မြန်မာနိုင်ငံမှာ မတ်လ ၂၈ရက်က လှုပ်ခတ်ခဲ့တဲ့အင်အားပြင်းငလျင်နဲ့ပတ်သက်ပြီး ရုရှားနိုင်ငံအပါအဝင် နိုင်ငံအချို့က ကူညီကယ်ဆယ်ရေးပစ္စည်းတွေ၊ ကူညီကယ်ဆယ်ရေးသမားတွေကိုမတ်လ ၂၉ ရက်မှာ စေလွှတ်ကူညီခဲ့တယ်လို့ သိရပါတယ်။
အာဆီယံအဖွဲ့ဝင်တစ်နိုင်ငံဖြစ်တဲ့ မလေးရှားနိုင်ငံက မြန်မာနိုင်ငံကို အဖွဲ့ဝင် ၅၀ ဦးပါဝင်တဲ့ ကူညီကယ်ဆယ်ရေးအဖွဲ့တစ်ဖွဲ့စေလွှတ်ခဲ့ပြီး မတ်လ ၂၉ ရက်မှာ ရန်ကုန်မြို့ကိုရောက်ရှိလာခဲ့တယ်လို့ သိရပါတယ်။

မြန်မာနိုင်ငံတွင် လှုပ်ခတ်ခဲ့သော ငလျင်နှင့် ပတ်သက်၍ နိုင်ငံတော်စီမံအုပ်ချုပ်ရေးကောင်စီ ဥက္ကဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ထံ ဝမ်းနည်းကြောင်း ဆက်သွယ် စကား ပြောကြားခဲ့သည်ဟု အိန္ဒိယ ဝန်ကြီးချုပ် Narendra Modi က ၎င်း၏ လူမှုကွန်ယက် X စာမျက်နှာထက်တွင် ရေးသားထားချက်အရ သိရသည်။

ဥရောပသမဂ္ဂသည် ငလျင်ဒဏ် ထိခိုက်နေသော မြန်မာနိုင်ငံအတွက် ကနဦး အရေးပေါ်အကူအညီအဖြစ် ယူရို ၂.၅ သန်း ကူညီပံ့ပိုးရန် ဆုံးဖြတ်လိုက်ကြောင်းသိရသည်။
ယင်းအထောက်အပံဖြင့် လူသားချင်းစာနာထောက်ထားမှုဆိုင်ရာ ခွဲဝေချထားပေးမှုသည် မြန်မာနိုင်ငံရှိ အထိခိုက်လွယ်ဆုံးသူများ၏ အရေးပေါ်လိုအပ်ချက်များကို ဖြည့်ဆည်းပေးရန်နှင့် အသက်များကို ကယ်တင်ရန်အတွက် အထောက်အကူဖြစ်စေမည် ဖြစ် ကြောင်းထုတ်ပြန်ချက်တွင်ဖေါ်ပြထားသည်။
ဥရောပသမဂ္ဂသည် နောက်ထပ်အကူအညီများ ပေးအပ်ပံ့ပိုးနိုင်ရန်အတွက် မြေပြင်အခြေအနေနှင့် လိုအပ်ချက်များကို အကဲဖြတ်စုံစမ်းစစ်ဆေးလျှက်ရှိကြောင်း သိရသည်။

ငလျင်ဒဏ်ကြောင့် တစ်နိုင်ငံလုံး အတိုင်းအတာဖြင့် လူပေါင်း တစ်ထောင်ကျော် သေဆုံးပြီး ပမာဏ ထပ်မံ မြင့်တက်ဖွယ်ရှိကြောင်း နိုင်ငံတော်စီမံအုပ်ချုပ်ရေး ကောင်စီက ထုတ်ပြန်ထားသော အချက်အလက်များအရ သိရသည်။