အမေရိကန်နိုင်ငံခြားရေးဝန်ကြီးက USAID ၏ ခေတ္တ အမှုဆောင်ဒါရိုက်တာအဖြစ် တာဝန်ယူမည်

အမေရိကန်နိုင်ငံခြားရေးဝန်ကြီး Marco Rubio သည် အမေရိကန်နိုင်ငံတကာဖွံ့ဖြိုးရေးအေဂျင်စီ (USAID) ၏ ခေတ္တ အမှုဆောင်ဒါရိုက်တာအဖြစ် တာဝန်ယူ ဆောင်ရွက်သွားမည်ဖြစ်ပြီး ယင်းအေဂျင်စီကို နိုင်ငံခြားရေးဝန်ကြီးဌာနအောက်တွင် ထားရှိသွားမည်ဖြစ်ကြောင်း ကြေညာလိုက်ပါသည်။ နိုင်ငံခြားအကူအညီပေးရေးလုပ်ငန်းများကို နိုင်ငံခြားရေးဝန်ကြီးဌာန အောက်တွင်ထားရှိခြင်းမှာ အမေရိကန်သမ္မတ ဒေါ်နယ်ထရမ့်အစိုးရအဖွဲ့၏ မဟာဗျူဟာလုပ်ငန်းများ ၏တစ်စိတ်တစ်ပိုင်းအဖြစ် ပြောင်းလဲဆောင်ရွက်နေခြင်း ဖြစ်ပါသည်။ 

Marco Rubio က လက်တင်အမေရိကနိုင်ငံများသို့ သွားရောက်သည့် ခရီးစဉ်အတွင်း USAID သည် အမေရိကန်အမျိုးသားအကျိုးစီးပွားရေးကို တိုးတက်မှု မရှိစေဘဲ ကမ္ဘာလုံးဆိုင်ရာ လူသားချင်းစာနာထောက်ထားရေးနှင့် အကူအညီပေးရေးအဖွဲ့အနေဖြင့်သာ လုပ်ဆောင်နေသည်ဟု ဝေဖန်ခဲ့သည်။ မိမိတို့ အစိုးရအဖွဲ့အနေဖြင့် USAID ကို လုံးဝဖျက်သိမ်းရန်မဟုတ်ဘဲ အမေရိကန်နိုင်ငံခြားရေးမူဝါဒနှင့် ပိုမို ကိုက်ညီ၍ အမျိုးသားအကျိုးစီးပွားကို ဖွံ့ဖြိုးတိုးတက် စေသည့် နည်းလမ်းများဖြင့် ပြုပြင်ပြောင်းလဲရန် ရည်ရွယ်ထားကြောင်း ပြောကြားထားပါသည်။

ထရမ့်အစိုးရသည် နိုင်ငံခြားအကူအညီအများစုကို ရပ်ဆိုင်းခြင်းနှင့် USAID အား ပြုပြင်ပြောင်းလဲခြင်း လုပ်ငန်းများကို ဆောင်ရွက်ခဲ့ပါသည်။  ဝါရှင်တန်ဒီစီရှိ USAID ရုံးချုပ်တွင် ဝန်ထမ်းများအား ဝင်ရောက်ခွင့်ပိတ်ထားပြီး USAID ကို နိုင်ငံခြားရေးဝန်ကြီးဌာနအောက်တွင်ထားရှိဆောင်ရွက်ရန် စီစဉ်လျက်ရှိပါသည်။ ဒေါ်နယ်ထရမ့်က အစိုးရလုပ်ငန်းများကို ထိထိ ရောက်ရောက် လုပ်ဆောင်နိုင်ရန် Elon Musk ကို တာဝန်ပေးအပ်ထားပြီး ယင်းပြုပြင်ပြောင်းလဲမှုတွင် ဝန်ထမ်းအရေအတွက် လျှော့ချခြင်းနှင့် အသုံးစရိတ်များကို အစိုးရ၏ ဦးစားပေးမှုများနှင့် ကိုက်ညီစေရန် ပြင်ဆင်ခြင်းများ ပါဝင်နေပါသည်။ 

ယခုအပြောင်းအလဲများကြောင့်USAID ၏ အနာဂတ်နှင့် နိုင်ငံတကာအကူအညီ‌ပေးရေးဆိုင်ရာ အခန်းကဏ္ဍမှာ မသေမချာဖြစ်နေပြီး အရေးကြီးသော လူသားချင်းစာနာထောက်ထားမှုဆိုင်ရာ သက်ရောက်မှုများ ဖြစ်ပေါ်နိုင်သည်ဟု ကျွမ်းကျင်သူများက ခန့်မှန်းထားကြပါသည်။

ကိုးကား-CNN

Photo: Al Jazeera