ဘရာဇီးနိုင်ငံ ဘရာဆီးလီးယားမြို့၌ မိုးမရွာဘဲ ရှိသည်မှာ ရက်ပေါင်း ၁၆၄ ရက် ဆက်တိုက်ရှိပြီဖြစ်ပြီး အကြာဆုံး ခြောက်သွေ့မှုအဖြစ် စံချိန်သစ်တင်ခဲ့ကြောင်း အမျိုးသား မိုးလေဝသ အင်စတီကျုက အောက်တိုဘာ ၄ ရက်တွင် ထုတ်ပြန်ခဲ့သည်။

ကာလရှည်ကြာ မိုးခေါင်မှုသည် တောမီးလောင်မှုနှင့် မြက်ခင်းပြင်များ မီးလောင်မှုကို ဖြစ်ပေါ်စေသည်။ ဩဂုတ်လလယ်ပိုင်းမှစတင်ကာ နိုင်ငံအနှံ့ ဒေသများတွင် တောမီးလောင်မှုများ ပျံ့နှံ့လာခဲ့သည်။ ၁၉၆၃ ခုနှစ်ကလည်း ဘရာဆီးလီးယားမြို့၌ ၁၆၃ ရက်တိုင်တိုင် မိုးမရွာဘဲ မိုးခေါင်မှု ဖြစ်ပွားခဲ့သည်။ 

ကွန်ဂိုဒီမိုကရက်တစ်သမ္မတနိုင်ငံ ဂိုမာမြို့၌ အောက်တိုဘာ ၅ ရက်မှစတင်ကာ မျောက်ကျောက်ရောဂါ ကာကွယ်ဆေးထိုးနှံမှု စတင်ခဲ့ကြောင်း သိရသည်။ ကနဦးတွင် ကျန်းမာရေးဝန်ထမ်းများနှင့် မျောက်ကျောက်ရောဂါ တိုက်ဖျက်ရေးရှေ့တန်းမှ ပါဝင်ကြသည့် လုပ်သားများကို အဓိကထား၍ ကာကွယ်ဆေးထိုးသည့် အစီအစဉ်ဖြစ်ကြောင်း ကျန်းမာရေး အာဏာပိုင်များက ပြောသည်။

အစ္စရေးအစိုးရသည် မကြာသေးမီက အီရန်၏ ဒုံးကျည်တိုက်ခိုက်မှုကို လက်တုံ့ပြန် တိုက်ခိုက်သွားမည်ဖြစ်ကြောင်းနှင့် လက်ဘနွန်ရှိ တီဟီရန် ကျောထောက်နောက်ခံပြု ဟစ်ဇ်ဘိုလာအပေါ် ထိုးစစ်ဆင်တိုက်ခိုက်မှု အရှိန်မြှင့် လုပ်ဆောင်သွားမည်ဖြစ်ကြောင်း အရိပ်အမြွက် ပြောကြားလိုက်သည်။