BRICS ညီလာခံကို လာမည့် ဇူလိုင် ၆ ရက်မှ ၇ ရက်အထိ ဘရာဇီးနိုင်ငံ ရီယိုဒီဂျနေးရိုမြို့တွင် ကျင်းပမည်ဖြစ်ကြောင်း BRICS အဖွဲ့၏ မီဒီယာဌာနက ဖေဖော်ဝါရီ ၁၆ ရက်တွင် ကြေညာလိုက်ပါသည်။

“၂၀၂၅ ခုနှစ်တွင် ကျင်းပမည့် BRICS အစည်းအဝေးအတွက် ရက်နှင့် နေရာကို အတည်ပြုပြီးဖြစ်ပါကြောင်း၊ လာမည့် ဇူလိုင် ၆ ရက်နှင့် ၇ ရက်တွင် ရီယိုဒီဂျနေးရိုမြို့၌ ကျင်းပပါမည်” ဟု မီဒီယာဌာနက ထုတ်ပြန် ကြေညာခဲ့သည်။

ဘရာဇီးနိုင်ငံသည် ယခုနှစ် ဇန်နဝါရီ ၁ ရက်မှစ၍ BRICS အဖွဲ့၏ အလှည့်ကျဥက္ကဋ္ဌအဖြစ် တာဝန်ယူထားပါသည်။

ဂျာမနီနိုင်ငံ၊ မြူးနစ်မြို့တွင် ပြုလုပ်လျက်ရှိသော မြူးနစ်လုံခြုံရေး ညီလာခံကျင်းပနေစဉ်အတွင်း ဆန္ဒပြမှုများ ပြုလုပ်နေကြပါသည်။ စစ်ပွဲများကို ငြိမ်းချမ်းစွာ အဆုံးသတ်ရေး တောင်းဆိုနေကြပြီး၊ Bavarian မြို့တွင် ကျင်းပနေသော ညီလာခံကို ဆန့်ကျင်နေကြပါသည်။ ဆန္ဒပြသူအများစုမှာ အနောက်နိုင်ငံများက ယူကရိန်းကို စစ်လက်နက်များ ထောက်ပံ့နေမှုကို ဆန့်ကျင်နေကြပါသည်။

ရုရှားဖက်ဒရေးရှင်းသည် အပြည်ပြည်ဆိုင်ရာပူးပေါင်းဆောင်ရွက်မှုအနေဖြင့် G7 အဖွဲ့သို့ ပြန်လည်ဝင်ရောက်တော့မည် မဟုတ်ကြောင်း၊ အတိတ်ကို ပြန်သွားရန် ဆန္ဒမရှိတော့ကြောင်း၊ ယခုအခါ အပြည်ပြည်ဆိုင်ရာပူးပေါင်းမှုအနေဖြင့် BRICS ၊ SCO နှင့် G20 တို့ကဲ့သို့ အဖွဲ့များကို ဦးစားပေးသွားမည်ဖြစ်ကြောင်း   ရုရှားဖက်ဒရေးရှင်း၏ ကနေဒါနိုင်ငံ သံအမတ်ကြီး Oleg Stepanov က ဖေဖော်ဝါရီ ၁၅ ရက်တွင် ထုတ်ဖော်ပြောကြားလိုက်ပါသည်။

ယူကရိန်းသမ္မတ ဇီလန်စကီးသည် မကြာမီကာလအတွင်း အာရပ်စော်ဘွား ပြည်ထောင်စု၊ ဆော်ဒီအာရေးဗီးယားနှင့် တူရကီနိုင်ငံများသို့ သွားရောက်မည်ဖြစ်ကြောင်း ကြေညာလိုက်ပါသည်။

အဆိုပါခရီးစဉ်အတွင်း ရုရှားနှင့် အမေရိကန် ကိုယ်စားလှယ်များနှင့် တွေ့ဆုံမည်မဟုတ်ကြောင်း၊ သွားရောက်မှုတွင် လူသားချင်းစာနာမှု အစီအစဉ်ဖြစ်သည့် အကျဉ်းသားများ လဲလှယ်မှုကိစ္စ ပါဝင်နေကြောင်း   ၎င်းက မြူးနစ်မြို့တွင် သတင်းထောက်များကို ပြောကြားခဲ့ပါသည်။