council အစည်းအဝေးတွင် အဓိကဆွေးနွေးမည့် အကြောင်းအရာ ဖြစ်လာနိုင်သည်။

Euractiv ၏ ဖော်ပြချက်အရ အဖွဲ့ဝင်နိုင်ငံအများစုက လက်ရှိအချိန်တွင် အဆိုပါ အစီအစဉ်ကို ဆက်လက်ထောက်ပံ့ကြသော်လည်း ဥပဒေ ပညာရှင်များက နောက်ထပ်သက်တမ်းတိုးခြင်းသည် အဆိုပါ ညွှန်ကြားချက် ၏ မူလရည်ရွယ်ချက်ကို ကျော်လွန်သွားနိုင်ကြောင်း သတိပေးထားသည်။

International Centre for Migration Policy Development မှ အကြီးတန်း မူဝါဒ အကြံပေး Martin Wagner က “ယာယီ အကာအကွယ်စနစ်မှ တစ်နည်းနည်းဖြင့် မည်သို့ထွက်ရမည်နည်းဆိုသည့် အချက်နှင့်ပတ်သက်ပြီး အစားထိုးနည်းလမ်းများအတွက် တကယ့်ဆွေးနွေးမှု တစ်ခု လိုအပ်နေပြီ” ဟု အလေးအနက်ထည့်သွင်းပြောဆိုခဲ့ပြီး အဆိုပါ ညွှန်ကြားချက်ကို ရေရှည်ဖြေရှင်းနည်းအဖြစ် ရည်ရွယ်ခဲ့ခြင်း မဟုတ်ကြောင်း ထောက်ပြခဲ့သည်။

နောက်ထပ်အမည်မဖော်လိုသော သံတမန်တစ်ဦးကလည်း EU အနေဖြင့် “ဥရောပနိုင်ငံများ၏ ခိုလှုံခွင့်စနစ်များအပေါ်  အလွန်အမင်းဝန်ပိသွားစေမည့် အန္တရာယ်ကို ဖိတ်ခေါ်နေသည်- TPD က ဒါကို တားဆီးဖို့အတွက် ရည်ရွယ်ခဲ့တာပါ” ဟု သတိပေးခဲ့သည်။

Wagner က လက်ရှိအကျိုးခံစားခွင့်ရှိသူအရေအတွက်သည် နိုင်ငံများ၏ ပုံမှန်ကိုင်တွယ်နိုင်သည်ထက် အဆပေါင်းများစွာ ပိုများနေပြီဖြစ်ကာ ဝန်ထုတ်ဝန်ပိုးဖြစ်နေစေသည် ဟု ရည်ညွှန်းပြောဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂