အမေရိကန်သမ္မတ ဒေါ်နယ်ထရမ့်က ဆီးရီးယားအပေါ် ဒဏ်ခတ်အရေးယူမှုများကို ရုပ်သိမ်းမည်ဟု ကြေညာလိုက်ပြီး ဒမတ်စကပ် အစိုးရအား ဖိအားပေးရန်ရည်ရွယ်ခဲ့သည့် ဆယ်စုနှစ်ကျော်မျှ ကြာမြင့်ခဲ့သော မူဝါဒကို ပြောင်းလဲလိုက်ခြင်းဖြစ်သည်။ ထို့အပြင် ၎င်းက Ahmed al-Sharaa ၏ အသွင်ကူးပြောင်းရေးအစိုးရနှင့်အတူ ဆီးရီးယား၏ တိုးတက်မှု အခွင့်အလမ်းသစ်များ ရှိလာမည်ဟု မျှော်လင့်ကြောင်း ဖြည့်စွက် ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်က ၂၀၁၅ နျူကလီးယား သဘောတူညီချက်ကို ပြန်လည်အသက်သွင်းရန်ရည်ရွယ်သည့် အိုမန်တွင် ကျင်းပဆဲ ဆွေးနွေးပွဲများ မအောင်မြင်ပါက အီရန်၏ ရေနံတင်ပို့မှုကို သုညအထိ လျှော့ချမည်ဟု ခြိမ်းခြောက်လိုက်သည်။ ၂၀၁၈ ခုနှစ်တွင် ထရမ့်သည် တီဟီရန်အပေါ် ဒဏ်ခတ်အရေးယူမှုများ လျှော့ချပေးရန် နျူကလီးယား အစီအစဉ်ကို ကန့်သတ်သည့် သဘောတူညီချက်မှ တစ်ဖက်သတ် နုတ်ထွက်ခဲ့သည်။

ကုလသမဂ္ဂအထွေထွေအတွင်းရေးမှူးချုပ် ဂူတာရက်စ်က တရုတ်-အမေရိကန် စီးပွားရေးနှင့် ကုန်သွယ်ရေး အဆင့်မြင့် တွေ့ဆုံဆွေးနွေးမှု ရလဒ်များအပေါ် ကြိုဆိုကြောင်း၊ ယင်းက ကမ္ဘာ့စီးပွားရေးအတွက်“အလွန်အပြုသဘောဆောင်သော” အချက်ပြမှုတစ်ခုဖြစ်သည်ဟု ယူဆကြောင်း ကုလသမဂ္ဂ အထွေထွေ အတွင်းရေးမှူးချုပ်၏ ပြောခွင့်ရပုဂ္ဂိုလ် Stephane Dujarric က မေ ၁၂ ရက်တွင် ပြောကြားခဲ့သည်။