အပြည်ပြည်ဆိုင်ရာ အဏုမြူစွမ်းအင် အေဂျင်စီ (IAEA) နှင့် ပူးပေါင်း ဆောင်ရွက်မှုကို အီရန် ရပ်ဆိုင်းလိုက်သည့်အပေါ် စိုးရိမ်ကြောင်း ကုလသမဂ္ဂ ဆို
ကုလသမဂ္ဂအနေဖြင့် အီရန်က အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) နှင့် ပူးပေါင်းဆောင်ရွက်မှုကို ရပ်ဆိုင်းကြောင်း ကြေညာလိုက်ခြင်းအပေါ် စိုးရိမ်ပူပန်ကြောင်း ကုလသမဂ္ဂ အထွေထွေအတွင်းရေးမှူးချုပ်၏ ပြောရေးဆိုခွင့်ရှိသူ စတက်ဖန်း ဒူဂျာရစ်က ဇူလိုင် ၂ ရက်တွင် ပြောကြားခဲ့သည်။
ကုလသမဂ္ဂဘက်က အီရန်၏ ဆုံးဖြတ်ချက်ကို သတိပြုမိကြောင်း၊ ဤဆုံးဖြတ်ချက်က “သိသာထင်ရှားတဲ့ စိုးရိမ်ပူပန်စရာ” ဖြစ်ကြောင်း စတက်ဖန်း ဒူဂျာရစ်က ဇူလိုင် ၂ ရက်တွင် ကျင်းပသော ပုံမှန်သတင်းစာရှင်းလင်းပွဲတွင် ပြောကြားခဲ့သည်။ ဂူတာရက်စ်သည် အီရန်နှင့် အခြားသော နိုင်ငံအားလုံးကို IAEA နှင့် ပူးပေါင်းဆောင်ရွက်ရန် အစဉ်အမြဲတိုက်တွန်းကြောင်း ၎င်းက ပြောကြားခဲ့သည်။
ထိုနေ့တွင်ပင် အမေရိကန် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တမ်မီ ဘရုစ်စ်က အီရန်တွင် ငြိမ်းချမ်းသာယာဝပြောသော လမ်းအား ရွေးချယ်ရန်၊ အခြေအနေကို ပြောင်းလဲ နိုင်သော အခွင့်အရေးရှိလျက်သား IAEA နှင့် ပူးပေါင်းဆောင်ရွက်မှုကို အီရန် ဆိုင်းငံ့ခြင်းသည် “လက်ခံနိုင်ဖွယ်မရှိကြောင်း” ပြောကြားခဲ့သည်။
အီရန်လွှတ်တော်က ဇွန် ၂၅ ရက်တွင် ဥပဒေမူကြမ်းတစ်ရပ်ကို အတည်ပြုခဲ့ပြီး အီရန်နှင့် IAEA အကြား ပူးပေါင်းဆောင်ရွက်မှုကို ရပ်ဆိုင်းခဲ့သည်။ ဤဥပဒေမူကြမ်းသည် IAEA မှ စောင့်ကြည့် လေ့လာသူများ အီရန်နိုင်ငံတွင်းသို့ လာရောက်စစ်ဆေးခြင်းကို တားမြစ်ထားသည်။ အီရန် နျူကလီးယားအဆောက်အအုံ လုံခြုံရေးနှင့် အီရန်၏ ငြိမ်းချမ်းစွာ နျူကလီးယားစွမ်းအင် အသုံးချခွင့်ကို အာမခံချက်ပေးနိုင်ပြီး အီရန်အမျိုးသားလုံခြုံရေးကောင်စီ၏ ခွင့်ပြုချက်ရရှိမှ သာလျှင် ဝင်ခွင့်ရှိမည်ဖြစ်သည်။ အီရန်သမ္မတ မာဆော့ ပါဇက်ရှ်ကီရမ်က အီရန်နှင့် IAEA အကြား ပူးပေါင်းဆောင်ရွက်မှု ယာယီရပ်ဆိုင်းရန် ဥပဒေမူကြမ်းကို အတည်ပြုခဲ့သည်ဟု အီရန် Mehr သတင်းဌာန၏ ဇူလိုင် ၂ ရက် သတင်းထုတ်ပြန်မှုအရ သိရသည်။
ကိုးကား- ဆင်ဟွာ
