ရထားပို့ဆောင်ရေးတစ်ခေတ်ဆန်းသစ် ပြည်သူများသွားလာရေးအဆင်ပြေ

ပြည်သူများ ဆက်သွယ်သွားလာမှုနှင့် ကုန်စည်ပို့ဆောင်မှု အဆင်ပြေချောမွေ့စေရေးအတွက် ကုန်းလမ်းပို့ဆောင်ရေး၊ ရေကြောင်းပို့ဆောင်ရေး၊ လေကြောင်းပို့ဆောင်ရေးနှင့် ရထားပို့ဆောင်ရေး ဟူသည့် နည်းလမ်းလေးမျိုးဖြင့် အစဉ်အဆက် ဆောင်ရွက်ခဲ့ရာတွင် ရထားပို့ဆောင်ရေးနည်းလမ်းသည် သယ်ယူပို့ဆောင်စရိတ်အနည်းဆုံးဖြင့် ခရီးသည်နှင့် ကုန်စည်များစွာကို အချိန်တိုအတွင်း သယ်ယူ ပို့ဆောင်ပေးနိုင်သည်။ နှစ်ပေါင်း ၁၄၀ ကျော် သက်တမ်းရှည်ကြာပြီဖြစ်သည့် အများပြည်သူ သယ်ယူပို့ဆောင်ရေးလုပ်ငန်းဖြစ်သည်။

မြန်မာ့မီးရထားသည် သက်တမ်းရှည်ကြာခဲ့သည့် ခေတ်သမိုင်းတစ်လျှောက် ကျယ်ပြန့်စွာ တိုးတက် ဖြစ်ထွန်းလာခဲ့သည်။ မြန်မာနိုင်ငံတစ်ဝန်း ရထားလမ်းကွန်ရက်များကို ချိတ်ဆက်တည်ဆောက်နိုင်ခဲ့ သည်။ ရထားပို့ဆောင်ရေးလုပ်ငန်းသည် နယ်မြေပမာဏကျယ်ဝန်းသည့်အလျောက် ခေတ်သမိုင်းတစ်လျှောက်၌ နှောင့်ယှက်ဖျက်ဆီးမှုများနှင့် ကြုံတွေ့ခဲ့ရသည်။ အဓိကနှောင့်ယှက်ဖျက်ဆီးမှုမှာ သောင်းကျန်းသူအဖျက်အန္တရာယ်ဖြစ်သည်။ လွတ်လပ်ရေးနှင့်အတူ ပေါ်ပေါက်လာသော သောင်းကျန်းသူများ၏ အဓိကလုပ်ငန်းမှာ အဖျက်လုပ်ငန်းဖြစ်၍ အဓိကပစ်မှတ်မှာ မီးရထားလုပ်ငန်းဖြစ်သည်ကို ယနေ့ထက်တိုင်တွေ့မြင်နိုင်သည်။ ရထားလမ်းများ၊ တံတားများကို မိုင်းထောင်ခြင်း၊ ဘူတာရုံများ၊ မီးရထားများစသည့်အမျိုးမျိုးကို ဖျက်ဆီးခဲ့ကြရာ မီးရထားလုပ်ငန်း တိုးတက်ဖွံ့ဖြိုးရေးအတွက် များစွာအဟန့်အတား ဖြစ်စေခဲ့သည်။

မျက်မှောက်ကာလတွင် ခရီးသည်နှင့် ကုန်စည်ပို့ဆောင်ရေးလုပ်ငန်းများကို ပုဂ္ဂလိကကဏ္ဍမှ ခေတ်မီအဆင့်မြင့်မော်တော်ယာဉ်များဖြင့် လုပ်ကိုင်လာကြရာ ပိုမိုလုံခြုံစိတ်ချပြီး ခရီးတွင်သော မော်တော်ယာဉ်ပို့ဆောင်ရေးလုပ်ငန်းများ တွင်ကျယ်ခေတ်စားလာသဖြင့် ရထားပို့ဆောင်ရေးဘက်တွင် အားနည်းသွားခဲ့သည်။ ယခုအခါ မြန်မာ့မီးရထားသည် ပြည်သူလူထုဆက်သွယ်သွားလာမှု အဆင်ပြေချောမွေ့စေရေးအတွက် ရထားလမ်းပိုင်းများ အဆင့်မြှင့်တင်ခြင်း၊ ဘူတာရုံများ အသစ်တည်ဆောက်ခြင်း၊ မီးရထားစက်ခေါင်းသစ်များ၊ အဆင့်မြင့်ရထားတွဲဆိုင်းသစ်များ ဝယ်ယူဖြည့်တင်းခြင်းတို့ကို စဉ်ဆက်မပြတ်ပြုလုပ်လျက်ရှိရာ ရထားပို့ဆောင်ရေးကဏ္ဍတွင် အသွင်သစ်ဖြင့် ပြန်လည်တိုးတက်လာသည်ကို တွေ့ရမည်ဖြစ်သည်။

အဓိကကျသော ရထားလမ်းပိုင်းများဖြစ်သည့် ရန်ကုန်-မန္တလေးလမ်းပိုင်း၊ ရန်ကုန်-ပြည်လမ်းပိုင်း၊ ရန်ကုန်-မော်လမြိုင်လမ်းပိုင်းတို့နှင့် ရန်ကုန်မြို့ပတ်နှင့် ဆင်ခြေဖုံးလမ်းပိုင်းများတွင်သာမက အခြားလမ်းပိုင်းများဖြစ်သော ပုသိမ်-ဟင်္သာတ-ကြံခင်းလမ်းပိုင်း၊ ပျဉ်းမနား-တောင်တွင်းကြီးရထားလမ်းပိုင်း၊ ရန်ကုန်-ပြည်-ပုဂံလမ်းပိုင်း၊ မြစ်ကြီးနား-မိုးကောင်းလမ်းပိုင်း၊ လက်ပံတန်း-သာရဝေါလမ်းပိုင်းစသည့်လမ်းပိုင်းများတွင် လူစီးရထားများကို ပြန်လည်စီစဉ်ပြေးဆွဲပေးလျက်ရှိသည်။ ထို့အပြင် မြန်မာ့မီးရထား၏ စာတိုက်တွဲအချို့ကို ပြန်လည်မွမ်းမံတည်ဆောက်ကာ ရန်ကုန်-မန္တလေး၊ ရန်ကုန်-မော်လမြိုင်အမြန်ရထားနှင့် ရန်ကုန်-ပြည်စာပို့ရထားများကိုချိတ်ဆက်လျက် ချောစာ၊ ချောထုပ်များကို ပို့ဆောင်ပေးခြင်းဖြင့် ဝန်ဆောင် မှုပေးလျက်ရှိသည်။

မကြာသေးမီက ကြုံတွေ့ခဲ့ရသည့် သဘာဝဘေးအန္တရာယ် ရေကြီးရေလျှံဖြစ်မှုကြောင့် ရန်ကုန်-မန္တလေးလမ်းပိုင်း၊ သာစည်-ရွှေညောင်-တောင်ကြီးလမ်းပိုင်းရှိ အချို့နေရာများတွင် ရထားလမ်းတာ ပေါင်များ၊ တံတားများ ရေတိုက်စား၍ ပျက်စီးခဲ့ခြင်း၊ မြေပြိုကျ၍ ပျက်စီးခြင်းများ ကြုံတွေ့ခဲ့ရသော်လည်း မြန်မာ့မီးရထားအနေဖြင့် လမ်းပိုင်းအလိုက် ပျက်စီးမှုများကို ဦးစားပေး၍ ပြုပြင်နိုင်ခဲ့သောကြောင့် အောက်တိုဘာ လ ၃ ရက်နေ့မှစ၍ ရန်ကုန်- မန္တလေးရထားလမ်းတစ်လျှောက် ပြန်လည်ဖွင့်လှစ်၍ လူစီးရထားများ၊ ကုန်ရထားများကို ပုံမှန်ခရီးစဉ်အဖြစ် ပြန်လည်ပြေးဆွဲပေး နေပြီဖြစ်သည်။

ရထားပို့ဆောင်ရေးစနစ် တစ်ခေတ်ဆန်းသစ်နိုင်ရေးရည်ရွယ်၍ အထူးအစီအစဉ်အနေဖြင့် နိုင်ငံတော် အကြီးအကဲ၏ လမ်းညွှန်ချက်အရ ရန်ကုန်မြို့ပတ်ရထားလမ်းတစ်လျှောက် လျှပ်စစ်ရထား ပြေးဆွဲနိုင်ရေးကို အကောင်အထည်ဖော်ဆောင်ရွက်လျက်ရှိသည်။ လက်ရှိတွင် စပိန်နိုင်ငံမှ ရောက်ရှိလာ သည့် ခေတ်မီလေအေးပေးစနစ်ပါဝင်သည့် ဒီဇယ်လျှပ်စစ်ရထား (DEMU) များဖြင့် ရန်ကုန်-ပဲခူး၊ ပဲခူး-ရန်ကုန်ပြေးဆွဲလျက်ရှိသည်။ အမြန်နှုန်း တစ်နာရီလျှင် ကီလိုမီတာ ၈၀ အထိ မြန်နှုန်းမြှင့်တင်မောင်းနှင် နိုင်ရေး၊ ကုန်ရထားတွဲများအား တစ်နာရီလျှင် ကီလိုမီတာ ၆၀ အထိ မောင်းနှင်နိုင်ရေး၊ လျှပ်စစ်ရထား (EDU) ပြေးဆွဲနိုင်ရေး ဆက်လက်ကြိုးပမ်းဆောင်ရွက်ရေးတို့ကို နိုင်ငံတော်အကြီးအကဲ၏ လမ်းညွှန် ချက်နှင့်အညီ အကောင်အထည်ဖော်လျက်ရှိသည်။

သို့ဖြစ်ရာ ရထားပို့ဆောင်ရေးစနစ်သည် တိုင်းပြည်တစ်ပြည်၏ အဓိကကျသည့် ပို့ဆောင်ရေးစနစ် တစ်ခုဖြစ်ပြီး အကျိုးများသောလုပ်ငန်းဖြစ်၍ ရထားလမ်းများ ကောင်းမွန်ပြီး အချိန်မှန်ပြေးဆွဲနိုင်ရေး၊ မြန်နှုန်းမြင့်ပြေးဆွဲနိုင်ရေး၊ သက်သောင့်သက်သာ လွယ်ကူစွာစီးနင်းနိုင်ရေးတို့ကို အကောင်အထည် ဖော်ပေးလျက်ရှိရာ အသစ်ဖြည့်ဆည်းပေးထားသော ရထားများ၊ ဘူတာများ၊ လမ်းနယ်များ၊ ရထားမြေများတွင် သွားလာနေထိုင်မှုများအားလုံး စည်းကမ်းစနစ်ကောင်းမွန်အောင် ပါဝင်ဆောင်ရွက်ကြ ခြင်းဖြင့် ရထားပို့ဆောင်ရေးစနစ် တစ်ခေတ်ပြန်လည်ဆန်းသစ်လာမည်ဖြစ်ပါကြောင်း။ ။

Source- www.moi.gov.mm