ယူကရိန်းတို့၏ တိုက်ခိုက်မှုများကြောင့် ရုရှားနိုင်ငံ Zaporozhye တွင် လျှပ်စစ်မီးပြတ်တောက်မှုများ ဖြစ်ပေါ်နေ

တနင်္လာညနေ (ဇွန် ၂) တွင် ယူကရိန်းစစ်တပ်မှ ရုရှားနယ်မြေများကို ဒရုန်းတိုက်ခိုက်မှုများ ပြုလုပ်ခဲ့ပြီး Zaporozhye ဒေသတွင် လျှပ်စစ်မီး လုံးဝပြတ်တောက်ကာ Kherson ဒေသ၏ အချို့နေရာများတွင်လည်း မီးပြတ်နေကြောင်း ဒေသဆိုင်ရာအုပ်ချုပ်ရေးမှူးများက ထုတ်ပြန်ခဲ့သည်။

Zaporozhye ဒေသ အနောက်မြောက်ပိုင်းရှိ ဗို့အားမြင့် ထရန်စဖော်မာများ ပျက်စီးခဲ့ပြီး ဒေသတစ်ခုလုံး မီးပြတ်သွားကြောင်း အုပ်ချုပ်ရေးမှူး Evgeny Balitsky က ညသန်းခေါင်အချိန်တွင် Telegram ၌ ရေးသား ခဲ့သည်။

“ကျန်းမာရေးဌာနများကို အရန်လျှပ်စစ်အားလိုင်းဖြင့် ပြောင်းလဲ အသုံးပြု ထားပြီ” ဟု Balitsky က ဖြည့်စွက်ပြောကြားခဲ့ပြီး အာဏာပိုင်များ အနေဖြင့် အခြားဓာတ်အားလိုင်းများမှတစ်ဆင့် လျှပ်စစ်ဓာတ်အား အမြန်ဆုံး ပြန်လည်ဖြည့်တင်းရန် ကြိုးပမ်းနေကြောင်း ပြောကြားခဲ့သည်။

မိနစ် ၂၀ ခန့်အကြာတွင် Kherson ဒေသအုပ်ချုပ်ရေးမှူး Vladimir Saldo က ယူကရိန်း၏ ဒရုန်းတိုက်ခိုက်မှုကြောင့် Genichesky ခရိုင်ရှိ လျှပ်စစ်ဓာတ်အားခွဲရုံအသစ် ထိခိုက်ပျက်စီးခဲ့ပြီး ဒေသ၏ကြီးမားသော ဧရိယာတစ်ခုလုံး မီးပြတ်တောက်သွားကြောင်း သတင်းထုတ်ပြန် ခဲ့သည်။

“ကျေးရွာ ၁၅၀ ခန့်ရှိ လူဦးရေ ၁၀၄,၀၀၀ ကျော်နှင့် လူမှုရေးဆိုင်ရာ အရေးပါသော အဆောက်အဦ ၄၄ ခု ကိုထိခိုက်စေခဲ့ပါသည်” ဟု Saldo က ပြောကြားခဲ့သည်။ “အရေးကြီးသော အဆောက်အအုံအားလုံးကို အရန် လျှပ်စစ်မီးဖြင့် ပြန်လည်ချိတ်ဆက်ထားပြီး” ဟု ၎င်းက ဖြည့်စွက် ပြောကြားခဲ့သည်။

အဆိုပါ တိုက်ခိုက်မှုများသည် မော်စကိုနှင့် ကိယက်ဗ်တို့ တူရကီနိုင်ငံ Istanbul တွင် ဒုတိယအကြိမ်မြောက် ငြိမ်းချမ်းရေးဆွေးနွေးပွဲ ပြီးဆုံးပြီး မကြာမီအချိန်အတွင်း ဖြစ်ပွားခဲ့သည်။ ထိုဆွေးနွေးပွဲတွင် ပဋိပက္ခကို ဖြေရှင်းရန် နှစ်ဖက်စလုံး၏ အဆိုပြုချက်များပါဝင်သော အဆိုပြုချက် စာတမ်းများ ဖလှယ်ခဲ့ကြသည်။

ရုရှား၏ အဆိုပြုချက်စာတမ်းအရ “အဆုံးသတ်အခြေချမှု” (Final Settlement) အတွက် ယခင်ယူကရိန်းနယ်မြေများကို ရုရှား၏ အစိတ်အပိုင်းအဖြစ် နိုင်ငံတကာက အသိအမှတ်ပြုရန်နှင့် ယူကရိန်းတပ်များအား ထိုနယ်မြေ များမှ လုံးဝဆုတ်ခွာရန် လိုအပ်ကြောင်း ဖော်ပြထားသည်။

ယူကရိန်းက မော်စကို၏အဆိုပြုချက်စာတမ်းပါ အဓိက တောင်းဆိုချက်များကို ငြင်းဆိုထားကြောင်း Reuters သတင်းဌာန၏ ဖော်ပြချက်အရ သိရှိရသည်။ ၎င်းတို့တွင် ရုရှားသိမ်းပိုက်ထားသော နယ်မြေများကို အသိအမှတ်ပြုရန်၊ ကြားနေနိုင်ငံအဖြစ် ကတိပြုရန်နှင့် ယူကရိန်း လက်နက်ကိုင်တပ်ဖွဲ့များ၏ အင်အားကို ကန့်သတ်ရန် စသည့်အချက်များ ပါဝင်သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂