အမေရိကန်သမ္မတ၏ အထူးကိုယ်စားလှယ် Steve Witkoff နှင့် အီရန် အဆင့်မြင့်ကိုယ်စားလှယ်တို့သည် လာမည့် ဧပြီလ ၁၂ ရက်နေ့တွင် အိုမန် နိုင်ငံ၌ တွေ့ဆုံကြမည်ဖြစ်ရာ ထိုတွေ့ဆုံမှုမှာ ငြိမ်းချမ်းရေးဆီသို့ ဦးတည် လိမ့်မည်ဟု အမေရိကန်ပြည်ထောင်စုက မျှော်လင့်ထားကြောင်း အမေရိကန် နိုင်ငံခြားရေးဝန်ကြီး မာကိုရူဘီယို က အမေရိကန်သမ္မတဒေါ်နယ်ထရမ့်၏ အစိုးရအဖွဲ့အစည်းအဝေးတွင် ပြောကြားလိုက်ပါသည်။
ဧပြီ ၁၀ ရက် (ကြာသပတေးနေ့)က အမေရိကန်ပြည်ထောင်စု၊ နယူးယောက် မြို့ရှိ Hudson မြစ်အတွင်း ရဟတ်ယာဉ်တစ်စင်း ပျက်ကျရာ လိုက်ပါ လာသူ ၆ ဦးစလုံး သေဆုံးခဲ့ကြောင်း နယူးယောက် မြို့တော်ဝန် အဲရစ် အဒမ်က အတည်ပြု ပြောကြားလိုက်ပါသည်။
မြို့တော်ဝန်ပြောကြားချက်အရ အဆိုပါလူခြောက်ဦးစလုံးကို ရေထဲမှ ဆယ်ယူနိုင်ခဲ့သော်လည်း တစ်ဦးမျှ အသက်ရှင်ကျန်ရစ်ခြင်း မရှိပေ။ ထို သေဆုံးသူများတွင် ရဟတ်ယာဉ်မောင်းနှင်သူအပါအဝင် အရွယ်ရောက်ပြီး ၃ ဦးနှင့် ကလေး ၃ ဦးတို့ ပါဝင်ကြောင်း သိရပြီး ၎င်းတို့မှာ စပိန်နိုင်ငံမှ ခရီးသွားမိသားစုများဖြစ်ကြောင်း သိရပါသည်။
ပြင်သစ်နှင့် ဗြိတိန်တို့က Odessa မြို့တွင် စစ်ရေးလုပ်ဆောင်ရန် စီစဉ် ဆောင်ရွက်နေကြောင်း ရုရှားနိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် Maria Zakharova က ဧပြီ ၉ ရက်နေ့တွင် ပြုလုပ်သော သတင်းစာ ရှင်းလင်းပွဲတွင်ပြောကြားလိုက်သည်။
ဧပြီ ၄ မှ ၅ ရက်အတွင်း ကီဗ်မြို့၌ ယူကရိန်း၊ ဗြိတိန် နှင့် ပြင်သစ် စစ်တပ် အရာရှိများသည် နိုင်ငံတကာငြိမ်းချမ်းရေးထိန်းသိမ်းရေးတပ်ဖွဲ့” ဟု ခေါ်သော စစ်ရေးစီမံချက်အတွက် တွေ့ဆုံဆွေးနွေးခဲ့ကြသည်ဟု ၄င်းက ပြောကြားထားပါသည်။
CIA ဒါရိုက်တာ John Ratcliffe က ဧပြီလ ၁၀ ရက်တွင် အာရပ်စော်ဘွား များပြည်ထောင်စု (UAE) ၌ အမေရိကန်-ရုရှား အကျဉ်းသား ဖလှယ်မှု တစ်ခုပြုလုပ်ခဲ့ကြောင်း ကြေညာခဲ့သည်။ ထိုအကျဉ်းသားဖလှယ်မှုနှင့် ပတ်သက်၍ မီဒီယာများ၏ မေးမြန်းမှုအပေါ် ကရင်မလင်ပြောခွင့်ရ ပုဂ္ဂိုလ် Dmitry Peskov က ယခုအချိန်မှာ မှတ်ချက်ပေးလိုခြင်း မရှိကြောင်း ဖြေကြားခဲ့သည်။
အဆိုပါအကျဉ်းသားလဲလှယ်မှုတွင် ရုရှားနိုင်ငံသား Artur Petrov နှင့် အမေရိကန်နိုင်ငံသား Ksenia Karelina တို့ကို ဖလှယ်ခဲ့ကြသည်။