ဝါးကုန်ကြမ်းမှသည် နိုင်ငံတကာအဆင့်မီ တန်ဖိုးမြင့်ထုတ်ကုန်များ တိုးမြှင့်ထုတ်လုပ်

“ဝါးတစ်လုံးရဲ့တန်ဖိုးက ထုတ်လုပ်လိုက်တဲ့ ကုန်ပစ္စည်းပေါ်မှာမူတည်ပြီး ကွာသွားနိုင်တယ်၊ မူလတန်ဖိုးရဲ့တစ်ဆလား၊ ဆယ်ဆလားအမျိုးမျိုးဖြစ်နိုင်တယ်၊ အဓိကက နည်းပညာပဲ” ဟု ဝါးစိုက်ပျိုး ထုတ်လုပ်တင်ပို့ရောင်းချသူများ အသင်းဥက္ကဋ္ဌလည်းဖြစ် Orchard ကုမ္ပဏီမှ မန်နေဂျင်းဒါရိုက်တာ ဖြစ်သူ ဒေါက်တာမြင့်စိန်ကပြောသည်။

ဧရာဝတီတိုင်းဒေသကြီး မအူပင်မြို့နယ် မလတ်တိုကျေးရွာ Orchard Farm သဘာဝငါးမွေးမြူရေးကန် ကန်ပေါင်တစ်လျှောက်သူကိုယ်တိုင် စနစ်တကျစိုက်ပျိုးထားသည့် ဝါးပင်များအား ခေတ်မီနည်းစနစ်များ၊ စက်ကိရိယာများအသုံးပြုကာ ကုန်ကြမ်းအဆင့်မှ တန်ဖိုးမြင့်ထုတ်ကုန်များအဆင့်သို့ တိုးမြှင့်ထုတ်လုပ်၍ နိုင်ငံတကာဈေးကွက်သို့ တင်ပို့နိုင်ရေး ကြိုးစားလုပ်ဆောင်သွားမည်ဟု ၎င်းကပြောသည်။

“အခုလောလောဆယ် ဝါးကနေ ဘောလ်ပင်ထုတ်ဖို့ပြင်ဆင်နေပါတယ်။ စက်လည်းဝယ်ထား ပြီးပါပြီ၊ မကြာခင်လုပ်ငန်းလည်ပတ်နိုင်အောင် ကြိုးစားနေပါတယ်။ အဲဒီလို ထုတ်နိုင်ဖို့အတွက် လည်း တရုတ်နိုင်ငံထိသွားပြီး လေ့လာခဲ့ပါတယ်။ ပြည်တွင်းဈေးကွက်ရော ပြည်ပထိပါ တင်ပို့နိုင်ဖို့ အတွက် ကြိုးစားသွားမှာပါ” ဟု Orchard Farm ပိုင်ရှင် ဒေါက်တာမြင့်စိန်က ပြောသည်။ နောက်ပိုင်းတွင် Orchard Farm အတွင်းရှိဝါးပင်များကို အသုံးပြုကာ ဝါးအခြေခံစားသောက်ကုန် စည်သွတ်ဘူးများ၊ ဝါးဖြင့် ချက်လုပ်ထားသော ဝိုင်များ၊ အဆင့်မီနည်းပညာမြင့် အသုံးအဆောင် ပစ္စည်းများကို စားသုံးသူ ဝယ်ယူသူများအကြိုက် ပြုလုပ်ရောင်းချသွားမည်ဖြစ်ပြီး ဝါးစိုက်ပျိုးနည်း သင်တန်းများကို သက်ဆိုင်ရာ  အဖွဲ့အစည်း တာဝန်ရှိသူများနှင့် ချိတ်ဆက်ကာ ဖွင့်လှစ်မည်ဖြစ်ကြောင်း သိရသည်။

သဘာဝပတ်ဝန်းကျင်နှင့် လိုက်လျောညီထွေမှုရှိသည့်အတွက် နိုင်ငံတကာမှ ထုတ်လုပ်သော ဝါးထုတ်ကုန်အမျိုးမျိုးနှင့် တူရိယာပစ္စည်းများ၊ လက်မှုပစ္စည်းများ၊ အစားအစာများ၊ အနုပညာလက်ရာ များသည် ယနေ့ခေတ်အခါတွင် လူကြိုက်များလျက်ရှိသည်၊၊ အထူးသဖြင့် ဝါးနှင့်ပတ်သက်သော ထုတ်ကုန်ပစ္စည်းများကို ထုတ်လုပ်ရောင်းချရာတွင် မြန်မာနိုင်ငံ၏အိမ်နီးချင်း တရုတ်နိုင်ငံသည် အောင်မြင် ထင်ရှားသည့် နိုင်ငံတစ်ခုဆိုလျှင် မှားမည်မထင်ပေ။ “တရုတ်နိုင်ငံက ဝါးနဲ့ပြုလုပ်ထားသည့် အအေးသောက်တဲ့ပိုက်တွေ၊ ဂေါက်သီးရိုက်ရာမှာ ချိန်ဆတဲ့ (T Stand) စတာတွေကို ဥရောပ နိုင်ငံတွေမှာ ဈေးကောင်းပေးပြီး နှစ်နှစ်ခြိုက်ခြိုက်အသုံးပြုနေပါပြီ ” ဟု ဒေါက်တာမြင့်စိန်က ပြောသည်။

ထို့ပြင် ဝါးပင်များ ရှင်သန်ပေါက်ရောက်ရာ အိန္ဒိယ၊ ဗီယက်နမ်၊ အင်ဒိုနီးရှား၊ ထိုင်း၊ ဖိလစ်ပိုင်၊ ဘင်္ဂလားဒေရှ့်၊ ကမ္ဘောဒီးယား၊ လာအိုစသည့် အရှေ့တောင်အာရှ နိုင်ငံများသည်လည်း ဝါးနှင့် ပတ်သက်သော ပရိဘောဂများ၊ လူ့အသုံးအဆောင်များ၊ အိမ်သုံးပစ္စည်းများ၊ အိမ်အလှဆင်ပစ္စည်းများ ထုတ်လုပ်သည့်နေရာတွင် ထင်ရှားကြပြီး နိုင်ငံတကာ ဈေးကွက်အတွင်း နေရာယူလာကြပြီဖြစ်သည်။

မြန်မာနိုင်ငံသည် စိုက်ပျိုးရေးကို အခြေခံသည့် စက်မှုနိုင်ငံအဖြစ် ထူထောင်ရာတွင် စိုက်ပျိုးမွေးမြူရေး အခြေခံကုန်ကြမ်းများသည် အဓိကဖြစ်ပြီး လျှပ်စစ်နှင့် စွမ်းအင်သည် အရေးကြီးသည့် သွင်းအားစုများ ဖြစ်ကြသည်။

ဝါးသည် မြန်မာနိုင်ငံအနှံ့အပြား ကျေးလက်ဒေသများတွင် သဘာဝအတိုင်းရှင်သန် ပေါက်ပွား လေ့ရှိပြီး စိုက်ပျိုးသည့်အခါတွင်လည်း လွယ်လင့်တကူ စိုက်ပျိုးနိုင်သည်ဖြစ်ရာ ဝါးနှင့်ပတ်သက်သည့် တန်ဖိုးမြင့် ထုတ်ကုန်ထုတ်လုပ်နိုင်ရေးအတွက် လိုအပ်သည့် အခြေခံဝါးကုန်ကြမ်းများအား လွယ်ကူ ပေါများစွာရရှိနိုင်သည်။

“ဝါးက သဘာဝအတိုင်းပေါက် ရောက်နိုင်သလို စိုက်ရတာလဲလွယ်တယ်၊ “ငှက်ပျောကဆုန် ဝါးနယုန်ငှက်ပျောတစ်နှိုက် ဝါးတစ်မိုက်တစ်နှစ်သားဝါးကိုစိုက်” အဲဒီလိုဆို အခုလိုဝါးတောတန်းကြီး ဖြစ်ပါပြီ” ဟု ဝါးရုံပင်ပေါင်းသုံးသိန်းခွဲကျော်ရှိသည့် စိမ်းစိုအုပ်မှိုင်းနေသည့် Orchard Farm အတွင်းရှိ ဝါးရုံပင်များအား လက်ညှိုးညွှန်ပြကာ ဒေါက်တာ မြင့်စိန်က ရှင်းပြသည်။

ဝါးအရင်းအမြစ် အများအပြားထွက်ရှိရာ မြန်မာနိုင်ငံသည် ရှေးယခင်ကတည်းက ဝါးကို ခွဲခြမ်းစိတ်ဖြာ၍လည်းကောင်း၊ အလုံးလိုက်သော်လည်းကောင်း နေရာစုံ၊ ကဏ္ဍစုံအသုံးပြုခဲ့ကြသည် ဖြစ်ရာဝါး နှင့် ပတ်သက်သော မိရိုးဖလာလက်မှုပညာသည် မြန်မာနိုင်ငံရှိ ကျေးလက်နေပြည်သူတို့ အတွက် စိမ်းလှသည့် ပညာရပ်ကားမဟုတ်ပေ။

ထိုသို့ မြန်မာ့လက်မှုပညာဖြင့် ကျွမ်းကျင်ပိုင်နိုင်စွာ ပြုလုပ်ထားသည့် ဝါးအခြေခံထုတ်ကုန် ပစ္စည်းများကို ပြည်တွင်းဈေးကွက်တွင်သာမက ပြည်ပစျေးကွက်တွင်ပါ ဈေးကွက်ဝင်ပစ္စည်းများ ဖြစ်လာစေရန် ခေတ်မီနည်းပညာ၊ စက်ကိရိယာများဖြင့် စနစ်တကျပေါင်းစပ်ဆောင်ရွက်လိုက်မည် ဆိုပါက အိမ်နီးချင်းနိုင်ငံများနည်းတူ မြန်မာ့ဝါးလက်မှုပစ္စည်းများသည် ပြည်ပဈေးကွက်တွင် အခိုင်အမာနေရာရရှိလာမည်ဖြစ်သည်။

ဒေသအလိုက်ထွက်ရှိသည့် စိုက်ပျိုး၊ မွေးမြူရေးကုန်ထုတ်လုပ်မှုများသည် သေချာသည့် ကုန်ကြမ်းများဖြစ်သည့်အတွက် ထိုမှတစ်ဆင့် ပြည်ပသွင်းကုန် အစားထိုးနိုင်ရန် နှင့် ပြည်ပ ပို့ကုန်တိုးမြှင့်ဆောင်ရွက်နိုင်ရန် တစ်ဆင့်ပြီးတစ်ဆင့် ကြိုးပမ်းသွားရမည်ဖြစ်သည်။

သို့ဖြစ်ရာ ဝါးနှင့်ပတ်သက်သော ကုန်ချော၊ ကုန်ကြမ်း နှင့် ထုတ်ကုန်များကို ပြည်ပနိုင်ငံသို့ တင်ပို့နိုင်ပြီး နိုင်ငံခြားစျေးကွက်ရရှိလာရေး၊ လက်မှုပညာနှင့် ပတ်သက်၍ ပြည်ပသို့ ထိုးဖောက်နိုင်ရေး၊ ခရီးသွားဧည့်သည်များ ဆွဲဆောင်နိုင်ရေးတို့အတွက် မြန်မာနိုင်ငံရှိ အသင်းအဖွဲ့များ၊ လူပုဂ္ဂိုလ်များက ကြိုးပမ်းဆောင်ရွက်နေကြသည်ကို မြင်တွေ့ကြားသိနေရသည်။

ဝါးပင်မှတစ်ဆင့် ခေတ်မီဆန်းသစ်သော၊ နိုင်ငံတကာစျေးကွက်တွင် ယှဉ်ပြိုင်နိုင်စွမ်းရှိသော ဝါးလက်မှု ထုတ်ကုန်များ ပိုမိုတိုးမြင့်ထုတ်လုပ်နိုင်အောင် စွမ်းဆောင်လာခြင်းဖြင့် ဒေသတွင်း ပြည်သူများ၏ လူမှုစီးပွားဘဝများလည်း တိုးတက်မြင့်မားလာမည်ဖြစ်ရာ Orchard Farm အတွင်း ဝါးပင်များကို ကိုယ်တိုင်စိုက်ပျိုးပြီး တန်ဖိုးမြင့်ထုတ်ကုန်တစ်ခုအဖြစ် နိုင်ငံတကာဈေးကွက်သို့ တင်ပို့ သွားမည့် ဝါးစိုက်ပျိုးထုတ်လုပ်တင်ပို့ ရောင်းချသူများအသင်းဥက္ကဋ္ဌ ဒေါက်တာမြင့်စိန်က “ပစ္စည်းချင်းတူရင်တောင် ကိုယ့်နိုင်ငံကထုတ်တဲ့ ပစ္စည်းကအရည်အသွေးကောင်းနေရင် ဈေးကွက် ထိုးဖောက်နိုင်ပြီ ထုတ်ကုန်နှစ်ဆတိုးထုတ်လာရုံတင်မကဘူး ဝင်ငွေပါတိုးလာမှာပါ’’ ဟု ပြောပြခဲ့သည်။

ဓာတ်ပုံ-နဒီမင်း

ကိုးကား MOI