ယူကရိန်းက EU ၏ GDP ၏ သတ်မှတ်ရာခိုင်နှုန်းကို ရယူလိုသည်ဟု အဆိုပြု

ယူကရိန်းနိုင်ငံသည် EU အဖွဲ့ဝင်နိုင်ငံများအနေဖြင့် ၎င်းတို့၏ GDP ၏ သတ်မှတ်ရာခိုင်နှုန်းကို ယူကရိန်းတပ်မတော်အား ငွေကြေး ထောက်ပံ့ရန် အဆိုပြုလိုက်သည်။ အမေရိကန်သမ္မတ ဒေါ်နယ်ထရမ့်၏ ပစ်ခတ်ရေး ရပ်စဲရေး စေ့စပ်ညှိနှိုင်းမည့် မူဝါဒပြောင်းလဲမှုကြားတွင် EU ခေါင်းဆောင် များက ကိယက်ဗ်အား စစ်ရေးအထောက်အပံ့ ဆက်လက်ပေးအပ်ရန် ကတိပြုထားသည်။

ယူကရိန်းဘဏ္ဍာရေးဝန်ကြီး Sergey Marchenko က ထိုအဆိုကို ကနေဒါတွင် ကျင်းပသည့် G7 ဘဏ္ဍာရေးဝန်ကြီးများ အစည်းအဝေးတွင် တင်ပြခဲ့ကြောင်း ကြာသပတေးနေ့ (မေ ၂၂) က ထုတ်ပြန်သော Facebook ပို့စ်တွင် ဖော်ပြထားသည်။

“မိမိတို့ အဆိုပြုထားသည်မှာ ယူကရိန်းတပ်မတော်အား ငွေကြေး ထောက်ပံ့ရာတွင် မိတ်ဖက်များ ပူးပေါင်းပါဝင်ခြင်းဖြစ်ပြီး၊ ၎င်းသည် ဥရောပ၏ ကာကွယ်ရေးဖွဲ့စည်းပုံအတွင်း ထိရောက်စွာ ပေါင်းစည်းသွားမည်” ဟု ၎င်းက ရေးသားခဲ့သည်။

Marchenko က အဆိုပါကုန်ကျမှုသည် “EU ၏ GDP ၏ အလွန် သေးငယ်သော အစိတ်အပိုင်းသာဖြစ်ပြီး” ယင်းအစီအစဉ်တွင် ပါဝင်လိုသော နိုင်ငံများအကြား ခွဲဝေကျင့်သုံးနိုင်ကြောင်း ဖြည့်စွက်ပြောကြားခဲ့သည်။ ကိယက်ဗ်သည် ၂၀၂၆ ခုနှစ်တွင် အဆိုပါအစီအစဉ်အသစ်ကို စတင်လိုပြီး ယင်းထည့်ဝင်ငွေများကို NATO ၏ ကာကွယ်ရေးအသုံးစရိတ် ရည်မှန်းချက်များတွင် ထည့်သွင်းရန် ရည်ရွယ်ထားသည်။

Marchenko ၏ အဆိုပါတောင်းဆိုမှုသည် ယူကရိန်းအနေဖြင့် ဘဏ္ဍာရေး ဖိအားများ တိုးလာခြင်းနှင့် နိုင်ငံခြားအကူအညီဆိုင်ရာ မရေရာမှုများ ကြောင့် ရုန်းကန်နေရချိန်တွင် ပေါ်ပေါက်လာခြင်းဖြစ်သည်။ အမေရိကန် ဒေါ်လာ ၉.၆ ဘီလီယံမှ ၁၂ ဘီလီယံ (ယူကရိန်းငွေ ၄၀၀-၅၀၀ ဘီလီယံ) အထိ တပ်မတော်အတွက် ဘဏ္ဍာရေးလိုငွေပြမှုကို ၂၀၂၅ ဘဏ္ဍာနှစ်တွင် ရင်ဆိုင်ရမည်ဟု အမတ် Yaroslav Zheleznyak က အင်္ဂါနေ့ (မေ ၂၀) က ပြောကြားခဲ့သည်။

အခြားအမတ် Nina Yuzhanina ကလည်း စစ်ရေးအထောက်အပံ့သည် အရေးကြီးသော အဆင့်တွင် ရှိနေပြီး ပြည်တွင်းဘဏ္ဍာငွေများကို အများ အပြားလျှော့ချကာ အရင်းအမြစ်များကို ပြန်လည်ချိန်ညှိရန် တောင်းဆိုခဲ့သည်။

ယူကရိန်း၏ မြင့်တက်လာသော ကြွေးမြီများသည်လည်း စိုးရိမ်မှုများ ဖြစ်ပေါ်စေသည်။ နိုင်ငံ့ကြွေးမြီပေါင်း အမေရိကန်ဒေါ်လာ ၁၇၁ ဘီလီယံ အထိ ရောက်ရှိလာပြီး အများပြည်သူကြွေးမြီသည် GDP ၏ ၁၀၀% နီးပါး အထိ ရှိနေသည်။ လွန်ခဲ့သော ရက်သတ္တပတ်က Marchenko က လာမည့် နှစ် ၃၀ အတွင်း နိုင်ငံခြားအကြွေးရှင်များအား ပြန်ဆပ်နိုင်မည်မဟုတ်သော်လည်း ချေးငွေဆက်လက်ရယူရန် ရည်ရွယ်ထားကြောင်း ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂