ဒိန်းမတ်သည် ၎င်း၏ ကိုယ်ပိုင်အုပ်ချုပ်ခွင့်ရ နယ်မြေများဖြစ်သည့် ဂရင်းလန်းကျွန်းနှင့် Faroe ကျွန်းစုတို့နှင့် ပူးပေါင်း၍ အာတိတ်ဒေသလုံခြုံရေးကို အဆင့်မြှင့်တင်ရန် ခရိုနာ ၁၄.၆ ဘီလီယံ (ဒေါ်လာ ၂.၀၅ ဘီလီယံ) သုံးစွဲသွားမည်ဖြစ်ကြောင်း ပြောကြားလိုက်ပါသည်။
အဆိုပါ ပူးပေါင်းဆောင်ရွက်ရေးသဘောတူညီချက်တွင် အာတိတ်သင်္ဘောသစ် ၃ စင်းနှင့် အဆင့်မြင့် ရုပ်ပုံဖမ်းနိုင်စွမ်းနှင့် ပိုမိုအားကောင်းသော ဂြိုလ်တုစွမ်းရည်ပါရှိသည့် တာဝေးပစ်ဒရုန်းများ ပါဝင်ပါသည်။
ဇန်နဝါရီ ၂၇ ရက်နေ့က အမေရိကန်သမ္မတ ဒေါ်နယ်ထရမ့်သည် Iron Dome အမျိုးသားဒုံးကျည်ကာကွယ်စနစ် ဖွံ့ဖြိုးတိုးတက်ရေးဆိုင်ရာ အမိန့်တစ်ရပ်ကို လက်မှတ်ရေးထိုးလိုက်ကြောင်း အိမ်ဖြူတော်က ပြောကြားလိုက်ပါသည်။
ဒေါ်နယ်ထရမ့်သည် ကျမ်းသစ္စာကျိန်ဆိုသည့် ဇန်နဝါရီ ၂၀ ရက်က မိန့်ခွန်းပြောကြားရာတွင် ဒုံးကျည်ကာကွယ်ရေးစနစ်ကို ပြည်တွင်း၌ ထုတ်လုပ်မည်ဖြစ်ကြောင်း ထည့်သွင်းပြောကြားခဲ့ပါသည်။
ယူကရိန်းနိုင်ငံကို ထောက်ပံ့မှုများလုပ်ဆောင်ပေးခဲ့ပြီးနောက် နိုင်ငံအများအပြားသည် ၎င်းတို့၏စစ်လက်နက် ပစ္စည်းသိုလှောင်မှုများကို ပြန်လည်ဖြည့်တင်းမှုနှင့်အတူ ကမ္ဘာလုံးဆိုင်ရာဝယ်လိုအားများ မြင့်တက်လာခဲ့ပြီး အမေရိကန်၏လက်နက်တင်ပို့မှုသည် ၂၀၂၄ ခုနှစ် ဘဏ္ဍာနှစ်အတွင်း စံချိန်တင်အမြင့်ဆုံးသို့ ရောက်ရှိခဲ့ကြောင်း အမေရိကန်နိုင်ငံခြားရေးဝန်ကြီးဌာနက ပြောကြားခဲ့ပါသည်။
အစ္စရေးက ဂါဇာကမ်းမြောင်ဒေသသို့ ဝင်ရောက်ခွင့် ကန့်သတ်ချက်များကို ဇန်နဝါရီ ၂၇ ရက်နေ့က ရုတ်သိမ်းလိုက်ပြီးသည့်နောက် ပါလက်စတိုင်းတို့သည် ဂါဇာမြောက်ပိုင်းမှ ၎င်းတို့၏နေအိမ်များဆီသို့ ပြန်နေကြပြီဖြစ်သည်။
အရပ်သားအမျိုးသမီးတစ်ဦးအပါအဝင် နောက်ထပ် ဓားစာခံ ၃ ဦးကို ယခုလကုန်၌ ပြန်လွှတ်ပေးမည်ဟု ဟားမက်စ်က ကြေညာပြီးသည့်နောက် အစ္စရေး၏ ယခုကဲ့သို့သော လုပ်ဆောင်ချက်ထွက်ပေါ်လာခြင်းဖြစ်သည်။ ပင်လယ်ကမ်းစပ်လမ်းတစ်လျှောက် မြောက်ဘက်သို့ခြေလျင်လျှောက်ကာ နေအိမ်များဆီ သို့ ပြန်နေကြသော လူစုလူဝေးကို ဝေဟင်မှ ရိုက်ကူးထားသည့်ပုံရိပ်များ၌ တွေ့ရပါသည်။