အမေရိကန်သမ္မတ Donald Trump က ၎င်းသည် ယခု သီတင်းပတ်အတွင်း ရုရှားသမ္မတ Vladimir Putin နှင့် ဖုန်းဖြင့် ဆွေးနွေးမှုများ ပြုလုပ်ရန်ဖြစ်နိုင်ကြောင်း မတ်လ ၁၁ ရက်နေ့တွင်ပြောကြားခဲ့ပြီး မော်စကိုဘက်မှ ယူကရိန်းနှင့် ၃၀ ရက်ကြာ စစ်ပြေငြိမ်းရေးဆိုင်ရာ အဆိုပြုချက်ကို သဘောတူညီလိမ့်မည်ဟု မျှော်လင့်ကြောင်း ဖော်ပြခဲ့သည်။

Trump က ယူကရိန်းနှင့် အမေရိကန်ကိုယ်စားလှယ်အဖွဲ့များ ဆော်ဒီအာရေဗျနိုင်ငံ ဂျီဒါတွင် ဆွေးနွေးပွဲပြုလုပ်ပြီးနောက် သတင်းထောက်များအား ထိုကဲ့သို့ပြောကြားခဲ့ခြင်းဖြစ်သည်။ ထိုဆွေးနွေးပွဲတွင် ကိယက်ဗ် ဘက်မှ မော်စကိုနှင့် စစ်ပြေငြိမ်းရေးဆိုင်ရာ အမေရိကန်၏ အဆိုပြုချက်ကို သဘောတူညီခဲ့သည်။ အမေရိကန်သမ္မတက ထိုကဲ့သို့သော သဘောတူညီချက်တစ်ရပ်ကို ချုပ်ဆိုနိုင်ပါက ပဋိပက္ခကိုအဆုံးသတ်ရန် နောက်ဆုံး သဘောတူညီချက်ရရှိရေးအတွက် အထောက်အကူဖြစ်စေမည်ဟု ပြောကြားခဲ့သည်။

ပူတင်ကလည်း သဘောတူလိမ့်မည်ဟု ထင်မြင်ကြောင်းနှင့် မြေနေရာ ပိုင်ဆိုင်မှုနှင့် ကျန်အချက်အလက်များကို ထပ်မံညှိနှိုင်း ဆောင်ရွက်သွားမည် ဟု Trump က ပြောကြားခဲ့သည်။

“ရုရှားဘက်မှ စစ်ပြေငြိမ်းရေးကို သဘောမတူပါကလည်း ၎င်းတို့အနေဖြင့် ဆက်လက်ညှိနှိုင်း လုပ်ဆောင်သွားမည်ဖြစ်သည်” ဟု အမေရိကန် သမ္မတ က ပြောကြားခဲ့ပြီး ညှိနှိုင်းမှုအဆင်မပြေပါက “လူများစွာ” သေဆုံးနိုင်ကြောင်း သတိပေးခဲ့သည်။ ရုရှားနှင့် အမေရိကန်အရာရှိများသည်ဆွေးနွေးမှုများ အမြန်ဆုံးပြုလုပ်နိုင်ရန် မျှော်လင့်ထားကြောင်း ၎င်းက ပြောကြားခဲ့သည်။

Trump က ၎င်း၏ပြောကြားချက်များကိုဖော်ပြခဲ့ပြီးနောက် မကြာမီတွင် ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Maria Zakharova က မော်စကိုနှင့် ဝါရှင်တန်တို့အကြား လာမည့်ရက်များအတွင်း ဆက်သွယ်မှုများဖြစ်နိုင်ကြောင်းနှင့် မဖြစ်မနေလုပ်ဆောင်ရမည့်အရာ ဖြစ်သည်ဟု ပြောကြားခဲ့သည်။ ကရင်မလင် သတင်းထောက် Dmitry Smirnov အဆို အရ အမေရိကန်နှင့် ရုရှားသမ္မတနှစ်ဦးအကြား ဖုန်းဖြင့်ဆွေးနွေးမှုကို မတ်လ ၁၅ ရက်(သောကြာ)နေ့တွင် ပြုလုပ်မည်ဖြစ်သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန်ပြည်ထောင်စုသည် ယူကရိန်းသို့ စစ်ရေးနှင့် ထောက်လှမ်းရေး အကူအညီများကို ပြန်လည်ဖြည်လျော့ပေးခဲ့ပြီး ယူကရိန်းဘက်မှလည်း ရုရှားနှင့် “ချက်ချင်း ယာယီ ၃၀ ရက်ကြာ စစ်ပြေငြိမ်းရေး” ဆိုင်ရာ အဆိုပြုချက်ကို သဘောတူညီခဲ့ကြောင်း မတ်လ ၁၁ ရက်နေ့တွင် ဆော်ဒီ အာရေဗျ၌ ကျင်းပခဲ့သောဆွေးနွေးပွဲအပြီးတွင် နှစ်နိုင်ငံက ကြေညာခဲ့သည်။ ထို့အပြင် ကိယက်ဗ်သည် အမေရိကန်နှင့် ယူကရိန်း၏ အရေးပါသောအရင်းအမြစ်များဆိုင်ရာ သဘောတူညီချက်တစ်ရပ်ကို အမြန်ဆုံး ချုပ်ဆိုရန်သဘောတူညီခဲ့သည်။

“ယူကရိန်းဘက်မှ အမေရိကန်၏အဆိုပြုချက်ကို လက်ခံရန် အဆင်သင့်ဖြစ်နေပြီဖြစ်ကြောင်း ချက်ချင်း ယာယီ ၃၀ ရက်ကြာ စစ်ပြေငြိမ်းရေးကို အကောင်အထည်ဖော်ရန်နှင့် နှစ်ဖက်သဘောတူညီချက်ဖြင့် ကာလ ထပ်မံတိုးမြှင့်နိုင်ကာ ရုရှားဘက်မှ လက်ခံပြီး တစ်ပြိုင်နက်တည်း အကောင် အထည်ဖော်ဆောင်ရန်လိုအပ်ကြောင်း” ပူးတွဲကြေညာချက်တွင် ဖော်ပြထားသည်။ အမေရိကန်ဘက်မှလည်း မကြာမီအတွင်း ယင်းအဆိုပြုချက်ကို ရုရှားသို့ ဆက်သွယ်ဆောင်ရွက်သွားမည်ဟု ပြောကြားခဲ့သည်။

အမေရိကန်သည် ယခုအခါ ထောက်လှမ်းရေး သတင်းအချက်အလက်များ မျှဝေခြင်းကို ရပ်ဆိုင်းထားမှုကို ရုပ်သိမ်းပြီး ယူကရိန်းသို့ လုံခြုံရေး အကူအညီများ ပြန်လည်ပေးအပ်မည်ဖြစ်သည်။ ဝါရှင်တန်နှင့် ကိယက်ဗ် တို့သည် လူသားချင်းစာနာထောက်ထားမှု ကူညီကယ်ဆယ်ရေးလုပ်ငန်းများကိုလည်း ဆွေးနွေးခဲ့ကြပြီး ယင်းတွင် စစ်သုံ့ပန်းများ လဲလှယ်ခြင်း၊ အရပ်သား၊ အကျဉ်းသားများ လွှတ်ပေးခြင်းနှင့် အခြားလုပ်ဆောင်ချက်များ ပါဝင်သည်။

အစည်းအဝေးအတွင်း ကိုယ်စားလှယ်အဖွဲ့များသည် ယူကရိန်းအတွက် ရေရှည်လုံခြုံရေးအာမခံချက်များကို ဆွေးနွေးခဲ့ကြောင်း အမေရိကန် အမျိုးသားလုံခြုံရေးအကြံပေးဖြစ်သူ Mike Waltz က ပြောကြားခဲ့သော်လည်း နောက်ထပ်အသေးစိတ်အချက်အလက်များကို မဖော်ပြခဲ့ပါ။ ဂျီဒါတွင် ကျင်းပခဲ့သော အမေရိကန်-ယူကရိန်း ဆွေးနွေးပွဲအပြီးတွင် ထုတ်ပြန်ခဲ့သည့် ကြေညာချက်များနှင့်ပတ်သက်၍ မော်စကိုဘက်မှ တရားဝင် တုံ့ပြန်ချက်များ ဖော်ပြခဲ့ခြင်းမရှိပေ။ ရုရှားခေါင်းဆောင်များက ယာယီ စစ်ပြေငြိမ်းရေးသဘောတူညီချက်များကို လက်မခံနိုင်ဘဲ၊ ယာယီသဘောတူညီချက်များသည် ကိယက်ဗ်နှင့် ၎င်း၏အနောက်နိုင်ငံများမှ ပံ့ပိုးသူများအတွက်သာ အကျိုးရှိမည်ဟု ယခင်ကတည်းကအသိပေးခဲ့သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယူကရိန်းက မော်စကိုမြို့အား ပစ်မှတ်ထားပြီး အနည်းဆုံး ဒရုန်း (၉၁) စင်းဖြင့် အကြီးမားဆုံးသော တိုက်ခိုက်မှုကို မတ်လ (၁၁) ရက်နေ့တွင် လုပ်ဆောင်ခဲ့ရာ အနည်းဆုံးလူ (၂) ဦးသေဆုံးပြီး လေဆိပ်များပိတ်ထားရကာ လေကြောင်း ခရီးစဉ်များ ရွှေ့ဆိုင်းထားရကြောင်း ရုရှားနိုင်ငံတာဝန်ရှိသူများက ပြောကြားခဲ့သည်။

ယူကရိန်းက မော်စကိုမြို့တော်သို့ ဒရုန်း (၉၁) စင်းနှင့် ယူကရိန်းတပ်များပြန်လည်ဆုတ်ခွာသွားခဲ့သည့် ကာ့ခ်စ် (Kursk)ဒေသသို့ ဒရုန်း (၁၂၆) စင်းတို့အပါအဝင် စုစုပေါင်းဒရုန်း ၃၃၇ စင်းဖြင့် ရုရှားနိုင်ငံသို့ ပစ်ခတ်တိုက်ခိုက် ခဲ့ခြင်းဖြစ်ကြောင်း ရုရှားကာကွယ်ရေးဝန်ကြီးဌာနက ထုတ်ပြန်ပြောကြားခဲ့ပါသည်။

ကိုးကား-CNA

အလွတ်သဘောဘာသာပြန်သူ-ဦးထက်ထက်အောင်(နစက-၄)

ယူကရိန်းထောက်ခံရေးနှင့်ပတ်သက်၍ ဗြိတိန်ဝန်ကြီးချုပ် Keir Starmer က လာမည့် မတ်လ ၁၅ ရက်တွင် နိုင်ငံတကာအစည်းအဝေးတစ်ရပ်ကို အွန်လိုင်းမှတစ်ဆင့် ပြုလုပ်မည်ဟု ဗြိတိန်ဝန်ကြီးချုပ် ပြောရေးဆိုခွင့်ရှိ သူက ပြောကြားလိုက်ပါသည်။

ယခုပြုလုပ်မည့် အစည်းအဝေးသည် ပြီးခဲ့သည့် မတ်လ ၂ ရက်က လန်ဒန်မြို့ Lancaster House မှာ ပြုလုပ်ခဲ့သည့် ယူကရိန်းကို အကူအညီထောက်ပံ့ပေးရေး အစည်းအဝေးရလဒ်များအပေါ်   ထပ်မံ အဖြေရှာမည့် ဆွေးနွေးပွဲဖြစ်ပါသည်။

ပြီးခဲ့သည့်အစည်းအဝေးမှာ ဥရောပ ၁၈ နိုင်ငံနှင့်အဖွဲ့အစည်းများ  ပါဝင်ခဲ့သော်လည်း တချို့နိုင်ငံများက  ယူကရိန်းကို အပြည့်အဝထောက်ခံရန်  မသင့်လျော်ဟု ထောက်ပြခဲ့ကြကြောင်း၊ ထို့ကြောင့် ယူကရိန်း ထောက်ပံ့ပေးရေး ထောက်ခံလိုသူနိုင်ငံများ စုစည်း၍  မတ် ၁၅ ရက်တွင် အွန်လိုင်း အစည်းအဝေးပြုလုပ်ရခြင်းဖြစ်ကြောင်း  Starmer က ထပ်လောင်း ပြောကြားထားပါသည်။ 

ကိုးကား- RT

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားက မတ်လ ၁၁ ရက်(အင်္ဂါ)နေ့တွင် ၎င်း၏အနောက်တောင်ပိုင်း Kursk ဒေသတွင် စတုရန်းကီလိုမီတာ ၁၀၀ ကျော် (စတုရန်းမိုင် ၄၀ နီးပါး) ကို ပြန်လည်သိမ်းပိုက်နိုင်ဟု ပြောကြားခဲ့သည်။ ရုရှား၏ ရည်မှန်းချက်မှာ ယူကရိန်းတပ်များကို ရုရှားပိုင်နယ်မြေမှ မောင်းထုတ်ရန် ဖြစ်သည်။

မော်စကို၏ ပြန်လည်ထိုးစစ်ဆင်တိုက်ခိုက်မှုများသည် ထိုဒေသတွင် အောင်မြင်မှုများရရှိနေသည်။ ယခင်နှစ် ဩဂုတ်လတွင် ယူကရိန်းက အံ့အားသင့်ဖွယ် ထိုးစစ်ဆင်နွှဲခဲ့ပြီး ဒုတိယကမ္ဘာစစ် ပြီး ပထမဆုံးအကြိမ် နိုင်ငံခြားတပ်များက ရုရှားကို မြေပြင်မှ ကျူးကျော်ဝင်ရောက်ခဲ့ခြင်းဖြစ်ကာ နယ်မြေများကို လျင်မြန်စွာသိမ်းပိုက်ခဲ့ခြင်းလည်းဖြစ်သည်။

ရုရှား၏ စစ်ဆင်ရေးတိုးတက်မှုများသည် ယူကရိန်း၏ နယ်မြေဆိုင်ရာ ညှိနှိုင်းမှုကို ခြိမ်းခြောက်လျက်ရှိပြီး အမေရိကန်နှင့် ယူကရိန်းအရာရှိများ အကြား ဆွေးနွေးမှုများကို ဆော်ဒီအာရေဗျနိုင်ငံ ဂျက်ဒါတွင် လက်ရှိ ကျင်းပလျက်ရှိသည်။

ဝါရှင်တန်အခြေစိုက် Institute for the Study of War (ISW) ၏ ထုတ်ပြန်ချက်တွင် “ရုရှားတပ်များသည် Kursk Oblast တွင် ၎င်းတို့ရရှိထားသည်များကို ခိုင်မာစေရန်လုပ်ဆောင်နေပြီး လာမည့်ရက် များအတွင်း Sudzha ကို တိုက်ခိုက်ရန် ပြင်ဆင်နေသည်ဟု ယူဆ ရကြောင်း” ဖော်ပြခဲ့သည်။ ISW ၏ အဆိုအရ ရုရှား ကမ်းတက် တပ်ဖွဲ့ များနှင့် မြောက်ကိုရီးယားတပ်ရင်း နှစ်ရင်းအထိ ပါဝင်သောတပ်များသည် Kurilovka နှင့် Guyevo အနီးရှိ Sudzha ၏ တောင်ဘက်တွင် တိုက်ခိုက်နေသည်ဟု ဖော်ပြခဲ့သည်။

ကိုးကား-CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က ဗလာဒီမာဇီလန်စကီးအား ယူကရိန်း ခေါင်းဆောင်အဖြစ်မှ နုတ်ထွက်သင့်ကြောင်း ၎င်း၏လက်ထောက်များအား သီးသန့်ပြောကြားခဲ့သည်ဟု NBC သတင်းဌာနက အမေရိကန် အစိုးရအရာရှိတစ်ဦး၏ပြောကြားချက်ကိုကိုးကားပြီး ဖော်ပြခဲ့သည်။

အဆိုပါသတင်းသည် အမေရိကန်အရာရှိကြီးများနှင့် ဇီလန်စကီး၏ ကိုယ်စားလှယ်အဖွဲ့တို့အကြား ဆော်ဒီအာရေဗျနိုင်ငံ ဂျီဒါမြို့၌ မတ်လ ၁၁ ရက်(အင်္ဂါ)နေ့တွင် ကျင်းပမည့် ညှိနှိုင်းဆွေးနွေးပွဲမတိုင်မီ ထွက်ပေါ် လာခြင်းဖြစ်သည်။ အမေရိကန်နိုင်ငံခြားရေးဝန်ကြီး Marco Rubio၊ အမျိုးသားလုံခြုံရေးအကြံပေးပုဂ္ဂိုလ် Mike Waltz နှင့် ထရမ့်၏ အရှေ့ အလယ်ပိုင်းဆိုင်ရာ အထူးကိုယ်စားလှယ် Steve Witkoff တို့သည် Andrey Yermak ဦးဆောင်သည့် ယူကရိန်းကိုယ်စားလှယ်အဖွဲ့နှင့် သုံးနှစ်ကြာ ပဋိပက္ခအဆုံးသတ်ရန် ဆွေးနွေးမည်ဖြစ်သည်။

ထရမ့်သည် ဇီလန်စကီး၏ ငြိမ်းချမ်းရေးဆွေးနွေးပွဲဆိုင်ရာ သဘောထားပြောင်းလဲမှုကို တွေ့မြင်လိုပြီး နယ်မြေအခွင့်အရေးများကိုလျှော့ပေးရန် သဘောထားပါဝင်ကြောင်း အမေရိကန်အုပ်ချုပ်ရေးအဖွဲ့ဝင်တစ်ဦးနှင့် အခြားအမေရိကန်အရာရှိတစ်ဦးတို့၏ပြောဆိုချက်များကို ကိုးကားကာ မတ်လ ၉ ရက်နေ့တွင် ထုတ်ဝေခဲ့သည့် NBC ၏ ဆောင်းပါးတစ်ပုဒ်တွင် ဖော်ပြခဲ့သည်။

ထရမ့်က ဇီလန်စကီးသည် သမ္မတရွေးကောက်ပွဲကျင်းပရန်နှင့် နိုင်ငံ့ခေါင်းဆောင်အဖြစ်မှ နုတ်ထွက်ရန် အဆင်သင့်ဖြစ်သင့်ကြောင်း ပြောကြားခဲ့သည်ဟု သိရှိရပါသည်။

ရုရှားနှင့် ပဋိပက္ခအတွင်း စစ်အုပ်ချုပ်ရေးကြေညာထားခြင်းကို အကြောင်းပြကာ ရွေးကောက်ပွဲအသစ်ကျင်းပရန် ငြင်းဆန်ခဲ့သည့် ဇီလန်စကီး၏ သမ္မတသက်တမ်းသည် ၂၀၂၄ ခုနှစ်၊ မေလတွင် တရားဝင် ကုန်ဆုံးခဲ့သည်။

ကရင်မလင်ပြောရေးဆိုခွင့်ရှိသူ Dmitry Peskov က ဇီလန်စကီးအား တရားဝင်နိုင်ငံခေါင်းဆောင်တစ်ဦးအဖြစ် မော်စကိုက မသတ်မှတ်သော်လည်း ဆွေးနွေးရန် အဆင်သင့်ရှိကြောင်း ဖေဖော်ဝါရီလတွင် ပြောကြား ခဲ့သည်။

Kiev International Institute of Sociology ၏ နောက်ဆုံး လေ့လာချက်အရ ယူကရိန်းခေါင်းဆောင်၏ ထောက်ခံမှုရာခိုင်နှုန်းသည် ၆၈% ရှိပြီး ဖေဖော်ဝါရီလကုန်ပိုင်းက အိမ်ဖြူတော်၌ ထရမ့်နှင့် အမေရိကန် ဒုသမ္မတ J.D. Vance တို့နှင့် အပြန်အလှန်ငြင်းခုံပြီးနောက် ထိုကိန်းဂဏန်းများ သိသိသာသာ မြင့်တက်လာခဲ့ခြင်းဖြစ်သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ပြည်ထောင်စု၏ အရှေ့အလယ်ပိုင်းဆိုင်ရာ အထူးကိုယ်စားလှယ် Steve Witkoff က ယူကရိန်းခေါင်းဆောင် ဗလာဒီမာ ဇီလန်စကီးသည် အိမ်ဖြူတော်ပြဿနာနှင့်ပတ်သက်၍ အမေရိကန်သမ္မတ ဒေါ်နယ်ထရမ့် အား တောင်းပန်ခဲ့ကြောင်း ပြောကြားခဲ့သည်။

Witkoff က ယခုအပတ်အတွင်း ဆော်ဒီအာရေဗျတွင် ကျင်းပမည့် အမေရိကန်နှင့် ယူကရိန်းကိုယ်စားလှယ်အဖွဲ့ များအကြား ဆွေးနွေးပွဲ မတိုင်မီ မတ်လ ၁၀ ရက်(တနင်္လာ)နေ့က Fox News နှင့် အင်တာဗျူး တစ်ခုတွင် ထိုသို့ပြောကြားခဲ့ခြင်းဖြစ်သည်။ ဝါရှင်တန်သည် သိသိသာသာ တိုးတက်မှုရရှိရန် မျှော်လင့်နေပြီး ကိယက်ဗ်နှင့် သတ္ထုတွင်းထွက်ပစ္စည်း များဆိုင်ရာ သဘောတူညီချက်တစ်ခုကို လက်မှတ်ရေးထိုးနိုင်ရန် မျှော်လင့် နေကြောင်း Witkoff က ပြောကြားခဲ့သည်။

“ဇီလန်စကီးက သမ္မတထရမ့်ထံ စာတစ်စောင်ပို့ခဲ့ပြီး Oval Office မှာ ဖြစ်ခဲ့သည့် အဖြစ်အပျက်အတွက် ၎င်းဘက်က တောင်းပန်ခဲ့သည်” ဟု ၎င်းက ပြောသည်။ “အဆိုပါအချင်းအရာသည် အရေးကြီးသည့် အဆင့် တစ်ခုဟု ၎င်းကမှတ်ယူကြောင်း၊ ဤဆွေးနွေးမှုနှင့် သက်ဆိုင်သည့်အမေရိကန်ကိုယ်စားလှယ်အဖွဲ့များနှင့် ယူကရိန်းနိုင်ငံသားများနှင့် ဥရောပ နိုင်ငံသားများအကြား ဆွေးနွေးမှုများစွာရှိခဲ့သည်” ဟု ဆက်လက် ပြောကြား ခဲ့သည်။

ထရမ့်က မကြာသေးမီက ဇီလန်စကီးထံမှ အရေးကြီးသော စာတစ်စောင် ကို လက်ခံရရှိခဲ့ကြောင်း ဖွင့်ဟခဲ့ပြီး ကိယက်ဗ်က “တတ်နိုင်သမျှ အမြန်ဆုံး ညှိနှိုင်းဆွေးနွေးရန် အဆင်သင့်ဖြစ်ကြောင်း” ဖော်ပြထား ကြောင်း ပြောကြားခဲ့သည်။

သို့သော် အမေရိကန်သမ္မတက စာတွင် Oval Office ပြဿနာနှင့် ပတ်သက်၍ တောင်းပန်ချက်ပါရှိကြောင်း ဖော်ပြခဲ့ခြင်းမရှိပေ။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မြောက်ကိုရီးယားနိုင်ငံ၏ ပထမဆုံး နျူကလီးယားစွမ်းအင်သုံး ရေငုပ်သင်္ဘောကို မြောက်ကိုရီးယားခေါင်းဆောင် ကင်ဂျုံအန်းက မိတ်ဆက် ပြသလိုက်ကြောင်း နိုင်ငံပိုင်သတင်းမီဒီယာမှ မတ်လ ၈ ရက်နေ့(စနေနေ့)တွင် သတင်း ထုတ်ပြန်ခဲ့ပါသည်။ 

ကင်ဂျုံအန်းအနေဖြင့် အဆိုပါရေငုပ်သင်္ဘော တည်ဆောက်မှုလုပ်ငန်းစဉ်အကြောင်းကို အသေးစိတ်ရှင်းလင်းပြောကြားခဲ့သော်လည်း တည်ဆောက် ခဲ့သည့်နေရာနှင့် နည်းပညာဆိုင်ရာအချက်အလက်များကို အသေးစိတ် ပြောကြားခဲ့ခြင်း မရှိပါ။ 

Nuclear Threat Initiative ၏ အချက်အလက်များအရ မြောက်ကိုရီးယားသည် ကမ္ဘာ့အကြီးဆုံး ရေငုပ်သင်္ဘောတပ်ဖွဲ့များမှ တစ်ခုဖြစ်ပြီး ပျမ်းမျှ အစီး ၇၀ မှ ၉၀ အထိ ပိုင်ဆိုင်ထားပါသည်။ သို့ရာတွင် စစ်ရေးကျွမ်းကျင်သူများက မြောက်ကိုရီးယား၏ ရေငုပ်သင်္ဘောအများစုသည် ခေတ်မမီတော့ကြောင်း၊ စစ်ဆင်ရေးများတွင် ထိထိရောက်ရောက် အသုံးပြုနိုင်ခြင်း မရှိခြင်း ၊ ဒုံးကျည်များ ပစ်လွှတ်ရာတွင် တိကျစွာ အသုံးပြုနိုင်စွမ်းမရှိကြောင်း သုံးသပ်ထားကြပါသည်။ 

ကိုးကား- RT

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

၂၀၂၅ ခုနှစ်၊ မတ်လ ၃ ရက်မှ စတင်၍ အမေရိကန်မှ တရုတ်သို့ တင်သွင်းသည့် လယ်ယာထွက်ကုန်ပစ္စည်းများအပေါ် တရုတ်နိုင်ငံက အကောက်ခွန်နှုန်းထား တိုးမြှင့်သတ်မှတ်လိုက်ပါသည်။ တရုတ်နိုင်ငံသည် လယ်ယာထွက်ကုန်ပစ္စည်းများအတွက် အကြီးဆုံး နိုင်ငံခြားဈေးကွက်ဖြစ်သည့်အတွက် အဆိုပါကိစ္စသည် တရုတ်နှင့် အမေရိကန်အကြား ကုန်သွယ်ရေးစစ်ပွဲကို ဖြစ်ပေါ်စေမည့် အလားအလာကို ပြသနေပါသည်။ ကြေညာခဲ့သည့် တရုတ်နိုင်ငံ၏ အကောက်ခွန်နှုန်းထား ၁၅ ရာခိုင်နှုန်း တိုးမြှင့်မှုတွင် ကြက်သား၊ ဂျုံ၊ ပြောင်း အစရှိသော ပစ္စည်းများ ပါဝင်ပြီး အကောက်ခွန် နှုန်းထား ၁၀ ရာခိုင်နှုန်း တိုးမြှင့်မှုတွင် ပဲပိစပ်၊ ဝက်သား၊ အမဲသားနှင့် အသီးများ ပါဝင်ပါသည်။ မတ်လ ၁၀ ရက်(တနင်္လာ)နေ့၌ အမေရိကန်မှ တရုတ်သို့ တင်ပို့ပြီး ဧပြီ လ ၁၂ ရက်တွင် တရုတ်သို့ တင်သွင်းမည့် ကုန်ပစ္စည်းများအပေါ် အဆိုပါအကောက်ခွန်နှုန်းထား သက်ရောက်မည် မဟုတ်ကြောင်း တရုတ်နိုင်ငံက ထုတ်ပြန်ထားပါသည်။ 

လက်ရှိအချိန်အထိ တရုတ်အစိုးရအနေဖြင့် အမေရိကန်ကုမ္ပဏီ ၁၅ ခုကို တရုတ်ကုန်ပစ္စည်းများ ဝယ်ယူခွင့်မရရန် တားမြစ်ထားပြီး ထိုကုမ္ပဏီများအထဲတွင် အမေရိကန်စစ်တပ်အတွက် Drone ဝယ်ယူနေသည့် ကုမ္ပဏီများ ပါဝင်ကြောင်း သိရှိရပါသည်။ ထို့အပြင် တရုတ်နိုင်ငံတွင် စီးပွားရေး ပြုလုပ်ရန် ပိတ်ဆို့ခံထားရသည့် အမေရိကန်ကုမ္ပဏီ ၁၀ ခု ရှိကြောင်း သတင်းရရှိပါသည်။ 

ကိုးကား -New York Times

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊နစက-၃

ရုရှားဖက်ဒရေးရှင်းနိုင်ငံသမ္မတ H.E. Vladimir Vladimirovich Putin ၏ ဖိတ်ကြားချက်အရ ရုရှားဖက်ဒရေးရှင်းနိုင်ငံသို့ မတ်လ ၄ ရက်နေ့၊ နံနက်ပိုင်းမှ မတ်လ ၆ ရက်နေ့ နံနက်ပိုင်းအထိလည်းကောင်း၊ ဘယ်လာရုစ် နိုင်ငံသမ္မတ မစ္စတာလူကာရှန်ကို၏ ဖိတ်ကြားချက်အရ မတ်လ ၆ ရက်နေ့ မွန်းလွဲပိုင်းမှ မတ်လ ၉ ရက်နေ့ နံနက်ပိုင်းအထိလည်းကောင်း တရားဝင် ချစ်ကြည်ရေးခရီးစဉ် သွားရောက်ရာတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဦးဆောင်သည့် မြန်မာ အဆင့်မြင့် ချစ်ကြည်ရေး ကိုယ်စားလှယ်အဖွဲ့တွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန (၁) ၊ ပြည်ထောင်စုဝန်ကြီး ဗိုလ်ချုပ်ကြီး မိုးအောင် လိုက်ပါသွားခဲ့ပြီး နှစ်နိုင်ငံအစိုးရနှင့် ပြည်သူများအကြား ချစ်ကြည်ရေး၊ စီးပွားရေး၊ လုံခြုံရေးဆိုင်ရာများနှင့် ကဏ္ဍပေါင်းစုံတွင် မဟာဗျူဟာမြောက် ပူးပေါင်းဆောင်ရွက်မှုဆိုင်ရာကိစ္စရပ်များ ပိုမိုတိုးတက်ခိုင်မာအောင် ဆွေးနွေးခြင်းနှင့် နှစ်နိုင်ငံအစိုးရနှစ်ရပ်အကြား သဘောတူညီချက်များ၊ စီးပွားရေး ပူးပေါင်းဆောင်ရွက်ရေးဆိုင်ရာ နားလည်မှု စာချွန်လွှာများကို လက်မှတ်ရေးထိုးခြင်းများ ဆောင်ရွက်ရာတွင် ပူးပေါင်းပါဝင် ဆွေးနွေးခဲ့ကြောင်း သိရှိရပါသည်။

ကိုးကား-SAC Web Technical Team