အိန္ဒိယနှင့် ကောင်းမွန်သော ဆက်ဆံရေး ဆက်လက်တည်မြဲလိုဟု ယူနွတ် ဆို

ဘင်္ဂလားဒေ့ရှ်၏ ယာယီအစိုးရခေါင်းဆောင် မိုဟာမက်ယူနွတ်က ၎င်း၏ နိုင်ငံသည် အိန္ဒိယနှင့် ကောင်းမွန်သော ဆက်ဆံရေးကို ထိန်းသိမ်းရန် အခြားရွေးချယ်စရာမရှိဟု ပြောကြားခဲ့သည်။ ယခင်ဘင်္ဂလားဒေ့ရှ် ဝန်ကြီးချုပ် ရှိတ်ဟာဆီနာကို လွှဲပြောင်းပေးအပ်ရေး ကိစ္စရပ်များကြောင့် အိန္ဒိယနှင့် ဘင်္ဂလားဒေ့ရှ်တို့ကြား ဆက်ဆံရေး ယိုယွင်းလာခဲ့သည်။

BBC Bangla နှင့် ဘင်္ဂလားဒေ့ရှ် မီဒီယာ Business Standard တို့က ဖော်ပြခဲ့သည့် မတ်လ ၄ ရက်(တနင်္လာ)နေ့ထုတ်ပြန်ချက်တွင် ယူနွတ်က နှစ်နိုင်ငံသည် “သမိုင်းကြောင်းအရ၊ နိုင်ငံရေးအရနှင့် စီးပွားရေးအရ ခွဲခြား၍မရကြောင်း ဝန်ခံခဲ့ပြီး ၊ နှစ်နိုင်ငံအကြား ကောင်းမွန်သော ဆက်ဆံရေးကို ထိန်းသိမ်းရန် အခြားနည်းလမ်း မရှိကြောင်းနှင့် ကောင်းမွန်လျက်ရှိသည့် လမ်းကြောင်းအပေါ် ဆက်လက် လျှောက်လှမ်းရမည်” ဟု ထပ်လောင်းပြောကြားခဲ့သည်။

ယူနွတ်က ဝါဒဖြန့်မှုများကြောင့် အိန္ဒိယနှင့် ဘင်္ဂလားဒေ့ရှ်အကြား ပဋိပက္ခအချို့ ဖြစ်ပွားခဲ့သော်လည်း ဆက်ဆံရေးသည် အလွန်ကောင်းမွန်သောအခြေအနေတွင် ရှိနေဆဲဖြစ်ပြီး ဆုတ်ယုတ်မှုမရှိသေး ဟု ပြောကြား ခဲ့သည်။ 

ဟာဆီနာအစိုးရ ပြုတ်ကျပြီးနောက် ဘင်္ဂလားဒေ့ရှ်ရှိ ဟိန္ဒူနှင့် အခြား လူနည်းစုများအပေါ် ကျူးလွန်ခဲ့သည်ဟု စွပ်စွဲခံရသော ရက်စက်မှုများနှင့် ပတ်သက်၍ အိန္ဒိယမီဒီယာများက မဟုတ်မမှန်ဝါဒဖြန့်မှုများဖြစ်သည်ဟု ယူနွတ်က ငြင်းဆိုခဲ့ဖူးသည်။

သတင်းများအရ (BIMSTEC) ထိပ်သီးအစည်းအဝေးမတိုင်မီ ထုတ်ပြန်ချက်တွင် ယူနွတ်သည် အိန္ဒိယဝန်ကြီးချုပ် နာရိန်ဒရာမိုဒီနှင့် တွေ့ဆုံရန် မျှော်လင့်ထားကြောင်း ဖော်ပြခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂