တရုတ်နိုင်ငံ၊ နိုင်ငံတော်ကောင်စီ ပြန်ကြားရေးရုံးက ဧပြီ ၉ ရက်တွင် “တရုတ်-အမေရိကန် စီးပွားရေးနှင့် ကုန်သွယ်မှု ဆက်ဆံရေးဆိုင်ရာကိစ္စရပ်အချို့နှင့်စပ်လျဉ်း၍ တရုတ်နိုင်ငံ၏ ရပ်တည်ချက်” စက္ကူဖြူစာတမ်း ကို ထုတ်ပြန်ခဲ့ပြီး တရုတ်-အမေရိကန် စီးပွားရေးနှင့် ကုန်သွယ်ရေး ဆက်ဆံရေးဖြစ်ရပ်မှန်အား ရှင်းလင်းတင်ပြခဲ့ကာ သက်ဆိုင်ရာ အရေး ကိစ္စများအပေါ် တရုတ်နိုင်ငံ၏ မူဝါဒဆိုင်ရာ ရပ်တည်ချက်များကို ရှင်းလင်း ပြောကြားထားပြီး ကုန်သွယ်ရေးစစ်ပွဲတွင် အနိုင်ရရှိသူဟူ၍ မရှိသလို ကိုယ်ကျိုးစီးပွား ကာကွယ်ရေးဝါဒသည် ထွက်လမ်းမရှိကြောင်း ဖော်ပြထားသည်။

စက္ကူဖြူစာတမ်းတွင် အပိုင်း ၆ ပိုင်း ပါဝင်သည်။ ၎င်းတို့မှာ တရုတ်-အမေရိကန် စီးပွားရေးနှင့် ကုန်သွယ်ရေး ဆက်ဆံရေး၏ အနှစ်သာရမှာ အပြန်အလှန် အကျိုးဖြစ်ထွန်းခြင်း၊ တရုတ်-အမေရိကန် ပထမအဆင့် စီးပွားရေးနှင့် ကုန်သွယ်ရေးသဘောတူညီချက်အား တရုတ်နိုင်ငံက သေချာစွာ လိုက်နာဖော်ဆောင်ခြင်း၊ တရုတ်-အမေရိကန် ပထမအဆင့် စီးပွားရေးနှင့်ကုန်သွယ်ရေး သဘောတူညီချက်၏ သက်ဆိုင်ရာ တာဝန် ဝတ္တရားအား အမေရိကန်ဘက်က ချိုးဖောက်ခြင်း၊ တရုတ်နိုင်ငံအနေဖြင့် လွတ်လပ်စွာကုန်သွယ်ရေး အယူအဆအား လက်တွေ့ဖော်ဆောင်၍ကမ္ဘာ့ကုန်သွယ်ရေးအဖွဲ့ (WTO) ၏ စည်းမျဉ်းစည်းကမ်းများအားသေချာစွာလိုက်နာခြင်း၊ တစ်ဖက်သတ်ဝါဒ၊ ကိုယ်ကျိုးစီးပွား ကာကွယ်ရေး ဝါဒတို့သည် နှစ်ဖက်စီးပွားရေးနှင့် ကုန်သွယ်မှုဆက်ဆံရေး ဖွံ့ဖြိုး တိုးတက်မှုအား ထိခိုက်စေခြင်း၊ တရုတ်နှင့် အမေရိကန်တို့သည် တန်းတူ ညီမျှ တွေ့ဆုံဆွေးနွေးမှု၊ အပြန်အလှန် အကျိုးဖြစ်ထွန်းသော ပူးပေါင်း ဆောင်ရွက်မှုမှတစ်ဆင့် စီးပွားရေးနှင့် ကုန်သွယ်ရေး သဘောထား ကွဲလွဲမှုများကို ဖြေရှင်းနိုင်ခြင်းတို့ပင်ဖြစ်သည်။

တရုတ်-အမေရိကန် နှစ်နိုင်ငံ သံတမန်ဆက်ဆံရေးထူထောင်သည့် ၄၆ နှစ်တာကာလအတွင်း နှစ်ဖက်စီးပွားရေးနှင့် ကုန်သွယ်မှု ဆက်ဆံရေးသည် စဉ်ဆက်မပြတ် ဖွံ့ဖြိုးတိုးတက်လာကြောင်း စက္ကူဖြူစာတမ်းတွင် မိတ်ဆက်ဖော်ပြထားသည်။ တရုတ်-အမေရိကန် ကုန်သွယ်ရေး ပမာဏ သည် ၁၉၇၉ ခုနှစ်တွင် ကန်ဒေါ်လာ ၂.၅ ဘီလီယံပင် မပြည့်သည့် အခြေအနေမှ ၂၀၂၄ ခုနှစ်တွင် ကန်ဒေါ်လာ ၆၈၈.၃ ဘီလီယံနီးပါးအထိ တိုးတက်လာခဲ့ကြောင်း၊ သို့သော် လတ်တလောနှစ်များအတွင်း အမေရိကန်၏ တစ်ဖက်သတ်ဝါဒ၊ ကိုယ်ကျိုးစီးပွားကာကွယ်ရေးဝါဒတို့ ဦးမော့လာသည်နှင့်အမျှ တရုတ်-အမေရိကန်၏ ပုံမှန်စီးပွားရေးနှင့် ကုန်သွယ်ရေးဆိုင်ရာ ပူးပေါင်းဆောင်ရွက်မှုကို ပြင်းထန်စွာ နှောင့်ယှက် လာကြောင်း စာတမ်းက ဆိုထားသည်။

၂၀၁၈ ခုနှစ် တရုတ်-အမေရိကန် စီးပွားရေးနှင့် ကုန်သွယ်ရေး ပွတ်တိုက်မှု ဖြစ်ပွားပြီးကတည်းက တရုတ်နိုင်ငံမှ အမေရိကန်သို့ တင်ပို့သော ကန် ဒေါ်လာ ၅၀၀ ဘီလီယံကျော်တန်ဖိုးရှိသည့် အမေရိကန်ဘက်က ကုန် ပစ္စည်းများအပေါ် ပမာဏမြင့်မားသော စည်းကြပ်ခွန်များ တိုးမြှင့် ကောက်ခံခဲ့ကာ တရုတ်နိုင်ငံအား တားဆီးဖိနှိပ်သည့် မူဝါဒများ အဆက်မပြတ် ထုတ်ပြန်ခဲ့ကြောင်း၊ တရုတ်နိုင်ငံအနေဖြင့် နိုင်ငံအကျိုးစီးပွားအား ခိုင်မာစွာ ကာကွယ်ရန်အတွက် ပြင်းထန်သည့် တန်ပြန်မှုအစီအမံများ မဖြစ်မနေ လုပ်ဆောင်ခဲ့ရကြောင်း၊ တစ်ချိန်တည်းတွင် တရုတ်နိုင်ငံက ဆွေးနွေးညှိနှိုင်းခြင်းမှတစ်ဆင့် အငြင်းပွားမှုအား ဖြေရှင်းသည့် အခြေခံ ရပ်တည်ချက်အား အစဉ်အမြဲ လက်ကိုင်ထားကာ အမေရိကန်ဘက်နှင့် စီးပွားရေးနှင့် ကုန်သွယ်ရေးဆိုင်ရာ ဆွေးနွေးညှိနှိုင်းမှုများ အကြိမ်များစွာ လုပ်ဆောင်၍ နှစ်ဖက်စီးပွားရေးနှင့် ကုန်သွယ်ရေးဆက်ဆံရေး တည်‌ငြိမ် အောင် ကြိုးပမ်းလုပ်ဆောင်ခဲ့ကြောင်း စာတမ်းတွင် ဖော်ပြထားသည်။

အမေရိကန်ဘက်က လတ်တလောကာလအတွင်း “အမေရိကန် ဦးစားပေး” ကုန်သွယ်ရေး၊ ရင်းနှီးမြှုပ်နှံမှု မူဝါဒဆိုင်ရာ စာချွန်လွှာနှင့် “အမေရိကန် ဦးစားပေး” ကုန်သွယ်ရေး မူဝါဒ အစီရင်ခံစာ လက်တွေ့ ဖော်ဆောင်မှု အကျဉ်းချုပ်တို့အား ဆက်တိုက်ထုတ်ပြန်ခဲ့ကြောင်း၊ Fentanyl စသည့် အရေးကိစ္စများကို အကြောင်းပြု၍ တရုတ်နိုင်ငံအပေါ် စည်းကြပ်ခွန် တိုးမြှင့်ကောက်ခံခြင်း၊ “အလားတူ စည်းကြပ်ခွန်” ကောက်ခံ၍ ၅၀ ရာခိုင်နှုန်း စည်းကြပ်ခွန်အား တစ်ဆင့်တိုး ကောက်ခံခြင်း တို့ အပါအဝင် တရုတ်နိုင်ငံ ကုန်ပစ္စည်းများအပေါ် ဘက်စုံ စည်းကြပ်ခွန် ထပ်တိုးကောက်ခံခဲ့ကြောင်း၊ ထို့ပြင် တရုတ်နိုင်ငံ ရေကြောင်း သွားလာရေး၊ ထောက်ပံ့ပို့ဆောင်ရေးနှင့် သင်္ဘောတည်ဆောက်ရေးလုပ်ငန်းများကို ဦးတည်၍ ဆိပ်ကမ်းအခကြေးငွေ ကောက်ခံခြင်း စသည့် ၃၀၁ စုံစမ်း စစ်ဆေးကန့်သတ်မှုအစီအမံများကို အဆိုပြုခဲ့ကြောင်း စက္ကူဖြူ စာတမ်း က ထောက်ပြထားသည်။

အဆိုပါ စည်းကြပ်ခွန် စသည်တို့ဖြင့် ခြိမ်းခြောက်အကျပ်ကိုင်သည့် ကန့်သတ်ချက်အစီအမံများသည် မှားပြီးရင်း မှားနေသည်သာဖြစ်ပြီး အမေရိကန်၏ စံတင်လောက်သည့် တစ်ဖက်သတ်ဝါဒနှင့် အနိုင်ကျင့် ဗိုလ်ကျမှုဝါဒ သဘောသဘာဝကို ထပ်မံဖော်ထုတ်လိုက်ခြင်း ဖြစ်ကြောင်း၊ ယင်းသည် ဈေးကွက်စီးပွားရေးအစီအစဉ်အား ချိုးဖောက်ရာကျသလို နိုင်ငံစုံ ပူးပေါင်းဆောင်ရွက်မှုဝါဒနှင့်လည်း ဆန့်ကျင်နေကာ တရုတ်-အမေရိကန် စီးပွားရေးနှင့် ကုန်သွယ်ရေး ဆက်ဆံရေးအပေါ် ဆိုးရွားသည့် သက်ရောက်မှုဖြစ်စေမည်ဖြစ်ကြောင်း၊ တရုတ်နိုင်ငံသည် နိုင်ငံတကာ ဥပဒေ အခြေခံမူ၊ ဥပဒေစည်းမျဉ်းစည်းကမ်းများနှင့်အညီ လိုအပ်သော တန်ပြန်အစီအမံများ လုပ်ဆောင်ပြီးဖြစ်ကြောင်း စာတမ်း၌ ဖော်ပြထား သည်။

တရုတ်-အမေရိကန် စီးပွားရေးနှင့် ကုန်သွယ်ရေး ဆက်ဆံရေး၏ အနှစ် သာရသည် အပြန်အလှန် အကျိုးဖြစ်ထွန်းမှုဖြစ်သည်ဟု တရုတ်နိုင်ငံ အနေဖြင့် အစဉ်တစိုက် မှတ်ယူထားကြောင်း စက္ကူဖြူစာတမ်းက ဆို ထားသည်။ ဖွံ့ဖြိုးတိုးတက်မှုအဆင့်၊ စီးပွားရေးစနစ် မတူညီသည့် နိုင်ငံ ကြီးနှစ်နိုင်ငံအနေဖြင့် တရုတ်၊ အမေရိကန် နှစ်ဖက်က စီးပွားရေးနှင့် ကုန်သွယ်ရေး ပူးပေါင်းဆောင်ရွက်မှုတွင် သဘောထားကွဲလွဲမှုနှင့် ပွတ်တိုက်မှုများ ဖြစ်ပွားခြင်းသည် ပုံမှန်ပင်ဖြစ်ကြောင်း၊ အဓိက အချက် မှာတစ်ဦး၏ အရေးကြီးအကျိုးစီးပွားနှင့် အရေးပါဂရုပြုချက်များကို အပြန်အလှန် လေးစား၍ ဆွေးနွေးညှိနှိုင်းခြင်းဖြင့် ပြဿနာအား ကောင်းမွန်စွာ ဖြေရှင်းသည့် နည်းလမ်းအား ရှာဖွေခြင်းပင်ဖြစ်ကြောင်း စက္ကူဖြူစာတမ်းကဆိုသည်။

ကုန်သွယ်ရေးစစ်ပွဲတွင် အနိုင်ရရှိသူဟူ၍ မရှိသလို ကိုယ်ကျိုးစီးပွား ကာကွယ်ရေးဝါဒသည် ထွက်လမ်းမရှိကြောင်း၊ တရုတ်နှင့် အမေရိကန်က ကိုယ်စီအောင်မြင်မှုများရရှိခြင်းသည် အပြန်အလှန်အတွက် အခွင့်အလမ်း များဖြစ်ပြီး ခြိမ်းခြောက်မှု မဟုတ်‌ကြောင်း၊ အမေရိကန်နှင့် တရုတ်နိုင်ငံ တို့သည် စိတ်တူကိုယ်တူ လုပ်ဆောင်ကာ နှစ်နိုင်ငံခေါင်းဆောင်များ ဖုန်းဖြင့် ဆက်သွယ်ရာ၌ လမ်းညွှန်ခဲ့သည့် လားရာနှင့်အညီ အပြန်အလှန် လေးစားသော၊ ငြိမ်းချမ်းစွာ အတူယှဉ်တွဲနေထိုင်သော၊ အပြန်အလှန် အကျိုးဖြစ်ထွန်း၍ ပူးပေါင်းဆောင်ရွက်သော အခြေခံမူကိုအရင်းခံ၍ တန်းတူညီမျှ တွေ့ဆုံဆွေးနွေးမှုမှတစ်ဆင့် အပြန်အလှန် ဂရုပြုချက် များကို ဖြေရှင်းကာ တရုတ်-အမေရိကန် စီးပွားရေးနှင့် ကုန်သွယ်ရေး ဆက်ဆံရေး ကောင်းမွန်စွာ၊ တည်ငြိမ်စွာ၊ စဉ်ဆက်မပြတ်ဖြစ်စွာ ဖွံ့ဖြိုး တိုးတက်မှုအား အတူတကွတွန်းအားပေးရန် မျှော်လင့်ကြောင်း စက္ကူဖြူ စာတမ်းတွင် ဖော်ပြထားကြောင်း သတင်းများအရ သိရှိရသည်။

ကိုးကား-The State Council Information Office, The Peoples’s Republic of China

အမေရိကန်သမ္မတ ဒေါ်နယ်ထရမ့်က အီရန်နိုင်ငံအား လိုအပ်ပါက စစ်ရေးအရ တုံ့ပြန်မှုပြုလုပ်ရန် အသင့်ရှိကြောင်း ဧပြီ ၉ ရက် (ဗုဒ္ဓဟူးနေ့) တွင် အိမ်ဖြူတော်၌ ကျင်းပသော သတင်းထောက်များနှင့် တွေ့ဆုံမှုတွင် ထုတ်ဖော်ပြောကြားခဲ့သည်။ 

အိုမန်၌အီရန်နှင့် ပြုလုပ်မည့်ဆွေးနွေးပွဲများသည် ကြာရှည်မည့် လုပ်ငန်းစဉ်၏အစသာဖြစ်ကြောင်း အမေရိကန်သမ္မတ ဒေါ်နယ်ထရမ့် က မှတ်ချက်ပြုပြောကြားခဲ့သည်။ “မိမိတို့တွင် အချိန်အနည်းငယ်သာရှိကြောင်း၊ အကြောင်းမှာ မိမိတို့အနေဖြင့် ၎င်းတို့ကို နျူကလီးယားလက်နက်ရရှိရန် ခွင့်မပြုနိုင်သည့်အတွက် ဖြစ်ပါကြောင်း” အမေရိကန်သမ္မတက ပြောကြားခဲ့သည်။ “မိမိအနေဖြင့် အများကြီးမတောင်းဆိုပါ။ ၎င်းတို့မှာ နျူကလီးယား လက်နက်ရှိ၍ မရပါ” ဟု ထရမ့်က ထပ်ခါတလဲလဲ ပြောကြားခဲ့ပါသည်။ “သို့သော် အီရန်နှင့်ပတ်သက်၍ စစ်ရေးဆိုင်ရာလုပ်ဆောင်မှုလိုအပ်ပါက မိမိတို့က လုပ်ဆောင်မည်ဖြစ်ကြောင်း၊ အစ္စရေး နိုင်ငံက ထိုအရာ၌ အကြီး အကျယ်ပါဝင်ပတ်သက်နေမည်မှာ ထင်ရှားကြောင်း၊ အစ္စရေးက အဆိုပါ ကိစ္စတွင် ဦးဆောင်သူဖြစ်လိမ့်မည်ဖြစ်ကြောင်း” အမေရိကန်သမ္မတ ဒေါ်နယ် ထရမ့်က ပြောကြားခဲ့ပါသည်။ “သို့သော် မည်သူကမျှ မိမိတို့ကို ဦးဆောင်ခြင်း မရှိကြောင်း၊ မိမိတို့က မိမိတို့ဆန္ဒရှိသည်ကိုသာ လုပ်ဆောင်ခြင်း ဖြစ်ကြောင်း” အမေရိကန်သမ္မတက အကျဉ်းချုပ်ပြောကြားခဲ့သည်။ 

ဧပြီ ၁၂ ရက်တွင် အိုမန်နိုင်ငံ၌ အမေရိကန်-အီရန် နျူကလီးယားအရေး ဆွေးနွေးပွဲ ကျင်းပမည်ဖြစ်ပြီး အမေရိကန်ဘက်မှ သမ္မတ၏ အထူး ကိုယ်စားလှယ် စတီဗင် ဝှစ်ကော့ဖ်နှင့် အီရန်ဘက်မှ နိုင်ငံခြားရေးဝန်ကြီး အဘ်ဘာစ် အရာချီ တို့ ဦးဆောင်မည်ဖြစ်ပါသည်။ အိမ်ဖြူတော်က “တိုက်ရိုက် ဆွေးနွေးမည်” ဟု ဆိုသော်လည်း၊ အီရန်က “ကြားခံများမှတစ်ဆင့်သာ” ဆောင်ရွက်မည်ဟု ငြင်းဆိုခဲ့ပါသည်။ 

နျူကလီးယားသဘောတူညီချက် (JCPOA) မှနုတ်ထွက်မည့်အဖွဲ့အပေါ် ပိတ်ဆို့အရေးယူမှုများချမှတ်ရန် ဖြစ်နိုင်ခြေကို စာရွက်စာတမ်းတွင် အတည်ပြုပေးခြင်းနှင့် ပူးတွဲဘက်ပေါင်းစုံ လုပ်ဆောင်မှုအစီအစဉ်များပါဝင်သည့် JCPOA သဘောတူညီချက်ကို ပြန်လည် ပြင်ဆင် ရေးအတွက် အီရန်က တောင်းဆိုလျက်ရှိပါသည်။ အမေရိကန်ကမူ အီရန် နျူကလီးယားအစီအစဉ်၏ စစ်ရေးဆိုင်ရာဖွံ့ဖြိုးတိုးတက်မှုကို တားဆီးခြင်း အပြင် အီရန်၏ နျူကလီးယားဆိုင်ရာနေရာများအားလုံးကို အပြီးအပိုင် ဖျက်သိမ်းရန် တောင်းဆိုလျက်ရှိသည်။ ထို့ပြင် ဝါရှင်တန်က အရှေ့ အလယ်ပိုင်း၌ အီရန်၏ မဟာမိတ်များကို ထောက်ခံအားပေးမှုကို ရပ်တန့် စေရန်နှင့် ဒုံးပျံပစ်လွှတ်ခြင်းနှင့်ပတ်သက်၍ အီရန်၏အစီအစဉ်ကို ကန့်သတ်ရန် တောင်းဆိုလျက်ရှိပါသည်။ အီရန်က ၎င်း၏နိုင်ငံခြားရေး မူဝါဒဆိုင်ရာနှင့် ကာကွယ်ရေးဆိုင်ရာအခွင့်အရေးများကို ကန့်သတ်ရန် မည်သည့်ကြိုးပမ်းမှုကိုမဆို လုံးဝငြင်းဆန်ခဲ့ပြီး ငြိမ်းချမ်းသော နျူကလီးယားစွမ်းအင်ကို ဖွံ့ဖြိုးတိုးတက်စေရန်အတွက် ၎င်း၏ အခွင့်အရေး ကို အလေးအနက်ထားပြောဆိုခဲ့သည်။

ကိုးကား - Tass

ရုရှားစစ်တပ်၏ အစိတ်အပိုင်းတစ်ခုအနေဖြင့် ယူကရိန်းကို တိုက်ခိုက် နေသည့် အနည်းဆုံး တရုတ်နိုင်ငံသား ၁၅၅ ဦး ရှိကြောင်း ယူကရိန်း သမ္မတ Zelensky သည် သတင်းထောက်များနှင့် တွေ့ဆုံစဉ် ပြောကြား ခဲ့ပါသည်။

သမ္မတ၏ အဆိုအရ ရုရှားသည် TikTok မှတစ်ဆင့် တရုတ်နိုင်ငံသား များကို အဓိကထား၍ စစ်သားအဖြစ်စုဆောင်းနေကြောင်း သိရပါသည်။

ကိုးကား-အင်တာနက်စာမျက်နှာများ

တရုတ်ကုန်ပစ္စည်းအပေါ် ဒေါ်နယ်ထရမ့်က အခွန် ၁၀၄ % အထိ စည်း ကြပ်မည့် အရေးယူမှုအပေါ် တရုတ်အစိုးရက ပြင်းပြင်းထန်ထန် တုံ့ပြန်သွားမည်ဖြစ်ကြောင်း တရုတ်နိုင်ငံခြားရေးပြောခွင့်ရှိသူ Lin Jian က ပြောကြားလိုက်ပါသည်။

“မိမိတို့၏ တရားဝင်အခွင့်အရေးနှင့် အကျိုးစီးပွားများကို ကာကွယ်ရန် ပြင်းထန်သည့် အရေးယူမှုများ ဆက်လက်ပြုလုပ်သွားမည်ဖြစ်ကြောင်း” Lin Jian က သတင်းစာရှင်းလင်းပွဲတွင် ထရမ့်၏ အခွန်မူဝါဒများအပေါ် မှတ်ချက်ပြု ပြောကြားလိုက်ပါသည်။

ဧပြီ ၂ ရက်က ဒေါ်နယ်ထရမ့်သည် နိုင်ငံပေါင်း ၁၈၅ နိုင်ငံမှ တင်သွင်း လာသည့်ကုန်ပစ္စည်းများအပေါ် အနည်းဆုံး အခြေခံအခွန် ၁၀ % စည်း ကြပ်ရန် ကြေညာလိုက်ပါသည်။ ထို့အပြင် တရုတ်နိုင်ငံအပေါ် အထူး သီးသန့် အခွန်အဖြစ် ၃၄ % ချမှတ်ထားကြောင်း အတည်ပြု ပြောကြား ထားပါသည်။

ထိုကိစ္စကို တုံ့ပြန်သည့်အနေဖြင့် တရုတ်အစိုးရသည် ဧပြီ ၁၀ ရက်မှစ၍ အမေရိကန်ကုန်ပစ္စည်းအားလုံးအပေါ် အခွန်စည်းကြပ်ကန့်သတ်မှုများ ပြုလုပ်သွားမည် ဖြစ်ကြောင်း သိရပါသည်။

ထို့နောက် ဒေါ်နယ်ထရမ့်က တရုတ်နှင့် အမေရိကန်အကြား ဆောင်ရွက်မည့် ကုန်သွယ်ရေး သဘောတူညီမှု မချုပ်ဆိုမီအထိ တရုတ်ပစ္စည်းများအပေါ် ၁၀၄ % အထိ အခွန်စည်းကြပ်မှု ဆက်တိုက်ပြုလုပ်သွားမည်ဖြစ်ကြောင်း ကြေညာခဲ့သည်။ 

ကိုးကား- TASS/ Reuters

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်ပြည်ထောင်စုသည် တရုတ်နိုင်ငံမှ သွင်းကုန်များအပေါ် အကောက်ခွန် ၅၀ ရာခိုင်နှုန်းကို ၁၀၄ ရာခိုင်နှုန်းအထိ တိုးမြှင့်လိုက်ကြောင်း အိမ်ဖြူတော်သတင်းထုတ်ပြန်ရေးခေါင်းဆောင် ကာရိုလိုင်းလီဗစ်ကသတင်းစာရှင်းလင်းပွဲတွင် သတင်းထောက်များအား အတည်ပြု ပြောကြား လိုက်ပါသည်။ 

“ဧပြီ ၉ ရက် ညသန်းခေါင်ယံမှာ တရုတ်နိုင်ငံအပေါ် ၁၀၄% အခွန် စည်းကြပ်မှု အကျိုးသက်ရောက်မှု စတင်မည်ဖြစ်ပါသည်” ဟု လီဗစ်က ပြောကြားခဲ့သည်။ 

ကိုးကား- TASS/CNN

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တရုတ်နိုင်ငံအနေဖြင့် ယူကရိန်းပဋိပက္ခတွင် စစ်တပ်များ ပေးပို့ခဲ့ခြင်း မရှိခဲ့ပါကြောင်း၊ မိမိနိုင်ငံသားများအား စစ်ပွဲများတွင် ပါဝင်ခြင်း မရှိစေရန်အမြဲတစေ ညွှန်ကြားထားပါကြောင်း တရုတ်နိုင်ငံခြားရေးဝန်ကြီးဌာန ပြောခွင့်ရှိသူ Lin Jian က ပြောကြားထားပါသည်။

“တရုတ်အစိုးရက ယူကရိန်းရှိ စစ်ပွဲပဋိပက္ခဖြစ်ပွားရာနေရာများကို   မိမိ နိုင်ငံသားများ ရှောင်ကြည်ကြရန်နှင့် မည်သည့်ဘက်ကမျှ ပါဝင်ခြင်း မရှိ စေရန် အမြဲတစေ ညွှန်ကြားလျက်ရှိပါကြောင်း၊ ယခု တရုတ်နိုင်ငံသားများ ရုရှား၏ အထူးစစ်ဆင်ရေးလှုပ်ရှားမှုတွင် ပါဝင်နေကြောင်း ထွက်ပေါ်နေ သည့်သတင်းများအပေါ် စုံစမ်းစစ်ဆေးမှုများ ပြုလုပ်နေပါကြောင်း”တရုတ် သံတမန်က ယူကရိန်းသတင်းထောက် မေးမြန်းချက်အပေါ် ပြန်လည် ဖြေကြားထားပါသည်။                                                 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တောင်ကိုရီးယားနိုင်ငံတွင် ဆိုင်းမဆင့် ဘုံမဆင့် သမ္မတ ရွေးကောက်ပွဲ ကို လာမည့် ဇွန်လ ၃ ရက်တွင် ကျင်းပရန် စီစဉ်ထားကြောင်း Yonhap သတင်းဌာနက ဧပြီ ၇ ရက်တွင် အစိုးရအမည်မဖော်လိုသူ အရင်းအမြစ် ကို ကိုးကားပြောပြထားပါသည်။ 

ထိုနေ့ကို ပြည်သူများအား အလုပ်ပိတ်ရက်အဖြစ် သတ်မှတ်ရန် ဆုံးဖြတ် ရမည်ဖြစ်သဖြင့် မကြာခင်ပြုလုပ်မည့် အစိုးရအဖွဲ့အစည်းအဝေး (Cabinet Meeting) တွင် တရားဝင်အတည်ပြုမည်ဖြစ်ပါသည်။

ဧပြီ ၄ ရက်က တောင်ကိုရီးယားနိုင်ငံ ဖွဲ့စည်းပုံအခြေခံဥပဒေဆိုင်ရာခုံရုံး (Constitutional Court) သည် သမ္မတ Yoon Suk Yeol အပေါ် ကန့်ကွက် ရှုတ်ချမှုကို တညီတညွတ်တည်း အတည်ပြုလိုက်ကြပါသည်။

တောင်ကိုရီးယား နိုင်ငံ၏ တည်ဆဲဥပဒေအရ သမ္မတရာထူး လစ်လပ်သည့် နေ့မှ ရက်ပေါင်း ၆၀ အတွင်း သမ္မတရွေးကောက်ပွဲ ကျင်းပရပါမည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

အမေရိကန်သမ္မတဒေါ်နယ်ထရမ့်နှင့် အီလွန်မက်တို့၏ အစိုးရဆိုင်ရာ မူဝါဒများကို ဆန့်ကျင်ရှုတ်ချသည့်အနေဖြင့် သန်းချီသော ပြည်သူများက ဧပြီလ ၅ ရက်(စနေနေ့)တွင် အကြီးအကျယ် ဆန္ဒပြခဲ့ကြပါသည်။ 

ဖက်ဒရယ်အစိုးရဌာနများမှ ဝန်ထမ်းများအား ထုတ်ပစ်ခြင်း၊ လူမှုရေး အာမခံဌာနများ ပိတ်သိမ်းခြင်း၊ ပညာရေးဝန်ထမ်းများ အလုပ်အကိုင် ဖြတ်တောက်ခြင်း၊ ကျန်းမာရေးနှင့် ယဉ်ကျေးမှု အဖွဲ့အစည်းများ၏ရန်ပုံငွေများဖြတ်တောက်ခြင်းစသည့် သမ္မတထရမ့်၏ အမိန့်ညွှန်ကြားချက် အပေါ် ဆန့်ကျင်သောအားဖြင့် အမေရိကန် ပြည်နယ် ၅၀ လုံးရှိ အစိုးရ ဆိုင်ရာအဆောက်အအုံများ၊ ပန်းခြံများ၊ မြို့တော်ခန်းမများတွင် “Hands Off !!” အမည်ရှိ ဆန္ဒပြပွဲပေါင်း ၁၄၀၀ ကျော် တစ်ပြိုင်တည်း ပြုလုပ် ကြပါသည်။

ထရမ့်အစိုးရ၏ သက်တမ်းစတင်ချိန်မှ ပြည်တွင်း၊ နိုင်ငံတကာဆိုင်ရာ ပြုပြင်ပြောင်းလဲလိုက်သည့်အမိန့်များအပေါ် ဆန့်ကျင်သည့်အနေဖြင့် အမေရိကန်အပြင် အခြား ဥရောပရှိ ဘာလင်၊ ဖရန့်ဖတ်၊ ပါရီနှင့် လန်ဒန် ကဲ့သို့ ကမ္ဘာ့မြို့ကြီးများတွင်လည်း တစ်ချိန်တည်း ဆန္ဒပြပွဲများ ပြုလုပ် ခဲ့ကြသည်။

ကိုးကား- CNN

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

အီတလီနိုင်ငံ ရောမမြို့တွင် ဥရောပသမဂ္ဂ၏ပြန်လည် လက်နက်မြှုပ်နှံမှု အစီအစဉ်ကို ကန့်ကွက်သည့် ကြီးမားသော ဆန္ဒပြပွဲများ ဖြစ်ပွားခဲ့သည်။

​သောင်းနှင့်ချီ​သောလူထုသည် Piazza Vittorio Emanuele II ရင်ပြင်တွင် စုဝေးကာ ဘရပ်ဆဲလ်မြို့ရှိ ဥရောပသမဂ္ဂအဖွဲ့၏ ယူရိုငွေ ဘီလီယံ ၈၀၀ အား ကာကွယ်ရေးလုပ်ငန်းများတွင် သုံးစွဲရန် ဖိအားပေးမှုကို ပယ်ချခဲ့ ကြသည်။ 

“ဒုံးကျည် မလိုပါ၊ ဆေးရုံ လိုအပ်နေပါသည်” ဟု ဆန္ဒပြသူများက ကြွေးကြော်ခဲ့သည်။ 

စစ်တမ်းများအရ အီတလီလူမျိုး ၆၂% သည် စစ်ရေး အသုံးစရိတ် တိုးမြှင့်မှုကို ကန့်ကွက်ကြောင်း ဖော်ပြထားပြီး ယင်းသည် ဥရောပ သမဂ္ဂ၏ ပျမ်းမျှကန့်ကွက်မှုထက် သိသိသာသာ မြင့်မားနေကြောင်း သိရှိရပါသည်။

ကိုးကား-အင်တာနက်စာမျက်နှာ

ပြည်ထောင်စုမြန်မာနိုင်ငံတော်၊ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌနှင့် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ထိုင်းနိုင်ငံဘန်ကောက်မြို့တွင် ကျင်းပသည့် ဆဋ္ဌမအကြိမ်မြောက် BIMSTEC ထိပ်သီးအစည်းအဝေး ကာလအတွင်း ဘင်္ဂလားဒေ့ရှ် ယာယီ အစိုးအဖွဲ့၏ အကြံပေးချုပ် ပါမောက္ခ မိုဟာမက် ယူနွတ်စ် နှင့် ဧပြီ ၅ ရက် (သောကြာနေ့)က တွေ့ဆုံခဲ့ပါသည်။ 

ပါမောက္ခယူနွတ်စ် က မတ်လ ၂၈ ရက်က မြန်မာနိုင်ငံတွင် ငလျင်ကြောင့် ဖြစ်ပွားခဲ့သော အသက်ဆုံးရှုံးမှုများနှင့်ပတ်သက်၍ မြန်မာပြည်သူများ နှင့်အတူ ထပ်တူဝမ်းနည်းကြေကွဲကြောင်း ထုတ်ဖော်ပြောကြားခဲ့ ပါသည်။ သဘာဝဘေးအန္တရာယ်ဖြစ်ပွားပြီးနောက် ဘင်္ဂလားဒေ့ရှ်မှ ကယ်ဆယ်ရေးအဖွဲ့များ စေလွှတ်ခြင်းအပါအဝင် လူသားချင်း စာနာ ထောက်ထားမှု အကူအညီများ ထောက်ပံ့ခဲ့သည့်အကြောင်းကို ဆွေးနွေး ခဲ့ကြပါသည်။ 

“နောက်ထပ်လူသားချင်းစာနာမှုအကူအညီများ ဆက်လက်ပံ့ပိုးရန် အသင့်ရှိ နေပါသည်။ မိမိတို့၏ သင်္ဘောများလည်း အသင့်ပြင်ဆင်ထား ပါသည်” ဟု ပါမောက္ခယူနွတ်စ်က ပြောကြားခဲ့ပါသည်။ 

ပြည်ထောင်စုမြန်မာနိုင်ငံတော်၊ နိုင်ငံတော်ဝန်ကြီးချုပ်က BIMSTEC ၏ ဥက္ကဋ္ဌရာထူးအတွက် ပါမောက္ခယူနွတ်စ်အား ဂုဏ်ပြုကြောင်း ပြောကြား ခဲ့ပြီး ဘင်္ဂလားဒေ့ရှ်နိုင်ငံ၏ ဦးဆောင်မှုဖြင့် ဒေသတွင်းအဖွဲ့အစည်းအား စွမ်းအားသစ်များ ရရှိလာမည်ဟု မျှော်လင့်ကြောင်း ဖော်ပြခဲ့ပါသည်။

ကိုးကား - ပါမောက္ခယူနွတ်စ်၏ လူမှုကွန်ယက် စာမျက်နှာ ( Facebook)