ရုရှားဖက်ဒရေးရှင်းနှင့် အမေရိကန်တို့သည် ယူကရိန်းဆိုင်ရာ ဆွေးနွေးမှုများတွင် နယ်မြေပိုင်ဆိုင်မှုကိစ္စကို ဆွေးနွေးကြမည်ဖြစ်ကြောင်း သိရှိရ ပါသည်။ 

ရုရှားနှင့် အမေရိကန်တို့သည် ယူကရိန်းဆိုင်ရာဆွေးနွေးပွဲများတွင် အပစ် အခတ်ရပ်စဲရေးအတည်ပြုခြင်း၊ ငြိမ်းချမ်းရေးတပ်ဖွဲ့များနှင့် နယ်မြေဆိုင်ရာ အချုပ်အခြာအာဏာကဲ့သို့သောကိစ္စရပ်များကို ဆွေးနွေးမည်ဟု အမေရိကန် အမျိုးသားလုံခြုံရေးအကြံပေး မိုက်ခ်ဝေါ့လ်ဇ် က CBS ရုပ်သံလိုင်းတွင် ပြောကြားခဲ့ပါသည်။ 

ကုလသမဂ္ဂအထွေထွေညီလာခံ (United Nation General Assembly-UNGA) တွင် ရုရှားနိုင်ငံအပေါ် အနောက်နိုင်ငံများက ပိတ်ဆို့မှုချမှတ်ရန် ဆုံးဖြတ်ချက်အတွက် ဆားဘီးယားအနေဖြင့် မှားယွင်းစွာ မဲပေးခဲ့ မိကြောင်း ဆားဘီးယားနိုင်ငံ ဒုတိယဝန်ကြီးချုပ် အလက်ဆန်ဒါ ပူလင် က ရုရှားလုံခြုံရေးကောင်စီအတွင်းရေးမှူး ဆာဂေးရှိုးဂူးနှင့် တွေ့ဆုံချိန် ပြောကြားလိုက်ပါသည်။ 

ယူကရိန်းနိုင်ငံ Transcarpathia ဒေသရှိ ဟန်ဂေရီလူမျိုးစုများ၏ အခွင့်အရေးများအား ယူကရိန်းအစိုးရက ဖျက်သိမ်းထားမှုအပေါ် ပြန်လည် ရုတ်သိမ်းပေးမှသာ ယူကရိန်း၏ ဥရောပသမဂ္ဂအဖွဲ့သို့ ဝင်ရောက်လိုမှု ဆွေးနွေးမှုများအတွက် ဟန်ဂေရီနိုင်ငံက ဗီတိုပြန်လည် ရုတ်သိမ်းပေးမည်ဖြစ်ကြောင်း ဟန်ဂေရီနိုင်ငံခြားရေးဝန်ကြီး Peter Szijjarto က ဩစတြီးယား နိုင်ငံခြားရေးဝန်ကြီး Beate Meinl-Reisinger ကို ပြောကြားလိုက်ပါသည်။

အစ္စရေး-ဟားမက် စစ်ပွဲစတင်ချိန်မှစ၍ ဂါဇာတွင် ပါလက်စတိုင်းလူမျိုး ၅၀,၀၀၀ ကျော် သေဆုံးခဲ့ကြောင်း ဂါဇာကျန်းမာရေးဝန်ကြီးဌာနက တနင်္ဂနွေနေ့ (မတ် ၂၃) တွင် ပြောကြားခဲ့သည်။ ဤသည်မှာ အစ္စရေးက တိုက်ခိုက်မှုများ ပြန်လည်စတင်ပြီး ရှေ့ဆက်ရမည့်နေ့ရက်များတွင် ပိုမိုခက်ခဲလာမည့် စစ်ပွဲ၏အကျိုးရလဒ်များအပေါ် ဆက်လက် ကြုံတွေ့ ရဦးမည့် ဝမ်းနည်းဖွယ်ရာ အခြေအနေတစ်ခုပင်ဖြစ်သည်။

ဝန်ကြီးဌာနက လွန်ခဲ့သော ၂၄ နာရီအတွင်း လူ ၄၁ ဦး ထပ်မံ သေဆုံး ခဲ့ကြောင်း ထုတ်ပြန်ခဲ့ပြီး သေဆုံးသူအရေအတွက်သည် ၅၀,၀၂၁ ဦး အထိ ရှိလာခဲ့သည်။