ဆဋ္ဌမအကြိမ်မြောက် ဘင်းမ်စတက် ထိပ်သီးအစည်းအဝေးကိုယနေ့နံနက်ပိုင်း တွင် ထိုင်းနိုင်ငံ၊ ဘန်ကောက်မြို့ရှိ Shangri – La ဟိုတယ်၌ ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်၍ ဆွေးနွေးသည်။

အဆိုပါအစည်းအဝေးသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ပြည် ထောင်စုဝန်ကြီးများဖြစ်ကြသည့် ဦးသန်းဆွေ၊ ဗိုလ်ချုပ်ကြီး မိုးအောင်နှင့် ခရီးစဉ်တွင် လိုက်ပါလာသည့် အဆင့်မြင့်အရာရှိကြီးများတက်ရောက်ကြသည်။

ဦးစွာ ဘင်းမ်စတက်အလှည့်ကျဥက္ကဋ္ဌ ထိုင်းနိုင်ငံဝန်ကြီးချုပ် H.E. Ms. Paetongtarm Shinawatra က နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် နှင့်အစည်းအဝေးသို့ တက်ရောက်လာ ကြသည့် ဘင်္ဂလားဒေ့ရှ်နိုင်ငံ၊ ဘူတန်နိုင်ငံ၊ အိန္ဒိယနိုင်ငံ၊ နီပေါနိုင်ငံနှင့် သီရိလင်္ကာနိုင်ငံ တို့မှ ခေါင်းဆောင်များအား တစ်ဦးချင်းကြိုဆိုနှုတ်ဆက်ပြီး မှတ်တမ်းတင်စုပေါင်း ဓာတ်ပုံရိုက်ကြသည်။

ယင်းနောက် အစည်းအဝေးကိုစတင်ကျင်းပပြုလုပ်ရာ ဘင်းမ်စတက်အလှည့်ကျ ဥက္ကဋ္ဌ ထိုင်းနိုင်ငံဝန်ကြီးချုပ်က အဖွင့်အမှာစကားပြောကြားသည်။ ထိုသို့အဖွင့်အမှာ စကားပြောကြားနေချိန်အတွင်း မြန်မာနိုင်ငံနှင့် ထိုင်းနိုင်ငံတို့တွင် မတ်လ ၂၈ ရက်နေ့၌ ပြင်းထန်စွာ ငလျင်လှုပ်ခတ်ခဲ့မှုကြောင့်  ငလျင်ဘေးဒဏ်သင့်ခဲ့ရသည့်သူများအတွက် ၁ မိနစ်ငြိမ်သက်ဂါရဝပြုကြသည်။

ထို့နောက် အစည်းအဝေးအစီအစဉ်အား အတည်ပြုပြီး ဘင်းမ်စတက်အဖွဲ့ဝင် နိုင်ငံခေါင်းဆောင်များက မိန့်ခွန်း အသီးသီးပြောကြားကြသည်။

ထိုသို့ပြောကြားရာတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်က ထိုင်းနိုင်ငံ၏ ဘင်းမ်စတက်ဥက္ကဋ္ဌသက်တမ်း ဆောင်ပုဒ်ဖြစ်သည့် “သာယာဝပြော၍ ကြံ့ကြံ့ခံနိုင်သော ပွင့်လင်းမြင်သာသည့် ဘင်းမ်စတက်” သည် အဖွဲ့ဝင်နိုင်ငံများ၏ ရည်မှန်းချက်များနှင့် အလွန်လိုက်လျောညီထွေရှိကြောင်း၊ ထိုင်းနိုင်ငံ၏ ဦးဆောင်မှုအောက်တွင် အစီအစဉ်များစွာ အကောင်အထည်ပေါ် လာခဲ့ ကြောင်း၊ အထူးသဖြင့် ယခုထိပ်သီးအစည်းအဝေးတွင် အတည်ပြုချမှတ်မည့် ဘင်းမ်စတက် ဗန်ကောက်မျှော်မှန်းချက် ၂၀၃၀ ကို ရေးဆွဲအဆိုပြုခြင်းအတွက် ဥက္ကဋ္ဌ ထိုင်းနိုင်ငံ၏ ဦးဆောင်ဦးရွက်ပြုမှုကို အသိအမှတ်ပြု ပြောကြားလိုကြောင်း။

ထို့ပြင် မိမိတို့သည် ဘင်းမ်စတက်ယန္တရားများဆိုင်ရာ လုပ်ထုံးလုပ်နည်းများကို ယခုထိပ်သီးအစည်းအဝေးတွင် အတည်ပြုကြမည်ဖြစ်ကြောင်း၊ အဆိုပါ လုပ်ထုံး လုပ်နည်းများသည် ဘင်းမ်စတက် အစည်းအဝေးများ စနစ်တကျ ကျင်းပနိုင်ရန်နှင့် ဆုံးဖြတ်ချက်ချသည့် လုပ်ငန်းစဉ်များ ရှင်းလင်းမှုရှိစေရန်အတွက် လမ်းညွှန်များ ဖြစ်လာမည် ဖြစ်ကြောင်း။

ဆက္လက္ဖတ္ရှုရန္ - https://myawady.net.mm/node/67112

Source : Myawady Webportal 

ထိုင်းနိုင်ငံတွင် အိမ်ရှင်အဖြစ်လက်ခံကျင်းပမည့်ဆဋ္ဌမအကြိမ်မြောက် ဘင်းမ် စတက်ထိပ်သီး အစည်းအဝေးအစည်းအဝေးသို့ တက်ရောက်ရန်ရောက်ရှိနေသော နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် သည် အိန္ဒိယနိုင်ငံဝန်ကြီးချုပ် H.E. Mr. Shri Narendra Modi နှင့် ယနေ့ဒေသစံတော်ချိန်နံနက်ပိုင်းတွင် ဘန်ကောက်မြို့ရှိ Shangri – La ဟိုတယ်၌ တွေ့ဆုံ ဆွေးနွေးသည်။

ထိုသို့တွေ့ဆုံဆွေးနွေးရာတွင် ဦးစွာ အိန္ဒိယနိုင်ငံဝန်ကြီးချုပ်က မြန်မာနိုင်ငံ တွင် ပြင်းထန်ငလျင်လှုပ်ခတ်ခဲ့မှုကြောင့် ထိခိုက်ပျက်စီးဆုံးရှုံးခဲ့ရမှုများကို မိမိနှင့် အိန္ဒိယ ပြည်သူများ အနေဖြင့် များစွာစိတ်မကောင်းဖြစ်ရပါကြောင်း၊ မိမိတို့ ဂူဂျာရက်ပြည်နယ် ၌လည်း ယခင်က ထိုကဲ့သို့ ပြင်းထန်သည့်ငလျင်ကို ထိခိုက်ခံစားခဲ့ရဖူးကြောင်း၊ မြန်မာ နိုင်ငံအတွက်လိုအပ်သည့် အကူအညီများကို မိမိတို့အနေဖြင့် ဆက်လက်ပေးအပ်သွား မည်ဖြစ်ပါကြောင်း၊ ယခုဘင်းမ်စတက်အစည်းအဝေးတွင် မိမိအနေဖြင့် သဘာဝဘေး ဒဏ်များနှင့်ပတ်သက်သည့် အကြောင်းအရာများကိုကျယ်ကျယ်ပြန့်ပြန့်ဆွေးနွေး သွားမည်ဖြစ်ပါကြောင်း၊ ယခုကဲ့သို့ အဆွေတော်နှင့် ထပ်မံတွေ့ဆုံရမှုအတွက်လည်း ဝမ်းမြောက်ပါကြောင်းဖြင့်ပြောကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် က ယခုကဲ့သို့ မိမိတို့နိုင်ငံတွင် ပြင်းထန်ငလျင်လှုပ်ခတ်ခဲ့မှုကြောင့် ထိခိုက်ပျက်စီး ဆုံး ရှုံးမှုများအပေါ် အဆွေတော်နှင့် အိန္ဒိယပြည်သူများက အကူအညီများပေးအပ်မှုများ အတွက်များစွာကျေးဇူးတင်ရှိပါကြောင်း၊ ငလျင်ဘေးဒဏ်ကြောင့် ထိခိုက်ပျက်စီးမှုများ၊ ပြန်လည်ထူထောင်ရေးနှင့်ပတ်သက်၍လည်း အတွေ့အကြုံများကို မျှဝေပေးစေလိုပါ ကြောင်း၊ အဆွေတော်အနေဖြင့် ဘင်းမ်စတက်အစည်းအဝေးတွင် သဘာဝဘေး အန္တရာယ် များနှင့်ပတ်သက်သည့် ကိစ္စရပ်များကို ကျယ်ကျယ်ပြန့်ပြန့်ဆွေးနွေးမည်ဟု သိရသည့်အတွက်လည်း မိမိအနေဖြင့် ဝမ်းမြောက်ပါကြောင်းဖြင့်ပြောကြားသည်။

ထို့နောက် နှစ်နိုင်ငံအကြားချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ မြှင့်တင် ရေးဆိုင်ရာကိစ္စရပ်များ၊ မြန်မာနိုင်ငံ တည်ငြိမ်အေးချမ်းရေး၊ သာယာ ဝပြောရေးနှင့် မြန်မာနိုင်ငံ၏ အချုပ်အခြာအာဏာပိုင်ဆိုင်မှုကို အလေးထားမှု အခြေအနေများ၊ နယ်စပ်ဒေသတည်ငြိမ်အေးချမ်းရေး၊ တရားမဝင်လူကုန်ကူးမှုများ နှင့် လက်နက်မှောင်ခိုမှုများ ပပျောက်ရေး ပူးပေါင်းဆောင်ရွက်သွားမည့်အခြေနေများ၊ မြန်မာနိုင်ငံအနေဖြင့် ပါတီစုံဒီမိုကရေစီလမ်းကြောင်းပေါ်၌ ဆက်လက်လျှောက်လှမ်း လျက်ရှိမှုနှင့် ယခုနှစ်ဒီဇင်ဘာလအတွင်း လွတ်လပ်ပြီးတရားမျှတသည့် ပါတီစုံဒီမို ကရေစီအထွေထွေရွေးကောက်ပွဲကျင်းပနိုင်ရေး ကြိုတင်ပြင်ဆင်ဆောင်ရွက်လျက်ရှိ မှုအခြေအနေများနှင့်ပတ်သက်၍ ရင်းနှီးပွင့်လင်းစွာအမြင်ချင်းဖလှယ်ဆွေးနွေးခဲ့ကြ သည်။

တွေ့ဆုံပွဲအခမ်းအနားသို့ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော် ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ပြည် ထောင်စုဝန်ကြီးများဖြစ်ကြသည့် ဦးသန်းဆွေ၊ ဗိုလ်ချုပ်ကြီး မိုးအောင်နှင့် ခရီးစဉ်တွင် လိုက်ပါလာသည့် အဆင့်မြင့်အရာရှိကြီးများတက်ရောက်ကြပြီး အိန္ဒိယနိုင်ငံ ဝန်ကြီး ချုပ်နှင့်အတူ  အိန္ဒိယနိုင်ငံအစိုးရအဖွဲ့မှ တာဝန်ရှိသူများတက်ရောက် ကြသည်။

တွေ့ဆုံပွဲအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီး ချုပ်နှင့် အိန္ဒိနိုင်ငံဝန်ကြီးချုပ်တို့သည် မှတ်တမ်းတင်ဓာတ်ပုံရိုက်ကြပြီး တက်ရောက် လာကြသူများကိုရင်းရင်းနှီးနှီးနှုတ်ဆက်ခဲ့ကြောင်းသတင်းရရှိသည်။

Source​: Myawady Webportal

ရုရှားနိုင်ငံ Federal Security Service (FSB) မှ ရဲအရာရှိများသည် ၎င်းတို့၏ လုပ်ဖော်ကိုင်ဖက်များနှင့်အတူ မော်စကိုမြို့ရှိ ရှေးဟောင်းပစ္စည်းဈေးကွက်တွင် ယခင်က ပြင်သစ်၌ ခိုးယူခံလိုက်ရသည့် ရူဘယ် ၅၅ သန်း (ဒေါ်လာ ၆၅၆,၀၀၀ ဝန်းကျင်) တန်ဖိုးရှိ ရှေးဟောင်းရွှေဒင်္ဂါးများကို တွေ့ရှိခဲ့ကြောင်း ရုရှားပြည်ထဲရေးဌာန ပြောခွင့်ရ Irina Volk က ပြောကြားလိုက်ပါသည်။ 

ထိုရှေးဟောင်းရွှေဒင်္ဂါးပြားများကို မူလက ပြင်သစ်နိုင်ငံ၊ Reims မြို့ရှိ Saint-Remy ရှိ ရှေးဟောင်းသုတေသနနှင့် အနုပညာပြတိုက်တွင် စုဆောင်းပြသထားခြင်းဖြစ်သည်။ 

“မော်စကိုက ရှေးဟောင်းပစ္စည်းဈေးကွက်မှာ ဒင်္ဂါးပြားတွေရောင်းချသည်ကို စုံစမ်းစစ်ဆေးသည့်အခါ အရာရှိတွေက ယခင်က ပြင်သစ်မှာ ခိုးယူခံလိုက်ရသည့်ပစ္စည်းများ၏ ဖော်ပြချက်များ၊ အထောက်အထားများနှင့် ကိုက်ညီနေသည်ကို တွေ့ရသဖြင့် Interpol က ပြင်သစ် အာဏာပိုင်တွေကို စုံစမ်းမေးမြန်းခဲ့ပါသည်" ဟု Volk က ဆက်လက် ရှင်းပြပါသည်။ 

 “အေဒီ ၁ ရာစုမှ ၅ ရာစုအတွင်း တူးဖော်ထားသော ရှားပါး ရှေးဟောင်းဒင်္ဂါးများအပါအဝင် ရွှေဒင်္ဂါးများ ခိုးယူခံရမှုကို နိုင်ငံခြား လုပ်ဖော်ကိုင်ဖက် (ပြင်သစ်ရဲတပ်ဖွဲ့)များ အတည်ပြုခဲ့ကြပါသည်။ ခိုးယူမှုအတွက် တာဝန်ရှိသည့် ပြတိုက်စောင့်ကို အပြစ်ပေးခဲ့သော်လည်း ထိုပစ္စည်းများ ယခုအချိန်အထိ ပြန်လည်မရရှိသေးခြင်းဖြစ်ပါတယ်” ဟု Volk က သူမ၏ Telegram ရုပ်သံလိုင်းတွင် ရေးသားဖော်ပြခဲ့ပါသည်။

ယခုအခါ ရုရှားအာဏာပိုင်များသည် အဆိုပါ ရှာဖွေသိမ်းဆည်းရသည့် ရှေးဟောင်းဒင်္ဂါးများကိုမူလအတိုင်း ပြင်သစ်တွင် ထိန်းသိမ်းပြသနိုင်ရေး  ပြန်လည်ပေးအပ်ရန် လုပ်ဆောင်လျက်ရှိပါသည်။

ကိုးကား- TASS

Photo: en.iz.ru

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ယူကရိန်းခေါင်းဆောင် ဗလာဒီမာဇီလန်စကီး က တပ်မတော်အတွင်း လူငယ်များ ပိုမိုပါဝင်လာစေရန် လိုအပ်ကြောင်း ထုတ်ဖော်ပြောကြားခဲ့သည်။ အချို့တပ်ဖွဲ့များတွင် လူအင်အား အရေးပေါ် လိုအပ်နေခြင်းကြောင့် ဖြစ်သည်။

မတ် ၂၄ (တနင်္လာနေ့)တွင် ကျင်းပသည့် ပုံမှန်သတင်းစာရှင်းလင်းပွဲတွင် ဇီလန်စကီးက အသက် ၁၈ နှစ်မှ ၂၄ နှစ်အရွယ် လူငယ်များကိုဦးတည်သော စစ်သားစုဆောင်းရေး အစီအစဉ်သစ်ကို အတည်ပြုခဲ့ကြောင်း ကြေညာခဲ့သည်။ အသက် ၂၄ နှစ်အထက် အမျိုးသားများအတွက် မဖြစ်မနေစစ်မှုထမ်းဆောင်ရန် ဥပဒေရှိသော်လည်း အစိုးရအနေဖြင့် လူငယ်များကိုယ်တိုင်ထမ်းဆောင်လိုမှုဖြင့် ပါဝင်လာစေရန် ဆွဲဆောင်မှုများ ပြုလုပ်နေသည်။

“မနေ့က ရှေ့တန်းကို သွားရောက်ခဲ့ပြီး အချို့တပ်ဖွဲ့များက အထူး လိုအပ်ချက်ရှိနေကာ မိမိတို့အနေဖြင့် အပြုသဘောဆောင်သော တုံ့ပြန်မှုပြုမည်ဖြစ်ကာ လူငယ်ကျွမ်းကျင်သူများ ပိုမိုပါဝင်သည့်တပ်ဖွဲ့များ ပိုမို ရှိလာမည်” ဟု ဇီလန်စကီးက ပြောကြားခဲ့သည်။ “အဆိုပါအစီအစဉ်ကို အမျိုးသားကာကွယ်ရေးတပ်ဖွဲ့နှင့် နယ်ခြားစောင့်တပ်ဖွဲ့များတွင်လည်း ကျင့်သုံးမည်ဖြစ်ပြီး ထိရောက်သော ကာကွယ်ရေးအင်အားစုအားလုံးကို စွမ်းဆောင်ရည်မြှင့်တင်နိုင်ရန် အခွင့်အလမ်းများ ပေးအပ်ရမည်” ဟု ၎င်းက ဆက်လက်ပြောကြားခဲ့ပါသည်။

ဖေဖော်ဝါရီလတွင် စတင်ခဲ့သော စုဆောင်းရေးအစီအစဉ်အရ စစ်မှုထမ်းသက် တစ်နှစ်ပြည့်ပါက လူငယ်များအား hryvnia ၁ သန်း (အမေရိကန် ဒေါ်လာ ၂၄,၀၀၀)၊ အခမဲ့သွားဘက်ဆိုင်ရာကုသမှုနှင့် စာချုပ်ကာလပြီးဆုံးပါက ယူကရိန်းမှ ထွက်ခွာခွင့်စသည့် အခွင့်အရေးများပေးမည်ဖြစ်သည်။ အဆိုပါခံစားခွင့်များကို သာမန်စစ်မှုထမ်းဆောင်ရန် အသက် အရွယ်ရောက်သူများအတွက် မရရှိနိုင်ပေ။

အဆိုပါကြေညာချက်သည် ယူကရိန်းနိုင်ငံ၏ စစ်ရေးအခြေအနေတွင် အရေးပါသော အပြောင်းအလဲတစ်ရပ်ဖြစ်ပြီး နိုင်ငံတကာမှ စောင့်ကြည့်လျက်ရှိသည်။ စစ်ရေးကျွမ်းကျင်သူများက ထိုအစီအစဉ်သည် ယူကရိန်း၏ ကာကွယ်ရေးအင်အားကို သိသိသာသာ တိုးမြှင့်ပေးနိုင်မည်ဟု ခန့်မှန်းထားသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ထိုင်း-မြန်မာနယ်စပ်က နယ်စပ်ဂိတ်တစ်ခုဖြစ်သည့် ဂိတ်အမှတ် (၄၈) ကို ထိုင်းနိုင်ငံဘက်က တရားဝင်ပိတ်လိုက်ကြောင်း သိရပါသည်။ နယ်စပ် မြစ်ဖြစ်သည့် သောင်ရင်းမြစ်ကူးဂိတ် (၅၉) ဂိတ် ရှိသည့်အနက်က မဲဆောက်ခရိုင်၊ မဲကုရပ်ကွက်မှာရှိသည့် ဂိတ်အမှတ် (၄၈) ကို ထိုင်း အာဏာပိုင်တွေက ပိတ်လိုက်ခြင်းဖြစ်ကြောင်း အဆိုပါဂိတ်များကနေ ကူးသန်းရောင်းဝယ်မှုပြုလုပ်နေသူများက ပြောပါသည်။

ထိုင်းနိုင်ငံ၊ တာခ်ခရိုင်မြို့တော်ဝန်နှင့် နယ်စပ်ဒေသလုံခြုံရေးအဖွဲ့များက အဆိုပါဂိတ်ကိုပိတ်သိမ်းလိုက်ကြောင်း ပြီးခဲ့သည့် မတ်လ ၂၂ ရက်နေ့က ကြေညာခဲ့ကြောင်း သိရပါသည်။

အခြားသော တတိယနိုင်ငံများက ကုန်သွယ်မှုပြုသည့် ကုန်စည်၊ မော်တော်ကားကူးဂိတ်များကိုလည်း ဒေသအာဏာပိုင်များ၏ ခွင့်ပြုချက်မရရှိဘဲ မည်သည့် လူပုဂ္ဂိုလ်၊ မော်တော်ယာဉ်၊ ကုန်ပစ္စည်းမဆို ကူးသန်းခွင့် ပေးတော့မည်မဟုတ်ကြောင်း အာဏာပိုင်များက အမိန့်ကြော်ငြာစာ ထုတ်ပြန်ကြေညာထားကြောင်း ထိုင်းဘက်က သတင်းများတွင် ဖော်ပြ ထားပါသည်။

ပြီးခဲ့သည့် မတ်လ (၂၁) ရက်နေ့က ထိုင်းနိုင်ငံ၊ နခွမ်စဝမ်မြို့နယ်မှာ မူးယစ်ဆေးဝါးနှိမ်နင်းရေးအဖွဲ့ တိုင်း (၆) အဖွဲ့သည် မြန်မာဘက်က ပြန်လာသည့် ထိုင်းကုန်တင်ယာဉ်တစ်စီးကို မသင်္ကာရာကနေ တားဆီးရှာဖွေခဲ့ချိန်မှာ ကွန်တိန်နာယာဉ်ပေါ်ကနေ စိတ်ကြွရူးသွပ်ဆေးပြား (၁၈) သန်း၊ ICE (၂၅၀) ဂရမ်၊ ‌ကက်သမင်း (၃၀၀) ဂရမ် ကို တွေ့ရှိ သိမ်းဆည်းရမိခဲ့ရာကနေ ယခုလိုနယ်စပ်ဂိတ်ပိတ်သိမ်းသည့်အထိ ဖြစ်လာခဲ့ကြောင်း ထိုင်းသတင်းများတွင် ဖော်ပြထားပါသည်။

နခွမ်စဝမ်မြို့နယ်မှာဖမ်းဆီးရမိသည့် မူးယစ်ဆေးဝါး သယ်ဆောင်လာသော သောက်သုံးရေသန့်တင်ကားသည် မြန်မာဘက်ခြမ်းက ကရင် လက်နက်ကိုင်နယ်မြေကအပြန် မူးယစ်ဆေးဝါးများ တင်ဆောင်လာပြီး ပိတ်သိမ်းလိုက်သည့် ဂိတ်ကနေ ဖြတ်သန်းလာကြောင်း ထိုင်းသတင်းများတွင် ထုတ်ပြန်ထားကြောင်း သိရှိရပါသည်။

ကိုးကား- ထိုင်းဒေသတွင်းမီဒီယာများ

Photo: Tripadvisor

ရုရှားနှင့် အမေရိကန် ကျွမ်းကျင်ပညာရှင်အဖွဲ့များကြား အဓိက သဘော တူညီမှုရလဒ်များအား ကရင်မလင်မှ ထုတ်ပြန် ကြေညာခဲ့ပါသည်။

၁။ ရုရှားနှင့် အမေရိကန် သမ္မတတို့၏ သဘောတူညီချက်အရ၊ရုရှားနှင့် အမေရိကန် နှစ်နိုင်ငံသည် “ပင်လယ်နက်အတွင်းအစီအစဉ်” အား အကောင် အထည်ဖော်ရန် သဘောတူညီခဲ့ကြပါသည်။ ယင်းတွင် ပင်လယ်နက်အတွင်း သင်္ဘောသွားလာမှု၌ လုံခြုံမှုရှိစေရေး ၊ အင်အားသုံးတိုက်ခိုက်မှုကို ရှောင်ရှားခြင်း၊ စီးပွားရေးသင်္ဘောများအား စစ်ရေးရည်ရွယ်ချက်ဖြင့် အသုံးမပြုရန် ကန့်သတ်ခြင်း၊ ထိုသင်္ဘောများအား စစ်ဆေးခြင်းစနစ် ပြည့်စုံစွာချမှတ်ခြင်းတို့ ပါဝင်ပါသည်။

၂။ အမေရိကန်သည် ရုရှား၏ စိုက်ပျိုးရေးထွက်ကုန်များ၊ မြေဩဇာများကမ္ဘာ့စျေးကွက်သို့ ပြန်လည်ရောက်ရှိရေး၊ ပင်လယ်ရေကြောင်းသယ်ယူပို့ဆောင်ရေး အာမခံကုန်ကျစရိတ်လျှော့ချရေး၊ ဆိပ်ကမ်းများနှင့် ငွေပေးချေမှုစနစ်များသို့ အဆင်ပြေစွာ ဝင်ရောက်နိုင်ရေးတို့ကို ကူညီဆောင်ရွက်မည်။ 

သတိပြုရန်

အပိုဒ် ၁ နှင့် ၂ သည် အောက်ပါ အချက်များ ပြည့်စုံပါမှ စတင် အကျိုးသက်ရောက်မည်ဖြစ်ပါသည်။ 

• ရုရှားစိုက်ပျိုးရေးဘဏ် (Rosselkhozbank) အပါအဝင် အစားအသောက်၊ ငါးထွက်ပစ္စည်းနှင့် မြေဩဇာ ကုန်သွယ်ရေးလုပ်ငန်းများအား ထောက်ပံ့သည့် ဘဏ်များနှင့် ငွေကြေး အဖွဲ့ အစည်းများမှ ဒဏ်ခတ်မှုများ ရုပ်သိမ်းခြင်း၊ SWIFT စနစ်သို့ ပြန်လည် ချိတ်ဆက်ခြင်း၊ လိုအပ်သော ငွေစာရင်းများ ဖွင့်လှစ်ခွင့်ပြုခြင်း။ 

• ကုန်သွယ်ရေးငွေကြေးဖြင့် လုပ်ကိုင်ခွင့်ဆိုင်ရာ ကန့်သတ်ချက်များ ရုပ်သိမ်းခြင်း။ 

• အစားအသောက်၊ ငါးထွက်ပစ္စည်းနှင့် မြေဩဇာထုတ်လုပ်သည့် ကုမ္ပဏီများနှင့် ပို့ကုန်လုပ်ငန်းများမှ ဒဏ်ခတ်မှုများ ရုပ်သိမ်းခြင်း။ 

• ထိုပစ္စည်းများအတွက် အာမခံကုမ္ပဏီများ လုပ်ကိုင်ခွင့် ပြန်လည်ရရှိခြင်း။ 

• အစားအသောက်/ မြေဩဇာ သယ်ယူသည့် ရုရှားအလံ တပ်ဆင် ထားသော သင်္ဘောများအား ဆိပ်ကမ်းဝန်ဆောင်မှုနှင့် ဒဏ်ခတ်မှုများ ရုပ်သိမ်းခြင်း။ 

• ရုရှားသို့ စိုက်ပျိုးရေးစက်ကိရိယာများ၊ အစားအသောက်နှင့် မြေဩဇာထုတ်လုပ်မှုတွင် အသုံးပြုသည့် အခြားပစ္စည်းများ တင်ပို့ခွင့် ကန့်သတ်ချက်များ ရုပ်သိမ်းခြင်း။ 

၃။ ရုရှားနှင့် အမေရိကန်သည် ၂၀၂၅ ခုနှစ်၊ မတ်လ ၁၈ ရက်မှစတင်၍ ရက် ၃၀ ကြာ ရုရှားနှင့် ယူကရိန်းစွမ်းဆိုင်ရာအင်အဆောက်အအုံများကို တိုက်ခိုက်မှုတားမြစ်ရန် သဘောတူညီခဲ့ပါသည်။ ယင်းသဘောတူညီချက်အား ဆက်လက် တိုးမြှင့်နိုင်ပြီး တစ်ဖက်မှ ချိုးဖောက်ပါက ပယ်ဖျက်နိုင်ပါသည်။ 

၄။ နှစ်နိုင်ငံသည် စွမ်းအင်နှင့် ပင်လယ်ပြင်ဆိုင်ရာ သဘောတူညီချက်များ အကောင်အထည်ဖော်ရာတွင် တတိယနိုင်ငံများ၏ ကြားဝင်ဖြန်ဖြေမှုကို ကြိုဆိုသည်။ 

၅။ ရုရှားနှင့် အမေရိကန်သည် ခိုင်မြဲသော ငြိမ်းချမ်းရေးအတွက် ဆက်လက်ပူးပေါင်းဆောင်ရွက်သွားမည်။

ကိုးကား - ကရင်မလင်

Photo: UNITED24 Media

ရီယာ့ဒ်မြို့၌ ပြုလုပ်သော ဆွေးနွေးပွဲများတွင် အမေရိကန်နှင့် ရုရှားတို့သည် ပင်လယ်နက်အတွင်း သင်္ဘောသွားလာမှုလုံခြုံစေရေးကိုအာမခံရန်နှင့် အင်အားသုံးစွဲမှုကို ဖယ်ရှားရန် သဘောတူညီခဲ့ကြောင်း အိမ်ဖြူတော်က သတင်းထုတ်ပြန်ခဲ့ပါသည်။

သမ္မတ ဒေါ်နယ်ထရမ့်နှင့် သမ္မတ ဗလာဒီမာ ပူတင်တို့အကြား သမ္မတ အဆင့် ဆွေးနွေးမှုများနှင့်အညီ အမေရိကန်ပြည်ထောင်စုသည် မတ်လ ၂၃ ရက်မှ ၂၅ ရက်အထိ ဆော်ဒီအာရေဗျနိုင်ငံ၊ ရီယာ့ဒ်မြို့တွင် ရုရှား ကိုယ်စားလှယ်အဖွဲ့နှင့် နှစ်နိုင်ငံပူးပေါင်းဆောင်ရွက်ရေး နည်းပညာအဆင့် ဆွေးနွေးပွဲများကို စီစဉ်ဆောင်ရွက်ခဲ့ပါသည်။ ထိုဆွေးနွေးပွဲများအပြီးတွင် အမေရိကန်နှင့် ရုရှားနိုင်ငံတို့သည် ပင်လယ်နက်အတွင်း သင်္ဘောများဘေးကင်းလုံခြုံစွာ သွားလာနိုင်ရေး သေချာစေရန်၊ အင်အားသုံးမှုကို ဖယ်ရှားရန်နှင့် စီးပွားဖြစ် သင်္ဘောများကို စစ်ရေးအရ ရည်ရွယ်ချက်များအတွက် အသုံးပြုမှုကို တားဆီးရန် သဘောတူညီခဲ့ကြသည်။

အမေရိကန်သည် ကမ္ဘာ့စျေးကွက်အတွင်း စိုက်ပျိုးရေးနှင့် မြေသြဇာထုတ်ကုန်များ တင်ပို့မှုအတွက် ရုရှား၏ အသုံးပြုခွင့်ကို ပြန်လည်ရရှိစေရန် ကူညီပေးမည့်အပြင် ပင်လယ်ရေကြောင်းဆိုင်ရာ အာမခံ အဖိုးအခများကို လျှော့ချပေးခြင်း၊ ထိုလုပ်ငန်းဆောင်တာများအတွက် ဆိပ်ကမ်းများနှင့် ငွေပေးချေရေးစနစ်များသို့ ဝင်ရောက်အသုံးပြုနိုင်မှုကို မြှင့်တင်ပေးရန် သဘောတူညီခဲ့ကြသည်။ 

အမေရိကန်နှင့် ရုရှားနိုင်ငံတို့သည် သမ္မတဒေါ်နယ်ထရမ့်နှင့် သမ္မတ ဗလာဒီမာပူတင်တို့၏ ရုရှားနှင့် ယူကရိန်းရှိ စွမ်းအင်ဆိုင်ရာ အဆောက်အအုံများအား တိုက်ခိုက်မှုများကို တားမြစ်သည့် သဘောတူညီချက်ကို အကောင်အထည်ဖော်ရန် နည်းလမ်းများ ရေးဆွဲမည်ဟု သဘောတူညီခဲ့ကြသည်။ 

အမေရိကန်နှင့် ရုရှားတို့သည် စွမ်းအင်နှင့် ပင်လယ်ရေကြောင်းဆိုင်ရာ သဘောတူညီချက်များ အကောင်အထည်ဖော်ရာတွင် တတိယနိုင်ငံများ၏ အကူအညီပေးမှုများကို ကြိုဆိုပါသည်။ 

အမေရိကန်နှင့် ရုရှားတို့သည် တည်တံ့ခိုင်မြဲပြီး ရေရှည်တည်တံ့မည့် ငြိမ်းချမ်းရေးကို ဆက်လက်ရယူဆောင်ရွက်သွားမည်ဖြစ်ပါသည်။ 

အမေရိကန်ပြည်ထောင်စုသည် ရုရှား-ယူကရိန်း ပဋိပက္ခတွင် နှစ်ဖက်စလုံးမှ အသက်ဆုံးရှုံးမှုများ ရပ်တန့်ရမည်ဟု သမ္မတ ဒေါ်နယ်ထရမ့်၏ အရေးတကြီးလိုအပ်ချက်ကို ထပ်လောင်းအလေးထား ပြောကြားခဲ့ပြီး၊ ရီယာ့ဒ်တွင် ပြုလုပ်ခဲ့သော သဘောတူညီချက်များနှင့်အညီ ငြိမ်းချမ်းစွာ အဖြေရှာနိုင်ရန် နှစ်ဖက်စလုံးနှင့် ဆက်လက်ညှိနှိုင်း ဆောင်ရွက်သွားမည်ဟု ကြေညာခဲ့ပါသည်။ 

အမေရိကန်ပြည်ထောင်စုသည် အဆိုပါအရေးပါသော ဆွေးနွေးပွဲများကို ဆော်ဒီအာရေဗျနိုင်ငံ၌ ထပ်မံကျင်းပပေးရန် စီစဉ်ဆောင်ရွက်ပေးခဲ့သည့် မင်းသား မိုဟာမက် ဘင်ဆာလမ်န်၏ ခေါင်းဆောင်မှုနှင့် ဧည့်ဝတ်ကျေပွန်မှုတို့အတွက် ကျေးဇူးတင်ကြောင်း ဖော်ပြခဲ့ပါသည်။

ကိုးကား - The White House

ဝန်ကြီးချုပ် Han Duck-soo အပေါ် စွဲချက်တင်ရေး အဆိုတင်သွင်းမှုတစ်ခုကို တောင်ကိုရီးယား ဖွဲ့စည်းပုံအခြေခံဥပဒေတရားရုံးက ပယ်ချပြီးနောက် ၎င်းအား ယာယီသမ္မတအဖြစ် ပြန်လည်ခန့်အပ်လိုက်ပါသည်။

လွန်ခဲ့သောနှစ် ဒီဇင်ဘာလအတွင်း သမ္မတ Yoon Suk-yeol အပေါ် ၎င်း၏ စစ်အုပ်ချုပ်ရေးကြေညာမှုနှင့်ပတ်သက်၍ အတိုက်အခံများ ဦးဆောင်နေသည့် လွှတ်တော်တွင် စွဲချက်တင်ရေး အဆိုတင်သွင်းခဲ့ပြီးနောက် Han သည် ယာယီသမ္မတဖြစ်လာခဲ့ခြင်းဖြစ်သည်။

ထို့နောက်တွင် လွှတ်တော်က ၎င်းအပေါ်တွင်လည်း စွဲချက်တင်ရေးအဆိုကို အတည်ပြုခဲ့ပြီးနောက် Han သည် ယာယီသမ္မတတာဝန်မှ ရပ်ဆိုင်းခံခဲ့ရသည်။

၎င်းအပေါ် စွဲချက်တင်ရေး အကြောင်းပြချက်များထဲမှ တစ်ခုဖြစ်သည့် တရားရုံးတွင် လစ်လပ်နေသော တရားသူကြီးများ ခန့်အပ်ရေးအတွက် Han ၏ ငြင်းဆိုမှုသည် ဖွဲ့စည်းပုံအခြေခံဥပဒေနှင့် ဆက်စပ်ဥပဒေများကို ဖောက်ဖျက်နေကြောင်း ဖွဲ့စည်းပုံအခြေခံဥပဒေဆိုင်ရာ တရားရုံး က ထောက်ပြခဲ့သည်။

သို့သော် Han သည် သမ္မတ Yoon ၏ စစ်အုပ်ချုပ်ရေးကြေညာမှုနှင့် စပ်လျဉ်း၍ ဖွဲ့စည်းပုံအခြေခံဥပဒေကို ချိုးဖောက်ခြင်းမရှိကြောင်းတရားရုံးကတွေ့ရှိခဲ့ပြီး ၎င်းကို စွဲချက်တင်ရန် လုံလောက်သည့် အကြောင်းပြချက်မရှိကြောင်း ဆုံးဖြတ်ခဲ့ခြင်းဖြစ်သည်။

စီရင်ချက်ချပြီးတဲ့နောက် သတင်းထောက်များနှင့်တွေ့ဆုံရာတွင် Han က ဖွဲ့စည်းပုံအခြေခံဥပဒေတရားရုံး၏ မှန်ကန်သည့်ဆုံးဖြတ်ချက်အတွက် ကျေးဇူးတင်ကြောင်း ပြောကြားခဲ့ပြီး နိုင်ငံအတွက် အမှန်တကယ် အရေးကြီးသည့် စိန်ခေါ်မှုသည် နိုင်ငံ၏ အနာဂတ်ဖွံ့ဖြိုးတိုးတက်မှုကို အာမခံနိုင်ရန်ဖြစ်သည်ဟုလည်း ၎င်းက ဆိုပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ထိုင်းအခွန်ဌာနက နိုင်ငံအတွင်းရှိ Social influencer များနှင့် Online seller များကို ၎င်းတို့၏နှစ်စဉ်ဝင်ငွေခွန်များကို မတ်လကုန်မတိုင်မီ ပေးဆောင်ကြရန်နှင့် ပျက်ကွက်ပါက ဒဏ်ကြေးနှင့် ပြစ်ဒဏ်များ ချမှတ်ခံရမည်ဟု ထုတ်ပြန်ထားသည်။ အခွန်ဌာန ညွှန်ကြားရေးမှူးချုပ် Pinsai Suraswadi က Social influencer များနှင့် Online seller များသည် ဝင်ငွေခွန်ပေးဆောင်ရန် ပျက်ကွက်လျက်ရှိပြီး ထိုအခြေအနေအတွက် စိုးရိမ်ကြောင်းဆိုသည်။ Shopee ၊ Lazada နှင့် Tiktok ကဲ့သို့သော ထိုင်းနိုင်ငံရှိ အီလက်ထရောနစ် စီးပွားရေးပလက်ဖောင်းများတွင် Social influencer နှင့် Online seller ၃ သန်းခန့်ရှိပြီး အချိန်ပြည့် ထုတ်လွှင့်ရောင်းချနေသူ ၂ သန်းခန့်သည် ဝင်ငွေ ဘီလီယံများစွာရရှိနေကြောင်း ခန့်မှန်းထားသည်။ စစ်တမ်းများအရ Social influencer များနှင့် Online seller များဖြစ်သည့် လူငယ်အများစုသည် ၎င်းတို့၏ဝင်ငွေကို စာရင်းသွင်းရန်နှင့် အခွန်ပေးဆောင်ရန် ပျက်ကွက်လျက်ရှိသည်ဟုဆိုသည်။

အခွန်ဌာနသည် မှတ်တမ်းများကို ငါးနှစ်အထိ နောက်ပြန်စစ်ဆေးနိုင်ပြီး အခွန်စာရွက်စာတမ်းများ မတင်ပြနိုင်ပါက ပြစ်ဒဏ်ချမှတ်မည် ဖြစ်ကြောင်း Pinsai က သတိပေးခဲ့သည်။ သို့သော် ၎င်းတို့အနေဖြင့် အမှားများကို ပြင်ဆင်နိုင်ကြောင်း Pinsai က အာမခံခဲ့သည်။ Tellscore, FutureTales LAB, and the Thailand Institute for Mental Health Sustainability (Tims) တို့၏လေ့လာဆန်းစစ်ချက်များအရ ထိုင်းနိုင်ငံရှိ Social influencer နှင့် Online seller များသည် နှစ်စဉ်ဝင်ငွေ ဘတ် ၄၅ ဘီလီယံ (အမေရိကန်ဒေါ်လာ ၁.၂၅ ဘီလီယံ)ရရှိနေကြောင်း ခန့်မှန်းထားကြသည်။ ထိုင်းနိုင်ငံတွင် အချိန်ပြည့် ထုတ်လွှင့်ရောင်းချသူ ၂ သန်းခန့် ရှိပြီး Micro-influencer များအပါအဝင် အချိန်ပိုင်းထုတ်လွှင့်ရောင်းချသူ ၉ သန်းခန့်အထိ မြင့်တက်လာသည်ဟုဆိုသည်။ 

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယီမင်အခြေစိုက် ဟူသီသူပုန်အဖွဲ့ကို တိုက်ခိုက်မည့်အစီအစဉ်များနှင့်ပတ်သက်ပြီး “အမေရိကန်ထိပ်တန်းတာဝန်ရှိသူများ ဆွေးနွေးနေသည့် Chat Group ထဲတွင် သတင်းထောက် တစ်ယောက်ကို မှားယွင်းထည့်ခဲ့မိကြောင်း” အိမ်ဖြူတော်က အတည်ပြုလိုက်ပါသည်။

အိမ်ဖြူတော်အမျိုးသားလုံခြုံရေးအကြံပေး မိုက်ကယ်ဝေါ့ဇ် အမည်နှင့် အကောင့်ကနေ ဆစ်ဂနယ် မက်ဆေ့ချ် အက်ပလီကေးရှင်း Chat Group ထဲသို့ မှားယွင်းထည့်သွင်းခဲ့ကြောင်း The Atlantic ၏ အယ်ဒီတာချုပ်ဖြစ်သူ ဂျက်ဖရီဂိုးဘတ်ကလည်း ပြောပါသည်။

ယီမင်ကို တိုက်ခိုက်မည့်ကိစ္စကို ဆစ်ဂနယ် မက်ဆေ့ချ် အက်ပလီကေးရှင်း Group တွင် အမေရိကန်ဒုတိယသမ္မတ ဂျေဒီဗန့်၊ အိမ်ဖြူတော် အကြီးအကဲ ဆူဇီဝိုင်းစ် ၊ စီအိုင်အေညွန်ကြားရေမှူး ဂျွန်ရက်ကလစ်နှင့် ကာကွယ်ရေးဝန်ကြီး ပိဟက်ဆက်နှင့် အခြားလုံခြုံရေးထိပ်တန်း တာဝန်ရှိသူများ ပါဝင်ကြပါသည်။

၎င်းတို့သည် မူဝါဒပိုင်းဆိုင်ရာများကို အခြေအတင်ဆွေးနွေးပြီးနောက် ယီမင်စစ်ဆင်ရေးနှင့်ပတ်သက်ပြီး အမေရိကန်စစ်တပ်၏ တိုက်ခိုက်မှုများနှင့်ပတ်သက်ပြီး အသေးစိတ်ဆွေးနွေးခဲ့ကြကြောင်း The Atlantic အယ်ဒီတာချုပ်က ပြောပါသည်။

ပြင်ပပုဂ္ဂိုလ်တစ်ယောက်ကို သတိထားရမည့် နိုင်ငံ့ကာကွယ်ရေးဆွေးနွေးမှုစကားဝိုင်းတွင် အမှတ်မထင်ထည့်သွင်းမိခြင်းသည် စစ်ဆင်ရေး လုံခြုံရေးနှင့်ပတ်သက်၍ ထရမ့်အစိုးရ၏ အံ့မခန်းကျိုးပေါက်မှုဟု ဝေဖန်သူများက ဆိုပါသည်။

ထရမ့်အနေဖြင့် အဆိုပါကိစ္စနှင့်ပတ်သက်ပြီး ဘာမျှမသိကြောင်း ပြောပါသည်။ အထက်လွှတ်တော် ဒီမိုကရက်တစ်ခေါင်းဆောင် ချော့ရှန်မာ ကတော့ ထိုကိစ္စကို စုံစမ်းစစ်ဆေးရေး တောင်းဆိုမှုများဆီသို့ ဦးဆောင်နေပါသည်။

သို့သော် Chat Group ထဲတွင် စစ်ရေးအစီအစဉ်များနှင့်ပတ်သက်၍ မျှဝေခဲ့ခြင်းမရှိကြောင်း ကာကွယ်ရေးဝန်ကြီး ပီဟက်ဆက်ချ်က ဟာဝိုင်ယီ ခရီးစဉ်မတိုင်ခင် သတင်းထောက်များကို ပြောပါသည်။ 

ကိုးကား-BBC

Photo: UPI

ဘာသာပြန်ဆိုသူ-ဦးဝင်းဇော်မိုး၊ ဒုတိယညွှန်ကြားရေးမှူးချုပ်၊ နစက