ပြန်ပေးဆွဲမှု၊ လုယက်မှုများ ဖြစ်ပေါ်ထားသည့် မန္တလေးမြို့တွင် ညဦးပိုင်းကစပြီး လူငယ်များ အပြင်မထွက်ကြရန် လူငယ်များအချင်းချင်း သတိပေးမှုများရှိလာနေကြောင်း သိရသည်။

“ကြားတယ်၊ အိမ်ကလည်း စိုးရိမ်နေတယ်။ မနေ့ကဆို သိပ္ပံလမ်းမကြီးပေါ်မှာတောင် ပြန်တဲ့လူ သိပ်မရှိတော့ဘူး၊ သတိထားသွားလာနေကြရတယ်”ဟု မန္တလေးမြို့ခံလူငယ်တစ်ဦးက ပေါ်ပြူလာနယူးကို ပြောသည်။

မန္တလေးမြို့ပေါ်၌ အခုရက်ပိုင်း လူပျောက်မှုများအပြင် ခိုးမှု၊ လုယက်မှု၊ ဓါးပြတိုက်မှုများလည်း ဆက်တိုက်ဖြစ်ပွားနေသည့်အတွက် မြို့ခံများသည်လည်း စိုးရိမ်ပူပန်နေကြကြောင်း အထက်ပါဒေသခံကပင် ဆိုသည်။

အဆိုပါ အဖြစ်အပျက်များကြောင့် အချို့သော ဆိုင်များ၊ အရောင်းဆိုင်များသည်လည်း (၆)နာရီခွဲမတိုင်ခင် ရုံးစောဆင်းပေးနေပြီး အိမ်ကိုသာစောစောပြန်ကြရန် တိုက်တွန်းမှုများလည်း ပြုလုပ်နေသည်ဟုလည်း သိရသည်။

လတ်တလောတွင် မန္တလေးမြို့ပေါ်ရှိ ရွှေစင်အကယ်ဒမီရွှေဆိုင်မှ ကျပ်သိန်း (၃၀,၀၀၀) ကျော်တန်ဖိုးရှိသည့် ရွှေထည်ပစ္စည်းများ ဓါးပြတိုက်ခံခဲ့ရမှုနှင့် ဆရာဝန်အချင်းချင်း ပြန်ပေးဆွဲကာ သတ်ဖြတ်မှု ဖြစ်စဉ်တို့ကြောင့် မန္တလေးမြို့၏ လုံခြုံရေးမှာ မေးခွန်းထုတ်စရာအခြေအနေဖြစ်နေပြီး မြို့ခံပြည်သူများ၏ စိုးရိမ်ထိတ်လန့်မှုရေချိန်မှာလည်း မြင့်သထက် မြင့်တက်လာနေသည်။

Source: Popular Journal

အကြမ်းဖက်နှိမ်နင်းရေးဆောင်ရွက်မှုမှတ်တမ်းများ ထုတ်ပြန်ချက်အရ ၂၀၂၄ ခုနှစ်၊ ဒီဇင်ဘာ ၁ ရက်မှ ၁၅ ရက်အတွင်း နယ်မြေရှင်းလင်းရေး၊ အကြမ်းဖက် နှိမ်နင်းရေးဆောင်ရွက်ရာ အကြမ်းဖက်သမား ၈၅၁ ဦး အသေဖမ်းဆီးရမိပြီး၊ ၂၃ ဦး အရှင်ဖမ်းဆီးရမိကြောင်း စစ်တမ်းအရ သိရသည်။

တိုင်းစစ်ဌာနချုပ်အလိုက် နှိမ်နင်းဆောင်ရွက်မှု စာရင်းတွင် ဒီဇင်ဘာ ပထမပတ်နှင့် ဒုတိယပတ်အတွင်း အနောက်ပိုင်းတိုင်း စစ်ဌာနချုပ်နယ်မြေတွင် အကြမ်းဖက် သမား ၅၉၀ ဦးအထိ နှိမ်နင်းဆောင်ရွက်ခဲ့ရပြီး မြောက်ပိုင်းတိုင်းစစ်ဌာနချုပ်နယ်မြေတွင် ၂၁၀ ဦးအထိ နှိမ်နင်းဆောင်ရွက်ခဲ့ရသည်။

မြောက်ပိုင်းတိုင်းစစ်ဌာနချုပ်နယ်မြေအတွင်း တိုက်ပွဲ ဖြစ်စဉ်များတွင် ဒီဇင်ဘာ ၄ ရက်နေ့ကစပြီး အကြမ်းဖက်သူပုန်များက ကချင်ပြည်နယ်၊ ဗန်းမော် မြို့နယ်အတွင်း တပ်စခန်းများအား လာရောက် တိုက်ခိုက်ရာတွင် KIA/PDF အကြမ်းဖက်သမား (သေဆုံးမှုအနေဖြင့် ၁၈၇ ဦး၊ ဒဏ်ရာရ ၂၂၈ ဦး)၊ မိုးမောက်မြို့နယ်တွင်း တိုက်ပွဲဖြစ်စဉ်များတွင် KIA/PDF အကြမ်းဖက်သမားများ (သေဆုံးမှုအနေဖြင့် ၈ ဦး ဒဏ်ရာရ ၂၄ ဦး)၊ မံစီမြို့နယ်အတွင်း တပ်စခန်းများအား လာရောက်တိုက်ခိုက်စဉ် KIA/PDF အကြမ်းဖက်သမား (သေဆုံး ၁ ဦး)၊ ဝိုင်းမော်မြို့နယ်အတွင်း တိုက်ပွဲဖြစ်စဉ် တွင်  KIA/PDF အကြမ်းဖက်သမား (သေဆုံးမှုအနေဖြင့် ၅ ဦး၊ ဒဏ်ရာရ ၂ ဦး) အထိရှိခဲ့ကြောင်း၊ ကချင် ပြည်နယ်တိုက်ပွဲများအတွင်း KIA/PDF အကြမ်းဖက်သမားများသေဆုံးမှု ၂၁၀ ဦးအထိရှိခဲ့၍ ဒဏ်ရာရ ၂၆၂ ဦးရှိခဲ့ကြောင်း တွေ့ရှိရပြီး ဗန်းမော်မြို့နယ်တွင်KIA/PDF အကြမ်းဖက်အဖွဲ့ ခေါင်းဆောင်ပိုင်းများအပါအဝင် အများအပြား သေဆုံး/ဒဏ်ရာရရှိခဲ့ကြောင်း တွေ့ရှိရသည်။

လက်ရှိအချိန်တွင် တပ်မတော်မှ ဗန်းမော်မြို့အား ဆက်လက်ထိန်းချုပ်ထားပြီး ဗန်းမော်မြို့နယ်အတွင်း ခိုအောင်းနေသော အကြမ်းဖက်သမားများကို လိုက်လံ ရှင်းလင်းလျက်ရှိကြောင်း သိရသည်။

၁၉-၁၂-၂၀၂၄ ရက်နေ့ ညပိုင်း ၉ နာရီ သတင်းအရ အမ်းမြို့တွင် နံနက် ၇ နာရီအချိန်ခန့်က တိုင်းရုံးအား သောင်းကျန်းသူများမှ လာရောက်တိုက်ခိုက်ခဲ့သောကြောင့်‌ နေ့လည် ၁၁ နာရီအချိန်အထိ နှစ်ဖက်တိုက်ပွဲ ၄ နာရီခန့် ဖြစ်ပွားခဲ့‌ကြောင်း၊ နံနက် ၈ နာရီအချိန်ခန့်က ဆင်ခုံတိုင် စခန်း၏ အနောက်ဘက် မီတာ ၃၀၀ ခန့် အကွာရှိကာကင်းစခန်းများအား သောင်းကျန်းသူများမှလာရောက်တိုက်ခိုက်ခဲ့သောကြောင့် နှစ်ဖက်တိုက်ပွဲကြိုကြားကြိုကြားဖြစ်ပွားခဲ့ပြီး ရန်သူအား ထိန်းချုပ်ဟန့်တားနိုင်ခဲ့ကြောင်း သိရသည်။

ထို့အတူ စစ်တွေမြို့တွင် ယနေ့ည ၈ နာရီခန့်က AA သောင်းကျန်းသူများမှ ခမောင်းတောကျေးရွာမှနေ၍ စစ်တွေမြို့ အရှေ့မြောက်ဘက်ရှိ ကာကင်းစခန်း တစ်ခုအား လက်နက်ကြီးများဖြင့် ပစ်ခတ်တိုက်ခိုက်ခဲ့သောကြောင့် ၎င်းတို့ပစ်ခတ်သည့်နေရာအား အမြောက်လက်နက်ကြီးများဖြင့်လည်းကောင်း၊ ရေတပ်သ‌င်္ဘောမှ လက်နက်ကြီးများဖြင့်လည်းကောင်း ပစ်ခတ်ချေမှုန်းခဲ့ကြောင်း သိရသည်။

ကိုးကား - Myanmar National Post

ဟားခါး-ထန်တလန်သွားကားလမ်းအနီး ဒီဇင်ဘာလ ၁၇ ရက် နံနက် ၇ နာရီခန့်က နယ်မြေရှင်းနေသော လုံခြုံရေးအဖွဲများသည် CDF အကြမ်းဖက်သမားများနှင့် ထိတွေ့မှုဖြစ်ပေါ်ခဲ့ပြီး CDF အကြမ်းဖက်သမား ၃ လောင်း၊ မောင်းပြန်သေနတ် ၂ လက်၊ ကျည် ၁၆၀ တောင့်၊ ကျည်အိမ် ၂ ခု၊ တစ်ယောက်ပစ်ကျင်း ၁၅ ကျင်း၊ ကျည်ကာ အင်္ကျီ ၁ ထည်တို့အား သိမ်းဆည်းရမိကြောင်း သိရသည်။

ကိုးကား-Myanmar National Post

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်  တပ်မတော်(လေ) ဖွဲစည်းတည်ထောင်မှု(၇၇)နှစ်မြောက် နှစ်ပတ်လည်နေ့ အခမ်းအနားနှင့် လေယာဉ်၊ ရဟတ်ယာဉ်များ တပ်တော်ဝင်အခမ်းအနားသို တက်ရောက်ချီးမြှင့်သည်။

ရခိုင်ပြည်နယ် မောင်တောမြို့ကို သိမ်းပိုက်ထားတဲ့ AA နဲ့ပတ်သက်တဲ့ သတင်းတွေအရ ကော့ဘဇာဒေသ တက္ကနဖ်ခရိုင်ခွဲအတွင်း နယ်စပ်လုံခြုံရေးကို ဘင်္ဂလားဒေ့ရှ်ရဲတပ်ဖွဲ့က တင်းကြပ်လိုက်တယ် လို့ “ဒါကာထရွိုင်ဗြွန်း”က ယမန်နေ့ (ဒီဇင်ဘာ ၉ ရက်)မှာ ရေးသားပါတယ်။

မြန်မာနဲ့ ဘင်္ဂလားဒေ့ရှ်အကြား နယ်ခြားမျဉ်းသဖွယ်ဖြစ်နေတဲ့ နတ်မြစ်ကို နှစ်နိုင်ငံမျှဝေပိုင်ဆိုင်ပါတယ်။ မြန်မာနိုင်ငံ မောင်တောမြို့ဟာ ဘင်္ဂလားဒေ့ရှ် ကော့ဘဇားဒေသ တက္ကနပ်ခရိုင်ခွဲ “ဂျာလီယာပါရာ” နယ်မြေရဲ့ အရှေ့တောင်ဘက်မှာ တည်ရှိနေပါတယ်။ ဘင်္ဂလားဒေ့ရှ် ငါးဖမ်းသမားတွေအနေနဲ့ နတ်မြစ်အတွင်း မြန်မာဘက်ခြမ်းရေပြင်ကို ရှောင်ရှားကြရန် မြန်မာနိုင်ငံအနောက်တံခါးမြောက်ပိုင်းဒေသကို သိမ်းယူပြီးနောက် AA တို့က သတိပေးထားကြောင်း သိရှိရပါတယ်။ အခြေအနေကို တုံ့ပြန်တဲ့အနေနဲ့ ဘင်္ဂလားဒေ့ရှ် ကမ်းခြေစောင့်တပ်နဲ့နယ်ခြားစောင့်တပ် (BGB) တို့က နယ်စပ်ဒေသ ကုန်းမြေနဲ့ရေလမ်းကြောင်းတစ်လျှောက် ကင်းလှည့်မှုတွေကို အရှိန်မြှင့် လုပ်ဆောင်ခဲ့တယ်လို့ ဆိုပါတယ်။

ဘင်္ဂလားဒေ့ရှ် ငါးဖမ်းသမားတွေအပါအဝင် အခြားလှေသင်္ဘောတွေအနေနဲ့ အဲဒီဧရိယာနဲ့ ဝေးဝေးမှာနေဖို့ သတိပေးကြေညာချက်တွေကို ထုတ်ပြန်ထားတယ်လို့ တက္ကနဖ်ခရိုင်ခွဲ အုပ်ချုပ်ရေး UNO အရာရှိက ပြောပါတယ်။ တက္ကနဖ်အနီးမှာ မြန်မာ့တပ်မတော်နဲ့ AA တို့အကြား လပေါင်းအတန်ကြာ တိုက်ပွဲများဖြစ်ပွားနေခဲ့ပြီး ယခုအခါ ဘင်္ဂလားဒေ့ရှ်နဲ့ နယ်နိမိတ်ချင်းထိစပ်နေတဲ့ မြန်မာဘက်ခြမ်းနယ်မြေများကို AA တို့က အပြည့်အဝ ထိန်းချုပ်နိုင်နေပြီဖြစ်ကြောင်း၊ အဲဒါကြောင့် ဒေသခံငါးဖမ်းငါးဖမ်းသမားတွေကို သတိပေးဖို့ တနင်္ဂနွေနေ့မှာ နှိုးဆော်ချက်ထုတ်ပြန်ထားရခြင်းဖြစ်ကြောင်း၊ နှစ်နိုင်ငံနယ်ခြားဖြစ်တဲ့ နတ်မြစ်ဟာ အလွန်အမင်း မငြိမ်မသက် ဖြစ်လာကြောင်း၊ ဥပဒေမဲ့ နယ်စပ်ဖြတ်ကျော် ကျူးကျော်ဝင်ရောက်မှုများကို တားဆီးရန်အတွက် BGB နဲ့ ကမ်းခြေစောင့်တပ်တို့က ကင်းလှည့်မှုများ တိုးမြှင့်ထားတယ်လို့ ရှင်းပြပါတယ်။

မကြာသေးမီရက်တွေအတွင်း မောင်တောဘက်ခြမ်းမှာ တိုက်ပွဲတွေပြင်းထန်လာကြောင်း သတင်းတွေနဲ့အတူ ပြင်းထန်တဲ့ ပစ်ခတ်ပေါက်ကွဲသံတွေကြောင့် နတ်မြစ်နယ်စပ်ဒေသအနီး ဘင်္ဂလားဒေ့ရှ်နယ်မြေခံတွေမှာ ထိတ်လန့်တုန်လှုပ်လျက်ရှိကြောင်း၊ မောင်တောဒေသ နယ်မြေအများစုကို နစကအစိုးရက ယခင် ထိန်းချုပ်ထားခဲ့ပေမယ့် ယခုအခါ AA က အဆိုပါနေရာတွေကို သိမ်းပိုက်လိုက်ပြီဖြစ်ကြောင်း၊ နတ်မြစ်အတွင်း လှေသင်္ဘောများသွားလာမှုအပေါ် AA က ကန့်သတ်ချက်ထုတ်ပြန်ထားကြောင်း၊ ရခိုင်မြောက်ပိုင်းနေ ဘင်္ဂါလီများ စိမ့်ဝင်လာမှုကို တားဆီးရန်နဲ့ လုံခြုံရေးထိန်းသိမ်းဖို့အတွက် နတ်မြစ်နဲ့ကုန်းမြေဧရိယာများမှာ တပ်လှန့်ထားကြောင်း စစ်တကောင်း ဘင်္ဂလားဒေ့ရှ် ကမ်းခြေစောင့်တပ် သတင်းမီဒီယာအရာရှိ ဒုတိယတပ်ရင်းမှူးက အတည်ပြုပါတယ်။

ဘင်္ဂလားဒေ့ရှ်ဘက်ခြမ်းရေပြင်ပိုင်နက်အတွင်း ဘယ်သူ့ကိုမှ ဝင်ရောက်ခွင့်မပြုကြောင်း၊ ဂျလီယာကျွန်းမှ စိန့်မာတင်ကျွန်းအထိ ကင်းလှည့်မှုတွေကို လုပ်ဆောင်နေပြီး ငါးဖမ်းသမားတွေကလည်း နယ်စပ်ကို ဖြတ်မကူးဖို့ ညွှန်ကြားထားတယ်လို့လည်း ဆိုပါတယ်။ ယခုအခါ မောင်တောဒေသဟာ AA ရဲ့ ထိန်းချုပ်မှုအောက် ရောက်ရှိနေကြောင်း၊ နယ်စပ်ဖြတ်ကျော်ခြင်းမပြုဖို့ ဘင်္ဂလားဒေ့ရှ်အစိုးရကတင်းတင်းကြပ်ကြပ် အမိန့်ထုတ်ပြန်ထားကြောင်း တက္ကနဖ်နယ်စပ်အနီးနေထိုင်သူတစ်ဦးက ပြောပါတယ်။ မောင်တောကို AA က သိမ်းပိုက်လိုက်တယ်လို့ မီဒီယာမျိုးစုံကနေတဆင့် သတင်းကြားသိရကြောင်း၊ အခြေအနေအရပ်ရပ်အတွက် အင်မတန်စိုးရိမ်မိတယ်လို့ အာရကန် ရိုဟင်ဂျာဆိုသူများ ငြိမ်းချမ်းရေးနဲ့ လူသားချင်းစာနာမှုဆိုင်ရာ အစည်းအရုံးဥက္ကဋ္ဌက ရှင်းပြပါတယ်။

Source- NP News

UWSA ထိန်းချုပ်နယ်မြေဖြစ်သည့် “ဝ” ဒေသ (၁၇၁) စစ်ဒေသအတွင်းသို့ ကျိုင်းတုံအခြေစိုက် တြိဂံဒေသစစ်ဌာနချုပ် တိုင်းမှူး လာရောက်ခဲ့ကြောင်း WUSA ပြင်ပဆက်ဆံရေးတာဝန်ခံ ဦးညီရမ်းက ဒေသအခြေစိုက်မီဒီယာတစ်ခုကို ဖြေကြားထားသည်။

“တိုင်းမှူးလာတာမှန်ပါတယ်။ နယ်မြေတပ်တွေသွားရောက်စစ်ဆေးတာဖြစ်မှာပါ။ ကျွန်တော်တို့နဲ့တွေ့ဆုံဖို့မရှိပါ။ ထိုင်းနဲ့လည်းတွေ့ဆုံဖို့မရှိပါ။ ထိုင်းနယ်စပ်ကိစ္စရပ် လောလောဆယ်ငြိမ်သွားပါပြီ။ ကျွန်တော်တို့ဖက်ကတော့ အားလုံးပုံမှန်ပါပဲ”ဟု ဖြေကြားထားသည်။

ကျိုင်းတုံအခြေစိုက် တိုင်းစစ်ဌာနချုပ်၊ တိုင်းမှူးသည် ယမန်နေ့ ဒီဇင်ဘာ (၁၀) ရက်က လာရောက်ခဲ့ခြင်းဖြစ်ပြီး ယနေ့တွင် မုံးတော့၊ မုံးထားဘင်သို့ ခရီးဆက်လက်ထွက်ခွာသွားကာ ထိုင်းနိုင်ငံနှင့် ဖြစ်ပွားနေသည့် နယ်စပ်အရေးကို ဆွေးနွေးဖြေရှင်းရန်ရှိကြောင်းသိရသည်။

ပြီးခဲ့သည့် နိုဝင်ဘာ (၂၅)ရက်က ထိုင်းစစ်တပ်နှင့် UWSA တို့အကြား ဖြစ်ပွားခဲ့သည့် နယ်မြေအငြင်းပွားမှုအတွင်း UWSA တပ်စခန်းများကို ယခု ဒီဇင်ဘာ (၁၈)ရက်နေ့ နောက်ဆုံးထားပြီး ဖယ်ပေးရန် ထိုင်းစစ်တပ်ဘက်က အသိပေးထားသော်လည်း၊ ယင်းဖြစ်စဉ်အတွက် နိုင်ငံတော်အချင်းချင်း ဆွေးနွေးရမည့်ကိစ္စရပ်သာဖြစ်ပြီး နိုင်ငံတော် ခေါင်းဆောင်ပိုင်းများကို သတင်းပေးပို့ထားပြီဖြစ်ကြောင်း သိရသည်။

Source- Popular Journal

သန့်ဇင် (NP News) - နိုဝင်ဘာ ၁၆ 

မြန်မာပြည်အလယ်ပိုင်းဒေသများဖြစ်သည့် စစ်ကိုင်းတိုင်း၊ မန္တလေးတိုင်းနှင့် မကွေးတိုင်းတို့တွင် နယ်မြေခံ PDF လက်နက်ကိုင်အဖွဲ့များစွာရှိနေပြီး အုပ်ချုပ်ရေးမှူးများ အကြမ်းဖက်သတ်ဖြတ်ခံရမှု ယခင်ထက်တိုးလာကြောင်း NP News က ရရှိထားသည့် သတင်းအချက်အလက်များအရ သိရသည်။
အဆိုပါဒေသများတွင် အကြမ်းဖက်သတ်ဖြတ်မှုများကို နယ်မြေခံလက်နက်ကိုင် (PDF) အဖွဲ့များက အများဆုံး ကျူးလွန်နေခြင်းဖြစ်ပြီး အထက်ပါနေရာဒေသများတွင် ၎င်းလက်နက်ကိုင်အဖွဲ့များက အာဏာရှိကြောင်း ပြသရန်အတွက် သတ်ဖြတ်နေခြင်းများဖြစ်ကြောင်း သေနင်္ဂဗျူဟာလေ့လာရေးအဖွဲ့မှ အမှုဆောင်ဒါရိုက်တာ ဦးသိန်းထွန်းဦးက ဆိုသည်။
“တရားဝင်အစိုးရသည် အရေးမပါဘူး။ သူတို့သာ အရေးပါသူဆိုတာ ပြရအောင်လုပ်ကြတာ။ သူတို့က တော်လှန်ရေးလို့ အော်နေကြပြီး တော်လှန်ရေးဆိုပေမယ့် အကြမ်းဖက်ကို အရမ်းနွယ်တယ်။ ဒီအတိုင်းဆက်သွားနေရင် အကြမ်းဖက်ပုံစံပဲ ဆက်တိုက်ရောက်သွားလိမ့်မယ်။ အခုလည်း ဒီအတိုင်းပါပဲ။ အခုက ခေတ်ကာလတစ်ခုလည်းကြာသွားပြီ။ သူတို့အရင်ကပြောထားတဲ့ ကြီးကြီးကျယ်ကျယ်ရည်ရွယ်ချက်တွေက ပေါက်မြောက်အောင် မြင်လာတာမရှိဘူး။ ဒီနေရာမှာ ဆက်လက်အာဏာတည်မြဲနေကြောင်း ပြဖို့အတွက်ကတော့ ရပ်ကျေးအုပ်ချုပ်ရေးမှူးတို့ အပြစ်မဲ့ပြည်သူတို့ သူတို့က ပစ်မှတ်တွေဖြစ်ကုန်တာ” ဟု ၎င်းက ဆိုသည်။
ထို့ပြင် နိုဝင်ဘာလ ၁ ရက်မှ လက်ရှိအချိန်ထိ မကွေးတိုင်းဒေသကြီးတွင် PDF လက်နက်ကိုင်အဖွဲ့များ၏ လုပ်ကြံသတ်ဖြတ်မှုကြောင့် ရပ်ကျေးအုပ်ချုပ်ရေးမှူးနှင့် ဒေသခံပြည်သူ (၆)ဦးထက်မနည်း သေဆုံးခဲ့ရကြောင်း မြန်မာနိုင်ငံရဲတပ်ဖွဲ့၏ သတင်းထုတ်ပြန်ချက်များအရ သိရသည်။
မန္တလေးတိုင်းဒေသကြီးတွင်လည်း ၁၀ရက်ကျော်ကာလအတွင်း ရပ်ကွက်အုပ်ချုပ်ရေးမှူးနှင့် အပြစ်မဲ့ပြည်သူ (၃)ဦး ထက်မနည်း သတ်ဖြတ်ခံခဲ့ရကာ ထိခိုက်ဒဏ်ရာရရှိသူများလည်းရှိခဲ့ကြောင်း သိရသည်။
အလားတူ ပြီးခဲ့သည့် နိုဝင်ဘာ ၁၂ ရက်ကလည်း မန္တလေးတိုင်းဒေသကြီး၊ ညောင်ဦးနှင့် ကျောက်ပန်းတောင်းမြို နယ်တို့မှ ရပ်ကျေးအုပ်ချုပ်ရေးမှူး(၂)ဦးအား PDF အဖွဲ့(၄)ဖွဲ့က ပူးပေါင်းသတ်ဖြတ်ခဲ့ကြောင်းကို ၎င်းတို့၏ လူမှုကွန်ယက်စာမျက်နှာများထက်တွင် ဝန်ခံချက်ထုတ်ပြန်ထားခဲ့ဖူးသည်။
ထိုသို့ ရပ်ကွက်အုပ်ချုပ်ရေးမှူးများအား PDF လက်နက်ကိုင်အဖွဲ့များက ပစ်မှတ်ထား သတ်ဖြတ်နေခြင်းသည် နစကအစိုးရ၏ အမှူထမ်းများအပေါ် ရန်သူဟု သတ်မှတ်ကာ အကြမ်းဖြတ်မှုများလုပ်ဆောင်နေခြင်းဖြစ်ကြောင်း ပြည်သူ့ပါတီမှ ရန်ကုန်တိုင်းဒေသကြီးဥက္ကဋ္ဌ ဦးလှဌေး က ဆိုသည်။
“ဒီလူတွေသတ်ဖြတ်ခံနေရတာကို ကျွန်တော်တို့ဘေးအမြင်နဲ့ပြောရမယ်ဆိုရင် လုံခြုံရေးတာဝန်ယူပေးမှု အားနည်းလို့။ လုံခြုံရေးအား နည်းတဲ့အပေါ်မှာ ဖြစ်ပေါ်လာတဲ့ အနေအထားလို့ပဲ ကျွန်တော်တို့က သုံးသပ်ရမှာပဲလေ။ နယ်မြေအမျိုးမျိုးရှိတာပေါ့လေ။ နယ်မြေအမျိုးမျိုးမှာကလည်း လက်လှမ်းမမှီတော့တဲ့လုံခြုံရေးကို ပြည့်ပြည့်ဝဝ မပေးနိုင်တော့တဲ့နယ်မြေတွေလည်း ရှိနေတာဖြစ်တယ်။ အဲဒီနယ်မြေတွေမှာရှိနေတဲ့အစိုးရနဲ့ တာဝန်ယူဆောင်ရွက်နေတဲ့လူတွေကလည်း ကိုယ့်ကိုကိုယ်လည်း ဂရုစိုက်ဖို့လိုတာပေါ့နော်။‌ နေတာထိုင်တာ။ သွားတာလာတာကစ။ မိမိနေထိုင်နေတဲ့ဘဝဟာ လုံခြုံသလားမလုံခြုံသလားဆိုတာကို တွေးရမှာပေါ့။ မလုံခြုံရင်လည်း လုံခြုံအောင် ဘယ်လိုနေရမလဲဆိုတဲ့အနေအထားမျိုးကို သူတို့ကိုယ်တိုင်ကလည်း တွေးဖို့လိုအပ်တယ်” ဟု ၎င်းက ဆိုသည်။
၂၀၂၁ ခုနှစ်၊ ဖေဖော်ဝါရီလမှ စတင်ကာ လက်ရှိအချိန်ထိ နိုင်ငံတစ်ဝန်း၌ အုပ်ချုပ်ရေးမှူးများ အကြမ်းဖက် သတ်ဖြတ်ခံရသူ (၈၀၀)ကျော်ထိ ရှိခဲ့ကြောင်း နစက၏ သတင်းထုတ်ပြန်ချက်များအရ သိရသည်။

Source- NP News

၁၄. ၁၁. ၂၀၂၄
Written by Nay Moe

မိုးကုတ်မြို့ ဗုံးအကြဲခံရပြီးနောက်မှာ ထပ်အကြဲမခံရဖို့အတွက် Starlink အင်တာနက်လိုင်းတွေနဲ့ CDMA ဖုန်းလိုင်းတွေ ပိတ်ပေးဖို့ TNLA ရဲ့ မိုးကုတ်ထွေအုပ်ရုံးက ညွှန်ကြားချက်ထုတ်ပြန်ထားတယ်လို့ သိရပါတယ်။

ဖြစ်စဥ်က နိုဝင်ဘာ ၁၁ ရက်မှာ မိုးကုတ်မြို့နယ်၊ လယ်ဦးအုပ်စု၊ အထက်လယ်ဦးရပ်နဲ့ ကသဲအုပ်စု၊ လူးထရပ်တို့က TNLA ရဲ့ ကျောက်အရောင်းအဝယ်ပြုရာနေရာတွေကို လေကြောင်းတိုက်ခိုက်မှုလုပ်ဆောင်ခဲ့တာကြောင့် လူ ၆ ဦးသေဆုံးပြီး ကလေးငယ်တစ်ဦးနဲ့ လူများစွာထိခိုက်ခဲ့ရတဲ့အပြင် အဆောက်အအုံ ၆၅ လုံး ပျက်စီးခဲ့တယ်လို့ သိရပါတယ်။

ဒီဖြစ်စဥ်မှာ TNLA ရဲ့ အတည်ပြုထုတ်ပြန်ချက်က လူ ၉ ဦးသေပြီး ၁၃ ဦး ဒဏ်ရာရခဲ့တာလို့ ထုတ်ပြန်ခဲ့ပေမဲ့ မိုးကုတ်ထွေအုပ်မှာတော့ TNLA လက်နက်ကိုင်ဘက်က သေဆုံးသူ ၃ ဦးကို မဖော်ပြတော့တာ တွေ့ရပါတယ်။ ဒီလိုမျိုး တိုက်ခိုက်မှုတွေ ဆက်မဖြစ်ဖို့အတွက် TNLA ထွေအုပ်က တာဝန်ရှိသူတွေအနေနဲ့ မိမိအုပ်စုနယ်မြေအတွင်းက အင်တာနက်ဆက်သွယ်ရေး Star Link ဝန်ဆောင်မှုလုပ်ငန်းတွေ CDMA ဖုန်း ဝန်ဆောင်မှုလုပ်ငန်းတွေ ပိတ်ပင်ပေးဖို့၊ မသင်္ကာရန်သူသတင်းပေးတွေ့ရှိရင် အမြန်ဆုံး တိုင်ကြားပေးဖို့နဲ့ TNLA ညွှန်ကြားချက်မလိုက်နာတဲ့ မိုးကုတ်ပြည်သူတွေကို အရေးယူပြီး သက်ဆိုင်ရာကို သတင်းပို့တိုင်ကြားဖို့ ညွှန်ကြားခဲ့သလို မိုးကုတ်မြို့အတွင်းက Star Link ဝန်ဆောင်မှုလုပ်ငန်းပေးသူစာရင်းတွေကိုပါ ပူးတွဲပေးပို့ ပိတ်သိမ်းစေခဲ့တယ်လို့ သိရပါတယ်။

Source- MT News

၁၄. ၁၁. ၂၀၂၄
Written by Nay Moe

ရခိုင်ပြည်နယ်မှာ မြို့သိမ်းတိုက်ပွဲဆင်နွှဲတဲ့ တစ်နှစ်တာကာလအတွင်း ချင်းနဲ့ ရခိုင်က မြို့ ၁၁ မြို့နဲ့ အဲဒီမြို့တွေက တပ်စခန်းတွေ သိမ်းယူခဲ့တဲ့အပြင် နပခ တပ်စခန်း ၈ ခုကိုပါ သိမ်းယူနိုင်ခဲ့တယ်လို့ ရခိုင်လက်နက်ကိုင် AA ရဲ့ ဒီနေ့ထုတ်ပြန်တဲ့ စစ်ရေးလှုပ်ရှားမှု တစ်နှစ်ပြည့်ထုတ်ပြန်ချက်မှာ ဖော်ပြထားပါတယ်။

AA ဟာ ၂၀၂၄ ခုနှစ်၊ ဇန်နဝါရီ (၁၄) ရက်နေ့မှာ ပလက်ဝ၊ ဇန်နဝါရီ (၁၉) ရက်နေ့မှာ ပေါက်တော၊ ဖေဖော်ဝါရီ (၁၃) ရက်နေ့မှာ ကျောက်တော်၊ ဖေဖော်ဝါရီ (၁၅) ရက်နေ့မှာ မြေပုံ၊ ဖေဖော်ဝါရီ (၈) ရက်နေ့မှာ မြောက်ဦး၊ ဖေဖော်ဝါရီ (၂၆) ရက်နေ့မှာ မင်းပြား၊ မတ်လ (၄) ရက်နေ့မှာ ပုဏ္ဏားကျွန်း၊ မတ်လ (၁၁) ရက်နေ့မှာ ရမ်းဗြဲ၊ မတ်လ (၁၇) ရက်နေ့မှာ ရသေ့တောင်၊ မေလ (၁၈) ရက်နေ့မှာ ဘူးသီးတောင်နဲ့ စက်တင်ဘာလ (၅) ရက်နေ့မှာ သံတွဲမြို့ကို သိမ်းယူခဲ့တယ် ပြောပါတယ်။

ဒါ့အပြင် အမ်းမြို့နယ်က အနောက်ပိုင်းတိုင်းစစ်ဌာနချုပ်ရှိ ခမရ (၃၇၃)-အမှတ် (၃၇၃) ခြေမြန်တပ်ရင်း၊ အမတ (၃၇၄)-အမှတ် (၃၇၄) အမြောက်တပ်ရင်း၊ လလစ (၇၅၇)-အမှတ် (၇၅၇) လျှပ်စစ်အလုပ်ရုံတပ်ခွဲ၊ စနခ (၃၄၅)-အမှတ် (၃၄၅) စစ်လက်နက်ပစ္စည်းတပ်ခွဲ၊ တစသ (၈)- အမှတ် (၈) တိုက်ပွဲဝင်စည်းရုံးရေးသင်တန်းကျောင်း၊ တဆရ(၂/၃၀၀)-အမှတ်-၂ /ကုတင် ၃၀၀ တပ်မတော်စစ်ဆေးရုံ၊ လကရ-လေကြောင်းရန်ကာကွယ်ရေးတပ်၊ စရဖ-စစ်ဖက်ရေးရာလုံခြုံရေးတပ်တို့ သိမ်းယူထားပြီးပြီလို့လည်း ပြောပါတယ်။

လက်ရှိမှာလည်း နပခ-အနောက်ပိုင်းတိုင်း စစ်ဌာနချုပ်၊ ဆလအခွဲ (၉၄၆) – အမှတ် (၉၄၆) ဆောက်လုပ်ရေးအင်ဂျင်နီယာတပ်ခွဲ၊ ခမရ (၃၇၁) -အမှတ် (၃၇၁) ခြေမြန်တပ်ရင်း၊ ခမရ (၃၇၂) – အမှတ် (၃၇၂) ခြေမြန်တပ်ရင်း၊ လလစ (၇၅၇/၂) – အမှတ် (၇၅၇/၂) လျှပ်စစ်အလုပ်ရုံတပ်ခွဲ၊ ထပခ (၉၂၆) – အမှတ် (၉၂၆) ထောက်ပံ့နှင့်ပို့ဆောင်ရေးတပ်ခွဲ၊ ဆသလ (၉) – အမှတ် (၉) ဆက်သွယ်ရေးလုံခြုံမှုတပ်ရင်း၊ အဆရ (၈) – အမှတ် (၈) အဆင့်မြင့်ဆက်သွယ်ရေးတပ်ရင်း၊ တထခ (၁၀) – အမှတ် (၁၀) တပ်ထိန်းတပ်ခွဲ၊ စအရ (၉၁၉) – အမှတ် (၉၁၉) စစ်မြေပြင်အင်ဂျင်နီယာတပ်ရင်းတွေကို ထိုးစစ်ဆင်တိုက်ခိုက်နေတယ်လို့ ထုတ်ပြန်မှုမှာ ဖော်ပြထားပါတယ်။

Source- MT News

၁၄.၁၁. ၂၀၂၄
Translated by Htwe Ko Tun

မြန်မာနိုင်ငံအတွင်း ဖြစ်ပွားနေတဲ့ ပဋိပက္ခတွေက သာမန်ဆိုရရင်တော့ အစိုးရနဲ့ အစိုးရကိုဆန့်ကျင်နေတဲ့ လက်နက်ကိုင်ပဋိပက္ခတွေပဲလို့ အပေါ်ယံအားဖြင့်တော့ ထင်မြင်ယူဆနိုင်ပါတယ်။ ဒါပေမယ့် ဒီပဋိပက္ခ ကြာရှည်လာတာမှာ မြန်မာနိုင်ငံအတွင်း ပြည်ပကနေ ခိုးဝင်လာကြပြီး ပြည်တွင်းစစ်ပွဲမှာ အစိုးရဆန့်ကျင်ရေးအင်အားစုတွေဘက်က ပါဝင်နေတဲ့ နိုင်ငံခြားသားတွေရှိလာနေတာကို The Telegraph သတင်းစာကြီးမှာ နိုဝင်ဘာလ ၁၃ ရက်က ဖော်ပြခဲ့တဲ့ သတင်းဆောင်းပါးတစ်ပုဒ်အရ ထင်ထင်ရှားရှားတွေ့ရနိုင်တယ်လို့လည်း ဆိုရမှာပါ။

ဒီမှာ အာဇတ်(Azud) ဆိုတဲ့ အမေရိကတောင်ပိုင်း ကျေးလက်တောရွာပိုင်းကနေ မြန်မာနိုင်ငံမြောက်ပိုင်း တောတောင်ထူထပ်တဲ့နေရာက သူပုန်တွေရဲ့ စခန်းကို ရောက်ရှိလာသူတစ်ဦးဆိုရင် အသက် ၂၄ နှစ်သာ ရှိသေးပြီး ဒီမိုကရေစီနိုင်ငံကြီးပါဆိုတဲ့ အမေရိကန်နိုင်ငံသားတစ်ဦးပါ။ ဒါပေမယ့် ဒီမိုကရေစီနိုင်ံငံသားဆိုသူက အခုတော့ တခြားနိုင်ငံပြည်တွင်းရေးမှာ သူပုန်တွေဘက်ကနေ လက်နက်ကိုင်တိုက်ပေးနေတာ တွေ့ရပြန်ပါတယ်။

အာဇတ်ဟာ လွန်ခဲ့တဲ့ကိုးလလောက်က သူ့မိသားစုကိုနှုတ်ဆက်ပြီး မိုင် ၈,၀၀၀ လောက်ဝေးတဲ့ မြန်မာနိုင်ငံအတွင်းက လက်နက်ကိုင်တွေရဲ့ အခိုင်အမာစခန်းတစ်ခုကို ရောက်ခဲ့တာပါ။ တော်လှန်ရေးအတွက် စိတ်အားထက်သန်မှုရှိတဲ့လူလို့ သူ့ကိုယ်သူဆိုတဲ့ အာဇတ်က မြန်မာနိုင်ငံမြောက်ပိုင်းက လက်နက်ကိုင်တွေကိုလည်း တော်လှန်ရေးဆင်နွှဲနေသူတွေဆိုတော့ လာရောက်ပူးပေါင်းခဲ့ပြန်တာပါ။

ဒါ့ပြင် အာဇတ်က သူ့အနေနဲ့ တရားဝင် ဘယ်စစ်သင်တန်းကိုမှ တက်ရောက်ခဲ့ဖူးသူမဟုတ်ဘူးလို့ ဆိုပါတယ်။ ဒါပေမယ့် သူက ဆီးရီးယားမှာဆိုရင် ကာ့ဒ်တပ်ဖွဲ့တွေနဲ့အတူ လေးနှစ်လောက် လက်တွဲတိုက်ပွဲဝင်ခဲ့တာလို့ ဆိုပါတယ်။ သူက နှစ်လလောက် အမေရိကန်က မိသားစုဆီသွားလည်ခဲ့အပြီးမှာတော့ ဖေဖော်ဝါရီလမှာ မြန်မာနိုင်ငံ အနောက်မြောက်ဘက်က ချင်းပြည်နယ်ကို သွားခဲ့ပါတယ်။ အဲဒီမှာ သူက ရှေ့တန်းစစ်မျက်နှာပြင်တွေမှာ တိုက်ခဲ့ပြီး တိုက်ခိုက်ရေးသင်တန်းတွေလည်း ဖွင့်လှစ်ပေးခဲ့ပါတယ်။ အထူးသဖြင့်တော့ လက်ဖြောင်တပ်သားကျွမ်းကျင်မှုသင်တန်းတွေပါ။

အာဇတ်က အရေအတွက်အားဖြင့်နည်းသော်လည်း တိုးပွားမှုရှိတယ်ဆိုတဲ့ မြန်မာနိုင်ငံအတွင်း ခိုးဝင်ပြီး သောင်းကျန်းသူလက်နက်ကိုင်တွေနဲ့အတူ မြန်မာ့တပ်မတော်ကို တိုက်ခိုက်နေသူတွေထဲက တစ်ဦးလို့ လည်း ဆိုရမှာပါ။ သူတို့က မြန်မာ့တပ်မတော်ကို ဦးတည်တိုက်ခိုက်နေတယ်ဆိုသော်လည်း နိုင်ငံနဲ့ပြည်သူတွေမှာတော့ စစ်ဒဏ်ကြောင့်တော်တော်လေးအထိနာလှပါပြီ။

အခုဆိုရင်လည်း ၂၀၂၃ ခုနှစ် အောက်တိုဘာလကစလို့ မြန်မာ့တပ်မတော်က မမျှော်လင့်ဘဲ မြို့အချို့ဆုံးရှုံးခဲ့ပြီးတဲ့နောက် မြန်မာနိုင်ငံအတွင်း လက်နက်ကိုင်အုပ်စုတွေဆီ ခိုးဝင်ရောက်ရှိနေတဲ့ နိုင်ငံခြားသားတွေက ပထမဆုံးအကြိမ်အဖြစ် ဖက်ဆစ်ဆန့်ကျင်ရေး အပြည်ပြည်ဆိုင်ရာတပ်ဦး(Anti-Fascist International Front—AIF) ကို ဖွဲ့စည်းခဲ့ကြပါတယ်။

AIF ကိုပူးတွဲတည်ထောင်သူ အာဇတ်က အခုအချိန်ဟာ မဟာဗျူဟာအရ စစ်ဆင်မှုပြုဖို့ အရေးကြီးတဲ့ အချိန်ပါလို့ ပြောခဲ့ပါသေးတယ်။

မြန်မာနိုင်ငံအတွင်းတိုက်ခိုက်မှုတွေမှာ လူ့အခွင့်အရေးကယ်ဆယ်ရေးအဖွဲ့ဆိုပြီး လက်နက်ကိုင်တွေဘက်က ပါဝင်တိုက်ခိုက်နေတဲ့ ပြည်ပအဖွဲ့တစ်ဖွဲ့ကတော့ Free Burma Rangers(FBR) ဆိုတာဖြစ်ပါတယ်။ သူတို့အဖွဲ့အနေနဲ့ စစ်ဘေးရှောင်ဒေသတွေမှာ ကျန်းမာရေးစောင့်ရှောက်မှုတွေပေးဖို့ဖြစ်ပေမယ့် ကိုယ့်ကိုယ်ကို ယ်ကာကွယ်ဖို့ လက်နက်တွေကိုင်ဆောင်တယ်ဆိုတာ အဖွဲ့ရဲ့ခေါင်းဆောင် ဒေးဗစ် ယူဘန့် (David Eubank) ကဝန်ခံပြောကြားခဲ့ပါတယ်။

ဒါဆိုရင်ဖြင့် မြန်မာနိုင်ငံရဲ့ ပြည်တွင်းအရေးအခင်းမှာ လူကိုယ်တိုင် ပါဝင်စွက်ဖက်နေတဲ့ နိုင်ငံခြားသားတွေက နိုင်ငံအနှံ့ လက်နက်ကိုင်အုပ်စုတွေရဲ့ စခန်းတွေမှာရှိနေတယ်လို့သာ ဆိုချင်ပါတယ်။

Source- MT News