အိန္ဒိယနိုင်ငံ၏ နည်းပညာမြို့တော်ဟု တင်စားခေါ်ဝေါ်ကြသော ဘန်ဂါလူရူတွင် မိုးသည်းထန်စွာ ရွာသွန်းမှုများကြောင့် ရေလျှံမှုများဖြစ်ပွားခဲ့သည်။ အဆိုပါမြို့သည် အိန္ဒိယ၏ “ဆီလီကွန်တောင်ကြား” (Silicon Valley) အဖြစ် လူသိများပြီး နိုင်ငံတကာနည်းပညာကုမ္ပဏီကြီး များ၏ ရုံးချုပ်များ တည်ရှိရာနေရာဖြစ်သည်။
မိုးသည်းထန်စွာ ရွာသွန်းမှုများကြောင့် မြို့၏အဓိကလမ်းမကြီးများတွင် ရေများလျှံတက်ကာ ယာဉ်ကြောပိတ်ဆို့မှုများ ဖြစ်ပေါ်ခဲ့သည်။ နေအိမ်များနှင့် စီးပွားရေးလုပ်ငန်းများလည်း ရေလွှမ်းမိုးမှုဒဏ်ကို ခံစားခဲ့ရသည်။ ဒေသခံများက မြို့တော်၏ မိလ္လာနှင့် ရေဆင်းလမ်းကြောင်းစနစ် ညံ့ဖျင်းမှုကို ပြဿနာ၏ အဓိကအကြောင်းရင်းအဖြစ် ဝေဖန်ခဲ့ကြသည်။ ရာသီဥတုပြောင်းလဲမှုနှင့်အတူ ထိုကဲ့သို့သော မိုးသည်းထန်မှုများ ပိုမို မကြာခဏ ဖြစ်ပွားလာနိုင်ကြောင်း ကျွမ်းကျင်သူများက သတိပေး ထားသည်။
မိုးလေဝသ အာဏာပိုင်များထုတ်ပြန်ချက်အရ ကပ္ပလီပင်လယ်ပြင်ပေါ် တွင် မုန်တိုင်းငယ်ဖြစ်ပေါ်နေမှုကြောင့် ဘန်ဂါလူရူမြို့သည် မုတ်သုံ မတိုင်မီ မိုးသည်းထန်စွာရွာသွန်းနိုင်သည့်အတွက် အရေးပေါ်အခြေအနေ ကြေညာထားသည်ဟု သိရှိရသည်။ တနင်္လာနေ့ (မေ ၁၉) တွင် မိုးကြောင့် ဖြစ်ပွားသော မတော်တဆမှုများတွင် အသက် ၁၂ နှစ်အရွယ် ကလေး တစ်ဦးအပါအဝင် လူသုံးဦး သေဆုံးခဲ့သည်။
ကမ္ဘာ့နည်းပညာကုမ္ပဏီကြီးများ စုစည်းရာဖြစ်သော ဘန်ဂါလူရူမြို့တွင် လမ်းများရေလွှမ်းမိုးနေမှုကြောင့် ကုမ္ပဏီအများအပြားက ၎င်းတို့၏ ဝန်ထမ်းများအား အိမ်မှအလုပ်လုပ်ရန် ညွှန်ကြားထားသည်။ မြို့၏နေရာ အများအပြားတွင် ၁၀၀ မီလီမီတာ (၄ လက်မ) မိုးရေချိန်ရှိခဲ့ပြီး ၂၀၁၁ ခုနှစ်နောက်ပိုင်း အမြင့်ဆုံးစံချိန်တင်ခဲ့သည်။
ဒေသဆိုင်ရာမိုးလေဝသဌာန၏ ဒါရိုက်တာ CS Patil က သတင်းဌာနများအား ဤသည်မှာ ဘန်ဂါလူရူအတွက် ရှားပါးဖြစ်ရပ်ဖြစ်ကြောင်း ပြောကြားခဲ့သည်။ မြို့တော်၏ အဓိက အိုင်တီစင်္ကြံတစ်ခုတွင် ဆော့ဖ်ဝဲ ကုမ္ပဏီ i-Zed ၏ တံတိုင်းပြိုကျခဲ့ပြီး အသက် ၃၅ နှစ်အရွယ် အမျိုးသမီး ဝန်ထမ်းတစ်ဦး သေဆုံးခဲ့သည်။
သွားလာသူများ ဒူးအထိရေများဖြတ်သန်းနေရသည့် အခြေအနေများနှင့် ရေလျှံနေသောလမ်းများပေါ်တွင် ကားများရပ်နားထားသည့် ဗီဒီယိုများလည်း တွေ့ရှိရသည်။ မြို့၏အချို့နေရာများတွင် အိမ်များအတွင်းသို့ လည်း ရေဝင်ရောက်ခဲ့သည်။
မြို့တော်အာဏာပိုင်များက ရေလျှံနိုင်ခြေရှိသော နေရာ ၂၁၀ ကို ဖော်ထုတ် ပြီး အခြေအနေကို ထိန်းသိမ်းနိုင်ရန် ၂၄ နာရီ ဆောင်ရွက်နေကြောင်း ပြောကြားခဲ့သည်။ “ဘန်ဂါလူရူမြို့သူမြို့သားများ စိုးရိမ်စရာမလိုပါ” ဟု ကန်နာတာကပြည်နယ် ဒုတိယဝန်ကြီးချုပ် DK Shivakumar က သတင်းထောက်များအား ပြောကြားခဲ့သည်။
ကိုးကား- BBC
ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂
