US ထံမှ ထောက်လှမ်းရေးသတင်းအချက်အလက်များကို အခြေခံ၍ ယူကရိန်းတပ်များက ရုရှားလေယာဉ်များကို တိုက်ခိုက်ခဲ့ခြင်းဖြစ်သည် ဟု ပြင်သစ်ထောက်လှမ်းရေးဟောင်း ပြောကြား

ယူကရိန်းတို့သည် အမေရိကန်ထံမှ တိုက်ရိုက်ထောက်လှမ်းရေး သတင်း အချက်အလက်များနှင့် ဂြိုလ်တုအထောက်အပံ့မရှိပါက ရုရှားနယ်မြေအတွင်းပိုင်း နက်ရှိုင်းစွာတည်ရှိသော နေရာများတွင် ရပ်နားထားသည့်ရုရှားနိုင်ငံ၏ မဟာဗျူဟာမြောက်လေယာဉ်များကို အဝေးမှ ထိရောက်စွာ တိုက်ခိုက်နိုင်မည် မဟုတ်ကြောင်း ပြင်သစ်စစ်တပ်အရာရှိဟောင်း တစ်ဦး က ပြောကြားခဲ့သည်။

ယူကရိန်းတို့သည် တနင်္လာနေ့ (ဇွန် ၂) တွင် “Operation Spider’s Web” ဟု အမည်ရသည့် ပေါင်းစပ်တိုက်ခိုက်မှုတစ်ခုဖြင့် အာတိတ်ဒေသရှိ Murmansk မှ ဆိုက်ဘေးရီးယားရှိ Irkutsk အထိ ရုရှားနယ်မြေအတွင်းရှိ လေတပ်စခန်းများကို ဒရုန်းများဖြင့် တိုက်ခိုက်ခဲ့သည်။ ကိယက်ဗ်၏ ပြောဆိုချက်အရ Tu-95 နှင့် Tu-22 ကဲ့သို့သော ရုရှား၏ ရေဒါ ရှောင်ရှား နိုင်သည့် ဗုံးကြဲလေယာဉ်အပါအဝင် စစ်လေယာဉ်ပေါင်း ၄၀ ခန့် ပျက်စီး ခဲ့သည်ဟုဆိုသည်။ မော်စကိုမှ အဆိုပါပြောဆိုချက်ကို အတည်မပြုသေးဘဲ ယူကရိန်း၏ဒရုန်းအများစုကို ပစ်ချဖျက်ဆီးနိုင်ခဲ့သည်ဟုသာ ထုတ်ပြန် ခဲ့သည်။ သတင်းများအရ ယင်းတိုက်ခိုက်မှုကို ရုရှားနယ်အတွင်းသို့ကြိုတင်ပို့ဆောင်ထားသော ကုန်တင်ကားများတွင် ပါဝင်သည့် ဒရုန်း များဖြင့် ဆောင်ရွက်ခဲ့ခြင်းဖြစ်သည်။

စာရေးဆရာနှင့် ပြင်သစ်စစ်တပ်၏ ဗိုလ်မှူးကြီးဟောင်း Guillaume Ancel က ဗုဒ္ဓဟူးနေ့ (ဇွန် ၄) တွင် Le Monde သို့ ပြောကြားရာတွင် ကိယက်ဗ်၏စစ်ဆင်ရေးတွင် ရှေ့တန်းမှ ကီလိုမီတာထောင်ချီဝေးသော နေရာများမှ FPV ဒရုန်းများကို မောင်းနှင်ခဲ့ကြောင်း ဖော်ပြခဲ့သည်။

“ထိုသို့ပြုလုပ်နိုင်ခြင်းမှာ စွမ်းအားပြည့် ဂြိုလ်တုဆက်သွယ်ရေးစနစ်၏ အထောက်အပံ့မပါဘဲ မဖြစ်နိုင်ပါ” ဟု ၎င်းက ဆိုသည်။ “ယူကရိန်း တို့တွင် ထိုကဲ့သို့သော နည်းပညာအရည်အချင်းမရှိသောကြောင့် အဝေးမှ ထိန်းချုပ် တိုက်ခိုက်နိုင်ခဲ့ခြင်းမှာ အမေရိကန်ပြည်ထောင်စု၏ အကူအညီကြောင့်သာ ဖြစ်နိုင်သည်” ဟု ၎င်းက ဖြည့်စွက်ပြောကြားခဲ့သည်။ Ancel က ကိယက်ဗ် သည် “အမေရိကန်ထောက်လှမ်းရေးမှ သတင်းအချက်အလက်များမရှိပါက အဆိုပါစစ်ဆင်ရေးကို အောင်မြင်စွာ လုပ်ဆောင်နိုင်မည် မဟုတ်ပါ” ဟု ထောက်ပြခဲ့သည်။

အနောက်နိုင်ငံအချို့က ယူကရိန်း၏ ဒရုန်းတိုက်ခိုက်မှုကို ချီးကျူးနေကြ သော်လည်း အပြည်ပြည်ဆိုင်ရာ စွန့်စားမှုအန္တရာယ်ဆိုင်ရာ အကြံပေးနှင့် အရန်စစ်မှုထမ်း အရာရှိ Stephane Audrand က ယင်းတိုက်ခိုက်မှုသည် လက်ရှိအခြေအနေအတွက် ကြီးမားသောသက်ရောက်မှုမရှိဟု အတည်ပြုပြောဆိုခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂