အစ္စရေးနှင့် ချမှတ်ခဲ့သည့် အပစ်အခတ်ရပ်စဲရေး သဘောတူညီချက်အရ ဖမ်းဆီးထိန်းသိမ်းထားသည့် ရုရှားနိုင်ငံသားတစ်ဦးကို မကြာမီပြန်လွှတ်ပေးမည်ဟု ဟားမက်အဖွဲ့၏ နိုင်ငံရေးရုံး ဒုတိယအကြီးအကဲ မူဆာအဘူမာဇွတ်က Sputnik သို့ပြောကြားသည်။

ဟားမက်အဖွဲ့သည်  ရုရှားနိုင်ငံသားတစ်ဦးဖြစ်သည့် အလက်ဇန္ဒား ထရူဖာနော့အား ရုရှားနိုင်ငံ၏ ပါလက်စတိုင်းအပေါ် ထားရှိသည့် ရပ်တည်ချက်သဘောထားကို တုံ့ပြန်သည့်အနေဖြင့်  မကြာမီပြန်လွှတ် ပေးမည်ဖြစ်ကြောင်း မူဆာအဘူမာဇွတ်က ပြောသည်။

အမေရိကန်သမ္မတ ဒေါ်နယ်ထရမ့်၏ အခွန်တိုးမြှင့်ကောက်ခံမည့် ကြေညာချက်ကြောင့် ဖေဖော်ဝါရီလ ၃ ရက်တွင် အာရှနှင့် ပင်လယ်ကွေ့ဒေသများရှိ  အစုရှယ်ယာဈေးကွက်များ ထိုးကျသွားခဲ့ကြောင်း သိရသည်။

သမ္မတထရမ့်က အမေရိကန်၏ အဓိကကုန်သွယ်ဖက်နိုင်ငံများအပေါ် အခွန်တိုးမြှင့်ကောက်ခံမည်ဟု  တရားဝင်ကြေညာခဲ့ပြီးနောက် ဂျပန်၊ ဩစတြေးလျ၊ တောင်ကိုရီးယား၊  ဟောင်ကောင်ရှိ အစုရှယ်ယာဈေးကွက်များ ထိုးကျသွားခြင်းဖြစ်သည်။

အမေရိကန်အနေဖြင့် ရုရှားနှင့်ယူကရိန်းတို့နှင့်တွေ့ဆုံရန် ဆက်သွယ်ဆွေးနွေးရန် စီစဉ်နေကြောင်း အမေရိကန် သမ္မတ ဒေါ်နယ်ထရမ့်က ဖေဖော်ဝါရီ ၃ ရက်တွင်ဝါရှင်တန်အနီးရှိ အန်ဒရီ အမေရိကန် လေတပ်အခြေစိုက် စခန်းသို့ ရောက်ရှိချိန်၌ ပြောကြားထားပါသည်။ 

ယခုရက်သတ္တပတ်တွင် အစ္စရေးကိစ္စ၊ ရုရှား ယူကရိန်း  ကိစ္စတို့နှင့်ပတ်သက်၍ သက်ဆိုင်ရာ အဖွဲ့အစည်းများကို  တွေ့ဆုံဆွေးနွေးနိုင်ရေးအတွက် လွန်စွာ အလုပ်ရှုပ်ရပါကြောင်း၊ ထိုကြိုးပမ်းမှုကြောင့် ရလဒ်ကောင်းများ ထွက်ပေါ်လာမည်ဟု မျှော်လင့်ထားကြောင်း ထရမ့်က ပြောကြားထားပါသည်။

အမေရိကန်သမ္မတ ဒေါ်နယ်ထရမ့်သည် မက္ကဆီကို သမ္မတ   Claudia Sheinbaum နှင့် ဆွေးနွေးပြီးနောက် ဖေဖော်ဝါရီ ၄ ရက် သန်းခေါင်ချိန်မှစ၍ အကျိုးသက် ရောက်မည့် မက္ကဆီကိုအပေါ် သတ်မှတ်ထားသည့် ၂၅% အခွန်ကို တစ်လကြာ ခေတ္တရပ်ဆိုင်းရန် သဘောတူညီခဲ့သည်။ 

အဆိုပါသဘောတူညီချက်အရ မက္ကဆီကိုသည် အမေရိကန် နယ်စပ်သို့ စစ်သား ၁၀,၀၀၀ ဦးကို ချထားမည်ဖြစ်ပြီး၊ မူးယစ်ဆေးဝါးဖြန့်ဖြူးမှုနှင့် တရားမဝင် ဝင်ရောက်မှုကို တားဆီးရန် ရည်ရွယ်သည်။