လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဧပြီ ၂၉ ရက် ည ၇ နာရီ ၃၀ မိနစ်တွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးပြည်သူ့ဆေးရုံကြီးသို့ ဗုံးသီးပေါက်ကွဲစ ထိမှန်ဒဏ်ရာများဖြင့် ကလေးငယ် တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ မန္တလေးတိုင်းဒေသကြီး၊ ပုသိမ်ကြီးမြို့နယ်၊ မြကံသာကျေးရွာသို့ အကြမ်းဖက်အဖွဲ့ (စိစစ်ဆဲ)က အများပြည်သူ သေဆုံး၊ ထိခိုက်ဒဏ်ရာရရှိစေရန် ရည်ရွယ်၍ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ ကျေးရွာအတွင်း လက်နက်ကြီးဗုံးသီးများ ကျရောက်ပေါက်ကွဲခဲ့မှုကြောင့် အဆိုပါကျေးရွာနေ မောင်ဟိန်းလင်းဆက်(၅)နှစ်တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော မြို့၊ ရပ်ကွက်၊ ကျေးရွာများအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။

Source: www.moha.gov.mm

မြန်မာနိုင်ငံ၊ ရခိုင်ပြည်နယ်အတွင်း ဘင်္ဂါလီလူမျိုးများအတွက် သီးခြားလွတ်လပ်သော ကိုယ်ပိုင်ပြည်နယ် ဖြစ်ပေါ်လာရေး ‌ ဘင်္ဂလားဒေ့ရှ်နိုင်ငံမှ အတိုက် အခံ အင်အားကြီးပါတီ ဂျာမတ် အီ အစ္စလမ်မစ် (Jamaat-e-Islami) ပါတီက တောင်းဆိုမှုသည် အနောက်နိုင်ငံ၏ စေခိုင်းမှုဖြစ်နိုင်ကြောင်း ရခိုင် နိုင်ငံရေးသမားများနှင့် နိုင်ငံရေးလေ့လာသူများက CNI သတင်းဌာနသို့ ပြောသည်။

ထိုကိစ္စနှင့်ပတ်သက်၍ ဧပြီ ၂၇ ရက်က ဘင်္ဂလားဒေ့ရှ်နိုင်ငံကို ရောက်ရှိနေသည့် တရုတ်ကွန်မြူနစ်ပါတီ (CPC) မှ ထိပ်တန်းကိုယ်စားလှယ်အဖွဲ့ နှင့် တွေ့ဆုံစဉ်တွင် ဆွေးနွေးညှိနှိုင်းမှုများ ပြုလုပ်ခဲ့ကြကြောင်း ဘင်္ဂလားဒေ့ရှ် အခြေစိုက် သတင်းဌာနများမှ ဖော်ပြခဲ့ကြသည်။

ကိုးကား- CNI News

စစ်ကိုင်းတိုင်းဒေသကြီး၊ ထီးချိုင့်မြို့ကို KIA နှင့် PDF အဖွဲ့တို့က မြို့သိမ်း တိုက်ပွဲဖော်ဆောင်ကာ သဲကြီးမဲကြီး တိုက်ခိုက်ခဲ့ပြီး လက်ရှိတွင်မူ တပ်မတော်ဘက်မှ ပြန်လည်အသာစီးရနေပြီဖြစ်ကြောင်း ဒေသခံများက NP News သို့ ပြောသည်။ KIA နှင့် PDF ပူးပေါင်းအဖွဲ့များသည် ထီးချိုင့် မြို့ကို ပြီးခဲ့သည့် ၂၀၂၄ ခုနှစ်၊ ဩဂုတ်လက စတင်တိုက်ပွဲများဖော်ဆောင်ခဲ့သော်လည်း ၎င်းတို့ကြောင့် မြို့သာကြေသွားခဲ့ပြီး သိမ်းပိုက်ထိန်းချုပ်နိုင်ခဲ့ခြင်း မရှိကြောင်းသိရသည်။ ထို့နောက် လက်ရှိတွင်မူ အထက်ပါ အဖွဲ့များသည် အနီးပင် ကပ်နိုင်ခြင်း‌ မရှိတော့ဘဲ မြို့နယ်အတွင်း၌သာ အခြေချနေထိုင်နေကြကြောင်း သိရသည်။ “မြို့အထဲထဲတော့ ပြန်ဝင်လို့တော့ မရဘူးပေါ့ဗျာ။ ရွာအနီးတွေမှာတော့ ပြန်ဝင်ကြည့်တာတော့ ရှိတာပေါ့။ မြို့ထဲကိုတော့ PDF ဘာညာကတော့ မကပ်ရဲတော့ဘူးပေါ့နော်။ တပ်ကပဲ လုံးဝစိုးမိုးပြီးတော့ ရွာနားဆို မြောက်ပြင်ဘက်ဆိုရင်တော့ အလယ်တောက စမှာပေါ့။ ထီးချိုင့်မြောက်ပြင်ဆို အလယ်တောကနေပြီးတော့ ကွင်းတုံ၊ ရွှေချောင်းနဲ့ ကျောင်းကုန်းလမ်းဆုံထိတော့ ထီးချိုင့်ဈေးဆိုင်တန်းတွေနဲ့ပဲ ဆိုင်ဖွင့်ပြီးတော့ နေနေကြတာပေါ့ဗျာ” ဟု ဒေသခံတစ်ဦးက ပြောသည်။ ထီးချိုင့်မြို့နယ်အနီးရှိ PDF များမှာမူ ကျေးရွာများအတွင်း ဒေသခံများနှင့် ရောနှောနေထိုင်ကာ အသက်ဆက်နေရကြောင်းလည်း ၎င်းက ဆက်ပြောသည်။ “ထီးချိုင့်မြို့နယ်က PDF ကတော့ ထီးချိုင့်မြို့နယ်ထဲကလူတွေနဲ့ပဲ ရောနှော နေကြတာပေါ့။ အဲဒီလိုပဲနေနေကြတာ။ အဲဒီမှာ လေယာဉ်ကျဲတယ်ဆိုရင်ပြည်သူကိုကျဲတယ်ပေါ့။ တပ်ကလည်း အမိအရ သတင်းရလို့ ကျဲတာလေ။ ရှိတာတော့ ရှိတယ်။ ပြည်သူတွေကိုပဲ Cover ယူနေကြတာပေါ့” ဟု ၎င်းက ပြောသည်။ ထို့အပြင် မြို့အတွင်း ဝင်ရောက်ခွင့်မရှိတော့သည့် PDF များသည် လက်ရှိကာလတွင် ငွေကြေးပြဿနာများကြောင့် အချင်းချင်း သဘောထားကွဲလွဲမှုများပင် ရှိနေကြောင်းလည်း ၎င်းကဆိုသည်။ “သူတို့ အချင်းချင်းကလည်း သဘောထားကွဲလွဲမှုတွေ တော်တော်များတယ်။အဲဒီမှာ ငွေရေးကြေးရေးတွေ မပြေလည်လို့ သူတို့အချင်းချင်းတောင်မှ အဲဒီမှာတချို့ဆို မခံချင်တဲ့ကောင်တွေရှိတာပေါ့။ အဲဒီမှာ စာရင်းရှင်းဖို့ လုပ်တော့ ဒီကောင်ကိုလိုက်ပြီးတော့ ပြဿနာရှာပြီး အစဖျောက်မယ် ကြံတာတွေရှိတော့ ထွက်ပြေးရတယ်လို့ သတင်းတွေလည်းကြားတယ်” ဟု ၎င်းကဆက်ပြောသည်။ ထီးချိုင့်မြို့တိုက်ပွဲကို PDF များက KIA အားကိုးဖြင့်တိုက်ခဲ့ခြင်းဖြစ်သော်လည်း စစ်မြေပြင်တွင် PDF အဖွဲ့ဝင် များစွာသေဆုံးခဲ့ရကြောင်း အထက်ပါ သတင်းရင်းမြစ်ကဆိုသည်။“သူတို့ကလည်း အဓိကဘာကို Cover ယူရလဲဆိုတော့ KIA တွေ TNLA တို့ ယူရတယ်။ သူတို့လည်း ပြန်ဆုတ်သွားပြီဆိုတော့ အဲဒီမှာ သူတို့တွေ ကတော့ ဘာမှမဖြစ်ဘူးပေါလေ။ အဲဒီလောက် ဇ မရှိဘူး။ မလုပ်ရဲဘူး ပေါ့လေ။ ပြီးတော့ ဗန်းမော်လေ။ ထီးချိုင့်ဘက်ကတက်သွားတာပေါ့။ ထီးချိုင့်တို့ သပိတ်ကျင်းတို့ဘက်က PDF တွေက အဲဒီဘက်မှာလည်း တော်တော်ကျတယ်။ အဲဒီမှာ ထီးချိုင့်မြို့ခံ PDF တွေရော လူငယ်တွေ တော်တော်သေတယ်လို့ပြောတယ်။ သူတို့မထိန်းနိုင်ဘူး” ဟု အထက်ပါ သတင်းရင်းမြစ်က ပြောသည်။

ကိုးကား-NP News

နိုင်ငံတစ်ဝန်းမြို့နယ် (၁၆) မြို့နယ်မှ PDF အဖွဲ့ဝင် (၃၀) ကျော် လက်နက်ခဲယမ်းများနှင့်အတူ ဥပဒေဘောင်အတွင်း ဝင်ရောက်လာခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

ပြစ်မှုကျူးလွန်ခြင်းမရှိသော PDF အဖွဲ့မှ ဥပဒေဘောင်အတွင်းသို့ ပြန်လည် ဝင်ရောက်လာသူများအား မိဘအုပ်ထိန်းသူများထံ ပြန်လည် လွှဲပြောင်းပေးအပ်ခြင်းကို ဧပြီလ ၂၅ ရက်တွင် အလယ်ပိုင်းတိုင်း စစ်ဌာနချုပ်၊ ရန်အောင်မြင်ခန်းမ၌ ပြုလုပ်ခဲ့ခြင်းဖြစ်ကြောင်း သိရသည်။

ဥပဒေဘောင်အတွင်း ပြန်လည်ဝင်ရောက်လာသည့် ပြစ်မှုကျူးလွန်ခြင်း မရှိသော PDF အဖွဲ့ဝင်များသည် မန္တလေး တိုင်းဒေသကြီး၊ အောင်မြေသာစံ မြို့နယ်၊ ပြည်ကြီးတံခွန်မြို့နယ်၊ အမရပူရမြို့နယ်၊ မဟာအောင်မြေ မြို့နယ်၊ ချမ်းအေးသာစံမြို့နယ်၊ စဉ့်ကူးမြို့နယ်၊ တံတားဦးမြို့နယ်၊ မိုးကုတ်မြို့နယ်၊ ရန်ကုန်တိုင်းဒေသကြီး၊ တောင်ဒဂုံမြို့နယ်၊ ကြည့်မြင်တိုင်မြို့နယ်၊ သင်္ဃန်းကျွန်းမြို့နယ်၊ စစ်ကိုင်းတိုင်းဒေသကြီး၊စစ်ကိုင်းမြို့၊ မုံရွာမြို့နယ်၊ ရှမ်းပြည်နယ်(မြောက်ပိုင်း)၊ မဘိမ်းမြို့နယ်၊ နောင်ချိုမြို့နယ်နှင့် ရှမ်းပြည်နယ် (တောင်ပိုင်း)၊ အောင်ပန်းမြို့နယ် တို့မှဖြစ်ပြီး အမျိုးသား(၃၀)ဦး နှင့် အမျိုးသမီး(၂)ဦး ဥပဒေဘောင်အတွင်း ဝင်ရောက်လာခဲ့ကြောင်း သိရသည်။

ထို့ပြင် ၎င်းတို့နှင့်အတူပါလာသည့် Type-81 အမျိုးအစား သေနတ် ၅ လက်၊ ၎င်းကျည်အိမ် ၁၃ ခု၊ ကျည် ၉၀၀ တောင့်နှင့် လက်ပစ်ဗုံး ၅ လုံးတို့ကို အပ်နှံခဲ့ကြသဖြင့် တာဝန်ရှိသူများက သေနတ် ၁ လက်လျှင် ဆုကြေး ငွေကျပ် သိန်း ၅၀ နှုန်းဖြင့် သေနတ် ၅ လက်အတွက် ဆုကြေးငွေကျပ် သိန်း ၂၅၀ ၊ လက်ပစ်ဗုံး ၅ လုံးအတွက် ကျပ် ၃ သိန်းနှင့် ဥပဒေဘောင် အတွင်း ပြန်လည်ဝင်ရောက်လာသူများအတွက် ကျပ်သိန်း ၁၄၀ တို့ကို ထောက်ပံ့ပေးအပ်ခဲ့ကြောင်းလည်း ထုတ်ပြန်ချက်အရ သိရသည်။

ထို့နောက် တာဝန်ရှိသူများက ဥပဒေဘောင်အတွင်း ပြန်လည်ဝင်ရောက်လာသူများအား ဝန်ခံကတိလက်မှတ်ရေးထိုးစေကာ ၎င်းတို့၏ မိဘအုပ်ထိန်းသူများထံသို့ လွှဲပြောင်းပေးအပ်ခဲ့ကြောင်း သိရသည်။

နိုင်ငံတော်စီမံအုပ်ချုပ်ရေးကောင်စီမှ ဥပဒေဘောင်အတွင်း ဝင်ရောက်လာသူများအား ပြန်လည်ကြိုဆိုလက်ခံ၍ လက်နက်/ ခဲယမ်းများပါရှိမှုအတွက်ဆုကြေးငွေများ ပေးအပ်လျက်ရှိခြင်းနှင့် လိုအပ်သည့် ကူညီပံ့ပိုးမှုများ ဆောင်ရွက်ပေးလျက်ရှိခြင်းတို့ကြောင့် ဥပဒေဘောင်အတွင်းသို့ ပြန်လည် ဝင်ရောက်ရန်ဆန္ဒရှိသူများ ကျန်ရှိနေသေးကြောင်းလည်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။ ထို့ကြောင့် ဥပဒေဘောင်အတွင်း ပြန်လည်ဝင်ရောက်လိုသူများအနေဖြင့် နီးစပ်ရာ ခရိုင်၊ မြို့နယ်စီမံအုပ်ချုပ်ရေးအဖွဲ့များ၊ တပ်စခန်းများနှင့် ရဲစခန်းများသို့ အမြန်ဆက်သွယ်သတင်းပေးပို့လာပါက ကြိုဆိုလက်ခံပေးသွားမည် ဖြစ်ကြောင်းလည်း သိရသည်။

ကိုးကား-NP News

တနင်္သာရီတိုင်းဒေသကြီး၊ ရေဖြူမြို့နယ်၊ တလိုင်းယာကျေးရွာအုပ်စု၊ ဒေါက်လောက်ကျေးရွာအနီး ထားဝယ်ရေနက်ဆိပ်ကမ်းသို့ သွားလာသည့် လမ်းပေါ်၌ ထားဝယ်မြစ်အား ဖြတ်သန်းဆောက်လုပ်ထားသည့် အရှည် ၅၀၀ ပေ၊ အနံ ၁၂ ပေရှိသံကူကွန်ကရစ် ဘေလီ တံတားအား ဧပြီ ၂၅ ရက်နေ့၊ နံနက် ၁၀ နာရီခန့်တွင် PDF အမည်ခံအကြမ်းဖက်သမားများက မီးရှို့ဖျက်ဆီးခဲ့မှုကြောင့် ၆ လက်မ ၃ လက်မရှိ သစ်သားဇလီဖားများနှင့်အပေါ်ပြင်ခင်းများ ပေ ၂၀၀ ခန့်မီးလောင်ပျက်စီးခဲ့ကြောင်းနှင့် မော်တော်ယာဉ်များ ဖြတ်သန်းသွားလာနိုင်မှုမရှိကြောင်း သိရှိရသည်။

အဆိုပါ ပျက်စီးခဲ့သည့်တံတားအား ရေဖြူမြို့နယ်လမ်းဦးစီးဌာနမှ အမြန်ဆုံး ပြန်လည်ပြုပြင်သွားမည်ဖြစ်ကြောင်းနှင့် အဆိုပါနေရာတစ်ဝိုက်အား လုံခြုံရေးတပ်ဖွဲ့ဝင်များက လိုအပ်သည့်လုံခြုံရေးလုပ်ငန်းများ ဆောင်ရွက်လျက်ရှိကြောင်း သတင်းရရှိသည်။

ကိုးကား-Myanmar National Post

၂၀၂၅ ခုနှစ်၊ ဧပြီလ ၂၁ ရက်တွင် မြေငလျင်ကြီးမားစွာလှုပ်ခတ်မည်ဟု Tiktok အကောင့်မှတစ်ဆင့် မဟုတ်မမှန်သတင်းအမှားဖြန့်ဝေနေကြောင်းသတင်းအရ ဧပြီလ ၂၂ ရက် ၁၀:၀၀ နာရီတွင် လုံခြုံရေးတပ်ဖွဲ့ဝင်များမှ မုံရွာမြို့၊ မြဝတီရပ်ကွက်၊ တိုးချဲ့ကွက်သစ်ရပ်၊ နယ်မြေ (၂၁)၊ ရွှေညောင်ပင်လမ်းရှိ နေအိမ်သို့သွားရောက်ရှာဖွေခဲ့ရာ တရားခံ John(Palmistry) အကောင့်ပိုင်ရှင် ဂျွန်မိုးသဲအား ဖမ်းဆီးရမိခဲ့ပါသည်။

ဖမ်းဆီးရမိတရားခံအား စိစစ်ဖော်ထုတ်ချက်အရ ၎င်းသည် ၂၀၂၁ ခုနှစ်၊ ဖေဖော်ဝါရီလ ၁ ရက်နောက်ပိုင်း မုံရွာမြို့ပေါ်၌ပြုလုပ်သည့် ဆန္ဒပြပွဲများတွင် ၂၀ ကြိမ်ခန့် လိုက်ပါဆောင်ရွက်ခဲ့သဖြင့် မုံရွာနယ်မြေရဲစခန်းမှ ရာဇသတ်ကြီးဥပဒေပုဒ်မ ၅၀၅-က ဖြင့် အမှုဖွင့်အရေးယူခဲ့သော်လည်း အသက်မပြည့်သူ ကလေးသူငယ်ဖြစ်သဖြင့် မိဘအုပ်ထိန်းမှုအောက်တွင် ကောင်းမွန်စွာနေထိုင်ရန် မုံရွာခရိုင်တရားရုံးမှ အမိန့်ချမှတ်ခြင်းခံခဲ့ရသူဖြစ်ကြောင်း သိရှိရပါသည်။

၎င်းအပြင် ၂၀၂၁ ခုနှစ်၊ မေလ ၂၈ ရက်တွင် ကော့ကရိတ်မြို့မှတစ်ဆင့် KNDO တပ်ရင်း(၆)သို့ သွားရောက်ခဲ့ပြီး အဆိုပါ KNDO တပ်ရင်း(၆)၌ဖွင့်လှစ်သည့် အကြမ်းဖက်သင်တန်းအား သင်တန်းသား ၇၅ ဦးနှင့်အတူ တက်ရောက်ခဲ့ကြောင်း၊ ၎င်းနောက် အကြမ်းဖက်အဖွဲ့အစည်းများအတွက် အွန်လိုင်းမှတစ်ဆင့် အလှူငွေများ ကောက်ခံထောက်ပံ့ပေးခဲ့ကြောင်း သိရှိရပါသည်။

ထို့နောက် ၂၀၂၁ ခုနှစ်၊ စက်တင်ဘာလ၊ တတိယပတ်ခန့်တွင် မုံရွာမြို့သို့ ပြန်လည်ရောက်ရှိနေထိုင်စဉ် အောက်တိုဘာလ ၃၀ ရက်တွင် လုံခြုံရေးတပ်ဖွဲ့ဝင်များ၏ ဖမ်းဆီးထိန်းသိမ်းခြင်းခံခဲ့ရကြောင်း၊ ၎င်းနောက် နိုဝင်ဘာလ ၁၄ ရက်တွင် မုံရွာမြို့၊ အမှတ်(၁)ရဲစခန်း၌ အကြမ်းဖက်မှုတိုက်ဖျက်ရေးဥပဒေ ပုဒ်မ-၅၀(ည)/၅၂(က)တို့ဖြင့် အမှုဖွင့်လှစ်ခဲ့ပြီး မုံရွာခရိုင်တရားရုံးမှ ၂၀၂၂ ခုနှစ်၊ အောက်တိုဘာလတွင် ထောင်ဒဏ် ၂ နှစ် ပြစ်ဒဏ်ချမှတ်ခဲ့သည့်အတွက် မန္တလေးမြို့ရှိ လူငယ်ထိန်းသိမ်းရေးသင်တန်းကျောင်း၌ ထိန်းသိမ်းစောင့်ရှောက်ခြင်းခံခဲ့ရကာ ၂၀၂၃ ခုနှစ်၊ ဇွန်လတွင် ပြန်လည်လွတ်မြောက်လာခဲ့ကြောင်း သိရှိရပါသည်။

ဂျွန်မိုးသဲအနေဖြင့် ထောင်မှလွတ်မြောက်ပြီးနောက် ဗေဒင်လက္ခဏာပညာအား အသုံးချ၍ ပြည်သူလူထု ထင်ယောင်ထင်မှားဖြစ်စေရန် ရည်ရွယ်ချက်ဖြင့် ၂၀၂၄ ခုနှစ်၊ ဖေဖော်ဝါရီလတွင် Johnmoe5.t အမည်ဖြင့် Tiktok အကောင့်ဖွင့်လှစ်ကာ အကြမ်းဖက်အဖွဲ့အစည်းများနှင့်ပတ်သက်သည့် Post များအားလည်းကောင်း၊ မြေငလျင်နှင့်ပတ်သက်သည့် Post များအားလည်းကောင်း၊ အများပြည်သူ အထိတ်တလန့်ဖြစ်စေရန်ရည်ရွယ်၍ မဟုတ်မမှန်ရေးသားဖော်ပြခဲ့ကြောင်း စိစစ်တွေ့ရှိရသဖြင့် ၎င်းအား ဥပဒေအရ ထိထိရောက်ရောက် အရေးယူသွားမည်ဖြစ်ပြီး နောင်အလားတူ မဟုတ်မမှန်သတင်းအမှားများ ရေးသားဖြန့်ဝေသူများကိုလည်း စိစစ်ဖော်ထုတ်၍ ထိထိရောက်ရောက် အရေးယူဆောင်ရွက်သွားမည်ဖြစ်ကြောင်း၊ မိဘပြည်သူများအနေဖြင့်လည်း သဘာဝဘေးအန္တရာယ်နှင့်ပတ်သက်၍ သတင်း အတုသတင်းအမှားများကို မသမာသူများမှ ဖြန့်ဝေရေးသားဖော်ပြလျက်ရှိသဖြင့် ယုံကြည်မှုမရှိရန်နှင့် သဘာဝဘေးအန္တရာယ်နှင့်ပတ်သက်သည့်သတင်းများအား သက်ဆိုင်ရာ မိုးလေဝသနှင့်ဇလဗေဒညွှန်ကြားမှုဦးစီးဌာနမှ အချိန်နှင့်တစ်ပြေးညီ တိကျစွာထုတ်ပြန်ပေးလျက်ရှိကြောင်း အသိပေးသတင်းထုတ်ပြန်အပ်ပါသည်။

Source: www.moi.gov.mm

အရှေ့မြောက်တိုင်းစစ်ဌာနချုပ်အလံများ လွှင့်ထူထားသည့် အစီးရေ ရာချီ ပါဝင်သော မြန်မာ့တပ်မတော်ယာဉ်တန်းများ ဧပြီ ၂၂ ရက် နံနက်ပိုင်း တွင် လားရှိုးမြို့သို့ ဝင်ရောက်လာကြောင်း သိရသည်။

လားရှိုးမြို့တွင် MNDAA တပ်ဖွဲ့များနှင့် နိုင်ငံတော်စီမံအုပ်ချုပ်ရေးကောင်စီ ၏ လုံခြုံရေးဆိုင်ရာ တာဝန်ရှိသူများအပြင် တရုတ်နိုင်ငံ ပစ်ခတ်ရပ်စဲမှု စောင့်ကြည့်ရေးကိုယ်စားလှယ်အဖွဲ့တို့ ယခင်ရက်များက တွေ့ဆုံ ဆွေးနွေး ခဲ့ပြီးနောက် ယခုကဲ့သို့ တပ်မတော်မှ လားရှိုးမြို့အတွင်းသို့ ပြန်လည် ဝင်ရောက်လာခြင်းဖြစ်သည်။

အဆိုပါ မြန်မာ့တပ်မတော်ယာဉ်တန်းများသည် လက်ရှိတွင် ပြည်ထောင်စု လမ်းမကြီးဘေး၌ ရပ်တန့်ထားသည်ဟုသိရပြီး သုံးပွင့်ဆိုင် ဆွေးနွေးပွဲ ပြုလုပ်သည့် လားရှိုးမြို့ ဆင်နှစ်ကောင်ဟိုတယ် အနီးတစ်ဝိုက်တွင် MNDAA တပ်ဖွဲ့ဝင်အချို့ ရှိနေဆဲဖြစ်ကြောင်း ဒေသခံအချို့က ပြောဆိုထားသည်။

MNDAA ထိန်းချုပ်ထားခဲ့သည့် အဆိုပါ လားရှိုးမြို့ကို နိုင်ငံတော်စီမံ အုပ်ချုပ်ရေးကောင်စီ၏ ဒေသဆိုင်ရာ အုပ်ချုပ်ရေးအဖွဲ့ထံသို့ ပြန်လည် လွှဲပြောင်းမည်ဟု ယခင်ရက်ပိုင်းက သတင်းများ ထွက်ပေါ်ခဲ့ပြီး ယခုလို အခြေအနေသို့ ရောက်ရှိလာခဲ့သော်လည်း လားရှိုးမြို့ အုပ်ချုပ်ရေးနှင့် ပတ်သက်၍ မည်ကဲ့သို့ စီမံဆောင်ရွက်သွားမည်ကို ယခုချိန်အထိ ဘက် အသီးသီးမှ တရားဝင်ထုတ်ပြန်ထားခြင်း မရှိသေးပေ။

MNDAA အဖွဲ့အနေဖြင့် ဧပြီ ၂၁ ရက်တွင် လားရှိုးမြို့အတွင်းရှိ ၎င်းတို့၏ အထူးဒေသ (၁) အလံများကို ဖြုတ်သိမ်းခဲ့ပြီး မြန်မာနိုင်ငံအလံများ လွှင့်ထူထားသည်ကို တွေ့ရှိရသည်ဟု ဒေသဆိုင်ရာသတင်းများအရ သိရသည်။

ကိုးကား-MHT

NUG၊ CRPH တို့၏ လက်ဝေခံ PDF အမည်ခံအကြမ်းဖက်သမားများသည် တိုင်းပြည်တည်ငြိမ်အေးချမ်းမှုနှင့် တရားဥပဒေစိုးမိုးမှုကို ပျက်ပြားစေရန် ရည်ရွယ် ချက်ဖြင့် ရုံးဌာနအဆောက်အဦများ၊ စာသင်ကျောင်းများ၊ အများပြည်သူ နေထိုင် လျက်ရှိသောနေအိမ်များ၊ လမ်း၊ တံတားများအား မီးရှို့ဖျက်ဆီးခြင်း၊ မိုင်းထောင် ဖောက်ခွဲခြင်းများ အလစ်အငိုက်လုပ်ဆောင်လျက်ရှိသည်။

တပ်မတော်အနေဖြင့် နိုင်ငံတော်တွင် ဖြစ်ပေါ်လျက်ရှိသည့် ငလျင် ဘေးဒဏ်ကြောင့် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်အဟုန်ဖြင့် ဆောင်ရွက်နိုင်စေရန် ယာယီပစ်ခတ်တိုက်ခိုက်မှုရပ်စဲရေး ကာလကို  ထုတ်ပြန်ထားပြီး ဖြစ်သော်လည်း KNLA အဖွဲ့မှ အကြမ်းဖက်မှုလိုလားသူများနှင့် အကြမ်းဖက်အဖွဲ့အစည်းများဖြစ်သည့် NUG၊ CRPH တို့၏ လက်ဝေခံ PDF အမည်ခံ အကြမ်းဖက်သမားများသည် ယနေ့နံနက် ၇ နာရီခန့်တွင် မွန်ပြည်နယ်၊ ဘီးလင်းမြို့၏ အနောက်မြောက်ဘက် မီတာ ၁၁၀၀၀ ခန့်အကွာရှိ မိုင်တိုင်အမှတ် (၁၀၇/၉) နှင့် မိုင်တိုင်အမှတ် (၁၀၇/၁၀) ကြား အရှည်ပေ ၄၀ ရှိ သံဘောင်အမျိုးအစား တံတား အမှတ်(၅၉)နေရာ မော်လမြိုင်- ရန်ကုန်သွား မီးရထားလမ်းအား ဒေသန္တရ လက်လုပ် မိုင်းများဖြင့် မိုင်းထောင်ဖောက်ခွဲခဲ့ရာ တံတားအောက်ခြေတိုင် ၂ ပေခွဲ ခန့် ကွဲအက် ပျက်စီးခဲ့ကြောင်းနှင့် အဆိုပါပျက်စီးမှုများကြောင့် မီးရထားများ ဖြတ်သန်းသွားလာမှုကို မထိခိုက်စေဘဲ ကောင်းမွန်စွာ ဖြတ်သန်းသွားလာနိုင်ကြောင်း သိရှိရသည်။

ငလျင်ဘေးဒဏ်ကြောင့် ကူညီကယ်ဆယ်ရေးနှင့် ပြန်လည်ထူထောင် ရေးလုပ်ငန်းများကို အရှိန်အဟုန်ဖြင့်ဆောင်ရွက်နေသည့်ကာလအတွင်းတွင် ယခုကဲ့သို့ စစ်ရေးနှင့်မသက်ဆိုင်သော နေရာများ၌ အကြမ်းဖက်လုပ်ဆောင်ခြင်းများသည် ပြည်သူများအား ပိုမိုအထိတ်တလန့်ဖြစ်ပြီး ကြောက်ရွံ့လာစေရန်၊ သွားလာမှုခက်ခဲ စေရန်နှင့် ကုန်စည်စီးဆင်းမှုကို ထိခိုက်ဆုံးရှုံးမှုဖြစ်စေပြီး တည်ငြိမ်မှုပျက်ပြားစေရန် ရည်ရွယ်လုပ်ဆောင်ခြင်းများ ဖြစ်ကြောင်း သတင်းရရှိသည်။

Source​: Myawady Webportal 

ငလျင်လှုပ်ခတ်ပြီးနောက် လူသားချင်းစာနာထောက်ထားမှုဆိုင်ရာလုပ်ငန်းများ အဆင်ပြေချောမွေ့စေရန်အတွက် အပစ်အခတ်ရပ်စဲရေးကို သက်တမ်းတိုးရန် အာဆီယံက မြန်မာနိုင်ငံအစိုးရကို တိုက်တွန်းထားပါသည်။ အထူးသဖြင့် မလေးရှားနိုင်ငံ အပါအဝင် အာဆီယံနိုင်ငံများသည် မြန်မာအစိုးရအား ငလျင်အပြီး ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများဆက်လက်လုပ်ဆောင်နိုင်ရန်အတွက် ကြေညာထားသည့်ကာလထက် ကျော်လွန်၍ အပစ် အခတ်ရပ်စဲရေးကို သက်တမ်းတိုးပေးရန် မျှော်လင့်ကြောင်း ဖော်ပြထားသည်။ မတ်လ ၂၈ ရက်နေ့က မြန်မာနိုင်ငံတွင် လှုပ်ခတ်ခဲ့သော ပြင်းအား ၇.၇ ရှိသည့် ငလျင်ကြီးအပြီး နိုင်ငံတော်စီမံအုပ်ချုပ်ရေးကောင်စီက ဧပြီလ ၂၂ ရက်အထိ သုံးပတ်ကြာ အပစ်အခတ်ရပ်စဲကြောင်း ကြေညာခဲ့ပါသည်။ မလေးရှားနိုင်ငံခြားရေးဝန်ကြီး ဒါတုတ် ဆရီ မိုဟာမဒ် ဟာဆန် (Datuk Seri Mohamad Hasan)က မလေးရှားနှင့် အာဆီယံ တို့သည် အဆိုပါအပစ်အခတ်ရပ်စဲရေး ကြေညာချက်ကို ကြိုဆိုကြောင်း ပြောကြားခဲ့ပါသည်။ မြန်မာပြည်သူများ၏ လုံခြုံရေးနှင့် သာယာဝပြောရေးအတွက် အဆိုပါငလျင်ကြောင့်ဖြစ်ပေါ်လာသော ပျက်စီးဆုံးရှုံးမှုပမာဏနှင့် ရေရှည်လူသားချင်းစာနာထောက်ထားမှု အကူအညီ များ လိုအပ်မှုတို့ကို ထည့်သွင်းစဉ်းစားကာ အပစ်အခတ်ရပ်စဲရေးကို သက်တမ်းတိုးမြှင့်ပေးရန် လိုအပ်ကြောင်း ၎င်းက ပြောကြားခဲ့ပါသည်။ “အဆိုပါကြေညာချက်ကိုမိမိတို့အလွန်ဝမ်းသာပါသည်။ အဘယ်ကြောင့်ဆိုသော် ဤအရေးပေါ် အခြေအနေတွင် မြန်မာနိုင်ငံသည် ကပ်ဘေးကြီးတစ်ခုနှင့်ရင်ဆိုင်နေရသည်။ ပဋိပက္ခများနှင့်ဆက်လက်မသွားသင့်ပါ။ အရေးကြီးဆုံးအရာက မြန်မာပြည်သူများကို မည်သို့ကယ်တင်နိုင်မလဲ၊ အကူအညီများ မည်သို့ ရရှိနိုင်မလဲ ဆိုသည် ပါပဲ” ဟု ၎င်းက ဧပြီ ၅ ရက်(စနေနေ့)တွင် လူသားချင်းစာနာထောက်ထားမှုဆိုင်ရာ အကူအညီများ ပေးအပ်ရန်မြန်မာနိုင်ငံသို့လာရောက်သည့် ခရီးစဉ်အပြီး သတင်းစာရှင်းလင်းပွဲတွင် ပြောကြားခဲ့ပါသည်။ အစောပိုင်းက မလေးရှားနိုင်ငံခြားရေးဝန်ကြီး မိုဟာမက်နှင့် ထိုင်းနိုင်ငံခြားရေးဝန်ကြီး Maris Sangiampongsa တို့သည် နိုင်ငံ၏ အလယ်ပိုင်းဒေသနှင့် အနီးတစ်ဝိုက်ဒေသများကို လှုပ်ခတ်ခဲ့သော ငလျင်ကြောင့် မြန်မာနိုင်ငံသို့ လူသားချင်းစာနာ ထောက်ထားမှုဆိုင်ရာ အကူအညီပေးရေးမစ်ရှင်ကို ပူးတွဲဦးဆောင်ခဲ့ပါသည်။ အာဆီယံနိုင်ငံခြားရေးဝန်ကြီးများ အစည်းအဝေး၏ သဘာပတိအဖြစ် မလေးရှားနိုင်ငံခြားရေးဝန်ကြီး မိုဟာမက်က လက်ရှိမြန်မာတွင်ရှိသော မလေးရှား နှင့် အခြားအာဆီယံနိုင်ငံများမှ ကယ်ဆယ်ရေးအဖွဲ့များသည် အကူအညီများပေးနိုင်ရန်အတွက် အပစ်အခတ်ရပ်စဲရေးကို သက်တမ်းတိုးပေးနိုင်လိမ့်မည်ဟု မျှော်လင့်ကြောင်း ထပ်လောင်းမှတ်ချက်ပြုပြောကြားခဲ့သည်။ “မိမိတို့အဖွဲ့များ၏ လုံခြုံရေးကို ခြိမ်းခြောက်နိုင်သည့်အရာများ တွေ့မြင်ရပါက အာဆီယံမိတ်ဖက်များကို မြန်မာနိုင်ငံတွင် ရှိနေခြင်းနှင့် ပတ်သက်ပြီး ပြန်လည်သုံးသပ်ရန် တောင်းဆိုရန် ဝန်မလေးပါ” ဟု ၎င်းကဆိုပါသည်။ ထို့အပြင် လူသားချင်းစာနာ ထောက်ထားမှုဆိုင်ရာ အပစ်အခတ်ရပ်စဲရေးသည် အာဆီယံ၏ ဘုံသဘောတူညီချက် ၅ ချက်နှင့်အညီ မြန်မာနိုင်ငံမှ သက်ဆိုင်သူအားလုံးကြား၌ပိုမိုကျယ်ပြန့်ပြီးဘက်စုံပါဝင်နိုင်သော ဆွေးနွေးမှုအတွက် ရှေ့ပြေးနိမိတ်အဖြစ် ဆောင်ရွက် နိုင်သည်ဟု ၎င်းက အဆိုပြုခဲ့သည်။ ခရီးစဉ်အတွင်း မလေးရှားနိုင်ငံခြားရေးဝန်ကြီး မိုဟာမက်နှင့် ထိုင်းနိုင်ငံခြားရေး ဝန်ကြီး မာရစ်တို့သည် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌဗိုလ်ချုပ်မှူးကြီးမင်းအောင်လှိုင်နှင့် နိုင်ငံခြားရေးဝန်ကြီး ဦးသန်းဆွေတို့နှင့် တွေ့ဆုံဆွေးနွေးခဲ့ပါသည်။ တစ်ချိန်တည်းမှာပင် နိုင်ငံခြားရေးဝန်ကြီးဌာနက ထုတ်ပြန်ချက် တစ်စောင်တွင် ဆွေးနွေးမှုအတွင်း မိုဟာမက်က အာဆီယံကိုယ်စား မြန်မာပြည်သူများအတွက် အာဆီယံ၏ ဝမ်းနည်း ကြောင်းနှင့် မယိမ်းမယိုင် သော ထောက်ခံအားပေးမှုကို ပေးပို့ခဲ့ကြောင်း ဖော်ပြထားသည်။ “ဘေးဒဏ်သင့်ရပ်ရွာများ ပြန်လည်ထူထောင်ရေး ကြိုးပမ်းမှုများအတွက် ချက်ချင်းလက်ငင်းထိရောက်သောအကူအညီများနှင့် ရေရှည်ပံ့ပိုး ကူညီမှုများ ဆက်လက်လုပ်ဆောင်ရန် အာဆီယံ၏စုပေါင်းကတိကဝတ်ကိုလည်း ထပ်မံအတည်ပြုခဲ့သည်” ဟု ထုတ်ပြန်ချက်တွင် ဖော်ပြထားသည်။ မလေးရှား၏ လူသားချင်းစာနာထောက်ထားမှုဆိုင်ရာ ပံ့ပိုးမှုတစ်ခုအဖြစ် မိုဟာမက်သည် နေပြည်တော်သို့ ရောက်ရှိပြီးနောက် လူသားချင်းစာနာထောက်ထားမှုအကူအညီ ၁၅ တန် ကို တရားဝင် လွှဲပြောင်းပေးအပ်ခဲ့သည်။ အဆိုပါအကူအညီကို မြန်မာအာဏာပိုင်များနှင့်ပူးပေါင်း၍ အာဆီယံ၏ ပံ့ပိုးကူညီမှုများကို ညှိနှိုင်းရန် တာဝန်ပေးအပ်ထားသည့် လူသားချင်းစာနာထောက်ထားမှုနှင့် ဘေးအန္တရာယ်စီမံခန့်ခွဲမှုဆိုင်ရာ အာဆီယံ ပူးပေါင်းညှိနှိုင်းရေးစင်တာ (AHA စင်တာ) သို့ လွှဲပြောင်းပေးအပ်ခဲ့သည်။ နောက်ထပ်အကူအညီများ သယ်ဆောင် လာမည့်လေယာဉ်သည် ဧပြီလ ၇ ရက်နေ့တွင် နေပြည်တော်သို့ ရောက်ရှိရန် စီစဉ်ထားပါသည်။ မြန်မာနိုင်ငံမှ မထွက်ခွာမီ မိုဟာမက်သည် နေပြည်တော်ရှိ AHA စင်တာကိုယ်စားလှယ်ထံမှ အခြေအနေအကျဉ်းကိုရယူခဲ့ပြီး လူသားချင်းစာနာထောက်ထားမှုလုပ်ငန်းများသည် ရှာဖွေကယ်ဆယ်ရေးအဆင့်မှ ပြန်လည်ထူထောင်ရေးအဆင့်သို့ ကူးပြောင်းသွားပြီဖြစ်ကြောင်း အတည်ပြုခဲ့ပါသည်။ အဆိုပါလူသားချင်းစာနာထောက်ထားမှုအဖွဲ့သည် အာဆီယံ ညီညွတ်မှုနှင့် ညှိနှိုင်းထားသော ဒေသတွင်းလုပ်ဆောင်ချက်များကို ထပ်မံအတည်ပြုခဲ့ပြီး စိန်ခေါ်မှုများနှင့် ရင်ဆိုင် ရသည့်အခါတွင်လည်း အာဆီယံ၏ခိုင်မာသောညီညွတ်မှုနှင့် လူသားချင်းစာနာထောက်ထားမှုအကျပ်အတည်းများကို မြန်ဆန်စွာတုံ့ပြန်နိုင်စွမ်းကို ပြသခဲ့ကြောင်း နိုင်ငံခြားရေးဝန်ကြီးဌာနက ဖော်ပြခဲ့သည်။ “အာဆီယံဥက္ကဋ္ဌအဖြစ်မလေးရှားသည် အခြားအာဆီယံအဖွဲ့ဝင်နိုင်ငံများ၊ AHA စင်တာနှင့် အပြည်ပြည်ဆိုင်ရာလူသားချင်းစာနာ ထောက်ထားမှုမိတ်ဖက်များနှင့် ပူးပေါင်းကာ အကူအညီများ အချိန်မီရောက်ရှိစေရန် ဆက်လက်ဆောင်ရွက်သွားမည်” ဟု ထုတ်ပြန်ချက်တွင် ဖော်ပြထားပါသည်။

ကိုးကား-The Sun