အမေရိကန်သမ္မတ ဒေါ်နယ်ထရမ့်၏ အကောက်ခွန်နှုန်းတိုးမြှင့် သတ်မှတ်မည့်အစီအစဉ်များမှ ကင်းလွတ်ခွင့်ပြုရန် ဂျပန်နိုင်ငံခြားရေးဝန်ကြီး Iwaya Takeshi က တောင်းဆိုခဲ့ပြီး ဖေဖော်ဝါရီ ၁၅ ရက်တွင် ဂျာမနီနိုင်ငံ မြူးနစ်မြို့၌ အမေရိကန်နိုင်ငံခြားရေးဝန်ကြီး Marco Rubio နှင့် တွေ့ဆုံစဉ် ထိုသို့ တောင်းဆိုခဲ့ခြင်းဖြစ်သည်။
ဒေါ်နယ်ထရမ့်သည် ၎င်း၏ ဒုတိယအကြိမ်သမ္မတသက်တမ်း (၁) လ မပြည့်မီမှာပင် ကုန်သွယ်ရေးမူဝါဒများကို ပိုမိုတင်းကြပ်စွာ ကျင့်သုံးလျက်ရှိပြီး အဆိုပါ ကုန်သွယ်ရေးအစီအမံများကြောင့် ကမ္ဘာ့ကုန်သွယ်ရေးစနစ်ကို ပြင်းထန်စွာ ထိခိုက်စေနိုင်သည်။
ဂျာမနီနိုင်ငံ မြူးနစ်မြို့တွင် ကျင်းပလျက်ရှိသော မြူးနစ်လုံခြုံရေးညီလာခံတွင် ဆွေးနွေးချက်များအပေါ် ဂျာမနီ နိုင်ငံရေးသုတေသနပညာရှင် Alexander Rahr က အမေရိကန်နှင့် ဥရောပအကြား ဆက်ဆံရေးမှာ ပျက်စီးသွားနိုင်ဖွယ်ရှိနေကြောင်း သုံးသပ်လိုက်ပါသည်။
တရုတ်အာဏာပိုင်များက ယူကရိန်းပဋိပက္ခအဆုံးသတ်ရေး စေ့စပ်ညှိနှိုင်းဆွေးနွေးပွဲမှ မျှတသော သဘောတူညီချက်တစ်ခုရရှိရန် မျှော်လင့်ပြီး ရုရှား-ယူကရိန်း နှစ်နိုင်ငံငြိမ်းချမ်းရေးရရှိရန် ကြိုးပမ်းဆောင်ရွက်ရာတွင် ပါဝင်ကူညီပေးသွားမည်ဖြစ်ကြောင်း တရုတ်နိုင်ငံခြားရေးဝန်ကြီး Wang Yi က ယူကရိန်းနိုင်ငံခြားရေးဝန်ကြီး Andrey Sibiga နှင့် မြူးနစ်လုံခြုံရေးညီလာခံ၌ တွေ့ဆုံစဉ် ပြောကြားခဲ့ခြင်းဖြစ်သည်။