လန်ဒန် Heathrow လေဆိပ်အနီးတွင် မီးလောင်မှုဖြစ်ပွားခဲ့ခြင်းကြောင့် ဓာတ်အားပြတ်တောက်မှုဖြစ်ပွားပြီး ကမ္ဘာ့ခရီးသည် အဝင်အထွက် အများဆုံးလေဆိပ်များထဲမှ တစ်ခုဖြစ်သော Heathrow လေဆိပ်ကို လုံးဝပိတ်သိမ်းထားရကြောင်း ကြေညာခဲ့သည်။

Heathrow လေဆိပ်ပိတ်သိမ်းမှုသည် ခရီးသည် သောင်းနှင့်ချီပြီး နှောင့်နှေး ကြန့်ကြာစေနိုင်ကာ လေယာဉ်ခရီးစဉ် ၁,၃၀၀ ကျော်ကို ထိခိုက်စေမည် ဟု မျှော်မှန်းထားသည်။ လေကြောင်းလိုင်းဆိုင်ရာစီမံခန့်ခွဲမှုကုမ္ပဏီ တစ်ခု က ခရီးသည် ၁၄၅,၀၀၀ ကျော် ထိခိုက်နိုင်ကြောင်း ခန့်မှန်းခဲ့သည်။

ရုရှား-ယူကရိန်း ပဋိပက္ခအတွင်း ယူကရိန်းကို ထောက်ပံ့ရန် အီးယူတွင် လက်တွေ့ကျသော နည်းလမ်းမရှိကြောင်း ဟန်ဂေရီဝန်ကြီးချုပ် Viktor Orban က ပြောကြားခဲ့သည်။ ဘရပ်ဆဲလ်တွင် ကျင်းပသော အီးယူ ခေါင်းဆောင်များ အစည်းအဝေးအပြီး မတ်လ ၂၀ ရက်နေ့က ၎င်း၏ မှတ်ချက်များကို ပြောကြားခဲ့သည်။

အပူချိန်မြင့်တက်မှုသည် ဩစတြေးလျနိုင်ငံရှိပြည်သူများ၌ နှလုံးရောဂါဖြစ်ပွားရသည့် အဓိကအကြောင်းရင်းတစ်ခုဖြစ်သည်ဟု လေ့လာမှုသစ်တစ်ရပ်က မတ်လ ၁၇ရက်တွင် ဖော်ပြထားသည်။

ကမ္ဘောဒီးယား အထက်လွှတ်တော်ဥက္ကဋ္ဌနှင့် ၀န်ကြီးချုပ်ဟောင်း Hun Sen က အမေရိကန်အသံ (VOA) သတင်းဌာနနှင့် လွတ်လပ်သော အာရှအသံ (RFA) သတင်းဌာနများကို ဖျက်သိမ်းရန် အမေရိကန်သမ္မတ Donald Trump ၏ ဆုံးဖြတ်ချက်ကို ကြိုဆိုလိုက်ပါသည်။ အဆိုပါသတင်းဌာနများသည် ဖယ်ဒရယ်အစိုးရရန်ပုံငွေနှင့် နိုင်ငံတကာသတင်းများကို ဖြန့်ဝေနေသည် အမေရိကန် သတင်းဌာနများ ဖြစ်သည်။

Hun Sen က “သတင်းတုများကို တိုက်ဖျက်ရာတွင် ကမ္ဘာကို ဦးဆောင်နိုင်သည့်သတ္တိအတွက် သမ္မတ Donald Trump ကို အထူးကျေးဇူးတင်သင့်သည်” ဟု ၎င်း၏ Facebook စာမျက်နှာတွင် ရေးသားခဲ့ပါသည်။