Trump အစိုးရသည် Beijing နှင့် တင်းမာမှုများ တိုးမြင့်လာချိန်တွင် တရုတ်ကျောင်းသားများ၏ ဗီဇာများကို “ထိရောက်စွာ ပယ်ဖျက်သွားမည်” ဟု ဆို

အမေရိကန်ပြည်ထောင်စုသည် “တရုတ်ကျောင်းသားများ၏ ဗီဇာများကို ထိရောက်စွာ ပယ်ဖျက်သွားမည်" ဟု နိုင်ငံခြားရေးဝန်ကြီး မာကိုရူဘီယို က ဗုဒ္ဓဟူးနေ့ (မေ ၂၈) တွင် ကြေညာခဲ့သည်။ ၎င်းသည် ပေကျင်းနှင့် ဆက်ဆံရေးတွင် တင်းမာမှုများ ပိုမိုမြင့်တက်လာခြင်းဖြစ်ပြီး အမေရိကန် အဆင့်မြင့်ပညာရေးအဖွဲ့အစည်းများအတွက် နောက်ထပ်ဒဏ်ရာတစ်ခု ဖြစ်စေသည်။

အမေရိကန်၏ အဆင့်မြင့်သံတမန်က ပြည်ထဲရေးဝန်ကြီးဌာနနှင့် ပူးပေါင်း၍ တရုတ်ကျောင်းသားများ၏ ဗီဇာများကို ပယ်ဖျက်သွားမည်ဟု ပြောကြားခဲ့ပြီး၊ အထူးသဖြင့် “တရုတ်ကွန်မြူနစ်ပါတီနှင့် ဆက်နွှယ်နေသူများ သို့မဟုတ် အရေးကြီးသော နည်းပညာနယ်ပယ်များတွင် လေ့လာနေသူများ” ကို ဦးတည်မည်ဖြစ်သည်။

ထို့အပြင် ၎င်းက “တရုတ်ပြည်သူ့သမ္မတနိုင်ငံနှင့် ဟောင်ကောင်မှ လာမည့် ဗီဇာလျှောက်ထားမှုအားလုံးကို ပိုမိုတင်းကျပ်စွာ စိစစ်ရန် ဗီဇာစည်းမျဉ်းများကိုလည်း ပြန်လည်ပြင်ဆင်သွားမည်” ဟု ဖြည့်စွက် ပြောကြား ခဲ့သည်။

အဆိုပါ အံ့ဖွယ်ကြေညာချက်သည် အမေရိကန်နှင့် တရုတ်တို့ကြား တင်းမာမှုလျှော့ချရေးအတွက် လက်ရှိကြိုးပမ်းမှုများကို အနှောင့်အယှက်ဖြစ်စေနိုင်ပြီး၊ လွန်ခဲ့သည့် ရက်သတ္တပတ်အနည်းငယ်ကပင် နှစ်နိုင်ငံသည် တစ်ဦးနှင့်တစ်ဦး ကုန်သွယ်ရေးအရ ဒဏ်ခတ်မှုများကို ရက် ၉၀ ယာယီရပ်စဲထားကြောင်း ကြေညာခဲ့ကြသည်။ ထို့အပြင် ၎င်းသည် ဒေါ်နယ်ထရမ့်နှင့် အမေရိကန်၏ အထင်ကရတက္ကသိုလ်များအကြား ပိုမိုနက်ရှိုင်းလာသော ပဋိပက္ခကို ထပ်မံအရှိန်မြှင့်လိုက်သည်။

ရူဘီယို၏ ထုတ်ဖော်ပြောဆိုမှုများသည် ထရမ့်အစိုးရ၏ နိုင်ငံခြားကျောင်းသားများအား အမေရိကတွင် ပညာသင်ကြားခြင်းမှ တားဆီးရန် လုပ်ဆောင်ချက်များနောက်ပိုင်းတွင် ထွက်ပေါ်လာခြင်းဖြစ်သည်။ ယခင်က အမေရိကန်သံရုံးများအား ကျောင်းသားဗီဇာချိန်းဆိုမှုများကို ယာယီ ရပ်ဆိုင်းရန် အမိန့်ပေးခြင်း၊ ဟားဗတ်တက္ကသိုလ်၏ နိုင်ငံတကာ ကျောင်းသားများအား လက်ခံခွင့်ကို ရုပ်သိမ်းခြင်း (သို့သော် ဖက်ဒရယ် တရားသူကြီးက နောက်ပိုင်းတွင် ဟားဗတ်အမိန့်ကို ပယ်ဖျက်ခဲ့သည်) အစရှိသည့် လုပ်ရပ်များ ပါဝင်သည်။

ထိုနောက်ဆုံးလုပ်ဆောင်ချက်သည် တရုတ်နိုင်ငံတွင် စိုးရိမ်မှုနှင့် အမျက်ဒေါသများကို ဖြစ်ပေါ်စေခဲ့ပြီး အမေရိကန် အဆင့်မြင့်ပညာရေးတွင် နိုင်ငံတကာကျောင်းသား၏ လေးပုံတစ်ပုံခန့်မှာ တရုတ်နိုင်ငံမှ ဖြစ်သည်။ ထို့အပြင် ၎င်းသည် တရုတ်နှင့် အခြားနိုင်ငံခြား ကျောင်းသားများမှ အမေရိကန်တက္ကသိုလ်များ၏ အဓိက ဝင်ငွေအရင်းအမြစ် ဖြစ်နေသည့်အတွက် အမေရိကန်တက္ကသိုလ်များတွင်လည်း စိုးရိမ်မှုများ ပိုမို တိုးမြင့်လာစေမည်ဖြစ်သည်။

ကိုးကား- CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂