ပနားမားတူးမြောင်းတွင် တရုတ်လွှမ်းမိုးမှု လျှော့ချရန် အမေရိကန် နိုင်ငံခြားရေးဝန်ကြီး Marco Rubio တောင်းဆို

ပနားမားတူးမြောင်းတွင် တရုတ်နိုင်ငံ၏ လွှမ်းမိုးမှုနှင့် ထိန်းချုပ်မှုများလျှော့ချရန်အတွက် ပြုပြင်ပြောင်းလဲမှုများချက်ချင်းပြုလုပ်သွားရန် ပနားမားနိုင်ငံအား အမေရိကန် နိုင်ငံခြားရေးဝန်ကြီး Marco Rubio က တောင်းဆို လိုက်ပါသည်။

ပနားမားနိုင်ငံအနေဖြင့် ပနားမားတူးမြောင်းအရေးကို ချက်ချင်းလုပ်ဆောင်သွားရန်နှင့် ပျက်ကွက်ပါက နှစ်နိုင်ငံစာချုပ်အရ အမေရိကန်၏ အခွင့်အရေးများကို ကာကွယ်ရန်အတွက် လိုအပ်သော အစီအမံများ လုပ်ဆောင်သွားမည်ဖြစ်ကြောင်း အမေရိကန် နိုင်ငံခြားရေးဝန်ကြီးက သတိပေးပြောကြားထားသည်။ 

ပနားမားတူးမြောင်းကို ပြန်လည်သိမ်းယူမည်ဟု သမ္မတထရမ့်က ကတိပြုပြောကြားခဲ့ပြီးနောက် ဖေဖော်ဝါရီ ၂ ရက်နေ့တွင် ပနားမားမြို့၌ Marco Rubio နှင့် ပနားမားနိုင်ငံ၏ ကွန်ဆာဗေးတစ် သမ္မတ Jose Raul Mulino တို့အကြား တွေ့ဆုံမှုအပြီး ထိုသို့ သတိပေးခဲ့ခြင်းဖြစ်သည်။

သို့သော်လည်း တူးမြောင်းကို ပြန်လည်ရယူမည်ဟူသော ထရမ့်၏ ပြောကြားမှုမှာ ပနားမားနိုင်ငံလူထုအကြား သိသိသာသာ ရိုက်ခတ်သွားခဲ့သည်။ ၃၁-၁-၂၀၂၅ ရက်နေ့ တွင် ပနားမားမြို့ရှိ ဆန္ဒပြသူများက Trump နဲ့ Marco Rubio တို့၏ ဓာတ်ပုံများကို မီးရှို့ခဲ့ကြပါသည်။ 

အဓိကရုဏ်း နှိမ်နင်းရေးရဲများသည် အခြားဆန္ဒပြသူ လူအုပ်ကြီးအား မျက်ရည်ယိုဗုံးများဖြင့် ပစ်ခတ်၍ လူစုကွဲစေရန် အင်အားသုံးဖြိုခွင်းခဲ့ရပါသည်။ အဆိုပါဆန္ဒပြပွဲသည် မကြီးမားသော်လည်း အမေရိကန်သမ္မတ၏ ပြောဆိုချက်အပေါ် ပနားမားလူထုက အကြီးအကျယ် ဒေါသထွက်တုံ့ပြန်ကြခြင်းပင် ဖြစ်သည်။

တူးမြောင်းပိုင်ဆိုင်မှုပြဿနာအား Rubio နှင့် ဆွေးနွေး ရန်မလိုအပ်ကြောင်း၊ တူးမြောင်းနှင့် ပတ်သက်၍ စေ့စပ်ညှိနှိုင်းရေးလုပ်ငန်းများ ပြုလုပ်မည်မဟုတ်ကြောင်းနှင့် တူးမြောင်းသည် ပနားမားအပိုင်ဖြစ်ကြောင်း ပနားမား သမ္မတ Mulino က ဇန်နဝါရီ ၃၀ ရက်နေ့တွင် ပြောကြားထားပါသည်။

ပနားမားတူးမြောင်းတွင်တရုတ်စစ်သားများ စောင့်ကြပ်နေပြီး ပနားမားနိုင်ငံသည် နှစ်နိုင်ငံသဘောတူညီချက်ကို ဆန့်ကျင်၍ အမေရိကန်သင်္ဘောများကို အခြားနိုင်ငံသင်္ဘောများထက် ဖြတ်သန်းခ ပိုမိုကောက်ခံနေသည်ဟူသော ထရမ့်၏ စွပ်စွဲချက်မှာ အခြေအမြစ်မရှိကြောင်း Mulino က ပြောကြားလိုက်ပါသည်။

ကိုးကား-BBC