ယူကရိန်းနိုင်ငံဆိုင်ရာ အမေရိကန်သံအမတ်ကြီး Bridget Brink ကို ရာထူးမှ မိမိသဘောဆန္ဒအလျောက် နုတ်ထွက်ခွင့်ပြုလိုက်ကြောင်း နိုင်ငံခြားရေးဌာန ပြောရေးဆိုခွင့်ရှိသူ Tammy Bruce က သတင်းစာ ရှင်းလင်းပွဲတွင် ပြောကြားလိုက်ပါသည်။
တရုတ်သမ္မတရှီကျင့်ဖျင်သည် ဗီယက်နမ်၊ မလေးရှားနှင့် ကမ္ဘောဒီးယား နိုင်ငံသို့ ဧပြီ ၁၄ ရက်မှ ၁၈ ရက်အထိ နိုင်ငံတော်ခရီးစဉ် သွားရောက်မည် ဖြစ်ကြောင်း တရုတ်နိုင်ငံခြားရေးဝန်ကြီးဌာနက သတင်းထုတ်ပြန်ထားပါသည်။
ဗီယက်နမ်ကွန်မြူနစ်ပါတီ ဗဟိုကော်မတီ အထွေထွေအတွင်းရေးမှူး To Lam နှင့် ဗီယက်နမ်သမ္မတ Luong Cuong တို့၏ ဖိတ်ကြားချက်အရ ရှီကျင့်ဖျင်သည် ဧပြီလ ၁၄ ရက်မှ ၁၅ ရက်အထိ ဟနွိုင်းသို့ သွားရောက် မည်ဖြစ်ကြောင်း ဝန်ကြီးဌာန၏ တရားဝင်ဝက်ဘ်ဆိုက်တွင် ဖော်ပြ ထားသည်။
ဗြိတိန်နှင့် နော်ဝေးတို့သည် ယူကရိန်းအား စစ်ရေးအကူအညီအဖြစ် အမေရိကန်ဒေါ်လာ သန်း ၅၈၀ ခွဲဝေထောက်ပံ့ပေးမည်ဟု ရိုက်တာ သတင်းက ဖော်ပြထားသည်။
ထိုရန်ပုံငွေများမှာ ယူကရိန်းစစ်တပ်အတွက် ဒရုန်းရာချီ ထောက်ပံ့နိုင်ရန်၊ ယာဉ်နှင့်စက်ကိရိယာများ ပြုပြင်ထိန်းသိမ်းရန်၊ ရေဒါစနစ်များ၊ တင့်ကားဖျက်မိုင်းများနှင့် တန်ပြန်ဒရုန်းနည်းပညာတို့အတွက် လိုအပ်သည်များ ဝယ်ယူရန် အသုံးပြုမည်ဖြစ်ကြောင်း သိရပါသည်။
အမေရိကန်သမ္မတ၏ အထူးကိုယ်စားလှယ် Steve Witkoff နှင့် အီရန် အဆင့်မြင့်ကိုယ်စားလှယ်တို့သည် လာမည့် ဧပြီလ ၁၂ ရက်နေ့တွင် အိုမန် နိုင်ငံ၌ တွေ့ဆုံကြမည်ဖြစ်ရာ ထိုတွေ့ဆုံမှုမှာ ငြိမ်းချမ်းရေးဆီသို့ ဦးတည် လိမ့်မည်ဟု အမေရိကန်ပြည်ထောင်စုက မျှော်လင့်ထားကြောင်း အမေရိကန် နိုင်ငံခြားရေးဝန်ကြီး မာကိုရူဘီယို က အမေရိကန်သမ္မတဒေါ်နယ်ထရမ့်၏ အစိုးရအဖွဲ့အစည်းအဝေးတွင် ပြောကြားလိုက်ပါသည်။