ဟနွိုင်းတွင် ကိုရီးယားခရီးသွား အမျိုးသမီးတစ်ဦးက ဒေသခံ အမျိုးသမီးကို ရိုက်နှက်မှုကြောင့် ကိုရီးယားနိုင်ငံသားများ အမျက်ဒေါသထွက်နေ

ဟနွိုင်းမြို့ရှိ ဓာတ်ပုံဆိုင်တစ်ခုတွင် ဗီယက်နမ်အမျိုးသမီးတစ်ဦးကို ရိုက်နှက်ခဲ့သည့် တောင်ကိုရီးယား အမျိုးသမီးခရီးသွားအား အမြန်ဆုံး အရေးယူရန် တောင်ကိုရီးယားနိုင်ငံသားများက တောင်းဆိုနေကြပြီး အချို့က ယင်းအဖြစ်အပျက်ကို "နိုင်ငံ့ဂုဏ်သိက္ခာကျစေသည့် အရှက်ရဖွယ် အဖြစ်အပျက်"ဟု ဝေဖန်နေကြသည်။

Photoism ဓာတ်ပုံဝန်ဆောင်မှုလုပ်ငန်း၏ ဇူလိုင် ၁၄ ရက်နေ့က ဖေ့စ်ဘွတ် ပို့စ်တွင် ထုတ်ပြန်ချက်အရ ဇူလိုင် ၁၁ ရက်နေ့က ဟနွိုင်းရှိ ၎င်းတို့၏ ဆိုင်ခွဲတစ်ခုတွင် ဖောက်သည်များအကြား အကြမ်းဖက်မှုဖြစ်ပွားခဲ့ပြီး ၎င်းတို့က တာဝန်ရှိသူများထံသို့ အကြောင်းကြားခဲ့ကြောင်း သိရသည်။

တောင်ကိုရီးယားသတင်းဌာနများစွာက အဆိုပါဖြစ်ရပ်ကို ရေးသားဖော်ပြခဲ့ကြပြီး MBN ရုပ်သံဌာနက ကိုရီးယားအမျိုးသမီးသည် အရက်မူးပြီး ဓာတ်ပုံဆိုင်ကို ရောက်ရှိလာခဲ့ကြောင်း၊ ဗီယက်နမ်အမျိုးသမီးနှစ်ဦး ဓာတ်ပုံ ရိုက်ကူးမှု ကြာရှည်နေသည်ကို မြင်တွေ့သောအခါ သူမက အလျင်အမြန် ရိုက်ခိုင်းခဲ့သော်လည်း ငြင်းပယ်ခံရပြီး ရန်ပွဲဖြစ်ပွားသွားခဲ့ကြောင်း ဖော်ပြခဲ့သည်။

ဇူလိုင် ၁၅ ရက်တွင် ထုတ်ဝေသော ဆောင်းပါးတစ်ခုတွင် Yonhap News TV က ဗီယက်နမ်အမျိုးသမီးငယ်၏ ခန္ဓာကိုယ်အပေါ်ပိုင်းကို ရုတ်တရက် လက်သီးနှင့်ထိုးပြီး ခေါင်းကို အိတ်ဖြင့်ရိုက်ခဲ့သည့် ကိုရီးယား အမျိုးသမီးအား "နိုင်ငံ့ဂုဏ်သိက္ခာကို ညှိုးနွမ်းစေသူ"ဟု ရည်ညွှန်းခဲ့သည်။

ကိုရီးယား၏ အကြီးဆုံး အွန်လိုင်းအသိုင်းအဝိုင်း Theqoo တွင် အဆိုပါ ဖြစ်စဉ်နှင့်ပတ်သက်သော အချက်အလက်များအတွက် မှတ်ချက် ၁,၀၀၀ ကျော်ရရှိခဲ့ပြီး အများစုမှာ ကိုရီးယားအမျိုးသမီးအား ဝေဖန် ကန့်ကွက်ကာ အရေးယူရန်တောင်းဆိုနေကြသည်။

ဆိုးလ်အခြေစိုက် နိုင်ငံရေး၊ စီးပွားရေးနှင့် လူမှုရေးသတင်းဌာန Power News အဆိုအရ ထိုကိုရီးယားခရီးသွားသည် ဖုန်းအစိတ်အပိုင်းများ ထုတ်လုပ်သည့် ကုမ္ပဏီတစ်ခုတွင် အလုပ်သမားဖြစ်နိုင်သည်ဟု ဆိုသည်။ သို့သော် ကုမ္ပဏီကိုယ်စားလှယ်က ထိုသူသည် ၎င်းတို့၏ဝန်ထမ်း ဟုတ်၊ မဟုတ် အတည်မပြုနိုင်သေးဘဲ စုံစမ်းစစ်ဆေးမှုများလုပ်ဆောင်နေပြီး မကြာမီ တရားဝင်ထုတ်ပြန်ချက်ထုတ်ပြန်မည်ဟု ပြောကြားခဲ့သည်။

ကိုးကား- VN Express

Photo: Mothership

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂