အမေရိကန်သမ္မတ ဒေါ်နယ်ထရမ့်က ကနေဒါနိုင်ငံသည် အမေရိကန် ပြည်ထောင်စု၏ ၅၁ ခုမြောက် ပြည်နယ်အဖြစ် ရှိနေသင့်ကြောင်း၊ အမေရိကန်အနေဖြင့် ကနေဒါအတွက် တစ်နှစ်လျှင် ဒေါ်လာ ၂၀၀ ဘီလီယံခန့် ဆုံးရှုံးနေရကြောင်း၊ အကယ်၍ ကနေဒါသည် အမေရိကန်၏ အစိတ်အပိုင်းပြည်နယ်တစ်ခုဖြစ်လာပါက ထိုသို့ ထောက်ပံ့ပေးရခြင်းမှာ မိမိအတွက် အဆင်ပြေမည်ဖြစ်ကြောင်း ဖေဖော်ဝါရီ ၉ ရက် (တနင်္ဂနွေနေ့) က FOX News နှင့် အင်တာဗျူးတွင် ပြောကြားထားပါသည်။

ဥရောပက လုံခြုံရေးအာမခံချက် ပေးမည်ဆိုပါက အမေရိကန် ပြုလုပ်မည့် မည်သည့် တရားဝင်ငြိမ်းချမ်းရေးလမ်းကြောင်း အတွက်မဆို အသင့်ရှိ ကြောင်း ယူကရိန်းသမ္မတ ဇီလန်စကီးက ဖေဖော်ဝါရီ ၉ ရက် (တနင်္ဂနွေနေ့) က ဗြိတိန်ရုပ်မြင်သံကြား ITV နှင့် အင်တာဗျူးတွင် ပြောကြားလိုက်သည်။ 

ကနေဒါနှင့် မက္ကဆီကို အပါအဝင် အခြားနိုင်ငံများမှ တင်သွင်းသည့် သံမဏိနှင့် အလူမီနီယံများကို အမေရိကန်ပြည်ထောင်စုက သွင်းခွန် ၂၅ ရာခိုင်နှုန်း စည်းကြပ်မည့်ကိစ္စအား ဖေဖော်ဝါရီ ၁၀ ရက်တွင် ထုတ်ပြန် ကြေညာသွားမည်ဖြစ်ကြောင်းနှင့် နောက်ထပ်သွင်းခွန်များကိုလည်း ထုတ်ပြန် သွားမည်ဖြစ်ကြောင်း ဖေဖော်ဝါရီ ၉ ရက်‌နေ့တွင် သမ္မတ ထရမ့်က ပြောကြားခဲ့ပါသည်။

အမေရိကန်အစိုးရ စွမ်းဆောင်ရည်မြှင့်တင်ရေးဌာန (DOGE) ၏ ခေါင်းဆောင်စီးပွားရေးလုပ်ငန်းရှင် Elon Musk က အမေရိကန် ဘဏ္ဍာရေး ဝန်ကြီးဌာန (US Department of the Treasury) သည် မည်သူမည်ဝါ အတိအကျ မသိရှိရသည့် လူပုဂ္ဂိုလ်များထံသို့ နှစ်စဉ် ၁၀၀ ဘီလီယံ ဒေါ်လာအား ပေးချေနေသည်ဟု ပြောကြားခဲ့သည်။