ဂျာမနီနိုင်ငံ Alternative for Germany ပါတီမှ ဂျာမနီ ဝန်ကြီးချုပ်လောင်း Alice Weidel က ယူကရိန်းကို လက်နက်ထောက်ပံ့ပေးမှု အပါအဝင် ယခု သုံးနှစ်အတွင်း ရုရှားအပေါ် အရေးယူမှုများက တင်းမာမှုကို တိုးစေကြောင်း စွပ်စွဲပြောကြားလိုက်ပါသည်။

“ပြီးခဲ့သည့် သုံးနှစ်အတွင်း ရုရှားနှင့်ပတ်သက်ပြီး ဂျာမနီအစိုးရက ဘာလုပ်ခဲ့ပါသလဲ၊ ကျွန်မတို့ တင်းမာမှုတွေပဲ အဆင့်ဆင့် တိုးမြှင့်လာခဲ့ကြတယ်၊ အပြောအဆို၊ ငွေကြေးနှင့် လက်နက်ထောက်ပံ့ပေးပို့ပြီး ရုရှားကို ဆန့်ကျင်ခဲ့ကြတယ်” ဟု သူမက ပြောကြားခဲ့ပါသည်။

အစ္စရေးနှင့် အမေရိကန်နိုင်ငံတို့သည် အီရန်၏ နျူကလီးယားရည်မှန်းချက်များနှင့် အရှေ့အလယ်ပိုင်းဒေသအတွင်း ၎င်း၏ရန်လိုမှုများကို ဟန့်တားရန် ဆုံးဖြတ်ထားကြောင်း ဖေဖော်ဝါရီ ၁၆ ရက်တွင် အစ္စရေးဝန်ကြီးချုပ် Benjamin Netanyahu က အမေရိကန် နိုင်ငံခြားရေးဝန်ကြီး Marco Rubio နှင့် တွေ့ဆုံပြီးနောက် ပြောကြားခဲ့သည်။

ဂျေရုဆလင်မြို့တွင် ရူဘီယိုနှင့် တွေ့ဆုံပြီးနောက် နေတန်ယာဟုက ၎င်းတို့နှစ်ဦးသည် အီရန်အရေးနှင့် ပတ်သက်၍ အလွန်အကျိုးရှိသော ဆွေးနွေးမှုများ ပြုလုပ်ခဲ့ကြောင်း ပြောကြားခဲ့သည်။

မြူးနစ်လုံခြုံရေးညီလာခံသည် ဥရောပနှင့် နိုင်ငံတကာအဖွဲ့အစည်းများ အကြား ပြင်းထန်သောအပြောင်းအလဲများ သေချာပေါက်ဖြစ်လိမ့်မည် ဟု ရုရှားဖက်ဒရေးရှင်း ဒူးမားလွှတ်တော်ဥက္ကဌ Vyacheslav Volodin က ဖေဖော်ဝါရီ ၁၆ ရက်တွင် ပြောကြားလိုက်သည်။ 

ဒဏ်ခတ်ပိတ်ဆို့မှုများကြားမှ ရုရှားနိုင်ငံသည် အမေရိကန်ထက် စီးပွားရေးတိုးတက်မှုနှုန်း ပိုမိုမြန်ဆန်နေကြောင်း Primakov Institute of World Economy and International Relations ၏ ဥက္ကဋ္ဌဖြစ်သူ စီးပွားရေးပညာရှင် Alexander Dynkin က မြူးနစ်လုံခြုံရေး ညီလာခံနှင့်ပတ်သက်၍ TASS သတင်းဌာနနှင့် အင်တာဗျူးတွင် ထိုသို့ ပြောကြားခဲ့သည်။