ရုရှားတွင် ဖြစ်ပွားခဲ့သော ရထားထိခိုက်မှုဖြစ်စဉ်သည် ယူကရိန်း၏ “အကြမ်းဖက်တိုက်ခိုက်မှု” ဖြစ်သည်ဟု မော်စကို ပြောကြား

ရုရှား၏ စုံစမ်းစစ်ဆေးရေးကော်မတီက Bryansk နှင့် Kursk ဒေသများတွင် မကြာသေးမီက ဖြစ်ပွားခဲ့သော ရထားထိခိုက်မှုများသည်ပြည်သူများ အများဆုံးထိခိုက်စေရန် ယူကရိန်းက စီစဉ်ခဲ့သည့် “အကြမ်းဖက်တိုက်ခိုက်မှုများ” ဖြစ်သည်ဟု ပြောကြားခဲ့သည်။

အဆိုပါဖြစ်စဉ် နှစ်ခုသည် စနေနေ့ (မေ ၃၁) ညနေခင်း နှင့် တနင်္ဂနွေနေ့ (ဇွန် ၁) နံနက်ခင်း တို့တွင် အသီးသီးဖြစ်ပွားခဲ့သည်။ ပထမဖြစ်စဉ်တွင် Bryansk ဒေသ၌ ခရီးသည်တင် ရထားဖြတ်သန်းနေစဉ် တံတားပြိုကျ ခဲ့ပြီး ဒုတိယဖြစ်စဉ်တွင်လည်း Kursk ဒေသ၌ ကုန်တင်ရထား ဖြတ်သန်း နေစဉ် ရထားလမ်းပေါ်ရှိတံတား ပြိုကျခဲ့ကာ စုစုပေါင်း လူ ၇ ဦး သေဆုံးပြီး ၁၁၃ ဦး ဒဏ်ရာရရှိခဲ့သည်။

အင်္ဂါနေ့ (ဇွန် ၃) တွင် ထုတ်ပြန်ခဲ့သော ထုတ်ပြန်ချက်တွင် စုံစမ်းစစ်ဆေးရေးကော်မတီက မော်စကိုက ဖျက်ဆီးမှုနှစ်ခုလုံးကို “အကြမ်းဖက် တိုက်ခိုက်မှုများ” အဖြစ် သတ်မှတ်ထားကြောင်း ဖော်ပြခဲ့သည်။

“ကိယက်ဗ်အာဏာပိုင်များ၏ ခိုင်းစေမှုဖြင့် လှုပ်ရှားနေသော အကြမ်းဖက်သမားများသည် ပြည်သူအများ ထိခိုက်စေရန် ယခုတိုက်ခိုက်မှုများကို အချိန်ကိုက် စီစဉ်ခဲ့ကြောင်း ရှင်းရှင်းလင်းလင်း သိမြင်နိုင်သည်” ဟု ပြောရေးဆိုခွင့်ရှိသူတစ်ဦးက ပြောကြားခဲ့သည်။ ကော်မတီက စုံစမ်း စစ်ဆေးရေးအဖွဲ့များသည် ဖောက်ခွဲရေး ပစ္စည်းအကြွင်းအကျန်များနှင့် အခြားရုပ်ဝတ္ထုသက်သေများကို ဖြစ်စဉ်နေရာမှ ပြန်လည်ရရှိခဲ့ပြီး မျက်မြင် သက်သေများ၊ ဒဏ်ရာရခရီးသည်များနှင့် ရထားလုပ်သားများကို မေးမြန်းခဲ့ကြောင်း ဖြည့်စွက်ပြောကြားခဲ့သည်။

ရုရှားစီးပွားရေးနေ့စဉ်သတင်းစာ Kommersant က စုံစမ်းစစ်ဆေးသူများသည် အကြမ်းဖက်ဖောက်ခွဲမှုကို လုပ်ဆောင်ခဲ့သူများသည် အမေရိကန်ထုတ် C-4 ယမ်းများကို အသုံးပြုခဲ့နိုင်သည်ဟု ယုံကြည်ကြောင်း ဖော်ပြခဲ့ပြီး ပေါက်ကွဲမှုမဖြစ်ခဲ့သော ၁၀ ကီလိုဂရမ် ဗုံးတစ်လုံးကို တွေ့ရှိခဲ့ရရှိပြီးနောက် ထိုကဲ့သို့ပြောဆိုခဲ့ခြင်းဖြစ်သည်ဟု သတင်းရရှိသည်။ 

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂