နိုင်ငံတော်၊ နိုင်ငံသား၊ နိုင်ငံမဲ့
နိုင်ငံသားဆိုသည်မှာ နိုင်ငံ၏အစိတ်အပိုင်းတစ်ရပ်ပင်ဖြစ်ပြီး နိုင်ငံနှင့်နိုင်ငံသားတို့၏အကြားတွင် အပြန်အလှန်ဆက်စပ်လျက်ရှိသည်။ နိုင်ငံတစ်နိုင်ငံ၏ နိုင်ငံသားအဖြစ်ကို ရရှိနိုင်ရန်အတွက် သတ်မှတ်ထားသည့်အရည်အချင်းများနှင့် ပြည့်စုံရန်လိုသည်။ မိမိတို့နိုင်ငံတွင် နိုင်ငံသားဖြစ်ရန်အတွက် ပြည်ထောင်စုသမ္မတမြန်မာနိုင်ငံတော်၏ တိုင်းရင်းသားမိဘနှစ်ပါးမှ မွေးဖွားသူ သို့မဟုတ် (၂၀၀၈ ခုနှစ်) ဖွဲ့စည်းပုံအခြေခံဥပဒေ အတည်ပြုပြဋ္ဌာန်းသည့်နေ့တွင် ဥပဒေအရ နိုင်ငံသားဖြစ်ပြီးသူဟူသည့် အရည်အချင်းတစ်ရပ်ရပ်နှင့် ပြည့်စုံရမည်ဖြစ်သည်။
ဖော်ပြပါအရည်အချင်းသတ်မှတ်ချက်တို့ ပြည့်စုံမှုအရ နိုင်ငံသားအဖြစ်ကို အလိုအလျောက်ရရှိလာသူ အများစုတို့မှာ နိုင်ငံသားဖြစ်မှု၏တန်ဖိုးကို အလေးထားဂရုမပြုမိသကဲ့သို့ နိုင်ငံသားတစ်ဦးအနေဖြင့် ထမ်းဆောင်ရမည့်တာဝန်များနှင့် ရရှိအပ်သည့် အခွင့်အရေးများရှိကြောင်းကိုလည်း မေ့လျော့နေတတ်ကြသည်။ ပြည်ထောင်စုသမ္မတမြန်မာနိုင်ငံတော်၏ နိုင်ငံသားအားလုံး လူမျိုး၊ ဇာတိ၊ ကိုးကွယ်သည့်ဘာသာ၊ ရာထူးဌာနန္တရ၊ အဆင့်အတန်း၊ ယဉ်ကျေးမှု၊ အမျိုးသား၊ အမျိုးသမီး၊ ဆင်းရဲချမ်းသာမရွေး ခွဲခြားမှုမရှိဘဲ တန်းတူအခွင့်အရေးများကို ပေးအပ်ထားခြင်းဖြစ်သည်။ လွတ်လပ်စွာထုတ်ဖော်ပြောဆိုခွင့်၊ ရေးသားဖြန့်ဝေခွင့်၊ လက်နက်မပါဘဲ ငြိမ်းချမ်းစွာစုဝေးခွင့်၊ အသင်းအဖွဲ့များ ဖွဲ့စည်းခွင့်၊ တိုင်းရင်းသားတို့၏ စကား၊ စာပေ၊ ယဉ်ကျေးမှု၊ ဘာသာသာသနာ ဓလေ့ထုံးတမ်းများ၊ လွတ်လပ်စွာ ဆောင်ရွက်ပိုင်ခွင့်တို့ကို နိုင်ငံတော်လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်းသာယာရေး သို့မဟုတ် ပြည်သူတို့၏ ကိုယ်ကျင့်တရား အကျိုးငှာ ပြဋ္ဌာန်းထားသည့် ဥပဒေများကို မဆန့်ကျင်လျှင် လွတ်လပ်စွာ သုံးစွဲဆောင်ရွက်ခွင့်ပြုထားသည်။
နိုင်ငံသားတိုင်း နိုင်ငံတော်အတွင်း မည်သည့်အရပ်၌မဆို ဥပဒေနှင့်အညီ အခြေစိုက်နေထိုင်ခွင့်၊ တရားဝင်ပိုင်ဆိုင်ထားသောပစ္စည်းများကို ဥပဒေအရ အကာအကွယ်ရယူခွင့်၊ ပညာသင်ကြားခွင့်၊ ကျန်းမာရေးစောင့်ရှောက်မှုခံယူခွင့်၊ ရွေးကောက်တင်မြှောက်ခွင့်နှင့် ရွေးကောက်တင်မြှောက်ခံပိုင်ခွင့်၊ လွှတ်တော်ကိုယ်စားလှယ်ကို ဥပဒေနှင့်အညီ တာဝန်မှ ပြန်လည်ရုပ်သိမ်းခွင့်၊ စီးပွားရေးလုပ်ငန်းများ ဥပဒေနှင့်အညီ လုပ်ကိုင်ခွင့်၊ ဥပဒေနှင့်အညီ ခုခံချေပခွင့်အစရှိသည်ဖြင့် နိုင်ငံရေး၊ စီးပွားရေး၊ လူမှုရေးဆိုင်ရာ အခွင့်အရေးများကို ဖွဲ့စည်းပုံအခြေခံဥပဒေအရ နိုင်ငံသားတိုင်း ရရှိကြသည်။
ထို့အတူ နိုင်ငံသားတိုင်းသည် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှုမပြိုကွဲရေး၊ အချုပ်အခြာ အာဏာတည်တံ့ခိုင်မြဲရေးတို့ကို စောင့်ထိန်းရန်၊ ဖွဲ့စည်းပုံအခြေခံဥပဒေပါ ပြဋ္ဌာန်းချက်များကို လိုက်နာစောင့်ထိန်းရန်၊ နိုင်ငံတော်၏ လွတ်လပ်ရေး၊ အချုပ်အခြာအာဏာနှင့် နယ်မြေတည်တံ့ခိုင်မြဲရေးကို ကာကွယ်စောင့်ရှောက်ရန်၊ စစ်ပညာသင်ကြားရန်နှင့် စစ်မှုထမ်းရန်၊ တိုင်းရင်းသားစည်းလုံးညီညွတ်ရေးနှင့် ပြည်သူတစ်ရပ်လုံး အေးချမ်းသာယာရေး ကြိုးပမ်းဆောင်ရွက်ရန်၊ နိုင်ငံတော်ကြီး ခေတ်မီဖွံ့ဖြိုးတိုးတက်ရေးဆောင်ရွက်ရန်၊ ဥပဒေနှင့်အညီ အခွန်ပေးဆောင်ရန်စသော တာဝန်များကို ထမ်းဆောင်ကြရမည်ဖြစ်သည်။
နိုင်ငံသားတစ်ဦး နိုင်ငံမဲ့ဖြစ်သည့်အခါ၊ တစ်နည်းအားဖြင့် မည်သည့်နိုင်ငံကမျှ ၎င်း၏တည်ဆဲဥပဒေအရ နိုင်ငံသားအဖြစ် အသိအမှတ်ပြုမခံရသည့်အခါ နိုင်ငံသားအခွင့်အရေးများကို ဆုံးရှုံးကြရသည်။ ခွဲခြားဆက်ဆံခံရခြင်း၊ ကူးသန်းသွားလာရေးတွင် ခက်ခဲခြင်း၊ အကာအကွယ်ကင်းမဲ့ခြင်းကြောင့် လူကုန်ကူးခံရနိုင်ခြေများပြားခြင်း၊ ဖမ်းဆီးထိန်းသိမ်းခံရခြင်း စသည်ဖြင့် မကောင်းသည့်အကျိုးဆက်များ အများအပြားနှင့် ရင်ဆိုင်ကြုံတွေ့လာရမည်ဖြစ်သည်။ သို့ဖြစ်ရာ နိုင်ငံသားတိုင်း မိမိတို့၏ နိုင်ငံသားဖြစ်မှုအပေါ် အလေးအနက်ထား ဂုဏ်ယူဝံ့ကြွားကာ နိုင်ငံတော်အပေါ် သစ္စာစောင့်သိရိုသေကြရန်၊ နိုင်ငံသားတစ်ယောက်၏တာဝန်များ ကျေပွန်ကြရန် နှိုးဆော်တိုက်တွန်းအပ်ပါကြောင်း။ ။
MNP
Photo -Social Media
