ယူကရိန်းသမ္မတ ဗလာဒီမာဇီလန်စကီး၏ မွေးရပ်မြို့ရှိ ဟိုတယ်တစ်ခုကို မတ်လ (၅) ရက်နေ့ ညပိုင်းတွင် ရုရှားက ဒုံးကျည်ဖြင့် တိုက်ခိုက်ခဲ့ရာ (၃) ဦး သေဆုံးပြီး (၃၁) ဦး ဒဏ်ရာရရှိခဲ့ကြောင်းနှင့် ဒဏ်ရာရသူများ အနက် ထက်ဝက်ခန့်မှာ စိုးရိမ်ရသည့်အခြေအနေတွင်ရှိကြောင်း၊ ထို့အပြင် အဆိုပါပစ်ခတ် တိုက်ခိုက်မှုကြောင့် (၁၄) ခန်းပါ ဟိုတယ်အဆောက်အဦ (၁) လုံး၊ စာတိုက် (၁) ခု၊ ကားအစီး (၂၀) ကျော် နှင့် ယဉ်ကျေးမှု အဆောက်အဦ (၁) လုံး၊ ဈေးဆိုင် (၁၂) ဆိုင် ပျက်စီးခဲ့ရကြောင်း ယူကရိန်းအာဏာပိုင်များက ထုတ်ဖော် ပြောကြားခဲ့ပါသည်။

ဂါဇာကမ်းမြောင်ဒေသရှိ ကလေးသူငယ်များအတွက် ယာယီစာသင်ကျောင်းများ ပြန်လည်ဖွင့်လှစ်သင်ကြားနေပြီ ဖြစ်သော်လည်း ကလေးများအနေဖြင့် စိတ်ဒဏ်ရာများခံစားနေရကာ အစ္စရေးနှင့် ဟားမက်တို့အကြား ယာယီ အပစ်အခတ်ရပ်စဲရေးကို “ဆက်လက်ဖော်ဆောင်နိုင်ပါ့မလား” ဆိုသည့်အပေါ် စိုးရိမ်စိတ်များ ရှိနေကြကြောင်း UNICEF က ပြောကြားခဲ့ပါသည်။

UNICEF ၏ ခန့်မှန်းချက်အရ ဂါဇာဒေသရှိ စာသင်ကျောင်းများ၏ ၉၀ ရာခိုင်နှုန်း ကျော်သည် အစ္စရေး၏ တိုက်ခိုက်မှုကြောင့် ပျက်စီးခဲ့ရကြောင်း၊ ကျန်ရှိသည့်စာသင်ကျောင်းအနည်းငယ်မှာလည်း ကယ်ဆယ်ရေးစခန်းများ အဖြစ် အသုံးပြုလျက်ရှိကြောင်း သိရှိရပါသည်။

အမေရိကန် အိမ်ဖြူတော် ပြန်ကြားရေးတာဝန်ခံ Karoline Leavitt ၏ အမေရိကန်စစ်ရေယာဉ်အား အခမဲ့ ဖြတ်သန်းခွင့်ပြုထားသည်ဟူသော ပြောဆိုချက်ကို ပနားမားတူးမြောင်း အာဏာပိုင်အဖွဲ့က မတ် ၅ ရက်တွင် ငြင်းဆိုခဲ့သည်။ (အမေရိကန်သင်္ဘောများ အပါအဝင်) တူးမြောင်းဖြတ်သန်းခကို မည်သည့်ပြင်ဆင်မှုမျှ လုပ်ဆောင်ထားခြင်းမရှိဟု တူးမြောင်းအာဏာပိုင်အဖွဲ့က အလေးထား ပြောကြားခဲ့သည်။

အစ္စရေး ကာကွယ်ရေးတပ် (IDF) ၏ ၂၄ ဦးမြောက် အကြီးအကဲအဖြစ် အိုင်ယာ ဇာမီယာက မတ် ၅ ရက်၌ စတင်တာဝန်ယူခဲ့ပြီး အစ္စရေး၏ စစ်မျက်နှာအသီးသီးတွင် ဖွင့်ထားသော စစ်ပွဲကို ဆက်လက်ဆင်နွှဲမည် ဖြစ်ကာ ရန်သူများကို ပြင်းပြင်းထန်ထန် ချေမှုန်းသွားမည်ဖြစ်ကြောင်း ကတိပြုခဲ့သည်။