15 June 2025

လက်နက်ကိုင်အကြမ်းဖက်အဖွဲ့များသည် မျိုးဆက်သစ်ကလေးသူငယ်များ၏ ပညာရေးကဏ္ဍ တိုးတက်မြင့်မားစေရန် အခြေခံပညာစာသင်ကျောင်းများ ဖွင့်လှစ်သင်ကြားနေမှုအား နှောင့်ယှက် ဖျက်ဆီးလိုသည့် ရည်ရွယ်ချက်များဖြင့် ကျောင်းသုံးပုံနှိပ်စာအုပ်များ၊ စာရေးကိရိယာများအား လုယက်ယူဆောင်ဖျက်ဆီးခြင်း၊ ပညာရေးဝန်ထမ်းများ၊ ကျောင်းသားမိဘများနှင့် ကျောင်းသား/ကျောင်းသူများအား ခြိမ်းခြောက်ဖမ်းဆီးခြင်း၊ သတ်ဖြတ်ခြင်း၊ ပညာရေးဆိုင်ရာ အဆောက်အအုံများအား မိုင်းထောင်ဖောက်ခွဲခြင်း၊ ခြိမ်းခြောက်စာများပေးပို့ခြင်းစသည့် အကြမ်းဖက်မှုလုပ်ရပ်များအား လုပ်ဆောင်လျက်ရှိပါသည်။
 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၄ ရက် နံနက် ၉ နာရီတွင် မန္တလေးတိုင်းဒေသကြီး၊ ညောင်ဦးမြို့နယ်၊ အမှတ်(၁)ရပ်ကွက်၊ သိရိမင်္ဂလာရပ်၌ Grade-12 တက္ကသိုလ်ဝင် စာမေးပွဲအား ပြန်လည်ဖြေဆိုရန် ရောက်ရှိတည်းခိုနေသည့် မန္တလေးတိုင်းဒေသကြီး၊ ညောင်ဦးမြို့နယ်၊ ကုလားတဲကျေးရွာ၊ အခြေခံပညာအထက်တန်းကျောင်းခွဲမှ ကျောင်းသား/ကျောင်းသူ ကိုးဦးအနက် မညဥ-၆၃၂ မခင်သက်ထား၊ မညဥ-၆၃၅ မဂျူးဂျူးစုလှိုင်၊ မညဥ-၆၃၆ မတိုးအိဝေ၊ မညဥ-၆၃၇ မယမင်းသူ၊ မညဥ-၆၃၈ မမြမြသက်၊ မညဥ-၆၃၉ မောင်ချမ်းမြေ့အောင်တို့ ခြောက်ဦး(ကျောင်းသား တစ်ဦး၊ ကျောင်းသူ ငါးဦး)တို့၏မိဘများအား PDF အကြမ်းဖက်အဖွဲ့က ခြိမ်းခြောက်မှုကြောင့် ပြန်လည်ခေါ်ဆောင်သွားကြောင်းနှင့် ကျန်ရှိသည့် မညဥ-၆၃၁ မောင်အာကာချမ်းမြေ့ကျော်၊ မညဥ-၆၃၃ မောင်ထွန်းနိုင်လင်း၊ မညဥ-၆၃၄ မောင်တင်ဦးလှိုင်တို့ သုံးဦးအား ၎င်းတို့၏မိဘများမှ လာရောက်ခေါ်ဆောင်မည်ဖြစ်ကြောင်း သိရှိရသဖြင့် လုံခြုံရေးတပ်ဖွဲ့ဝင်များက သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်း၍ ကျောင်းသား/ ကျောင်းသူများ စာမေးပွဲပြန်လည်ဖြေဆိုနိုင်ရေး ဆောင်ရွက်လျက်ရှိကြောင်း သိရသည်။
 အထက်ပါဖြစ်စဉ်မှ ပညာရေးကဏ္ဍ တိုးတက်မြင့်မားစေရန် အခြေခံပညာစာသင်ကျောင်းများ ဖွင့်လှစ်သင်ကြားမှုကို နှောင့်ယှက်ဖျက်ဆီးလိုသည့် ရည်ရွယ်ချက်ဖြင့် ကျောင်းသားမိဘများအား ခြိမ်းခြောက်ခြင်းများ လုပ်ဆောင်ခဲ့သည့် အကြမ်းဖက်သမားများအား ဖမ်းဆီးအရေးယူနိုင်ရေးနှင့် နယ်မြေဒေသ တည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေး လုပ်ငန်းစဉ်များနှင့်အညီ ဆောင်ရွက်ပေးလျက်ရှိကြောင်း သတင်းရရှိပါသည်။

MOHA

လက်နက်ကိုင်အကြမ်းဖက်အဖွဲ့များသည် နိုင်ငံတော်မှ မျိုးဆက်သစ်ကလေးသူငယ်များ၏ ပညာရေးတိုးတက်မြင့်မားစေရန် အခြေခံပညာစာသင်ကျောင်းများ ဖွင့်လှစ်သင်ကြားနေမှုအား နှောင့်ယှက်ဖျက်ဆီးလိုသည့် ရည်ရွယ်ချက်များဖြင့် ကျောင်းသုံးပုံနှိပ်စာအုပ်များ၊ စာရေးကိရိယာများအား လုယက်ယူဆောင်ဖျက်ဆီးခြင်း၊ ပညာရေးဝန်ထမ်းများနှင့် ကျောင်းသား၊ ကျောင်းသူများအား ခြိမ်းခြောက် ဖမ်းဆီးခြင်း၊ သတ်ဖြတ်ခြင်း၊ ပညာရေးဆိုင်ရာ အဆောက်အအုံများအား မိုင်းထောင်ဖောက်ခွဲခြင်း၊ ခြိမ်းခြောက်စာများပေးပို့ခြင်း စသည့်အကြမ်းဖက်မှုလုပ်ရပ်များအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၂ ရက် ညနေ ၅ နာရီတွင် ချင်းပြည်နယ်၊ တီးတိန်မြို့နယ်၊ တီးတိန်မြို့ပေါ်ရှိ အခြေခံပညာစာသင်ကျောင်း ရှစ်ကျောင်းမှ ပညာရေးဝန်ထမ်းများထံသို့ အကြမ်းဖက်အဖွဲ့(စိစစ်ဆဲ)က ခြိမ်းခြောက်စာများပေးပို့သွားကြောင်း သတင်းအရ လုံခြုံရေးတပ်ဖွဲ့ဝင်များက ဖြစ်စဉ်အားစိစစ်ခဲ့ရာ တီးတိန်မြို့၊ လေးလုမ်းရပ်ကွက်နေသူများဖြစ်ကြသည့် အမှတ်(၆)အခြေခံပညာမူလတန်းလွန်ကျောင်းမှ ကျောင်းအုပ်ဆရာမ ဒေါ်မန်းဇဝုန် (၅၄)နှစ်၊ အမှတ်(၁)အခြေခံပညာမူလတန်းကျောင်းမှ ကျောင်းအုပ်ဆရာမ ဒေါ်နိန်ခေါမန်း(၅၃)နှစ်၊ လွယ်ဘွာလ်းရပ်ကွက်နေသူများဖြစ်ကြသည့် အမှတ်(၅)အခြေခံပညာအလယ်တန်းကျောင်းခွဲမှ ကျောင်းအုပ်ဆရာမ ဒေါ်ဇမ်းခန့်နွမ်း(၃၈)နှစ်၊ အမှတ်(၂)အခြေခံပညာအထက် တန်းကျောင်းမှ ကျောင်းအုပ်ဆရာမ ဒေါ်ကျောင်ငိုက်လွန်း(၃၄)နှစ်၊ မြို့မရပ်ကွက်နေသူများဖြစ်ကြသည့် အမှတ်(၂)အခြေခံပညာအထက်တန်းကျောင်းခွဲမှ အလယ်တန်းပြဆရာမ ဒေါ်ကျင်းအင်းညောင် (၅၃)နှစ်၊ ရုံးအကူဝန်ထမ်း ဒေါ်ဝုန်ရှန်းမွဲ(၂၅)နှစ်၊ စကောလမ်းရပ်ကွက်နေသူများဖြစ်ကြသည့် အမှတ်(၁)အခြေခံပညာအထက်တန်းကျောင်းမှ ကျောင်းအုပ်ဆရာမ ဒေါ်မန်းတူလ်ကျိန် (၅၆)နှစ်နှင့် အမှတ်(၃)အခြေခံပညာမူလတန်းကျောင်းမှ ကျောင်းအုပ်ဆရာမ ဒေါ်ကျင့်မင့်ထန်(၄၉)နှစ်တို့ ရှစ်ဦးအား အသက် ၂၀ နှစ်ခန့်ရှိ အကြမ်းဖက်သမား နှစ်ဦး(စိစစ်ဆဲ)က ဆိုင်ကယ် တစ်စီးဖြင့် ရောက်ရှိလာပြီး ခြိမ်းခြောက်စာများပေးအပ်ခဲ့ကြောင်း အဆိုပါစာတွင် တီးတိန်မြို့နယ်အတွင်း စစ်ကောင်စီ၏ ပညာရေးလုပ်ငန်းဖော်ဆောင်မှုများကို Zomi Federal Union(ZFU) ၏ ပညာရေးဌာနတစ်ခုဖြစ်သော တီးတိန်မြို့နယ်ပညာရေးဘုတ်အဖွဲ့သည် လုံးဝ(လုံးဝ)တားမြစ်ထားပါကြောင်း စစ်ကောင်စီ၏ လက်ပါးစေဝန်ထမ်းများသည် ပြည်သူ့ပညာ ရေးလုပ်ငန်းများတွင် မိမိကိုယ်ကျိုးအတွက်သာရည်စူး၍ တော်လှန်ရေးလုပ်ငန်းများ အနှောက်အယှက်ဖြစ်စေသော လုပ်ဆောင်မှုများကို ထပ်မံတွေ့ရှိပါက ZFU/PDF-Zoland၊ PPF-Zoland၊ မြို့နယ်ပြည်သူ့အုပ်ချုပ်ရေးအဖွဲ့နှင့်အတူ လက်တွဲ၍ လိုအပ်သလို ပြတ်ပြတ်သားသား အရေးယူဆောင်ရွက်မည်ဖြစ်ကြောင်း ဖော်ပြထားသည့် ခြိမ်းခြောက်စာများအား ပေးအပ်ခဲ့ကြောင်း သိရှိရသည်။
အထက်ပါဖြစ်စဉ်မှ ပညာရေးကဏ္ဍတိုးတက်မြင့်မားစေရန် အခြေခံပညာစာသင်ကျောင်းများ ဖွင့်လှစ်သင်ကြားမှုကို နှောင့်ယှက်ဖျက်ဆီးလိုသည့် ရည်ရွယ်ချက်ဖြင့် ကျောင်းဆရာ/ဆရာမများအား ခြိမ်းခြောက်စာပေးပို့ခြင်းများ လုပ်ဆောင်ခဲ့သည့် အကြမ်းဖက်သမားများအား ဖမ်းဆီးအရေးယူနိုင်ရေးနှင့် နယ်မြေဒေသတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆောင်ရွက်ပေးလျက်ရှိကြောင်း သတင်းရရှိပါသည်။

MOHA

အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူ သွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများအသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၃ ရက် နံနက် ၁၁ နာရီ ၅၅ မိနစ်တွင် မကွေးတိုင်းဒေသကြီး၊ စလင်းမြို့နယ်ပြည်သူ့ဆေးရုံသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ စလင်းမြို့နယ်၊ ဥယျာဉ်စုကျေးရွာနေ မောင်ဆယ်သိန်း(၂၃)နှစ်သည် နံနက် ၉ နာရီ ၃၅ မိနစ်တွင် ကျေးရွာ၏အရှေ့ဘက် ၇ ဖာလုံခန့်အကွာရှိ ဒေသအခေါ် “အင်း” သို့ နွားစာရိတ်ရန် လမ်းလျှောက်သွားစဉ် အဆိုပါနေရာအနီးအရောက် PDF အမည်ခံ အကြမ်းဖက်အဖွဲ့ထောင်ထားသည့် နင်းမိုင်း တစ်လုံးအား နင်းမိပေါက်ကွဲခဲ့မှုကြောင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိပါသည်။

MOHA

၂၀၂၅ ခုနှစ်၊ ဇွန် ၁၂ ရက် နံနက် ၁၂ နာရီ ၁၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မိုင်းဆတ်မြို့နယ်၊ မဟုန်လွယ်ကျေးရွာအုပ်စု၊ မဟုန်လွယ်ကျေးရွာအနီးတွင် သတင်းအရစောင့်ဆိုင်းနေစဉ် ယောင်ခကျေးရွာဘက်မှ မိုင်းဆတ်မြို့ဘက်သို့ ချိန်ကိုးချိန်(ခ)အားချန် မောင်းနှင်လာသော DONG FENG အမျိုးအစား ခြောက်ဘီး မော်တော်ယာဉ်အား ရပ်တန့်စစ်ဆေးရှာဖွေရာ ယာဉ်ခေါင်းခန်းနောက် ထိုင်ခုံပေါ်ရှိ စက္ကူဂျပ်ဖာအတွင်းမှ အိုက်စ်(မက်သ်အဖက်တမင်း) ၃၆ ဒသမ ၉ ကီလို (တစ်ကီလိုလျှင် ငွေကျပ်သိန်း ၈၀ နှုန်းဖြင့် ၎င်းဒေသတန်ဖိုး ငွေကျပ် ၂၉၅၂ သိန်း) ဖမ်းဆီးရမိသဖြင့် ချိန်ကိုးချိန်(ခ)အားချန်(၄၄)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိပါသည်။

MOHA

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များအသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၃ ရက် ညနေ ၄ နာရီ ၃၀ မိနစ်တွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးပြည်သူ့ဆေးရုံကြီး၌ ကျည်ထိမှန်ဒဏ်ရာများဖြင့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ မကွေးတိုင်းဒေသကြီး၊ ပခုက္ကူမြို့၊ အမှတ်(၂)ရပ်ကွက်နေ ဒေါ်ယမင်းဖြိုး(၃၁)နှစ်သည် ဇွန် ၁၁ ရက် နံနက် ၁၁ နာရီတွင် ပခုက္ကူမြို့မှ ကမ္မမြို့သို့ ဆိုင်ကယ်ဖြင့်သွားရောက်စဉ် ကမ္မမြို့အနီးအရောက် PDF အမည်ခံ အကြမ်းဖက်အဖွဲ့ အင်အား(စိစစ်ဆဲ)က သေနတ်ဖြင့် ပစ်ခတ်ခဲ့သဖြင့် ကျည်ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

၂၀၂၅ ခုနှစ်၊ ဇွန် ၁၀ ရက် ညနေ ၄ နာရီ ၅၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သာစည်မြို့နယ်၊ ကျွဲတပ်ဆုံကျေးရွာအနီးတွင် တာချီလိတ်မှ မိတ္ထီလာသို့ ယာဉ်မောင်း ထူးအိဏ် မောင်းနှင်ပြီး ယာဉ်နောက်လိုက် စိန်လင်း လိုက်ပါလာသည့် TOYOTA HIACE ခရီးသည်တင်ယာဉ်အား ရပ်တန့်စစ်ဆေးရှာဖွေရာ ယာဉ်၏ နောက်ဆုံးထိုင်ခုံနှင့်ကပ်လျက် အိမ်သုတ်ဆေးဗူးကြီးအတွင်းမှ စိတ်ပြောင်းဆေးဝါး အက်တက်စီ ဆေးပြား ၅,၀၀၀ ပြား (တစ်ပြားလျှင် ငွေ ၅၀,၀၀၀ ကျပ်နှုန်းဖြင့် ၎င်းဒေသတန်ဖိုး ငွေကျပ် ၂၅၀၀ သိန်း)နှင့် ဆေးခြောက် ၀.၆ ကီလို (တစ်ကီလိုလျှင် ငွေကျပ် ၄.၅ သိန်းနှုန်းဖြင့် ၎င်းဒေသတန်ဖိုး ငွေကျပ် ၂ ဒသမ ၇ သိန်း)တို့အား သိမ်းဆည်းရမိခဲ့သည်။
ကွင်းဆက်စစ်ဆေးဖော်ထုတ်ချက်အရ ညနေ ၅ နာရီ ၁၅ မိနစ်တွင် မူးယစ်ဆေးဝါးများအား တင်ဆောင်ပေးသူ မာမာသက်အား တာချီလိတ်မြို့၊ ရန်အောင်မြေရပ်ကွက်၊ ပါလျှံ(၁)ရှိနေအိမ်တွင် လည်းကောင်း၊ ဇွန် ၁၁ ရက် ည ၁၀ နာရီ ၂၅ မိနစ်တွင် မူးယစ်ဆေးဝါးများ ပို့ဆောင်ခိုင်းသူ ပြည့်စိုးအား တာချီလိတ်မြို့၊ ရန်အောင်မြေရပ်ကွက် လမ်းမပေါ်တွင်လည်းကောင်း၊ ဇွန် ၁၂ ရက် မွန်းလွဲ ၂ နာရီတွင် မူးယစ်ဆေးဝါးများပို့ဆောင်ရန် လက်ခံဆောင်ရွက်သူ နေလင်းအောင်အား တာချီလိတ်မြို့၊ ပါလျှံ(၁)လမ်းပေါ်တွင်လည်းကောင်း အသီးသီးဖမ်းဆီးရမိသဖြင့် ထူးအိဏ်(၂၃)နှစ်၊ စိန်လင်း(၂၀)နှစ်၊ မာမာသက်(၃၂)နှစ်၊ ပြည့်စိုး(၂၈)နှစ်၊ နေလင်းအောင်(၃၇)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိပါသည်။

MOHA

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် နိုင်ငံ့ဝန်ထမ်းများနှင့် အေးချမ်းစွာ နေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၂ ရက်တွင် စစ်ကိုင်းတိုင်းဒေသကြီး၊ ဟုမ္မလင်းမြို့နယ်ရှိ လုံခြုံရေးတပ်ဖွဲ့ဝင်များထံ စစ်ကိုင်းတိုင်းဒေသကြီး၊ ဖောင်းပြင်မြို့နယ်၊ ကျွန်းရွှေဝါ ရပ်ကွက်နေ နားမော်ကျေးရွာ အခြေခံပညာအထက်တန်းကျောင်းခွဲမှ လက်ထောက်မူလတန်းပြ ဆရာမဖြစ်သူ ဒေါ်စိမ့်စိမ့်သူ(၂၅)နှစ်က လာရောက်သတင်းပို့ချက်အရ ၎င်းသည် KIA အဖွဲ့နှင့် PDF အမည်ခံ အကြမ်းဖက်သမားများ ပူးပေါင်းအဖွဲ့က ဖမ်းဆီးခေါ်ဆောင်သွားရာမှ ပြန်လည်လွတ်မြောက်လာသူဖြစ်ကြောင်း သိရသဖြင့် ဖြစ်စဉ်အား စိစစ်ခဲ့ရာ ၂၀၂၄ ခုနှစ်၊ နိုဝင်ဘာ ၁၁ ရက် နံနက် ၁၁ နာရီ ၃၀ မိနစ်တွင် ၎င်းနှင့်အတူ စစ်ကိုင်းတိုင်းဒေသကြီး၊ ဟုမ္မလင်းမြို့နယ်၊ ရေလဲထိန်းကျော်ကျေးရွာနေ နားမော်ကျေးရွာ အခြေခံပညာအထက်တန်းကျောင်းခွဲမှ လက်ထောက်မူလတန်းပြဆရာမဖြစ်သူ ဒေါ်ချောစုလှိုင်(၃၀)နှစ်တို့ နှစ်ဦးသည် စာသင်ကျောင်းနှင့် မီတာ ၅၀၀ ခန့်အကွာရှိ နားမော်ကျေးရွာသို့ သွားရောက်စဉ် အကြမ်းဖက်သမားများက ပင်ခုတ်ကျေးရွာသို့ ဖမ်းဆီးခေါ်ဆောင်သွားခြင်းခံရကြောင်း။
 အဆိုပါကျေးရွာ၌ ၄၈ ရက်ခန့် ချက်ပြုတ်လျှော်ဖွတ်ခြင်းများအား ခိုင်းစေခဲ့ပြီး ၎င်းတစ်ဦးတည်းအား တောင်ပေါ်ဆယ်ကျေးရွာသို့ ထပ်မံရွှေ့ပြောင်း၍ လေးလခန့် နေထိုင်စေခဲ့ပြီး ဖောင်းပြင်မြို့နယ်၊ သငါကျေးရွာ၌ တစ်လခန့် နေထိုင်ခဲ့ကြောင်း၊ ၂၀၂၅ ခုနှစ်၊ မေ ၂၈ ရက်တွင် မော်လိုက်မြို့သို့ စက်လှေ တစ်စီးဖြင့် လိုက်ပါခဲ့ကြောင်း၊ မော်လိုက်မြို့တွင် တစ်ညအိပ်ပြီးနောက် မော်လိုက်-ကလေးဝ-ကလေးခရီးစဉ်အတိုင်း ထွက်ခွာခဲ့ကာ ကလေးမြို့မှ မုံရွာမြို့သို့ လေယာဉ်ဖြင့် ဆက်လက် လိုက်ပါခဲ့ကြောင်း၊ မုံရွာမြို့၌ ငါးရက်ခန့် နေထိုင်ပြီးနောက် ဇွန် ၈ ရက်တွင် မုံရွာမြို့မှ ဟုမ္မလင်းမြို့သို့ လေယာဉ်ဖြင့် ထပ်မံလိုက်ပါခဲ့ပြီး ဇွန် ၉ ရက်တွင် ဟုမ္မလင်းမြို့ရှိ လုံခြုံရေးတပ်ဖွဲ့ဝင်များထံ သတင်းပို့ခဲ့ကြောင်း၊ ဇွန် ၁၂ ရက်တွင် ဟုမ္မလင်းမြို့နယ်ပညာရေးမှူးရုံး၊ မြို့နယ်အထွေထွေအုပ်ချုပ်ရေးဦးစီးဌာနရုံးနှင့် လုံခြုံရေးတပ်ဖွဲ့ဝင်များထံသို့ လာရောက်သတင်းပို့ခဲ့ခြင်းဖြစ်ကြောင်း စစ်ဆေးသိရှိရသည်။
 အထက်ပါဖြစ်စဉ်မှ နိုင်ငံ့ဝန်ထမ်းများနှင့် ဒေသခံပြည်သူများအား ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက် ဆောင်ရွက်လျက်ရှိကြောင်း သတင်းရရှိပါသည်။

MOHA

အစွန်းရောက်အကြမ်းဖက်သမားများသည် အေးချမ်းစွာနေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၂ ရက် နံနက် ၁၀ နာရီ ၁၅ မိနစ်တွင် မွန်ပြည်နယ်၊ ကျိုက်ထိုမြို့နယ်ပြည်သူ့ဆေးရုံသို့ မိုင်းစထိမှန်ဒဏ်ရာ ရရှိထားသည့် အမျိုးသား နှစ်ဦးနှင့် အမျိုးသမီး နှစ်ဦးတို့ ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက် စစ်ဆေးခဲ့ရာ မွန်ပြည်နယ်၊ သိမ်ဇရပ်မြို့၊ အမှတ်(၄)ရပ်ကွက်ကြီး၊ နဝရတ်ရပ်ကွက်နေသူများဖြစ်သည့် ကိုမျိုးမင်းခန့်(၂၆)နှစ်၊ ဦးဘညွန့်(ခ)ဦးပန်းညွန့်၆၁)နှစ်၊ မသဲသဲ(၂၈)နှစ်နှင့် ပဲခူးတိုင်းဒေသကြီး၊ ပဲခူးမြို့နယ်၊ ဝမ်းဘဲအင်းကျေးရွာနေ မအိအိခိုင်(၂၅)နှစ်တို့ လေးဦးတွင် မိုင်းစထိမှန် ဒဏ်ရာများ ရရှိထားသည်ကို တွေ့ရှိရ၍ ဖြစ်စဉ်အား စိစစ်ခဲ့ရာ ၎င်းတို့ လေးဦးနှင့် ကိုမျိုးသူရစိုး(ခ)မျိုးသီဟ(၂၄)နှစ် တို့သည် ကိုမျိုးမင်းခန့် မောင်းနှင်သည့် MDY-8/3I-XXXX TOYOTA WISH မော်တော်ယာဉ်ဖြင့် သိမ်ဇရပ်မှ ကျိုက်ထိုသို့ ရန်ကုန်-မော်လမြိုင်ကားလမ်းအတိုင်း မောင်းနှင်လာစဉ် ကျိုက်ထိုမြို့နယ်၊ ဘိုက္ကားကျေးရွာရှိ “ဒေါင်းတောင် ဝါးဟားဟား” ကလေးကစားကွင်းအနီး ရန်ကုန်-မော်လမြိုင် ကားလမ်းမကြီး မိုင်တိုင်အမှတ် ၁၀၂ မိုင် ၃ ဖာလုံနှင့် ၄ ဖာလုံအနီး ကားလမ်းဘေး၌ KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမားများ ပူးပေါင်းအဖွဲ့က ထောင်ထားသည့် မိုင်း တစ်လုံးအား ကားဘီးဖြင့် နင်းမိပေါက်ကွဲမှုကြောင့် ၎င်းတို့ လေးဦးတွင် ထိခိုက်ဒဏ်ရာများ ရရှိခဲ့ခြင်းဖြစ်ကြောင်းနှင့် လုံခြုံရေးတပ်ဖွဲ့ဝင်များက အခင်းဖြစ်နေရာအား သွားရောက်စစ်ဆေးခဲ့ရာ TOYOTA WISH မော်တော်ယာဉ်မှာ ဝဲဘက်ရှေ့/နောက်ဘီးများ ကွဲကာ၊ လေကာမှန်များ ကွဲကြေပြီး ယာဉ်ဝဲဘက်ခြမ်း ကိုယ်ထည် မိုင်းစထိမှန် ပျက်စီးနေသည်ကို တွေ့ရှိရသဖြင့် ပြန်လည်သယ်ဆောင်ပြုပြင်နိုင်ရေး ဆောင်ရွက်ပေးခဲ့ပါသည်။ 
    အထက်ပါဖြစ်စဉ်မှ အေးချမ်းစွာသွားလာနေသည့် အပြစ်မဲ့ အရပ်သားပြည်သူများအား ထိခိုက်စေရန် ရည်ရွယ်ချက်ဖြင့် အများပြည်သူဆိုင်ရာနေရာများ၌ မိုင်းထောင်ဖောက်ခွဲခြင်းများကဲ့သို့ အကြမ်းဖက်မှုလုပ်ရပ်များ ကျူးလွန်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး၍ ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက လုံခြုံရေးလုပ်ငန်းစဉ်များ နှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

ကရင်ပြည်နယ်၊ ကော့ကရိတ်မြို့နယ်၊ ကျုံဒိုးမြို၊ ကော့ဘော်ကျေးရွာအတွင်းသို့ KNLA အဖွဲ့နှင့် PDF အမည်ခံအကြမ်းဖက်သမားများက လက်နက်ကြီးဖြင့် အကြောင်းမဲ့ လာရောက်ပစ်ခတ်ခဲ့မှုကြောင့် အသက် ၄ နှစ် နှင့် ၉ နှစ်အရွယ် ကလေးငယ် ၂ ဦးအပါအဝင် ၆ ဦး သေဆုံးခဲ့ကြောင်း သိရှိရသည်။

ဖြစ်စဉ်မှာ ဇွန်လ ၁၂ ရက်နေ့ ညနေ ၅ နာရီခွဲခန့်တွင် KNLA အဖွဲ့နှင့် PDF အမည်ခံအကြမ်းဖက်သမားများက ကော့ဘော်ကျေးရွာ၏ အရှေ့မြောက်ဘက် မီတာ ၂၇၀၀ ခန့်အကွာမှ လက်နက်ကြီးဖြင့် အကြောင်းမဲ့ လာရောက်ပစ်ခတ်ခဲ့ရာ ကျေးရွာအတွင်းသို့ လက်နက်ကြီးကျည် ကျရောက်ပေါက်ကွဲခဲ့သဖြင့် အသက် ၄ နှစ်အရွယ် ကလေးငယ် ၁ ဦးအပါအဝင် အပြစ်မဲ့အရပ်သားပြည်သူ ၃ ဦးသေဆုံးပြီး အသက် ၉ နှစ်အရွယ် ကလေးငယ် ၁ ဦးအပါအဝင် အပြစ်မဲ့ပြည်သူ ၃ ဦး လက်နက်ကြီးစ ထိမှန်ဒဏ်ရာများ ရရှိခဲ့ကြောင်း၊ အဆိုပါထိခိုက်ဒဏ်ရာရရှိသူ ၃ ဦးအား ဘားအံမြို့ ပြည်သူ့ဆေးရုံသို့ တာဝန်ရှိသူများက ပို့ဆောင်စဉ် ရရှိသောဒဏ်ရာများဖြင့် ထပ်မံသေဆုံးသွားခဲ့ကြောင်း သိရှိရသည်။

အကြမ်းဖက်သမားများအနေဖြင့် ၎င်းတို့၏ အကြမ်းဖက်လုပ်ရပ်များအား ထောက်ခံအားပေးမှုမရှိသည့် မြို့/ရွာ/ရပ်ကွက်များအတွင်းသို့ ယခုကဲ့သို့ အကြောင်းမဲ့ ပစ်ခတ်တိုက်ခိုက်မှုများကြောင့် အပြစ်မဲ့ပြည်သူများ မကြာခဏသေဆုံးမှုများ ဖြစ်ပေါ်လျက်ရှိပြီး ပြည်သူများအနေဖြင့် ၎င်းတို့၏ အကြမ်းဖက်လုပ်ရပ်များအပေါ် ဆန့်ကျင်ရှုတ်ချလျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သည့် နယ်မြေလုံခြုံရေးလုပ်ငန်းများကို ဒေသခံပြည်သူများနှင့် ပူးပေါင်း၍ ဆက်လက်ဆောင်ရွက်လျက်ရှိကြောင်း သတင်းရရှိသည်။

MOI

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် အေးချမ်းစွာနေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။
 

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၁ ရက် မွန်းလွဲ ၁၂ နာရီ ၁၅ မိနစ်တွင် မကွေးတိုင်းဒေသကြီး၊ ရေစကြိုမြို့နယ်၊ ကံသစ်ကျေးရွာနေ ဒေါ်နုရီဝင်း(၃၅)နှစ်သည် ၎င်းနေအိမ်၌ မိသားစုနှင့်အတူ ထမင်းစားနေစဉ် PDF အမည်ခံ အကြမ်းဖက်သမား ခြောက်ဦး(စိစစ်ဆဲ)က ဆိုင်ကယ် နှစ်စီးဖြင့် ရောက်ရှိလာပြီး ဒေါ်နုရီဝင်းအား ဖမ်းဆီးခေါ်ဆောင်ကာ ကံသစ်ကျေးရွာတောင်ဘက် နှစ်မိုင်ခန့်အကွာရှိ ရေစကြိုမြို့နယ်၊ ကြီးကန်ကျေးရွာသို့ ပြန်လည်ထွက်ခွာသွားခဲ့ကြောင်း သိရသည်။
 

အထက်ပါဖြစ်စဉ်မှ ဒေသခံပြည်သူများအား ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA