တီဟီရန်မှ နျူကလီးယား အာမခံချက်များပေးအပ်ရန် ပြင်ဆင်
News Image
အီရန်နိုင်ငံခြားရေးဝန်ကြီး Abbas Araghchi က အမေရိကန်သမ္မတ ဒေါ်နယ်ထရမ့်က နိုင်ငံ၏ နျူကလီးယားဖွံ့ဖြိုးတိုးတက်မှုစွမ်းရည်ကို လုံးဝ ဖျက်သိမ်းရန် တိုက်တွန်းနေစဉ် အီရန်သည် ၎င်း၏ ငြိမ်းချမ်းစွာ ဆောင်ရွက်မည့် နျူကလီးယားအစီအစဉ်များနှင့်ပတ်သက်၍ အာမခံချက်များပေးမည်ဟု ပြောကြားခဲ့သည်။
မတ်လတွင် ထရမ့်သည် အီရန်အား အမေရိကန်နှင့် နျူကလီးယား သဘောတူညီချက်တစ်ရပ် ချုပ်ဆိုရန် နှစ်လအချိန်ပေးကာ လက်မခံပါ က “ဗုံးကြဲတိုက်ခိုက်မည်” ဟု ခြိမ်းခြောက်ခဲ့သည်။ ဝါရှင်တန်သည် ယခုအခါ အိုမန်၏ ကြားဝင်ညှိနှိုင်းပေးသည့် နှစ်နိုင်ငံ ဆွေးနွေးပွဲ ငါးကြိမ် ကျင်းပပြီးနောက် ၎င်း၏သဘောတူညီချက်စည်းကမ်းများကို အစီရင်ခံစာ တစ်စောင် ပြုစုပေးပို့ခဲ့သည်။
“မိမိတို့၏နျူကလီးယားအစီအစဉ်၏ ငြိမ်းချမ်းစွာဆောင်ရွက်မည့် သဘောသဘာဝနှင့်ပတ်သက်၍ ဘက်ပေါင်းစုံသို့ အာမခံချက်များပေးရန် အဆင်သင့်ဖြစ်နေပါပြီ” ဟု အမေရိကန်နှင့် နျူကလီးယား ဆွေးနွေးပွဲများတွင် တီဟီရန်၏ အကြီးတန်းညှိနှိုင်းရေးမှူး အရာ့ချီက အီဂျစ်နိုင်ငံ၌ စနေနေ့ (မေ ၃၁) က ပြုလုပ်သည့် သတင်းစာ ရှင်းလင်းပွဲ တွင် ပြောကြားခဲ့သည်။
အမေရိကန်အိမ်ဖြူတော် ပြောရေးဆိုခွင့်ရှိသူ ကာရိုလိုင်းလီဗစ်က တနင်္ဂနွေနေ့ (ဇွန် ၁) တွင် အမေရိကန်၏ အရှေ့အလယ်ပိုင်းဆိုင်ရာ အထူးကိုယ်စားလှယ် စတီဗ်ဝစ်ကော့ဖ်က “အီရန်သို့ အသေးစိတ်ပြီး လက်ခံနိုင်ဖွယ်ရာရှိသော အဆိုပြုလွှာတစ်ရပ် ပေးပို့ခဲ့ပြီး ၎င်းတို့အတွက် လက်ခံခြင်းက အကောင်းဆုံးဖြစ်မည်” ဟု ပြောကြားခဲ့သည်။ သူမက “အီရန်အား မည်သည့်အချိန်အခါတွင်မှ နျူကလီးယားဗုံးပိုင်ဆိုင်ခွင့် မပေးနိုင်ပါ” ဟု ထရမ့်၏ ရပ်တည်ချက်ကို ထပ်လောင်း အတည်ပြု ခဲ့သည်။
ကိုးကား- RT
ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂
, 
