NATO အဖွဲ့၏ နှစ်စဉ်ကျင်းပမြဲ ထိပ်သီးအစည်းအဝေးတွင် ယူကရိန်း အကြောင်း ဆွေးနွေးမှုများကို အကျဉ်းချုံးရန်သာထားရန် စီစဉ်ထားကြောင်း Reuters သတင်းဌာနက ဖော်ပြခဲ့သည်။ ထိုသို့ဆောင်ရွက်ရခြင်းမှာ အမေရိကန်သမ္မတ ဒေါ်နယ်ထရမ့်ကို စိတ်အနှောင့်အယှက်မဖြစ်စေရန် ရည်ရွယ်ခြင်းဖြစ်သည်ဟုဆိုသည်။

အဆိုပါထိပ်သီးအစည်းအဝေးကို ဇွန်လ ၂၄ ရက်နှင့် ၂၅ ရက်တွင် နယ်သာလန်နိုင်ငံ၊ The Hague ၌ ကျင်းပမည်ဖြစ်သည်။ ၂၀၂၂ ခုနှစ်၊ ဖေဖော်ဝါရီလတွင် ရုရှား-ယူကရိန်း ပဋိပက္ခ စတင်ချိန်မှစ၍ NATO အစည်းအဝေးများတွင် ဧည့်သည်တော်အဖြစ် အမြဲဖိတ်ကြားခံခဲ့ရသော ယူကရိန်းသမ္မတ ဇီလန်စကီးကို ယခုအချိန်အထိ တရားဝင် ဖိတ်ကြား ထားခြင်း မရှိသေးပေ။ 

Reuters ၏ သတင်းတွင် ဥရောပ NATO အဖွဲ့ဝင်နိုင်ငံများသည် “ထရမ့် ၏ မတည်ငြိမ်သော စိတ်ခံစားမှုကို မထိခိုက်စေရန် အထူးဂရုပြု နေကြသည်” ဟု ဖော်ပြထားသည်။

သတင်းအရင်းအမြစ်များအရ အစည်းအဝေးရလဒ်များကို အတိုချုပ် ဖော်ပြမည့် ကြေညာချက်စာတမ်းသည် ပုံမှန်ထက် ပိုမိုတိုတောင်းမည် ဖြစ်ပြီး သဘောထားကွဲလွဲမှုများ နည်းပါးစေရန် ရည်ရွယ်သည်။ ထိုစာတမ်းတွင် “ရုရှားကို ခြိမ်းခြောက်မှုတစ်ရပ်အဖြစ် ဖော်ပြမည်လား၊ သို့မဟုတ် ယူကရိန်းကို ထောက်ခံမှုဖော်ပြမည်လား ဆိုသည်မှာ မရေရာ သေးပါ” ဟု ဆိုသည်။

လွန်ခဲ့သော နှစ်နှစ်နှင့်မတူဘဲ NATO အဖွဲ့ဝင်နိုင်ငံများ၏ ခေါင်းဆောင် များသည် အဆိုပါထိပ်သီးအစည်းအဝေး၏ တစ်စိတ်တစ်ပိုင်းအဖြစ်NATO-ယူကရိန်း ကောင်စီ၏ တရားဝင်အစည်းအဝေးကို ကျင်းပရန် စီစဉ်ထားခြင်းမရှိကြောင်း တာဝန်ရှိသူများက ပြောကြားခဲ့သည်။ အဖွဲ့၏ သံတမန်တစ်ဦးအဆိုအရ ယင်းအစား နိုင်ငံခြားရေးဝန်ကြီးများ သို့မဟုတ် ကာကွယ်ရေးဝန်ကြီးများနှင့် အလုပ်သဘောညစာစားပွဲဖြင့် အစားထိုး နိုင်သည်ဟု ဆိုသည်။

NATO အကြီးတန်း သံတမန်တစ်ဦးက Reuters သို့ ပြောကြားရာတွင် အကြောင်းတစ်စုံတစ်ရာကြောင့် ဇီလန်စကီးက အဆိုပါ ထိပ်သီး အစည်းအဝေးသို့ တက်ရောက်နိုင်ခြင်း မရှိပါက (PR) ဆုံးရှုံးမှုတစ်ရပ် ဖြစ်လိမ့်မည် ဟု ဆိုသည်။

သတင်းအရင်းအမြစ်များအရ ယူကရိန်းခေါင်းဆောင်သည် နယ်သာလန် ဘုရင် Willem-Alexander မှ တည်ခင်းဧည့်ခံမည့် ထိပ်သီးအကြို ညစာ စားပွဲဖိတ်ကြားမှုကို လက်ခံ၍တက်ရောက်နိုင်ရန် အခွင့်အရေးကိုသာ လက်ခံရမည်ဖြစ်သည်။ ဤနည်းဖြင့် ၎င်းသည် ထရမ့်ကို စိတ်အနှောင့် အယှက်မဖြစ်စေဘဲ The Hague သို့ သွားရောက်နိုင်မည်ဟု ရှင်းပြ ခဲ့သည်။

မော်စကို-ကိယက်ဗ် ပဋိပက္ခကို အဆုံးသတ်ရန် ကြားဝင် ဆောင်ရွက် နေသော အမေရိကန်သမ္မတထရမ့်သည် ယခင်က ယူကရိန်း၏ NATO အဖွဲ့ဝင်ဖြစ်နိုင်ရေးကို ဖယ်ရှားခဲ့သည်။ ရုရှားဘက်မှ မကြာခဏ ထုတ်ဖော် ပြောဆိုခဲ့သည်မှာ ယူကရိန်းကို NATO တွင် သွတ်သွင်းရန် လှုပ်ရှားမှု များသည် Red line ကျော်လွန်ခြင်းဖြစ်ပြီး ပဋိပက္ခ၏ အဓိက အကြောင်း အရင်းများထဲမှ အဓိကတစ်ခုဖြစ်ကာ ယူကရိန်းသည် ရေရှည် ငြိမ်းချမ်းရေးအတွက် ကြားနေနိုင်ငံအဖြစ်သာ ကျင့်သုံးသင့်သည်ဟု အတိအလင်း တောင်းဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဒရုန်းလက်နက်များအန္တရာယ်မှ စိုးရိမ်ရသော ခြိမ်းခြောက်မှုများ တိုးပွား လာသည့်အတွက် အမေရိကန်စစ်တပ်၏ ဒရုန်းတိုက်ခိုက်မှု ကာကွယ်ရေး စွမ်းရည်များ မြှင့်တင်နိုင်ရေး အမိန့်အရ လုပ်ဆောင်ရန် သမ္မတ ထရမ့်က အမိန့်တစ်ရပ် လက်မှတ်ရေးထိုးထုတ်ပြန်ခဲ့သည်။

ဇွန်လ ၆ ရက်နေ့တွင် ထုတ်ပြန်ခဲ့သော ယင်းအမိန့်တွင် အမေရိကန် သမ္မတ ဒေါ်နယ်ထရမ့်က အမေရိကန်လေကြောင်းနယ်နိမိတ်အား ထိန်းချုပ်ရန် ဗဟိုအလုပ်အမှုဆောင်အဖွဲ့တစ်ရပ် ဖွဲ့စည်းခဲ့ပြီး အထိခိုက် မခံနိုင်သော နေရာများအတွက် ကန့်သတ်ချက်များ တိုးချဲ့ခဲ့သည်။

ထိုအမိန့်တွင် အစိုးရအေဂျင်စီများအား ဒရုန်းများကို အချိန်နှင့် တစ်ပြေးညီ ထောက်လှမ်းနိုင်ရန် နည်းပညာအသုံးပြုမှု တိုးမြှင့်ခွင့်ပြုထားပြီး ပြည်နယ်နှင့် ဒေသဆိုင်ရာ ဥပဒေစိုးမိုးရေးအဖွဲ့များအား ပံ့ပိုးကူညီမှုများ ပေးအပ်ထားသည်။

“သမ္မတထရမ့်သည် အကြမ်းဖက်သမားများမှလည်းကောင်း၊ အမေရိကန် လေကြောင်းနယ်နိမိတ်အတွင်း အခြားနိုင်ငံများမှ ခွင့်ပြုချက်မရှိဘဲဒရုန်းများ လွှတ်တင်မှုများမှလည်းကောင်း ပိုမိုကြီးထွားလာနေသောခြိမ်းခြောက်မှုများကို ကိုင်တွယ်ဖြေရှင်းရန် ရည်ရွယ်ထားသည်” ဟု အမေရိကန်အိမ်ဖြူတော်၏ သိပ္ပံနှင့်နည်းပညာမူဝါဒရုံး၏ ညွှန်ကြားရေးမှူး Michael Kratsios က ပြောကြားခဲ့သည်။

အိမ်ဖြူတော်အရာရှိများက အဆိုပါအစီအမံများသည် အိုလံပစ်နှင့် ကမ္ဘာ့ ဖလားကဲ့သို့သော ကြီးမားသည့်ပွဲများ နီးကပ်လာချိန်တွင် လေကြောင်း ခြိမ်းခြောက်မှုများအပါအဝင် အမေရိကန်နိုင်ငံအား အမျိုးသား လုံခြုံရေး ခြိမ်းခြောက်မှုများမှ ကာကွယ်ရန် ရည်ရွယ်သည်ဟု ပြောကြားခဲ့သည်။

အမျိုးသားလုံခြုံရေးကောင်စီ၏ အကြမ်းဖက်တိုက်ဖျက်ရေးဌာန ခေါင်းဆောင် Sebastian Gorka   က ၎င်းတို့သည် ဒရုန်းများကို ကာကွယ်နိုင်ရန် စွမ်းရည် နှင့် အရည်အသွေးများ မြှင့်တင်သွားမည်ဟု ပြောကြားခဲ့သည်။ “မကောင်းသည့် ရည်ရွယ်ချက် ရှိသူများကို ဟန့်တားနိုင်ရန် လက်ရှိ ဥပဒေများအား ပိုမိုတင်းကြပ်စွာ အကောင်အထည်ဖော်သွားမည်” ဟု ၎င်းက ဆိုသည်။

နယူးဂျာစီပြည်နယ်တွင် ဒရုန်းများ မကြာခဏမြင်တွေ့ရသည့် အဖြစ် အပျက်များအပြီးတွင် သမ္မတထရမ့်က အဆိုပါအမိန့်ကို ထုတ်ပြန်ခဲ့ခြင်း ဖြစ်သည်။ အမေရိကန်ဖက်ဒရယ်လေကြောင်းအာဏာပိုင် (FAA) ၏ ပြောကြားချက်အရ လေဆိပ်အနီးတွင် ဒရုန်းများနှင့်ပတ်သက်သည့် အစီရင်ခံစာ တစ်လလျှင် ၁၀၀ ကျော် ရရှိသည်ဟု သိရသည်။ 

အမေရိကန်နိုင်ငံတွင် အမည်မသိဒရုန်းများသည် ဗျူဟာမြောက် Langley လေတပ်စခန်းနှင့် ကမ္ဘာ့အကြီးဆုံးရေတပ်စခန်းဖြစ်သည့် Norfolk အပါအဝင် စစ်ဘက်ဆိုင်ရာအဆောက်အအုံများအနီးသို့ ချဉ်းကပ်သည့် အဖြစ်အပျက် များစွာကို မှတ်တမ်းတင်ထားသည်ဟု ဆိုသည်။ ထိုသို့ချဉ်းကပ်မှု များသည် အမေရိကန်စစ်တပ်အတွက် အဓိကစိန်ခေါ်မှုတစ်ရပ်ဖြစ်ပြီး ဒရုန်းများအား ခြေရာခံရန် ခက်ခဲပြီး တုံ့ပြန်ရန် နည်းလမ်းများနှင့် ပတ်သက်သည့် စည်းမျဉ်းများစွာနှင့် ရင်ဆိုင်နေရသည်။

ဇွန်လ ၄ ရက်နေ့တွင် အမေရိကန်လေတပ်ဗိုလ်ချုပ်ကြီး David Allvin က နိုင်ငံအနေဖြင့် တာဝေးပစ်ဒုံးကျည်များအပြင် ဒရုန်းများကိုပါ ကာကွယ် တိုက်ခိုက်နိုင်ရန် Golden Dome ကာကွယ်ရေးစနစ်ကို ဖွံ့ဖြိုးတိုးတက်ရေး လုပ်ဆောင်ရန် လိုအပ်ကြောင်း ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှား လုံခြုံရေးကောင်စီ ဒုတိယဥက္ကဋ္ဌ Dmitry Medvedev က သင့်လျော်သောအခကြေးငွေဖြင့် ထရမ့်နှင့် အီလွန်မက်ကြား သင့်မြတ်ရေး စေ့စပ်ပေးရန် မော်စကိုက အဆင်သင့်ရှိကြောင်း ပြောသည်။ “ဒေါ်နယ် ထရမ့် နှင့် အီလွန်မက်တို့ကြား ငြိမ်းချမ်းရေး သဘောတူညီချက်ရရှိရန် မိမိတို့သည် တရားဝင်ကြေးတစ်ရပ်ဖြင့် စေ့စပ်ပေးရန် အဆင်သင့်ဖြစ် နေပါသည်။ ငွေပေးချေမှုအဖြစ် Starlink ရှယ်ယာများကို လက်ခံမည်။ ရန်ဖြစ်ခြင်းကို ရပ်တန့်ပါ!” ဟု ရုရှား လုံခြုံရေးကောင်စီ ဒုတိယဥက္ကဋ္ဌ Dmitry Medvedev က ဇွန်လ ၆ ရက်နေ့တွင် X တွင် ရေးသားခဲ့သည်။

Starlink သည် အီလွန်မက်၏ SpaceX ကုမ္ပဏီမှ ဖွံ့ဖြိုးဆဲ ဂြိုဟ်တု အင်တာနက် စီမံကိန်းဖြစ်သည်။ အမေရိကန် ဘီလီယံနာ အီလွန်မက်က ထိုပိုစ့်ကို ရီရီမောမောဖြင့် တုံ့ပြန်ခဲ့ပြီး သမ္မတ ထရမ့် ကမူ ရုရှား လုံခြုံရေး ကောင်စီ ဒုတိယဥက္ကဋ္ဌ၏ ထုတ်ပြန်ချက်ကို မှတ်ချက်မပြုသေးပါ။

အမေရိကန်သမ္မတ ထရမ့်နှင့် အီလွန်မက်တို့သည် ယခင်က မဟာမိတ် များဖြစ်သော်လည်း ထရမ့်က အခွန် ၄.၅ ထရီလီယံ လျှော့ချရေး အစီအစဉ်ကို အားပေးစည်းရုံးခဲ့စဉ် မက်က ကန့်ကွက်ခဲ့သည့်အချိန်မှစ၍ ဆက်ဆံရေး ပျက်ပြားခဲ့သည်။ ထို့နောက် နှစ်ဦးစလုံးသည် လူမှု ကွန်ရက် ပေါ်တွင် တစ်ဦး၏ကိုယ်ရေးကိုယ်တာ အကြောင်းအရာများကို ထောက်ပြ ကာ အပြင်းအထန် အငြင်းပွားခဲ့ကြသည်။

ရုရှားအရာရှိများက အငြင်းပွားမှုနှင့်ပတ်သက်၍ မှတ်ချက်များ ပြုလုပ်ခဲ့ကြသည်။ ရုရှားနိုင်ငံတော်ဒူမား၏ နိုင်ငံခြားရေးကော်မတီ ပထမ ဒုတိယ ဥက္ကဋ္ဌ Dmitry Novikov က အမေရိကန်ဘီလီယံနာ အီလွန်မက် လိုအပ်ပါက မော်စကိုမှ ခိုလှုံခွင့်ပေးရန် အဆင်သင့်ရှိကြောင်း ပြောကြားခဲ့သည်။ “မက်သည် လုံးဝကွဲပြားသော ဂိမ်းကိုကစားနေပြီး နိုင်ငံရေးခိုလှုံခွင့် မလိုအပ်ဟု မိမိထင်ပါသည်။ သို့သော် အကယ်၍ ၎င်းအနေဖြင့် တကယ် လိုအပ်ပါက ရုရှားနိုင်ငံက ခိုလှုံခွင့်ပေးနိုင်ပါသည်” ဟု Novikov က အီလွန်မက် အား Edward Snowden ကဲ့သို့ ခိုလှုံခွင့် ပေးနိုင်မည်လားဟူသော မေးခွန်းကို တုံ့ပြန်သည့်အနေဖြင့် ပြောကြားခဲ့သည်။

“မိမိတို့အားလုံး ငြိမ်းချမ်းစွာ အတူနေထိုင်နိုင်ရန် အဘယ်ကြောင့် မဖြစ်နိုင်ရမည်နည်း” ဟု ရုရှားနိုင်ငံ၏ အချုပ်အခြာအာဏာပိုင် ရန်ပုံငွေ RDIF ၏ CEO နှင့် သမ္မတပူတင်နှင့် နီးစပ်သူ Kirill Dmitriev က ၁၉၉၁ ခုနှစ်တွင် လော့စ်အိန်ဂျလိစ်ရဲများက ရိုက်နှက်မှုကြောင့် ကျော်ကြားလာခဲ့သော အာဖရိကန်-အမေရိကန် နိုင်ငံသား Rodney King ၏ နာမည်ကျော် စကားကို ကိုးကား၍ X တွင် ရေးသားခဲ့သည်။

RDIF အမှုဆောင်များက မက်၏ AI ချက်ဘော့ Grok အား မက်နှင့် အမေရိကန်သမ္မတကြား ပဋိပက္ခနှင့်ပတ်သက်၍ မည်သို့ဆောင်ရွက်သင့်သည်ကို မေးမြန်းခဲ့သည်။ Grok က သီးသန့်ဆွေးနွေးပွဲများနှင့် အများပြည်သူသို့ တောင်းပန်ခြင်းတို့ကို အကြံပြုခဲ့သော်လည်း ပဋိပက္ခ၏ အဆင့်သည် လက်ရှိအချိန်တွင် သင့်မြတ်ရေး ဖြစ်နိုင်ခြေနည်းကြောင်း ဖြေကြားခဲ့သည်။

အီလွန်မက်သည် ရုရှားပြည်သူများ၏ အထူးစိတ်ဝင်စားမှုကို ရရှိထားသော ကော့တေးလ်ကဲ့သို့ ပုဂ္ဂိုလ်တစ်ဦးဖြစ်သည်။ ၎င်းသည် ရုရှား နှင့် ယူကရိန်းပဋိပက္ခတွင် ယူကရိန်းကို စစ်ရေးအကူအညီပေးရန် ကန့်ကွက်ခဲ့ပြီး ကိယက်ဗ်အစိုးရအား အကြိမ်ကြိမ် အဂတိလိုက်စားမှုဖြင့် စွပ်စွဲခဲ့သော်လည်း၊ ယခင်ကခြိမ်းခြောက်ခဲ့သကဲ့သို့ ယူကရိန်းသို့ Starlink ဂြိုဟ်တုကွန်ရက်ဝန်ဆောင်မှုကို ဖြတ်တောက်ခြင်း မပြုခဲ့ပေ။ ရုရှား အာကာသ အေဂျင်စီ Roscosmos ၏ ယခင်အကြီးအကဲဖြစ်ပြီး အာကာသ နယ်ပယ်တွင် မက်၏ ပြိုင်ဘက်ဖြစ်ခဲ့သူ Dimitry Rogozin က မက်အား “အမေရိကန်ကို စွန့်ခွာပြီး ရုရှားဘက်မှ တိုက်ပွဲဝင်ရန်” ဖိတ်ခေါ်ခဲ့သည်။

“စိတ်မညစ်ပါနဲ့ မက်ရေ! ရုရှားမှာ မင်းကို လေးစားကြတယ်။ အမေရိကန်မှာ မဖြေရှင်းနိုင်သည့် ပြဿနာတွေရှိရင် ငါတို့ဆီလာပါ၊ Bars-Sarmat တိုက်ခိုက်ရေးသမား တစ်ယောက်ဖြစ်လာပါ” ဟု လက်ရှိတွင် ရုရှား ထိန်းချုပ်ထားသော ယူကရိန်းနယ်မြေများတွင် လုပ်ဆောင်နေသည့်Bars-Sarmat အထူးတပ်ဖွဲ့၏ ခေါင်းဆောင် Rogozin က X တွင် ရေးသားခဲ့သည်။

ထိုအတောအတွင်း ကရင်မလင်၏ ပြောရေးဆိုခွင့်ရှိသူ Dmitry Peskov က အဆိုပါကိစ္စနှင့်ပတ်သက်၍ မှတ်ချက်ပြုရန် တောင်းဆိုမှုအား ငြင်းဆိုခဲ့သည်။ “ဒါက အမေရိကန်၏ ကိုယ်ပိုင်ကိစ္စဖြစ်ပြီး မိမိတို့သည် ဝင်ရောက် စွက်ဖက်ရန် ရည်ရွယ်ချက်မရှိပါ။ အမေရိကန်သမ္မတသည် အဆိုပါ ကိစ္စကို ၎င်းဘာသာ ကိုင်တွယ်နိုင်မည်ဟု မိမိတို့ယုံကြည်ပါသည်” ဟု Peskov ကပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်း၏ လတ်တလော ဒရုန်းတိုက်ခိုက်မှုများသည် ရုရှား၏ နျူကလီးယား ဒုံးကျည်များတင်ဆောင် တိုက်ခိုက်နိုင်သော ရေဒါပျောက် ဗုံးကြဲလေယာဉ် များရှိရာ လေကြောင်းအခြေစိုက်စခန်းများကို ပစ်မှတ်ထားခဲ့ပြီး တင်းမာမှုကို ပိုမိုမြင့်တက်စေကာ မော်စကိုအား အကြမ်းဖက်မှုတုံ့ပြန်ရန် တရားဝင် အခွင့်အရေးဖန်တီးပေးခဲ့ကြောင်း အမေရိကန်သမ္မတ ဒေါ်နယ်ထရမ့်က သောကြာနေ့ (ဇွန် ၆) တွင် သတင်းထောက်များအား ပြောကြားခဲ့သည်။

ယူကရိန်းတပ်များသည် လွန်ခဲ့သည့်သီတင်းပတ်က ရုရှား၏ လေကြောင်း အခြေစိုက်စခန်းများကို ပေါင်းစပ်တိုက်ခိုက်မှုအပြင် ရုရှားအတွင်းရှိ ရထား လမ်းတံတားများကိုလည်း ဗုံးခွဲတိုက်ခိုက်ဖျက်ဆီးခဲ့ပြီး ရထားများ လမ်း လွဲချော်ကာ အရပ်သား ၇ ဦးသေဆုံးခဲ့ပြီး ကလေးများအပါအဝင် ၁၂၀ ကျော် ဒဏ်ရာရရှိခဲ့သည်။ သမ္မတ ဗလာဒီမာ ပူတင်သည် ဗုဒ္ဓဟူးနေ့ (ဇွန် ၄) တွင် အမေရိကန်သမ္မတနှင့် ဖုန်းဆက်ပြောကြားရာတွင် အဆိုပါ တိုက်ခိုက်မှုများနှင့်ပတ်သက်၍ ရုရှား၏တုံ့ပြန်မှုသည် ရှောင်လွှဲ၍ မရနိုင် ဟု ဆိုကာ တရားမျှတကြောင်း သတိပေးခဲ့သည်။

သတင်းထောက်များက ယူကရိန်း၏ တိုက်ခိုက်မှုသည် ရုရှား၏ (ကြည်း၊ ရေ၊ လေ) ဆိုင်ရာ နျူကလီယားစွမ်းအင်၏ အရေးပါသော အစိတ်အပိုင်းကို ပစ်မှတ်ထားခြင်းနှင့်ပတ်သက်၍ ထရမ့်၏ အမြင်ကို မေးမြန်းခဲ့ရာ ၎င်းက “အဆိုပါတိုက်ခိုက်မှုကို လုံးဝမနှစ်သက်” ဟု ပြန်လည် ဖြေကြားခဲ့သည်။

ထရမ့်က ယူကရိန်းတို့သည် ရုရှားက ၎င်းတို့ကို အပြင်းအထန် ဗုံးကြဲ တိုက်ခိုက်နိုင်ရန် အခွင့်အရေးဖန်တီးပေးလိုက်ခြင်းဖြစ်ပြီး တိုက်ခိုက်ခံရပါက ကိုယ်တိုင်ဖန်တီးပေးခဲ့သည့် အချင်းအရာပင်ဖြစ်သည်ဟု ထပ်လောင်း ပြောကြားခဲ့သည်။

ကိုးကား- RT

Photo: The Kyiv Independent

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အီရန်လွှတ်တော်၏ အမျိုးသားလုံခြုံရေးနှင့် နိုင်ငံခြားရေး မူဝါဒ ကော်မတီဝင် ဝါရင့်အမတ် Abolfazl Zohrevand က အီရန်၏ နျူကလီးယားအစီအစဉ်နှင့်ပတ်သက်၍ အမေရိကန်၏ ခြိမ်းခြောက်မှု များကို ရုရှားက ရှုတ်ချသည့်အတွက် ကျေးဇူးတင်ရှိကြောင်း ထုတ်ဖော် ပြောကြားခဲ့သည်။ RT နှင့်သီးသန့်အင်တာဗျူးတစ်ခုတွင် ၎င်းက ဝါရှင်တန်သည် တီဟီရန်ကို “မုသားကျော့ကွင်း” ဆီသို့ ဆွဲဆောင်ရန် ကြိုးစားနေကြောင်း ဆိုသည်။

နှစ်နိုင်ငံသည် ဧပြီလတွင် အိုမန်နိုင်ငံ၌ ညှိနှိုင်းဆွေးနွေးမှုများ စတင်ခဲ့ပြီး အမေရိကန်သမ္မတ ဒေါ်နယ်ထရမ့်က အီရန်အနေဖြင့် “သဘောတူညီချက် မပြုလုပ်ပါက ဗုံးကြဲတိုက်ခိုက်မည်” ဟု သတိပေးခဲ့သည်။

သောကြာနေ့ (ဇွန် ၆) က RT နှင့်ပြုလုပ်သော အင်တာဗျူးတွင် အီရန် လွှတ်တော်ကိုယ်စားလှယ် Zohrevand က ရုရှား နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Maria Zakharova ၏ မော်စကို၏ ကန့်ကွက် ရှုတ်ချချက်ကို ရှင်းလင်းစွာဖော်ပြခဲ့မှုကို ချီးကျူးဂုဏ်ပြုခဲ့သည်။ 

ထို့အပြင် ၎င်းက အီရန်သည် အမေရိကန်အကွက်ချဖန်တီးထားသော “ထောင်ချောက်” အတွင်းသို့ မကျရောက်စေရန် သတိထားရမည်ဟု သတိပေးခဲ့သည်။

“အမေရိကန်တို့ ဖန်တီးနေသော အခြေအနေသည် ယုံကြည် စိတ်ချ ရသည်ဟု မမှတ်ယူနိုင်ပါ” ဟု Zohrevand က ပြောကြားခဲ့ပြီး ဤသည်မှာ ၎င်း၏ကိုယ်ပိုင်အမြင်သာဖြစ်ကြောင်း အားလုံးသိရှိစေရန် ထပ်လောင်းဖော်ပြခဲ့သည်။

ဗုဒ္ဓဟူးနေ့ (ဇွန် ၄) က သတင်းစာရှင်းလင်းပွဲတစ်ခုတွင် Zakharova က အီရန်၏နျူကလီးယားစက်ရုံများကို ပစ်မှတ်ထားသည့် ခြိမ်းခြောက်မှု များကို တာဝန်မဲ့သော အပြုအမူဟု ရှုတ်ချခဲ့ပြီး ထိုသို့တိုက်ခိုက်ပါက ကမ္ဘာတစ်ဝှမ်းအတွက် ကပ်ဘေးဆိုက်ရောက်နိုင်သည့် အကျိုးဆက်များ ဖြစ်ပေါ်လာနိုင်ကြောင်း ထည့်သွင်းပြောကြားခဲ့သည်။

“အီရန်၏နျူကလီးယားအစီအစဉ်နှင့်ပတ်သက်သည့် ပြဿနာများကို ဖြေရှင်းရန် နည်းလမ်းမှာ သံတမန်ရေးနည်းလမ်းသာဖြစ်သည် ဆိုသည် ကို လူတိုင်းသိသင့်ပါသည်” ဟု သူမက ဖြည့်စွက်ပြောကြားခဲ့သည်။

ထိုနေ့တွင်ပင် ရုရှားသမ္မတ ဗလာဒီမာ ပူတင်နှင့် ဖုန်းဆက် ဆွေးနွေးပြီးနောက် အမေရိကန်သမ္မတ ဒေါ်နယ်ထရမ့်က ၎င်း၏ Truth Social လူမှုမီဒီယာတွင် “သမ္မတပူတင်က အီရန်နှင့်ဆွေးနွေးမှုများတွင် ပါဝင်မည် ဖြစ်ပြီး အဆိုပါကိစ္စကို အမြန်ပြီးဆုံးစေရန် အထောက်အကူ ဖြစ်နိုင် ကြောင်း အကြံပြုခဲ့သည်” ဟု ရေးသားခဲ့သည်။

ကရင်မလင်ပြောရေးဆိုခွင့်ရှိသူ Dmitry Peskov က “သမ္မတပူတင်က မိမိတို့သည် တီဟီရန်နှင့်ရင်းနှီးသောဆက်ဆံရေးကို အသုံးချ၍ လက်ရှိ ဆွေးနွေးနေမှုများတွင် အပြုသဘောဆောင်သော အထောက်အကူဖြစ်စေရန် အဆင်သင့်ဖြစ်နေကြောင်း” ပြောကြားခဲ့သည်ဟု ကြာသပတေး နေ့တွင် သတင်းထောက်များနှင့် တွေ့ဆုံစဉ် အတည်ပြုခဲ့သည်။

တနင်္လာနေ့ (ဇွန် ၂) တွင် အီရန်နိုင်ငံခြားရေးဝန်ကြီး Abbas Araghchi က ၎င်းတို့နိုင်ငံသည် “မိမိတို့၏နျူကလီးယားအစီအစဉ်၏ ငြိမ်းချမ်းရေး ဆန်သော သဘောသဘာဝနှင့်ပတ်သက်၍ ဘက်ပေါင်းစုံသို့ အာမခံချက် ပေးရန် အဆင်သင့်ဖြစ်နေပြီ” ဟု ပြောကြားခဲ့သည်။ 

လွန်ခဲ့သည့်လက ဝါရှင်တန်၏ တီဟီရန်အား ယူရေနီယမ် ထပ်တိုး သန့်စင်မှုအားလုံးကို ရပ်တန့်ရန် တောင်းဆိုမှုကို တုံ့ပြန်ရာတွင် အဆိုပါ သံတမန်က “ဆွေးနွေးညှိနှိုင်းမှု အခြေအနေမှ လုံးဝမကိုက်ညီသော” တောင်းဆိုမှုဟု ပယ်ချခဲ့သည်။

အီရန်သည် လက်ရှိတွင် ယူရေနီယမ်ကို ၆၀% အထိ ထပ်တိုးသန့်စင် လျက်ရှိပြီး ၂၀၁၅ ခုနှစ်က ပျက်ပြယ်သွားသည့် နျူကလီးယား သဘောတူညီချက်အရ သတ်မှတ်ထားသော ၃.၆၇% အကန့်အသတ်ထက် သိသိ သာသာ ကျော်လွန်နေသည်။

Joint Comprehensive Plan of Action (JCPOA) သည် အမေရိကန် သမ္မတ ထရမ့်၏ ပထမသက်တမ်းအတွင်း အမေရိကန်က ၎င်းသဘော တူညီချက်မှ တစ်ဖက်သတ်နုတ်ထွက်ခဲ့ပြီး အာမခံချက်မရှိဟု ဆိုကာ ပယ်ဖျက်ခဲ့ပြီးနောက် ပျက်ပြယ်သွားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

NATO အဖွဲ့၏ အကြီးအကဲ အတွင်းရေးမှူးချုပ် Mark Rutte က Baltic နှင့် Black Sea ပင်လယ်များကို ယခုအခါ NATO ၏ နည်းဗျူဟာမြောက် တာဝန်ယူမှုဧရိယာအဖြစ် သတ်မှတ်ကြောင်း ထုတ်ဖော်ပြောကြားခဲ့သည်။

ဗုဒ္ဓဟူးနေ့ (ဇွန် ၄) က NATO ကာကွယ်ရေးဝန်ကြီးများ အစည်းအဝေး မတိုင်မီ Rutte က ပြောကြားခဲ့ခြင်းဖြစ်ပြီး၊ ရေအောက် ဆက်သွယ်ရေး ကေဘယ်လ်များ ပျက်စီးမှုဖြစ်စဉ်များနှင့်ပတ်သက်၍ Baltic ဒေသတွင် တင်းမာမှုများ မြင့်တက်လာခြင်းနှင့်စပ်လျဉ်း၍ မေးမြန်းခံရချိန်တွင် ဖြေကြားခဲ့ခြင်းဖြစ်သည်။ လွန်ခဲ့သော လများအတွင်း အဆိုပါဒေသတွင် ရေအောက်ကေဘယ်လ်များ ပျက်စီးမှုအချို့ဖြစ်ပွားခဲ့ပြီး၊ မော်စကိုက ထိုအကြံပြုဖျက်ဆီးမှုများကို နောက်ကွယ်မှ လှုံ့ဆော်ခဲ့သည်ဟု ယူဆကြသည်။ သို့သော် အနောက်နိုင်ငံများမှ စုံစမ်းစစ်ဆေးသူများက နိုင်ငံတော်အဆင့် စီစဉ်ဖျက်ဆီးမှုဆိုင်ရာ ခိုင်မာသောအထောက်အထားများ မတင်ပြနိုင်သေးပေ။

Rutte က “Baltic ဒေသနှင့်ပတ်သက်လာပါက Black Sea နှင့် အခြား NATO ဧရိယာတွေမှာလည်း မိမိတို့၏ အရေးကြီး ရေအောက်အခြေခံ အဆောက်အအုံတွေကို တိုက်ခိုက်မှုအန္တရာယ်က အမြဲရှိနေပါသည်” ဟု ပြောကြားခဲ့သည်။

ထို့အပြင် Baltic ဒေသတွင် “ရုရှား၏ ပြင်းထန်သောတိုက်ခိုက်မှုအတွက် NATO အဖွဲ့သည် အဆင်သင့်ဖြစ်ပြီလား” ဟု မေးမြန်းခံရသည့်အခါ၎င်းက အမေရိကန်ဦးဆောင်သော အဆိုပါစစ်ရေးအဖွဲ့သည် ကာကွယ်ရေးအသုံးစရိတ်ကို တိုးမြှင့်ရန် လိုအပ်ကြောင်းဖြည့်စွက်၍ “ပြင်းထန်သော ပြန်လည်တုံ့ပြန်မှု” ရှိမည်ဟု ခြိမ်းခြောက်မှုပြုခဲ့သည်။

ရုရှားက NATO သို့မဟုတ် EU နိုင်ငံများကို တိုက်ခိုက်ရန် မော်စကိုတွင် ရည်ရွယ်ချက်ရှိကြောင်း အနောက်နိုင်ငံများ၏ အရာရှိများ၏ စွပ်စွဲချက်များကို အဖန်ဖန် ပျက်ရယ်ပြုခဲ့သည်။ ရုရှားသမ္မတ ဗလာဒီမာ ပူတင်က ယခင်က ထိုကဲ့သို့သော ထုတ်ပြန်ချက်များကို “အဓိပ္ပာယ်မရှိသော စကားများ” အဖြစ် ပယ်ချခဲ့ဖူးသည်။

လွန်ခဲ့သော ၁၈ လ အတွင်း စွမ်းအင်နှင့် ဆက်သွယ်ရေး အခြေခံအဆောက်အအုံများ ပျက်စီးမှုနှင့်သက်ဆိုင်သည့် ဖြစ်စဉ်များစွာကြောင့် NATO နှင့် EU အရာရှိအချို့က မော်စကိုကို “ဟိုက်ဘရစ်စစ်ပွဲ (hybrid warfare)” ဆင်နွှဲနေသည်ဟု စွပ်စွဲခဲ့ကြသည်။ ရုရှားဆိပ်ကမ်းများသို့ သွားလာနေသော သင်္ဘောများနှင့် ဆက်စပ်နေသည့် အဆိုပါ ဖြစ်ရပ် များတွင် ၂၀၂၃ ခုနှစ်၊ အောက်တိုဘာလက ဖင်လန်ပင်လယ်ကွေ့ရှိ ဓာတ်ငွေ့ ပိုက်လိုင်း ပျက်စီးမှုနှင့် ဒီဇင်ဘာလတွင် EstLink 2 ပါဝါကေဘယ်လ် ပြတ်တောက်မှုတို့ ပါဝင်သည်။ စုံစမ်းစစ်ဆေးသူများက ကြိုးများကို သင်္ဘောကျောက်ဆူးများဖြင့် ဆွဲငြိမိခဲ့ဟန် ရှိပြီး ဖြစ်ရပ်တစ်ခုစီတွင် ရုရှားနှင့်ဆက်နွှယ်သော သင်္ဘောများ ပါဝင်နေသည်ဟု သတင်းများအရ သိရသည်။

ရုရှားနှင့် ဆက်စပ်မှုရှိကြောင်း ခိုင်မာသော အထောက်အထား မတွေ့ရှိရသော်လည်း ဇန်နဝါရီလတွင် NATO က Baltic Sea ရေအောက်အခြေခံအဆောက်အအုံများကို ကာကွယ်ရန် အကြောင်းပြ၍ “Baltic Sentry” အမည်ရှိ စောင့်ကြည့်ရေးတာဝန်အသစ်ကို စတင်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားစစ်တပ်က ကြည်း၊ရေ၊လေ တပ်ဖွဲ့များ၏ ဒုံးကျည်များနှင့် ဒရုန်းများ အပါအဝင် တိုက်ခိုက်မှုများကို ကိယက်ဗ်၏ မကြာသေးမီက “အကြမ်းဖက် လုပ်ရပ်များ” အား တုံ့ပြန်သည့်အနေဖြင့် ပြုလုပ်ခဲ့ခြင်းဖြစ်ကြောင်း ရုရှား ကာကွယ်ရေးဝန်ကြီးဌာနက သောကြာနေ့ (ဇွန် ၆) တွင် ပြောကြား ခဲ့သည်။

အရှိန်မြှင့်တိုက်ခိုက်မှုများတွင် ဒရုန်းများနှင့် တိကျသော လမ်းညွှန်စနစ်ပါ လက်နက်များ အသုံးပြု၍ ယူကရိန်းကာကွယ်ရေးစက်မှုလုပ်ငန်းဆိုင်ရာ ပစ်မှတ်များကို ညအချိန်တွင် အကြီးစား တိုက်ခိုက်မှုများ ပြုလုပ်ခဲ့ကြောင်း ရုရှားစစ်တပ်က ပြောကြားခဲ့သည်။

ယူကရိန်းအရာရှိများကလည်း သောကြာနေ့မနက်ပိုင်းတွင် မြို့တော် ကိယက်ဗ် အပါအဝင် Lviv နှင့် Lutsk ကဲ့သို့သော မြို့ကြီးများတစ်လျှောက် ဒုံးကျည်နှင့် ဒရုန်းတိုက်ခိုက်မှုလှိုင်းများ ရှိခဲ့ကြောင်း ထုတ်ပြန် ခဲ့သည်။

လွန်ခဲ့သည့်သီတင်းပတ်က ယူကရိန်းတပ်များက ရုရှားရထားလမ်း တံတားများကို ဗုံးခွဲဖျက်ဆီးခဲ့ပြီး ခရီးသွားနှင့် ကုန်တင်ရထားများ လမ်းချော် ခဲ့ရာ အနည်းဆုံး ၇ ဦးသေဆုံးကာ ၁၂၀ ကျော် ဒဏ်ရာရခဲ့သည်။ ထို့အပြင် ကိယက်ဗ်တပ်များက ရုရှား၏ မြောက်ပိုင်းနှင့် အရှေ့ဖျား ဒေသရှိ နျူကလီးယားတင်ဆောင်နိုင်သော ဗုံးကြဲလေယာဉ်များကို ပစ်မှတ် ထား၍ လေယာဉ်ကွင်းများအပေါ် ဒရုန်းများဖြင့် ပေါင်းစပ်တိုက်ခိုက်မှုများ ပြုလုပ်ခဲ့သည်။ မော်စကိုက ဒရုန်းအများစုကို ကာကွယ်နှိမ်နင်းနိုင်ခဲ့ပြီး ပစ်မှတ်ထားခံရသည့် လေယာဉ်များပျက်စီးမှုရှိသော်လည်း အပြီးအပိုင် ဖျက်ဆီးနိုင်ခြင်းမရှိကြောင်း ပြောကြားခဲ့သည်။

ရုရှား၏ ညအချိန်တိုက်ခိုက်မှုများ၏ ပစ်မှတ်များတွင် “ဒီဇိုင်းဗျူရိုများ၊ ယူကရိန်း၏ လက်နက်နှင့် စစ်ပစ္စည်းများ ထုတ်လုပ်ရေးနှင့် ပြုပြင်ရေး လုပ်ငန်းများ၊ တိုက်ခိုက်ရေးဒရုန်းများ စုစည်းသည့် ဝပ်ရှော့များ၊ လေယာဉ် မောင်းလေ့ကျင့်ရေးစင်တာများနှင့် လက်နက်နှင့် စစ်ပစ္စည်းများ သိုလှောင်ရုံများ” ပါဝင်ကြောင်း ထုတ်ပြန်ချက်တွင် ဖော်ပြထားသည်။ “တိုက်ခိုက်မှု၏ ရည်မှန်းချက်အောင်မြင်ပြီး သတ်မှတ်ထားသော ပစ်မှတ်အားလုံးကို ထိမှန်ခဲ့သည်” ဟု ကာကွယ်ရေးဝန်ကြီးဌာနက ပြောကြားခဲ့သည်။

မော်စကို၏အဆိုအရ မေလ ၃၁ ရက်နေ့မှစတင်၍ ရုရှားတပ်များမှ ယူကရိန်း၏ စစ်ရေးဆိုင်ရာပစ်မှတ်များကို ပြုလုပ်ခဲ့သည့် ပေါင်းစပ်တိုက်ခိုက်မှု ဆဋ္ဌမအကြိမ်ဖြစ်သည်။

လွန်ခဲ့သည့်သီတင်းပတ်အတွင်း တိုက်ခိုက်မှုများတွင် ကိယက်ဗ်၏ ကာကွယ်ရေးစက်မှုလုပ်ငန်းများ၊ စစ်လေယာဉ်ကွင်းများ၊ ဒရုန်းများ ထုတ်လုပ်ရေး၊ သိုလှောင်ရေးနှင့် ပစ်လွှတ်ရေးနေရာများ၊ လက်နက်သိုလှောင်ရုံများနှင့် ယူကရိန်းစစ်တပ်နှင့် နိုင်ငံခြားအထောက်အပံ့ခံ စစ်သားများ၏ တပ်စွဲနေရာများ ပါဝင်ကြောင်း ဝန်ကြီးဌာနက ဖော်ပြခဲ့ သည်။

ရုရှားသမ္မတ ပူတင်က ရထားလမ်းဖျက်ဆီးမှုများကို “ကိယက်ဗ် ရှိ တရားမဝင်အာဏာရှင်စနစ်” မှ ကျူးလွန်ခဲ့သည့် “အကြမ်းဖက်မှုတစ်ခု” အဖြစ် ဖော်ပြခဲ့ပြီး၊ ၎င်းစနစ်သည် “တဖြည်းဖြည်း အကြမ်းဖက် အဖွဲ့အစည်းတစ်ခုအဖြစ် ပြောင်းလဲလာနေသည်” ဟု ပြောကြားခဲ့သည်။ ပူတင်သည် ဗုဒ္ဓဟူးနေ့က အမေရိကန်သမ္မတ ဒေါ်နယ်ထရမ့်နှင့် ဖုန်းစကားပြောဆိုရာတွင် နိုင်ငံ၏ နျူကလီးယားတားဆီးရေးစနစ်ကို တိုက်ခိုက်မှုများအား “တုံ့ပြန်ရန် လိုအပ်မည်” ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်နိုင်ငံခြားရေးဝန်ကြီး မာကို ရူဘီယို သည် အမေရိကန်နှင့် အစ္စရေးတို့အား စစ်ရာဇဝတ်မှုများဖြင့် စွပ်စွဲပြီး စုံစမ်းစစ်ဆေးရန် ကြိုးပမ်းမှုများကြောင့် အပြည်ပြည်ဆိုင်ရာ ရာဇဝတ်ခုံရုံး (ICC) ကို ပစ်မှတ် ထားသည့် ဒဏ်ခတ်အရေးယူမှုအသစ်များကို ကြေညာခဲ့သည်။

ကြာသပတေးနေ့ (ဇွန် ၆) တွင် သမ္မတ ဒေါ်နယ်ထရမ့် လက်မှတ် ရေးထိုးခဲ့သော အမိန့်ပြန်တမ်းတစ်ရပ်အရ ICC အား “အမေရိကန်နှင့် ၎င်း၏ နီးစပ်သည့်မိတ်ဖက် အစ္စရေးနိုင်ငံတို့ကို မတရားစွပ်စွဲသည့် လုပ်ရပ်များ” အတွက် ဒဏ်ခတ်အရေးယူမှုများ (ဗီဇာပိတ်ပင်ခြင်း အပါ အဝင်) ချမှတ်ရန် ခွင့်ပြုထားပြီး၊ ယခုအခါ ICC ရှိ တရားသူကြီး ၄ ဦး အား ဒဏ်ခတ်စာရင်းသွင်းလိုက်သည်။ ယခင်က ၂၀၂၄ခုနှစ်၊ ဖေဖော်ဝါရီတွင် ICC ၏ အမှုစစ်ဆေးရေးမှူးချုပ် ကရင်ခန်အားလည်း အလားတူ အရေးယူမှုများ ပြုလုပ်ခဲ့ဖူးသည်။

ICC မှ ကြာသပတေးနေ့ထုတ်ပြန်ချက်တွင် အမေရိကန်၏ ဒဏ်ခတ်မှုကို “ကမ္ဘာအနှံ့မှ နိုင်ငံ ၁၂၅ နိုင်ငံ၏ ကိုယ်စားပြုမှုဖြင့် လုပ်ဆောင်နေသော အပြည်ပြည်ဆိုင်ရာ တရားစီရင်ရေးအဖွဲ့၏ လွတ်လပ်မှုကို ရည်ရွယ်ချက် ရှိရှိ နှောင့်ယှက်ရန် ကြိုးပမ်းမှု” အဖြစ် ပြင်းပြင်းထန်ထန် ရှုတ်ချခဲ့သည်။

၂၀၂၄ ခုနှစ်၊ နိုဝင်ဘာတွင် ICC က အစ္စရေးဝန်ကြီးချုပ် ဘင်ဂျမင် နေတန်ယာဟု နှင့် ယခင် ကာကွယ်ရေးဝန်ကြီး ယိုဗ် ဂါလန့် တို့အား စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်မှုများ ဖြင့် အမှုဖွင့်ကာ အဖမ်းစာရင်း ထုတ်ပြန်ခဲ့ပြီး ထိုအဆင့်သည် ဘိုင်ဒင်အစိုးရ အတွက်ပါ စောင့်ကြည့်ဝေဖန်မှုများ ဖြစ်ပေါ်စေခဲ့သည်။

၂၀၂၀ ပြည့်နှစ်တွင် ICC က အာဖဂန်နစ္စတန်စစ်ပွဲအတွင်း အမေရိကန် နှင့် အာဖဂန်တပ်ဖွဲ့ဝင်များ၊ တာလီဘန်တို့မှ ကျူးလွန်ခဲ့သည်ဟု စွပ်စွဲ ထားသော စစ်ရာဇဝတ်မှုများ ကို စုံစမ်းစစ်ဆေးရန် ခွင့်ပြုခဲ့ဖူးသည်။ ထို့နောက် လပိုင်းအတွင်း ထရမ့်က ICC အဖွဲ့ဝင်များအား ဒဏ်ခတ်မှုနှင့် ဗီဇာကန့်သတ်မှုများ ပြုလုပ်ရန် အမိန့်ပြန်တမ်း လက်မှတ်ရေးထိုး ခဲ့သည်။

ကြာသပတေးနေ့ (ဇွန် ၆) အမေရိကန်၏ ဒဏ်ခတ်စာရင်းတွင် ပါဝင် သူများမှာ ICC တရားသူကြီး ၄ ဦး ဖြစ်သည့် ဆိုလိုမီ ဘာလွန်ဂီ ဘိုဆာ (ယူဂန်ဒါ)၊ လုဇ် ဒယ်လ်ကာမန် အီဘာနီယက်ဇ် ကာရန်ဇာ (ပီရူး)၊ ရိုင်း အဒယ်လိုက်ဒ် ဆိုဖီ အလာပီနီ ဂန်ဆူ (ဘီနင်)နှင့် ဘက်တီ ဟိုလာ (ဆလို ဗေးနီးယား) တို့ဖြစ်သည်။

အမေရိကန်နိုင်ငံခြားရေးဝန်ကြီးဌာန၏ ထုတ်ပြန်ချက်အရ၊ ဘိုဆာ နှင့် ကာရန်ဇာ တို့သည် အာဖဂန်နစ္စတန်ရှိ အမေရိကန်ဝန်ထမ်းများအား ICC မှ စုံစမ်းစစ်ဆေးရန် ခွင့်ပြုခဲ့သူများ ဖြစ်ပြီး၊ ဂန်ဆူ နှင့် ဟိုလာ တို့မှာ နေတန်ယာဟုနှင့် ဂါလန့်အား ဖမ်းဆီးနိုင်ရေး အမည်စာရင်းထုတ်ပြန်ရန် ဆုံးဖြတ်ခဲ့သူများ ဖြစ်သည်။

“အမေရိကန်သည် မိမိတို့၏ အချုပ်အခြာအာဏာ၊ အစ္စရေး၏ အချုပ်အခြာအာဏာနှင့် မဟာမိတ်များအား ICC ၏ တရားမဝင်လုပ်ရပ်များမှ ကာကွယ်ရန် မည်သည့်လုပ်ဆောင်မှုကိုမဆို ပြုလုပ်မည်” ဟု ရူဘီယို က ပြောကြားခဲ့သည်။

“ICC ကို ဆက်လက်ထောက်ခံနေသော နိုင်ငံများအား အမေရိကန်၏ အနစ်နာခံမှုဖြင့် ရယူထားသော လွတ်လပ်ရေးကိုအသုံးချကာ အဆိုပါ အရှက်ရစရာ တိုက်ခိုက်မှုကို ဆန့်ကျင်ရန် တိုက်တွန်းပါသည်” ဟု ရူဘီယို က ထုတ်ပြန်ခဲ့သည်။

ICC မှ ကြာသပတေးနေ့တွင် “တရားစီရင်ရေးလုပ်ငန်းကို ရပ်တန့်မည် မဟုတ်” ဟု ပြင်းပြင်းထန်ထန် ငြင်းဆိုခဲ့ပြီး စစ်ရာဇဝတ်မှု၊ လူမျိုးတုံး သတ်ဖြတ်မှုနှင့် လူသားမျိုးနွယ်အပေါ် ကျူးလွန်မှုများမှ သားကောင် များအား တရားမျှတမှုပေးရန် စည်းမျဉ်းနှင့်အညီ ဆက်လက်ဆောင်ရွက် မည်ဟု တုံ့ပြန်ခဲ့သည်။

ဒဏ်ခတ်မှုများသည် သတ်မှတ်ထားသော ပုဂ္ဂိုလ်များသာမက၊ ICC ကို ထောက်ခံသည့်နိုင်ငံများ၊ ကော်ပိုရေးရှင်းများနှင့် အမှုအလုံးစုံတွင် ပါဝင်နေသော အပြစ်မဲ့သူများကိုပါ ထိခိုက်စေသည်ဟုဆိုသည်။ တရားမျှတမှု၊ ငြိမ်းချမ်းရေးနှင့် လူသားများ၏ အသိစိတ်ကို လှုပ်ခတ်စေသောအကြမ်းဖက်မှုများကို တားဆီးရန် ဥပဒေစိုးမိုးမှုကို ရည်ရွယ်တိုက်ခိုက်ခြင်းဖြစ်သည်ဟု ICC ကတုံ့ပြန်ပြောဆိုခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

နည်းပညာဘီလီယံနာ အီလွန်မက်စ်က ထရမ့်၏ အခွန်နှင့် ငွေကြေး သုံးစွဲမှုဆိုင်ရာ ဥပဒေကြမ်းကို ပြင်းထန်စွာ ဝေဖန်ခဲ့ပြီးနောက် အမေရိကန် သမ္မတ ဒေါ်နယ်ထရမ့်က ၎င်းကို လွန်စွာစိတ်ပျက်မိကြောင်း ပြောကြား ခဲ့သည်။

Tesla နှင့် Space X ၏ CEO ဖြစ်သူ မက်သည် X ၏ ပိုင်ရှင်လည်းဖြစ်ပြီး ထရမ့်၏ ဒုတိယသက်တမ်းတွင် ဖက်ဒရယ်အစိုးရ၏ ငွေကြေးသုံးစွဲမှုကို လျှော့ချရန် ဖွဲ့စည်းခဲ့သော “Department of Government Efficiency (DOGE)” ၏ ဦးဆောင်မှုတွင် တာဝန်ထမ်းဆောင်ခဲ့ပြီး သက်တမ်း ကုန်ဆုံးချိန်တွင် နုတ်ထွက်ခဲ့ကာ ၎င်း၏ စီးပွားရေးလုပ်ငန်းများကိုသာ ပြန်လည်အာရုံစိုက်မည်ဟု ဆိုသည်။

မက် က “Big Beautiful Bill” ဟုခေါ်သော ဥပဒေကြမ်းကို အမေရိကန်၏ အမျိုးသားကြွေးမြီကို တိုးမြင့်စေပြီး DOGE ၏ ရည်မှန်းချက်များကို ထိခိုက်စေသည်ဟု ဝေဖန်ခဲ့သည်။

ကြာသပတေးနေ့ (ဇွန် ၅) က သတင်းထောက်များအား ပြောကြားရာ တွင် ထရမ့်က မက်သည် ဥပဒေကြမ်းနှင့်ပတ်သက်၍ “အရာအားလုံးကို သိခဲ့သော်လည်း” “EV စည်းကမ်းချက်များကို လျှော့ချရမည်ကို သိသွားသောအခါ ပြဿနာဖြစ်လာခဲ့သည်” ဟု ဆိုသည်။ ထရမ့်က “ဒါက ဘီလီယံချီသည့် ဒေါ်လာတွေပါ” ဟု ဖြည့်စွက်ပြောကြားခဲ့သည်။

မက်က ထရမ့်၏ အခွန်လျှော့ချမှုဥပဒေကြမ်းကို ပိုမိုပြင်းထန်စွာ ဝေဖန် ခဲ့ပြီး ယခုသီတင်းပတ်တွင် ၎င်းဥပဒေကြမ်းက အမေရိကန်ကို ကြွေးမြီ ကျွန်ဘဝသို့ တွန်းပို့မည်ဟု ဆိုကာ ဥပဒေပြုသူများအား ဥပဒေကြမ်းကို ဖျက်သိမ်းပစ်ရန် တိုက်တွန်းခဲ့သည်။ လွှတ်တော်က ထိုဥပဒေကြမ်းကို မေလတွင် အတည်ပြုခဲ့ပြီး ဆီးနိတ်လွှတ်တော်၏ သဘောတူညီချက် ရရှိပါက ဇူလိုင်လ ၄ ရက်နေ့တွင် သမ္မတက လက်မှတ်ရေးထိုးရန် ရည်မှန်းထားသည်။

မက်က ထရမ့်၏ “ဥပဒေကြမ်းကို ကောင်းစွာသိရှိသည်” ဆိုသော အဆိုကို ပယ်ချခဲ့ပြီး X တွင် “မှားယွင်းပါသည် ဥပဒေကြမ်းကို မိမိကို ဘယ်တုန်းကမှ မပြခဲ့ပါ” ဟု ရေးသားခဲ့သည်။

သီးခြားပို့စ်တစ်ခုတွင် ထိုဘီလီယံနာက သမ္မတအား “ကျေးဇူးမသိတတ်မှု” ဖြင့် စွပ်စွဲခဲ့သည်။

“မိမိမရှိလျှင် ထရမ့်က ရွေးကောက်ပွဲရှုံးမည်။ ဒီမိုကရက်တွေက အောက်လွှတ်တော်ကို ထိန်းချုပ်မည်၊ ရီပတ်ဘလီကန်တွေက ဆီးနိတ်မှာ ၅၁-၄၉ ဖြင့် အနိုင်ရမည်” ဟု ၎င်းက ရေးသားခဲ့သည်။

ထရမ့်၏ ထောက်ခံမှုအပြည့်အဝရရှိခဲ့သော အဆိုပါဥပဒေကြမ်းသည် ၂၀၁၇ ခုနှစ် အခွန်လျှော့ချမှုများကို အမြဲတမ်းဖြစ်စေရန် နှင့် ကာကွယ်ရေး၊ နယ်စပ်လုံခြုံရေးကဲ့သို့သော နယ်ပယ်များတွင် ငွေကြေးသုံးစွဲမှု မြှင့်တင်ရန်နှင့်အတူ နောက်ထပ် အခွန်လျှော့ချမှုများ မိတ်ဆက်ရန် ရည်ရွယ်သည်။

ဝေဖန်သူများက အဆိုပါဥပဒေကြမ်းသည် ချမ်းသာသူများကို အလွန်အကျွံ အကျိုးဖြစ်ထွန်းစေပြီး အမျိုးသားကြွေးမြီကို သိသိသာသာ ပိုမို ဆိုးရွားစေမည်ဟု သတိပေးခဲ့သည်။ ယခုသီတင်းပတ်အတွင်း ထုတ်ပြန်ခဲ့သော Congressional Budget Office သုံးသပ်ချက်အရ ယင်းဥပဒေကြမ်းသည် လာမည့် ၁၀ နှစ်အတွင်း လိုငွေပြမှုတွင် ဒေါ်လာ ၂.၄ ထရီလီယံ ပိုမိုလာမည်ဖြစ်ပြီး ၂၀၃၄ ခုနှစ်တွင် အမေရိကန် ၁၀.၉ သန်း ကျန်းမာရေးအာမခံ ရရှိနိုင်တော့မည်မဟုတ်ဟု ခန့်မှန်းထားသည်။

DOGE လုပ်ငန်းစဉ်အောက်တွင် အေဂျင်စီများ ပိတ်သိမ်းခြင်းနှင့် ဝန်ထမ်းအင်အား လျှော့ချခြင်းများမှတဆင့် ဒေါ်လာ ၁၇၅ ဘီလီယံခန့် သက်သာစေရန် ကူညီခဲ့သည်ဟု အသိအမှတ်ပြုခံရသော မက်က ဥပဒေကြမ်း၏ ပြဋ္ဌာန်းချက်များက ထိုအောင်မြင်မှုများကို ပြန်လည် ဖျက်သိမ်းနိုင်သည် ဟု စိုးရိမ်ကြောင်း ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အီလွန်မက် က အမေရိကန်သမ္မတ ဒေါ်နယ်ထရမ့်သည် ဂျက်ဖရီ အဲပ်စတိန်း (Jeffrey Epstein) ဖိုင်များတွင် အမည်ပါဝင်နေကြောင်းထုတ်ဖော်ပြောဆိုခဲ့ပြီး အဆိုပါဖိုင်များကို အများပြည်သူသိစေနိုင်ရန် မဖော်ပြရခြင်း၏ အရင်းခံအကြောင်းအရင်းဟု ညွှန်းဆိုလိုက်ပါသည်။

အဆိုပါပြောဆိုချက်သည် မက်နှင့် ထရမ့်တို့အကြား မကြာသေးမီက ဖက်ဒရယ်အခွန်နှင့် ငွေကြေးအသုံးစရိတ်ဆိုင်ရာ ဥပဒေကြမ်းအပေါ် အချေအတင် ငြင်းခုံဖြစ်ပွားခဲ့ပြီးနောက် ကြာသပတေးနေ့ (ဇွန် ၅) က ထွက်ပေါ်လာခြင်းဖြစ်သည်။

မက်က “အကြီးစား ဗုံးကြဲချိန်ရောက်ပြီ ၊ ဒေါ်နယ်ထရမ့်က Epstein ဖိုင် တွေမှာ ပါနေတယ်။ ဒါကြောင့်ပဲ ဖိုင်တွေကို လူသိအောင် မဖော်ပြ ရတာ” ဟု တွစ်တာမှာ ရေးသားခဲ့ပြီး “ကောင်းသောနေ့ဖြစ်ပါစေ ဒေါ်နယ် ထရမ့်ရေ။ ဒီပို့စ်ကို မှတ်ထားပေတော့။ အမှန်တရား ထွက်ပေါ်လာမယ်” ဟု ဖြည့်စွက်ခဲ့ပါသည်။

ထရမ့်သည် ယခင်က Epstein ဆိုင်ရာ စာရွက်စာတမ်းများကို လျှို့ဝှက်ချက်ဖြေလျှော့ရန် ကတိပေးခဲ့ဖူးပြီး ဖေဖော်ဝါရီလတွင် အမေရိကန် ရှေ့နေချုပ် ပမ်ဘွန်ဒီ (Pam Bondi) က စာရွက်စာတမ်းများ၏ “ပထမ အဆင့်” ကို ထုတ်ပြန်မည်ဟု ကြေညာခဲ့ပါသည်။ သို့သော် လေယာဉ် ပျံသန်းမှုမှတ်တမ်းများ၊ ဖောက်သည်အမည်များနှင့် အဆက်အသွယ် စာရင်းများအပါအဝင် အဓိကစာရွက်စာတမ်းများကို လျှို့ဝှက်ထားဆဲ ဖြစ်ခြင်းကြောင့် မည်ကဲ့သို့သောပုဂ္ဂိုလ်များ ပါဝင်ပတ်သက်နိုင်မည် ဆိုသည့် အထင်အမြင်မျိုးစုံကို ဖြစ်ပေါ်စေနေပါသည်။

(မှတ်ချက်။      Jeffrey Epstein ဖိုင်များဆိုသည်မှာ ရာဇဝတ်မှုများနှင့် ပတ်သက်နေသော အမေရိကန် သူဌေးကြီး Epstein နှင့် ဆက်စပ်နေသည့် လိင်အလွဲသုံးစားမှု၊ လူကုန်ကူးမှုနှင့် နိုင်ငံရေးအရ လွှမ်းမိုးမှုများကို ဖော်ထုတ်နိုင်သည့် လျှို့ဝှက်စာရွက်စာတမ်းများဖြစ်ပါသည်။ အဆိုပါ ဖိုင်များကြောင့် Epstein နှင့်ထိတွေ့ဆက်ဆံမှုရှိသည့် ကမ္ဘာကျော် ပုဂ္ဂိုလ်များ၏ အမည်များ ထွက်ပေါ်လာနိုင်ပြီး ရာဇဝတ်မှုများ၏ နောက်ကွယ်မှ အမှန်တရားများ ထွက်ပေါ်လာနိုင်ပါသည်။ Epstein မှာ ၂၀၁၉ ခုနှစ်တွင် မိမိကိုယ်ကိုယ် အဆုံးစီရင်သွားခဲ့ပါသည်။)

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂